2 Peturusu 2 - Ma Jou ai Demo-demo o Totobelohoka

O Peturusu wahitiari onangika ma titi ona yodoto-dotoko ko itiaiua

¹ De igoungu ma dodihiraino naga Ma Jou ai uru ma dodofanga abe to Una ai hingahu ma demo yatobadofanga o nyawaika. Masara nagali ma oraha gea o nyawa utuoli abe onangoo yomahingahu ato naga Ma Jou ai hingahu ma demo onangoka, masara ona gea tanu ka yoelu-eluku dika. De gea imaketero abe hoka ma oraha naa nginioka, angamoi ahao idadi abe o nyawa utu naga ti nginioo nia hidogoronaka de ona gea yotobadoto-dotoko o dodotoko abe ko itiaiua. Abe ona gea yomatohi-tohiki dika o dodotoko ihiboaino abe ko ma gou-goungua, de manga dodotoko gea ka idadi ihirusaka abe to ngone nanga ngongaku nanga hiningaka. Masara ona gea, ngaro to ngone nanga Baluhu idodutu wabanguoka, ma ona gea iwiolukoka Unangika, ho ona gea ko itedekanua de Ma Jou kiani wahibinaaha ma titi to ona ma hirete manga hiningaino.

² De abe nginioka marai naga nia ngoe ahao nimaaduru abe hoka to onangoli manga datoro duru itorou yanii-niiki, de genangino ma titi hiadono nanga dodotoko ma gou-goungu de o nyawa duru yongelo-ngelo enangika.

³ De abe ma titi ona yotobadoto-dotoko ko itiaiua, mangale ona gea duru yohafini o tiwika, ho ona gea ahao inirusi-rusi ngini ma titi manga dodotoko ma demoino la gea yomatiwi-tiwi dika nginioka. De gea manga demo ka yofeto-feto dika, de ko iwa ma titi genangino. Masara duru ma deka-dekanuku de Ma Jou waputuhokau abe ahao hokokia yamake manga hohowono, de manga bobinaaha gea ko wawohangua masara ka itigi moduku. Ho ngini ufa niahigihene onangika gea.

Ahao Ma Jou wahohowono onangika abe yotobadotoko ko itiaiua

⁴ De gea ka idadi duru hohioriki abe Ma Jou ahao wahohowono abe ona yotobadotoko ko itiaiua, angamoi abeika hokokia ma dodihiraino de Una wahohowono abe iwilawa-lawanika. Abe ngaro o momalaekata abe ma dodihiraino de ona yahowonoka Ma Jouika, ma Una ko wanoaikaua manga hohowono masara gea wahohowono o haara ma gogurutuku abe genangoka duru kohamofufutu. De genangoka yogoa-goana ma momalaekata gea la ufa ihupu ka hiadono ma hohowono ma baha ma oraha adonoka, de ma oraha gea ahao wohikokibinaaha enangika.

⁵ De ngaro o dunia ma nyawa abe duru ma deka-dekanuku yomanoa o dunia ma lokuoka abe ma oraha o Nuhi, ma onangoo manga hohowono ko wanoaikaua masara gea Ma Jou wahikokihohowono de o nguihi abe ona mata-mataika iwilawa-lawana. Masara nako o Nuhi una gea Ma Jou ai totiai watobahingahu-ngahu o nyawaika, ho una waniiki Ma Jou ai mauika. De o Nuhi de ona yatumidi gea abe ai tau ma goronaka, ka ona dika Ma Jou waduhunu o nguihino ho ko wahohowonua onangika.

⁶ De nagali o Sodomo de o Gomora ma kota, abe ena gea duru Ma Jou wahihohowono de o uku ho duru wahibinaahaka hiadono ma hou ka ma kafokahi ililiaroko. De ai hohowono gea idadioka o hitiari moi o nyawaika abe manga hiningaka ato iwilawana Ma Jouika, done onangoo yamake to Una ai hohowono.

⁷ Masara ma oraha genangoo de o Loti Ma Jou widuhunu to ona manga hidogoronaino angamoi una gea wototiai Ma Jou ai himangoka. Abe una ai hininga duru ihuhaholi ma titi ma nyawa ma kotaka gea abe ona duru ko yolegaikaua ma paretaika gea masara ona duru ka yanii-niiki dika manga wowango ma datoro ma dorouika.

⁸ De igoungu o Loti una o totiai ma nyawa, masara ka ihikaika o futu de o wange una wamake de woihene to ona gea manga datoro ma dorou angamoi una wogogere to ona manga hidogoronaka. Ho una ai hiningaka duru wamao hoka iwihaka-hakara ma titi manga datorino.

