2 Korintusu 5 - Ma Jou ai Demo-demo o Totobelohoka

O Paulusu wahingahu abe ma titi ahao ngone hamake nanga badanga ma hungi

¹ De hokonaa ma titi hiadono ngomi mia hininga ma lako itagi enangika abe ahao hamake o Horogaka, angamoi to ngone nanga badanga naa ko itongohonua masara ika-ika de ahao ihonenge. Abe nanga badanga naa ka idadi hohiketero de o hijai-jai ma tau abe o duniakahi dika ngone hapake. De hohioriki abe ma oraha to ngone nanga hijai-jai ma tau naa ibinaahaka, gea ahao o Horogaka de Ma Jou wonahidoaka ngone homoi-homoiino nanga tau moioli abe itongohono ka hiado-adonika ho ko ihonengua. De abe tohiromanga nanga tau gea nanga badanga ma hungi, gea ko o nyawa biaha manga giamokaua de aino idadi, masara Ma Jou Una ma hirete dika wohidadi.

² De igoungu ngone ka hongano-nganono nanga badanga ma hungi gea, angamoi ma oraha naa de ka hamakeohi o kangela nanga badangoka ho hamao inaboleoka de ka idadi hokururihi ma titi hamao nanga kangela. De gea ma titi hiadono ngone duru hoigo de hongano-nganono abe ahao o Horogaka de Ma Jou wonahinoauku de nanga badanga ma hungi abe gea hoka nanga tau ma hungi hamake.

³ De gea duru hohioriki abe ma oraha gea nanga jiwa ko imatawangeikaua angamoi nanga badanga ma hungi naga.

⁴ Ho igoungu abe ngone hokururihi ma titi nanga hijai-jai ma badanga naga de ma kurangoka. Masara ko ma titiua la ngone hoigo hohonenge de hanoaka nanga badanga naa la gea nanga jiwa imatawangeika dika. Masara abe ngone duru hoigo, gea hoigo la wonahinoauku de o Horogaka ma badanga abe duru irahaiholi. Angamoi ma oraha gea de ahao nanga badanga abe ka idadi ihonenge gea ipahaka, de aturuuruoka de ma hungioli gea abe itobawango ka hiado-adonika. De gea ma titi hiadono ngomi mia hininga ko itoakua masara miongano-nganono enangika abe ahao hamake o Horogaka.

⁵ De gea Ma Jou Una ma hirete dika abe wonahideeoka la wato ahao nanga badanga ma hungi hamake de gea nanga wowango ko iwa ma baha. De ma titi gea ka idadi ngone duru hongaku abe ahao kiani idadi. De ka idadi duru hongaku abe ahao nanga wowango ma hungi hamake angamoi Una wonahidoakoka Ma Jou o Womaha ngoneino. Ho Ma Jou o Womaha Una gea wodadioka nanga hingaku ma dodunguu. Abe mangale ma titi Ma Jou o Womaha gea naga ngoneoka ho ka idadi hohioriki de hongaku abe ahao nanga badanga ma hungi gea wonahidoaka ngoneino. De nanga badanga ma hungi gea ahao itongohono ka hiado-adonika.

^6-7 De ngomi naa duru mihioriki abe ahao ma rorahai miamake Ma Jouino, ho ngaro o kangela o kia dika naga miaohana, masara ngomi ka ihikaika mimatongohono de mia domoroini ko ihihangua. De gea ka idadi mihioriki angamoi ngomi duru mingaku abe Ma Jou watobagou-goungu ai demo mata-mataika. Ho ka idadi mitemo abe mia ngongaku Unangika imihihira-hira to ngomi mia wowangoka. Masara gea abe ka idadi miamake de mia lako, ena gea ko miolegaikaua la imihihira-hira. De mangale ma titi mia ngongaku gea hiadono ngomi mihiorikoo abe ahao migogere ka hiado-adonika de nanga Baluhu idodutuoka ai ngi o Horogaka. Ho ngaro ma oraha naa de ko mihiorikua hokokia ma dekanohi abe ka mimanoahi mia hijai-jai ma badangoka naa, masara ka idadi duru mihioriki de mionganono abe ahao dokengika de migogere Unangoka.

