2 Korintusu 7 - Ma Jou ai Demo-demo o Totobelohoka

¹ De ahi gogianongoru abe ngomi duru minidora nginika, gea igoungu abe Ma Jou o Baba wonahibehehongo wato wonahidadi to Una ai ngofa-ngofaka. Ho mangale ma titi ai behehongo duru ma rorahai gea ho koaho ngone homahitebini nanga wowangoka. Abe ngaro nanga badanga eko ngaro nanga hininga, masara gea mata-mata homahitebini la moioo de ko iwaka ma peseke ngoneoka. De gea kiani howango hokokia la duru hotebini Ma Jou ai himangoka, de ngone hoigo hotebini ma titi nanga modongo de ma horomatioka Unangika.

O Paulusu duru wogarago ma titi ai hurata ihira-hira ma hasili ma rahai

² De ngini nihioriki abe ngomi naa duru ko ma moiua miahowono o nyawaika, de duru ko iwa o nyawa miahirehene o howonika, de ko ma iwa abe o nyawa miabudi. Ho naa ngomi migahoko ma moioli nginika la ngini niodafongo to ngomi mia demo nia hiningaka, angamoi ko iwa mia howono nginika.

³ De ahi demo gea ko ma titiua tinitaere, masara tinihingahu dika abe ngini ka ihikaika naga to ngomi mia hiningaka. De mia hininga gea nginika ka imaketero dika hoka kangano tinihingahuoka. Abe ngaro ma oraha naa abe nagahi mia wowango o duniaka de ngaro ahao ma oraha mihonengoka, masara ngini ka ihikaika miningano-nganono.

⁴ De ngohi duru tohioriki de tonganono abe ti ngini nia ngongaku iputurungu, ho hiadono ahi hiningaka de duru tinihidogarago nginika. De ngohi ka de tofikiri ma titi ngini de ihihiputurungu ahi ngongakuoka. De ngaro ngomioka naga ma kangela ma ngoe miaohana, masara ma titi ngini ho hiadono duru mia garago ka enangohi ilamoko.

⁵ De igoungu ngaro ngomi duru o kangela ma dodubuho ma goronaka masara ngini gea ka idadi nimihiputurungu de nimihigarago. Abeika toade-ade abe hokokia ngini nimihigarago ngaro homakitingakokahi ma gurutika. Abe kangano tinihingahuoka ma titi nengokadauino ma oraha mimahiadono naa o Makedonia ma tonakino de nenangoka o kangela irupa-rupa miaohana hiadono mia badanga duru ko iwa ma hiaini. De gea naga o liliara ngomi de o nyawa utuika, de nagali doka mia hiningaka mia hawana angamoi ko mihiorikua hokokia ahao idadi mia gogianongoruika.

⁶ Masara Ma Jou Una ka ihikaika wahiputurungu o nyawaika abe manga hininga ihuha. De hokogenangoli idadi ngomino, angamoi Ma Jou duru womihiputurungu abe ma titi nanga gianongoruino abe ma oraha o Titusu woboa womitutumu.

⁷ De gea ka o Titusu ai boaua dika abe imihiputurungu mia hiningaka, masara ti nginioo nia abari abe o Titusu wao-ao de womihingahu ngomino, de enangoo duru imihiputurungu ngomino. Abe una womihingahu wato ngini o Korintusoka niwihiputurungu una ai ngongakuika. De nagali womihingahu ngomino abe ngini duru nioigo la ngohi toboa tinitutumu o Korintusika, de abe ma titi ngini genangoka nimahilooa ngohino ma titi nia datoro gea abe ko itaanua. De nagali womihingahu abe ti ngini nia hininga duru itagi ngohino. De ka de toihene ti ngini nia abari gea o Titusino de utuohi ilamoko ahi garago ahi hiningaka.

⁸ De ma oraha naa to ngohi ahi hininga ma huha ko iwaka abe ma titi ma dihiraino ahi hurata gea abe tohidingoto nginika. De igoungu nengokadau naga ahi hininga ma huha ma hohutulu angamoi tohioriki abe ahi huratino gea de tinihitubuho nia hiningaka.

⁹ Masara naa ngohi duru tosanangi abe ma dihiraino de tinihurata hokogea, de ko ma titiua tosanangi abe nia hininga ma dubuho. Hokogenangua, masara ngohi tosanangi angamoi nia hininga ma dubuhoino de ihihofoko o toduba nia hiningaka ka hiadono nia hininga niaturuuruoka. De nia todubaino gea abe Ma Jou wapake nia wowangoka la nia howono nianoaka. Ho mia hurata ma demoino gea de ko inihirehenua o howonika masara ihihofoko ma rorahai ti ngini nia wowangoka.

