2 Korintusu 4 - Ma Jou ai Demo-demo o Totobelohoka

Abe ma titi Ma Jou ai dararono imanoa o Abari ma Rorahaioka ho imanoa onangokaoo abe yatobahingahu-ngahu ai Abari o nyawaika

¹ De igoungu abe to ngomi mia tagongo la miatobahingahu-ngahu o Abari ma Rorahai o nyawaika, gea ma tagongo abe duru ihohailoa. De ma titi moi dika hiadono Ma Jou womihitagongo gea ngomino, abe ma titi to Una dika ai hininga ma doraka de aino ngomino. De ngaro ma karajaanga ko iuwinua ma titi ma kangela ka ihikaika naga, masara mangale ma titi ma tagongo gea duru ihohailoa ho hiadono ngomi naa ko idadiua mia domoroini ihihanga abe mia tagongika.

² De mangale ngomi duru mioigo la mia tagongo gea mihidagi irahai ho ngomi duru mioluku mianiiki ma hininga abe ko itiaiua. Angamoi o hininga ko itiaiua gea nako o nyawa yodiaioka de yamao kiani yomahipongono done yamaleke genangino. Ho ma hininga gea duru mioluku midiai. De ngomi mia datorino o nyawa ko miabudiua, de ko mihikawalimua Ma Jou ai Demo-demo. De ngomi o demo ma gou-goungu dika duru miahiree-reeika o nyawaika. De naa Ma Jou ai himangoka de ka idadi tomahingahu abe ngomi ngaro mia datorino eko ngaro mia demoino masara gea ma gou-goungu dika ngomi mianii-niiki. Ho onagona dika abe manga hininga ma rorahaiino de yoigo imitailako mia wowango, ona gea ka idadi ihioriki abe ngomi miagou-goungu mianiiki to Una ai Demo-demoino.

^3-6 De ngomi naa mimaribuutu la mia tagongo gea mihidagi irahai angamoi ko to ngomi ma hireteua mia hininga mimahingahu-ngahu o nyawaika, masara miahingahu-ngahu onangika ma titi nanga Baluhu idodutu o Yesusu Kristusu. Duru ko iwa mia hiningaka abe miato mimahigorakiye ngomi ma hirete, masara mioigo la wiwihigorakiye ka Una dika nanga Baluhu! De abe ma titi ngomi ma hirete, gea ma oraha miahingahu-ngahu de mimahitipokouku abe mimahiromanga miato midadioka ti ngini nia duduhunu. De gea midadi nia duduhunu mangale ma titi o Yesusu ai datorino abe ngone mata-mata wonaduhunu genangino. Ho ngomi mimaaduru hoka Unangoli angamoi Una wohira wodadi ngone mata-mata nanga Duduhunu, ho ngomioli naa midadioka ti ngini nia duduhunu. De ngomi mihingahu-ngahu ma titi o Yesusu Kristusu dika angamoi Ma Jou ai medebini ma dararono ena gea ka idadi hamake o Yesusu Kristusoka. Abe ngone hoihenoka abe duru ma dodihiraka de Ma Jou wotemo wato, “O fufutu ma goronaka de toigo la ihitararono de o dawange.” De ai demo gea wohingodumu abe ma oraha ngomi mihingahu-ngahu to Una ai Abari, angamoi ai demoino de Una wohitararono ai dararono o nyawa manga hiningaika. Abe Ma Jou ai dararono ihititi o Yesusu Kristusino, ho nako hiadono ngone hamake de hataoko o Kristusu ai hininga, gea tanu ka idadi Ma Jouoo ai hininga hataokoka irahai. De Ma Jou ai hiningaino gea de ngone ka idadi hamake to Una ai medebini ma dararono ka hiadono ai dararono gea duru wonahitararono ngone o nyawa nanga hiningaino. De hokogea ma Abari ma hofoko o nyawa manga hiningaka iti iwingaku o Yesusu Kristusika. Masara naga o nyawa utu o Abari ma Rorahai abe ngomi miahingahu-ngahu de gea imaketero hoka ma Abari atamunohi onangino abe ka ikurangohi yataoko to ena ma titi. De abe ona ma Abari atamunohi onangino, gea ma nyawa abe ika-ika de ahao to ona manga baha adonoka de yamake o hohowono ka hiado-adonika. De hokonaa ma titi hiadono ma Abari atamunohi ma nyawaino gea, angamoi ona gea ko iwingakuahi o Kristusika. De abe nako o nyawa ko iwingakuahi, ona gea o Ibilihi ma haeke idiai la manga hininga ko ataokua ma gou-goungu ho gea imaketero hoka ma dadatoko naga manga hiningaka. Ho ona gea duru ko kia-kiakaua yamake de manga hininga ifufutuoka. De ma Ibilihi ma haeke abe idadi o dunia naa ma hibaluhu ma dorou, ena ikarajaanga to ona gea manga hiningaka la ato done yataoko Ma Jou ai dararono duru ihohailoa abe imanoa o Kristusu ai Abari ma Rorahaioka. Ena gea duru aoluku la o nyawa yamake ma dararono o Kristusoka, abe Una gea ai rupa duru hoimoi de Ma Jou o Baba ai rupa. Ho nako hiadono o nyawa ko yataokua to Una ai Abari gea abe miahingahu-ngahu, gea ko ma titiua ma Abari ko itararonua, masara gea ma titi o Ibilihi ma haeke yatatokoka o nyawa gea manga hininga. Ho ngomi naa ka migila-gila dika miahingahu-ngahu ai Abari o nyawaika. De ngaro ma kangela miaohana de o nyawa utu ko yangakua mia Abarika, masara ngomi de mia hininga ma domoroini mihidagi mia tagongo ma hohailoa naa.

