2 Korintusu 9 - Ma Jou ai Demo-demo o Totobelohoka

O Dora ma hidoaka ma hitararono

¹ De ahi higaro ma demo gea nginika ma titi o dora ma hidoaka niatoomu, tanu koaho ngaro ufa dika totulihi nginika.

² Angamoi ngohi tohiorikoka ti ngini nia hininga ma magawe abe niato niaduhunu nanga gogianongoru o Yerusaleeme ma kotaka. De nia hininga gea tahingahuoka nanga gogianongoruika o Makedonia ma tonakoka. De ngohi toade-ade onangika ma titi ngini o Akaya ma tonakoka o taongo naa ipopaha de ngini nimahidiaioka la niaduhunu nanga gogianongoruika. De ona o Makedonia ma nyawa nenangoka ka de yoihene ma titi ti ngini nia magawe de ahao genangino yahiwangoro ona manga ngoe la ato onangoo ka idadi yaduhunu nanga gogianongoruika. Ho mangale ma titi ti ngini nia magawe nagau la niaduhunu onangika, marai kangano ngaro ufa dika de ahi demo gea tohitulihi nginika.

³ Ho naa ngohi tato irahai tahidingoto nanga gogianongoru yaruange gea nginika la ka de yolioino ngohino de duru tohioriki abe ngini niagou-goungu nimahidiaioka la niduhunu. Angamoi done ko nimahidiaiuahi de ahi demoino idadi o ngeluku dika abe o gareja ma dodoomuika tahingahuoka tato ngini nimahidiaioka.

⁴ De gea done ngohi de o Makedonia ma nyawa imimuruono naga imimaleke ma titi o dora ma hidoaka gea ngini ko nimahidiaiuahi. Angamoi nako hoka ahao ma oraha ngohi toboa tinitutumu de bote naga ihiniiki o Makedonia ma nyawa yamuruono naga. Ho ahao ma oraha minitutumu de nako miamake abe ko iwahi nia hidiai, de gea ngomi ahao duru imimaleke ma titi miaeluku onangika. De hongoli ngini genangoka abe nginioo ahao duru inimaleke. Angamoi ngohi ma oraha naa duru tonganono abe ngini nimahidiaioka la niaduhunu nanga gogianongoruika.

⁵ Ho ngohi tato koaho irahai ona yaruange tatihira tahidingoto nginika la inihigaro ka hiadono niabooto nia hiaturu ma titi nia dora ma hidoaka gea abe ma dihirainohi de niahibehehongoka niato ahao nidiai. Abe nako hoka ngini ko nitoomuahi de gea ngohi toboaka nginika de ahao niatoomu nia hidoaka, de gea ahao marai utu yataoko ihowono done ato ngohi tiniribuutu la nihidoaka. De ngohi toigo la nia dora ma hidoaka gea idadi nia hininga ma rorahaiino abe iboa ko o ribuutuinoua.

⁶ De naa tohiketero o dora ma hidoaka de o gihiihi abe womatengo wotobaredi wodatomo. Abe nako wodatomo de o gihiihi muruono naga dika, de gea ahao o gugutuku ma oraha adonoka de ma hasili enangoo ka muruono naga dika wamake. Masara nako wotobaredi gea wodatomo de o gihiihi duru ilamoko, de gea ma hasili enangoo ahao duru ilamoko abe wamake genangino. De hokogenangoo de nanga dora ma hidoaka o nyawaika, angamoi nako ma hohutulu dika hahidoaka, ahao nanga hasili enangoo ko ilamokua hamake.

⁷ Ho ngini genangoka kiani nimaputuhu homoi-homoi nia hiningaka abe hokokia ma amoko ka idadi niatingaka la niahidoaka nia gogianongoruika. De iti ufa nihidoaka o hininga ma huhaino eko o ribuutuino, angamoi Ma Jou duru wasanangi o nyawaika abe ihidoaka manga hininga ma rorahaiino dika.