⁹ Ho nako ngone hongano-nganono ma ade-ade gea abe hokokia ma titi nanga Baluhu idodutu waduhunu o Nuhi de o Loti o hohowono ma goronaka de aino, ho gea itararonoka abe ngaro ma oraha naa ma ka wakunohi Una wonaduhunu abe ngone hingaku-ngakuoka ma oraha o kangela haohana. De naga moioli abe ka idadi hamake itararono to ona gea manga ade-adeino, de gea ma titi abe Ma Jou Unangoo ka wakunu wahiaturu o nyawa utu abe ko yototiaiua la ufa hiadono manga hohowono ko amakeua. Masara gea nako o hohowono ma wange adonoka de ahao kiani Una wahohowono onangika gea.

¹⁰ De igoungu abe o hohowono ma wangeoka de gea ahao Una wahohowono mata-mataika abe ko yototiaiua, masara hongoli ona abe ka ihikaika yanii-niiki manga badanga ma hafini ma dorou hiadono duru yomahipesekoka, de ona abe ka yongelo-ngelo Ma Jou ai kuahaika. De gea onangohi abe duru Ma Jou wahohowono onangika. De abe ona yotobadotoko o rerehene ma dodotoko nginioka, ona gea duru ko manga domoroini ma titi manga sadeino, abe ngaro ona ato yongelo Ma Jou ai momalaekatika abe naga de ma kuahaka, ma gea ona ka yodiai dika de ko yohawanua.

Abe ma titi ona o rerehene yotobadotoko manga hininga de manga datoro hokokia

¹¹ Masara nako Ma Jou ai malaekata, ona hokogenangua yodiai. Abe ngaro ka Ma Jou ai malaekatohi manga kuaha duru ma amoko, masara gea ai malaekata nako Ma Jou ai himangino yoboa, gea ko yongeloua onangika abe o rerehene yotobadotoko.

¹² Masara ona gea abe yotobadotoko ko itiaiua, ngaro ko kia-kiaua ihioriki abe ma titi Ma Jou ai malaekata abe naga de ma kuahaka, ma ona ka yongelo-ngelo dika onangika! De ona gea manga hiningaka duru yomaketero dika hoka o aewanioli ma hininga angamoi manga badanga ma hafini o kia dika naga de gea ka yaniiki. De nako ma aewani gea, ahao to ena ma baha o nyawa yataokino de yahohonenge. De gea ka imaketero dika de abe ona o rerehene yotobadotoko, angamoi to onangoo manga baha o bobinaahaika ahao yamake Ma Jouino, de gea ma titi abe ona yatobanii-niiki manga dodotoko o binaahaino.

¹³ De gea Ma Jou ahao duru wabalaha de o kangela onangika ma titi ona ma dodihirainohi de o nyawa utuika yahikangelaka. De ona duru yodosanangi dika abe ngaro o wange-wange ma ka yodiai o rame-rame la manga badanga ma hafini ka idadi yomahisosanangi genangino. De to ngone nanga romanga ona ihipeseke de inawewederoka abe ngone hingaku-ngakuoka. De ahi demo gea ma titi abe ngaro ma oraha ngini o doomu moi nimakokutuono niolomo de abe onangoo ininiiki, ma ngaro genangoka de ona ato inibudi la to onangoli manga hininga nianiiki.

¹⁴ De to ona gea manga lako ka ihikaika imalingiri o ngo-ngofekaika la ato yomaidu de de ona, de ona o futu de o wange yahowo-howono dika ho ko ihoa-hoanua. De ona yahiata-atara o nyawaika abe ona manga ngongaku ka ikelu-keluohi la ato yahirehene o howonika. De ona yomadotokoka abe ma titi manga horoodo o kiahonangika ho hiadono duru ilaku manga wowangoka manga horoodo gea. Ho mangale ma titi to ona gea manga wowango ma datoro ma dorou mata-mataika ho hiadono Ma Jou kiani wahohowono de o koboto onanguku.

¹⁵ De igoungu ona gea yorehenoka o totiai ma ngekomoka de aino angamoi ona ko yolegaikakaua enangika. Masara ona yaniikoli o Bileama ai hininga ma ngekomo, abe una ma dodihiraino to Beoro ai ngofaka. Abe una ma dodihiraino de wohafini o tiwika hiadono o dodaere moi wamakeoka. De o Bileama una tanu Ma Jou ai uru ma dodofanga womatengo. Masara naga ma moiuku idadi abe o Bileama iwihewa o nyawa la ato o dorou wodiai de gea bari ma dorouino waduhunu onangika. De gea o Bileama duru wohafini ai hewaika abe ahao wamake ai datoro ma dorou ma hofokino.

¹⁶ Masara ma hewa gea ko wamakeua ma gea o dodaere dika wamake ma titi una wahowonoka. De ai dodaere gea ko o nyawainoua iboa, masara gea o aewani ma uruoka de aino ihupu, abe gea o keledaiino. De gea igoungu o aewani o keledai ena duru ko akunua itemo-temo, masara to Bileama ai keledai ma dodihiraino gea ka itodokanino de iwitemo unangika de gea iwitemo de hoka o nyawa manga ilingi la iwitaere unangika. De iwitaere ibootino de ahao o Bileama ko wogila-gilauali ho ai hidee ma dorou abe duru ibodo gea ko idadiokauali. Masara abe nginioka abe yotobadotoko ko itiaiua, ona gea ka yaniikohi to Bileama ai hininga ma dorou.