⁸ Ho ngomi naa ngaro o kia dika idadi mia wowangoka masara duru mitomoroini. De ngaro hiadono ngomi mihonenge masara ka misanangi dika. Angamoi ngomi miato koaho mianoaka mia hijai-jai ma badanga naa la miloiki de mimahiadono mia ngiika abe genangoka ko mimaturuuruokaua mia ngi, abe gea miloiki nanga Baluhu idodutu ai ngiika. De ka enangohi abe duru imihisanangi.

⁹ Ho ngomi naa duru ka ihikaika mia hininga ma dumutu la miato wiwihisanangi Unangika dika. Abe ngaro ngomi nagahi mia badangokahi naa masara duru mioigo la wiwihisanangi. De ngaro mianoaka mia badanga de ngomi naga Unangoka, genangokaoo ma duru mioigo la wiwihisanangi.

¹⁰ Angamoi ngone homoi-homoi ahao kiani homakokiokoino o Yesusu Kristusu ai himangoka abe ma oraha wonatailako nanga datoro homoi-homoi abe nanga badangokahi hodiaioka. De ma oraha gea wonahibalaha ngoneino de ma rorahai ma titi nanga datoro ma rorahai abe hodiaioka. Masara abe nanga datoro ma dorou abe ngone hodiaioka, de gea ahao wonahibalaha de ma dorou ngoneino. De gea ma titi hiadono ngomi ka ihikaika mia hininga ma dumutu la miato wiwihisanangi Unangika dika.

O Paulusu womahingahu ma titi ai tagongo de ai hingahu ma demo o nyawaika

¹¹ De ahi gogianongoru, ngomi duru mihioriki abe Ma Jou ahao wonatailako ngone homoi-homoi ho ngomi naga mia hawana de ma horomatioka Unangika ma titi ai hitailako gea. De gea ma titi hiadono ngomi naa duru mioigo la wiwihisanangi Unangika. De naga moioli abe ihititi mia hawanoka gea, abe ngomi duru miahigaro o nyawaika la miato ona iwinii-niiki Unangika. Angamoi nako ona iwiniiki itiai Unangika, gea ahao ma oraha watailako nanga Baluhu idodutu de wasanangi onangika. De Ma Jou Una duru womihioriki itararono abe to ngomi naa mia hininga ko iwa ma dumutu o dorouika, ho ngomi mionganono abe nginioo ka idadi niataoko itiai ma titi to ngomi mia hininga ma rorahai.

¹² De mia demoino gea ko ma titiua la mimahigiriiri ngomi ma hirete. Hokogenangua, masara ngomi mioigo la ngini nia hiningaka de ka idadi nimihidogarago ngomino angamoi mia hininga ma dumutu ma rorahai dika. Angamoi igoungu naga o nyawa utu nginioka abe yahigiriiri o nyawaika ma titi abe bari to ona manga tagongo eko manga hiakunu duru ikurutiye o nyawa manga himangoka. Masara ona ko yolegaikaua abe o nyawa gea manga hininga ma dolaika, abe nako imakiniiki de Ma Jou ai hininga eko koua. De ona gea abe imilega ngomino de ato ngomi naa ko kia-kiaua angamoi ona ko igou-goungua ihioriki to ngomi mia hininga ma dola. Ho ngomi mioigo la ngini nihioriki igou-goungu to ngomi mia hininga la ufa hiadono ona inihirehene hiadono ko nianiikokaua to ngomi mia dodotoko.

¹³ Angamoi igoungu ona utu imingelo ngomino ato imitogohanga. De ngaro o nyawa imilega mia wowango de ato ngomi naa imitogohanga masara gea mia hiningaka ko kia-kiaua, angamoi ngomi mihioriki abe mia tagongo miao la genangino de mihiboa o higiriiri Ma Jouika. De ngaro o nyawa utu imietongo ato ko imitogohangua, masara genangoo ngomi miato ko kia-kiaua mia hiningaka. Abe ngomi miato iti ngini ka idadi niamake ma utumu mia wowangoino de mia dodotoko ma demoino.