⁸ De Ma Jou Una naga de ai kuahaka la winihidailako ti ngini nia wowango ma perelu mata-mataika la gea ahao duru iniwedono nginika. De ahao nia boloiino gea de ngini ka idadi niahikokodoku o nyawaika la gea nia datoro ma rorahai enangoo naga de ma boloioka.

⁹ De gea ahao idadi nginioka abe imaketero hoka ma dihiraino ihitulihukuoka Ma Jou ai Demo-demoka. Abe itemo ato, “O nyawa abe iwinii-niiki Ma Jouika, ona gea manga hidailakoino de yahikodoku o huha ma nyawaika, de to ona manga datoro ma rorahai gea duru ko ihihangua de ko awohangua ka hiado-adonika.” Hokogea itemo Ma Jou ai Demo-demoka, de hokogenangoo Una wodiai ti ngini nia wowangoka, abe Una ka idadi winihidailako nginika la nginioli ka niakunu niaduhunu utuika.

¹⁰ De naa moi tinileha nginika. Abe nako wotobaredi abe ai gihiihi wodatomuku de genangino ahao idadi o nyawa manga inomo, gea ma gihiihi o kiaka de aino iboa? De gea iboa Ma Jouoka dika de aino wonahidoaka. De Unangoo abe wonahidoaka o gihiihi de wohiwangoiye de wohilomuku hiadono idadi o inomo, Una gea abe winihidailako nginika. Ho imaketero abe hoka Ma Jou ka idadi wohilamoko ma gihiihi hiadono idadi iwoe la winihidailako nia perelu, hokogenangoo Una ka idadi wohilamoko ti ngini nia datoro ma rorahai gea. Abe ma titi ti ngini nia dora ma hidoaka abe niato niahidoaka o nyawaika, enangoo Una ka idadi wohilamoko hiadono ma hasili duru kohaamoko.

¹¹ De Ma Jou ahao Una winihidogo nginika la ahao nginioli ka idadi niahikokodoku to Una ai hidailako o nyawa yowoe-woeika. Abe ti ngini nia dora ma hidoaka ngomi ahao mitotaka o nyawaika de ona gea ka de yamake de duru yotarimakase Ma Jouika.

¹² Ho gea ti ngini nia hidoakino ahao ihihofoko ma utumu hinooto. Abe moi, nanga gogianongoru o Yesusoka abe yogogere o Yerusaleeme ma kotaka, to ona manga perelu ngini niahingodumu. De moioli, ahao ona duru yotarimakase Ma Jouika manga hininga ma sanangioka de aino, de enangoo ma titi nia hidoakino.

¹³ Ho gea imaketero hoka ngini ma hirete nihiboa o higiriiri Ma Jouika, angamoi nia hidoakino gea de nanga gogianongoru ahao iwihigiriiri Unangika. De ona iwihigiriiri angamoi ona ahao yamake ti ngini nia hingounu naga duru ilamoko o Yesusu Kristusu ai Abari ma Rorahaiika. De gea ma titi nia hingounu hiadono ti ngini nia hidailako niahikodoku nia gogianongoru o Yerusaleemika. De ngaro abe ma oraha niaduhunu o nyawa utuikaoo, ma enangoo ihititi nia hingounino.

¹⁴ De nia gogianongoru o Yerusaleemoka ahao to ona manga hininga ma dora duru ma amoko itagi nginika. Abe ona ahao ininiata Unangika ma titi ngini, angamoi Ma Jou winipake ngini la wahiowa onangika. Abe Una wohira winihidailako nginika de ahao ipahaino de nginioli niadofanga nia gogianongoruika gea la manga perelu niahingodumu. Ho duru igoungu abe manga hininga ma dora nginika gea ihititi Ma Jou ai hidoakoka abe ma dihiraino de winihidoaka nginika.

¹⁵ De igoungu ngone naa kiani duru hotarimakase Ma Jouika ma titi ai hidoaka ma owa kohaamoko abe wonahidoakoka ngoneino. Abe ma titi kiani duru hotarimakase Unangika ma titi ai Ngofaka ka womatengo dika wonahidoaka ngoneino. Masara tanu nanga tarimakase ma demo ko haboaikaua genangika angamoi duru ihohailoaholi ai hidoaka gea.