¹⁷ De ona abe nginioka gea manga demo ka parahaja dika, angamoi ngaro hokokia dika yotemo masara ma bahauku de manga demo gea ko ihofokua. Ho gea ngohi tahiketero tato ona gea yomaketero dika hoka o jojobuubu abe ko inahidoakua o akere. Eko ka idadi tahiketero ona abe hoka o lobi ma birini ho ma rato ihikabarihi ho hiadono o awana ko inaadonua ngoneino. Hokogea ngohi tahiketero de ona yotobadotoko abe manga demo ka parahaja dika. Ho ona gea mangale ma titi manga demo ma homoa ho ahao manga hohowono amake o fufutu ma ngioka, abe ma ngi gea Ma Jou wohidiaioka de duru kohamofufutu genangoka.

¹⁸ De naga o nyawa abe ahao yomulaenge yomatingaka o wowango ma dorouoka de aino ma totiai ma ngekomino. Masara gea de ahao ona yotobadotoko ko itiaiua, ona gea yahiata-atara onangika ma titi manga demo-demoino abe duru yomagorakiye, masara manga demo gea tanu duru ma homoa dika. De manga sade ma demoino gea de yahigaro onangika ato bari ka idadiohi yaniiki dika manga badanga ma hafini ma dorouika, angamoi ona ato bari gea ko o howonua.

¹⁹ De gea yadotoko onangika ato, “De ngone naa hingakuoka Unangika, ho ngaro ibootohi haniiki o hiaturu de o pareta de o hitiari ngoneino. Ho gea o kia dika hato hodiai, gea ka idadi hodiai dika. Angamoi ngoneoka duru ko iwa o pareta o kia dika abe inahipareta.” Hokogea manga higaro ma demo abe yadotoko onangika abe ahao yomulaenge yomatingaka manga wowango ma dorouino. De ngaro hokogea manga sade ma demo abe yomahingahu ato moioo de ko iwa abe yahipareta onangika, masara abeika ona gea tanu yodadioka o gogilaongo abe manga hininga ma dorouika. Abe imaketero hoka o gilaongo kiani yahigihene manga dutuika, hokogenangoo ona naa kiani naga manga hingounu manga hininga ma dorouika angamoi ena gea idadioka to ona manga dutu. De manga hininga ma dorou ena gea abe yahibinaaha onangika. Angamoi manga hiningaka ma dorou gea yahikalaka ho hiadono yahipareta onangika. De gea duru itaana abe o demo ma dulu itemo ato, “Abe o kia dika naga inahikalaka, de enangika gea ngone hodadioka to ena ma gilaongo ho ena dika inahipareta.” Hokogea itemo o demo ma dulu, de hokogea idadi onangika abe yotobadotoko ko itiaiua. Angamoi ngaro yomahingahu ato duru ko iwa abe yahipareta onangika, masara abe igoungu gea to ona ma hirete manga hininga ma dorou yahiparetaka.

²⁰ De gea igoungu ma dihiraino ona yomulaenge yomatingaka o dunia naa ma pese-pesekoka de aino, de gea ma titi abe ona ihioriki abe nako o Yesusu Kristusu Una gea nanga Baluhu idodutu de nanga Duduhunu. Masara gea ipahaino de ahao yogilio de yaniikoli o dunia ma pese-pesekika hiadono ena gea yadehoro de yahikala onangika ho ena gea dika yanii-niiki. Ho nako ona ma dihiraino manga hininga abe ko iwihiorikuahi nanga Baluhika de abe manga hininga ma oraha naa naga, masara ka ma oraha nenangohi de duru manga hininga itorou.

²¹ Abe tanu koaho ngaro ufa dika de ona gea ma dihiraino de ihioriki o totiai ma ngekomo. Masara ma oraha naa hadongoo de ihiorikoka masara ona ka yorehene dika ma ngekomoka de aino angamoi ko yoigokauali yaniiki Ma Jou ai huhuloko ma demo ma debi-debini. Abe ai huhuloko gea ma dihiraino de ona yamakeoka nanga gogianongoruino.

²² Ho to ona manga hininga gea duru imakiniiki de o demo ma dulu hinooto naa abe ma demo duru igou-goungu. De gea moi itemo ato, “O kaho iwunangoka masara ahao yogilioli to ena ma ngunangino la ma moioli yaolomo.” De naa moioli o demo ma dulu itemo ato, “O ode abe ena aohikoka masara ahao yogilio to ena ma homuika la genangoka imahipesekoli.” Hokogea o demo ma dulu itemo, de hokogenangoo abe ona yotobadotoko ko itiaiua.