¹⁰ De gea igoungu naga o hininga ma huha o fara moi abe Ma Jou ka idadi wapake nanga hiningaka la gea ka idadi ihihofoko o toduba nanga hiningaka. De nanga todubaino gea hiadono hanoa nanga howono de hiniikoli Ma Jouika. De gea ahao nanga gogao ma rorahai ilioli Unangika, ho ngomi ka idadi duru misanangi ma titi o hininga ma toduba gea angamoi ihihofoko ma rorahai o nyawa manga wowangoka. Masara nako o hininga ma huha abe iboa ka o duniaka de aino, gea ko idadiua yaduhunu o nyawa manga howonino, ho o duniaka ma hininga ma huha ihihofoko ka o hone-honenge dika.

¹¹ De abeika nimafikirohi abe hokokia ma amoko ti ngini nia utumu niamakeoka ma titi nia hininga ma huhaino gea abe Ma Jou ka idadi wapake nia hiningaka. Abe nengokadau ahi hurata ngini niamake de idadioka o hininga ma huha nginioka. De nia hininga ma huha gea ihihofoko o magawe nginioka la duru nioigo niaurusu ma howono gea nia hidogoronaka. De gea niaurusu angamoi duru nioigo la ma howono gea ko iwaka nginioka. De ngini ko nianiikua womatengo gea nginioka abe wahowo-howonoka, masara nianiiki ka ma totiaiika dika. De hongoli niangamo ma howonika gea hiadono niaemono enangika. De ngini nia hiningaka niamao abe ma howono gea duru itubuho hiadono nia hawana ipuda de niato done o hohowono inihidotadaene nginika. De ngini duru inimagawe abe ngini ma hirete niwidotoko una wahowo-howonika ti ngini nia hidogoronaka la ufa ma howono gea igila-gila done imahora o nyawa utuika. De gea nia datorino mata-mata de duru nimahitaana abe ti ngini nia hiningaka de o totiai dika nianiiki ka hiadono ma howono gea nia hidogoronaka ibootoka. Ho abeika nia hininga ma huhaino gea de duru inihiutumu nginika!

¹² De ma oraha naa duru itararonoka abe ma titi o kia naga ahi hiningaka de hiadono nengokadau ahi hurata tohidingoto nginika. Abe tanu ko ma titiua abe una wahowo-howono dika de ko ma titiua o nyawa gea abe wahowono onangika. Hokogenangua, masara tanu tinihurata la ka idadi ngohi tohipuda nia hininga ma magawe abe inimagawe niminiiki ngomi naa. Abe gea tinihurata la Ma Jou ai himangoka de ngini ka idadi nimahioriki ma titi nia hininga ma magawe de nia hininga ma dora abe itagi ngomino naa.

¹³ De nia hininga gea ngomino duru imihiputurungu to ngomi mia hiningaka. De ngini genangoka ka ngominoua dika abe nimihigaro mia hiningaka. Angamoi nanga gianongoru o Titusu, to unangoo ai hininga duru niwihigaro abe ma oraha woboa winitutumu nginika de duru niwidafongo de nia hininga ma rorahaiino. De ma titi niwidafongo gea hiadono to una ai hininga ka idadi iriidi. De ahao ma oraha o Titusu wolio ngomino de ka de ngomi miamake to una ai hininga ma sanangi gea de ngomioo ka utuohi idogo to ngomi mia garago mia hiningaka.

¹⁴ De ma dihiraino abe ma oraha o Titusu ko winitutumuahi de ngohi de o Titusu mimakoketemo de ngohi ma oraha gea de tinihigiriiri unangika abe ma titi ti ngini nia ngongaku ma wowangoka. De abeika ahi demoino de ko tielukua o Titusika, angamoi ipahaino de una ma hirete winimake abe nia hininga ma rorahai. Ho ahi demo gea unangika ma titi ngini de gea duru tagoungu, abe imaketero hoka ma dihirainohi de to ngomi mia demo mata-mata ma gou-goungu dika minihingahu nginika.

¹⁵ De nako ma dihiraino de ma oraha naa, ma oraha nenangohi de o Titusu ai hininga ma dora itagi ilamoko nginika, angamoi una ka wohiningahi abe hokokia niwidafongo una de nia horomati ma amoko. De una wohiningaoo abe ma titi ngini niwihigihene ai demoika.

¹⁶ Ho ngohi ma oraha naa de duru tinisanangi nginika angamoi duru tohioriki de tonganono abe nia hiningaka de duru nioigo la nianiiki ma rorahaiika dika.