¹⁴ De to ngomi mia hiningaka naa de o Yesusu ai dora ka ihikaika imihigaro la mimaaduru hoka to Unangoli ai hininga. Ho ngaro o kia dika ngomi midiai mia wowangoka naa, masara gea mia datoro mata-mata ihititi o Yesusu Kristusu ai doraka de aino. De gea ngomi mihioriki abe Una wohonenge la ka idadi ngone mata-mata wonaturuuru. De mangale ma titi Una wonaturuuru ngone mata-mata, ho genangino de ka idadi hohioriki abe ngone mata-mata imaketero hoka hohonengoka abe ma titi nanga wowango ihira-hiraika. De gea idadi abe ma oraha Una wohonenge o gotaka.

¹⁵ De gea ma titi o kia hiadono Una wohonenge? Gea wohonenge la wato ngone abe naga de nanga wowango ma hungioka ka idadi nanga hininga ma dumutu waturuuruoka. Abe o Yesusu Una woigo la ngone ma oraha o duniakahi naa de ko holegaikaua to ngone ma hirete dika nanga pereluika. Masara ai hininga ma dumutu la ngone howango ka Unangika dika, angamoi Una wohonenge de iwihimomiki ai honengino la wonaduhunu ngone.

¹⁶ De mangale nanga wowango ma hungioli naga, ho ngomi ma oraha naa de imahikaika de mia hininga o nyawaika imakohowonoka de ma dihiraino. Abe ma oraha naa ngomi ko o dunia ma nyawakaua, ho abe ma oraha mimalega o nyawaika de ko ma titiua abe to ona manga poretoka dika miamake masara to ona manga hiningaikaoo miolegaika. De igoungu ma dihiraino de to ngomi mia hininga o Yesusu Kristusika imaketero dika hoka o dunia ma nyawali manga hininga Unangika, abe ona ato Una ka o nyawa biaha dika, ho hokogenangoo to ngomi mia hininga Unangika. Masara ma oraha naa naga de to ngomi mia hininga duru imakohowonoka Unangika.

¹⁷ Ho ngomi duru mihioriki abe nako onagona dika manga gogere naga o Yesusu Kristusoka, ona gea yodadioka o dulaada ma hungioli! Abe to ona manga wowango ihira-hira gea ipahaka, de abeika to ona manga wowango duru aturuuruoka de ma hungioli!

¹⁸ De igoungu nanga wowango ma hungi naa duru ka Ma Jouoka dika de aino iboa. Abe Una gea wonahikadameoka ngone de Una ma titi o Yesusu Kristusu ai honengino la ibootohi homakumusu Una de ngone. De ahao Una womihitagongo ngomi naa la ngomioo miahikadame o nyawa de Ma Jou hiadono yomaketedodiawo de de Una.

¹⁹ De hokonaa mia hingahu ma demo o nyawaika la mia demoino de ka idadi ona o hikadame yamake Unangika. Abe mia demoino de miahingahu Ma Jou ai hininga o nyawaika, angamoi Una duru woigo la wahikadame o dunia ma nyawa la yomaketedodiawo de de Una. De gea ka idadi o nyawa wadafongo angamoi ma titi o Yesusu Kristusu ai honengino ho ko wolegaikakaua to ona manga howo-howonika. De to Una ai hikadame ma abari gea womihitagongo ngomino la miahingahu-ngahu o nyawa mata-mataika.

²⁰ Ho ngomi naa to Yesusu Kristusu ai hidingoto ma nyawa abe womihidingoto o nyawaika de ai hikadame ma abari la ngomi miadofanga onangika. De gea imaketero hoka ko ngomiua mitemo masara Ma Jou Una dika ma hirete abe duru wahigaro o nyawaika ma titi to ngomi mia uruino. Abe ngomi duru minihigaro miato, “Duru mioigo la ngini nimakadameoka de Ma Jou.”

²¹ De ka idadi o nyawa yomakadame de Ma Jou angamoi to ngone nanga howo-howono Ma Jou wagoraka ngoneoka de aino de wihinoauku o Yesusu Kristusuku. Abe ngaro to Yesusu Kristusu ma hirete ai howono duru ko iwa, masara Ma Jou wihitagongo to ngone nanga howono o Yesusu Kristusika la gea imaketero hoka Una wodadi to ngone nanga howono. De ai datorino gea de ka idadi Ma Jou ai totiai wonahidoaka ngoneino la imaketero hoka wonahinoauku ai totiai ngoneuku.