⁷ De abe hohidotelega o Abari ma Rorahai ma titi o Kristusu de o utumu eko o kaya o kia dika naga utu, masara ka o Abari ma Rorahaiohi gea duru de ma utumoka. Masara abeika ma utumu gea imanoa to ngomi mia badangoka abe ngomi miatobahingahu-ngahu ai Abari o nyawaika. De mia badanga naa tanu ko kia-kiaua de ko itongohonua angamoi o dunia ma pesekino dika idadi. Ho done ma titi o kia hiadono ai Abari duru irorahaiholi naa de imanoa to ngomi mia ngioka abe ko kia-kiaua ma ija? Masara gea naga ma titi. Abe ma oraha o nyawa yamake o Abari ma Rorahai ma kuaha abe duru ikurutiye de gea imanoa to ngomi mia badanga ma lolamaanoka, gea ka de yamake de ihioriki abe ma kuaha ma amoko gea ko ihititiua mia badanga ma bole-boleino naa. De gea ahao ona yafikiroli hiadono ihioriki abe ma kuaha gea kiani duru ihititi ka Ma Jouoka dika de aino.

⁸ Ho Ma Jou wapake ai kuahaino la ngomi womiduhunu mia kangela ma goronaka. Abe ngomi naa duru imihigororomino arihonongaka de o kokangela masara ko imihikalaua. De ma moi ma moi mia hiningaka duru miamao mililifanga masara ko milutua genangoka.

⁹ De igoungu o nyawa imihikangela, masara duru ko ma moiua Ma Jou wominoaika. De ngaro naga imihiodiri mia badangino masara ko imihibinaahaua. De gea mata-mata ma titi Ma Jou Una ka ihikaika womiduhunu ngomi naa.

¹⁰ De mangale ka ihikaika imihikangela ngomino ho ka idadi totemo tato mia badanga ma kangela naa ngade-ngade imakadaene hoka to Yesusoli ai badanga ma kangela abe ma oraha Una wohonenge. De ma titi mia kangelaino gea hiadono to Yesusu ai wowango enangoo ka idadi o nyawa yamake abe to ngomi mia badangoka. Abe ngaro imihikangela masara to Una ai Abari ka ihupuohi mia badangoka de aino mia uruino, de genangino o nyawa ka idadi yamake o wowango ma ngango.

¹¹ De gea igoungu abe ngomi ka ihikaika miaohana o bodito ma titi wiwileleani o Yesusu, de ngaro ika-ika mia badanga naa ihonenge, masara gea adodoaua, iti o Yesusu ai wowango ka idadi o nyawa yamake ngomioka.

¹² Ho ngomi ka ihikaika o hone-honenge iminii-niiki la ato imidaene, masara mia kangelaino gea de ihiboa o wowango ma ngango nginika.

¹³ De ngaro ma ngoe imihikangela masara ka miahingahu-ngahuohi ai Abari o nyawaika. De gea ko mimatogumua angamoi to ngomi mia ngongaku imakadaene abe hoka womatengoli ma dodihiraino abe wohitulihuku Ma Jou ai Demo-demo o buku moioka. De gea o Higiriiri ma Nyanyianga ma bukuoka. Abe una wotuli-tulihi gea ma oraha o bodito waohana de una wotulihi wato, “Ngohi tingaku Unangika, de gea ma titi hiadono ahi demo ihupu.” Hokogea ma dodihiraino ai hininga, de hokogenangoo to ngomi mia hininga ma oraha naa. Abe ngaro naga abe imihikangela ngomino, masara mangale ma titi to ngomi mia ngongaku hiadono mia demo ka ihikaika ihupu.

¹⁴ Angamoi ngomi duru mihioriki de mingaku abe Ma Jou wihimomikoka nanga Baluhu o Yesusu ai honengino, de ngomi mihioriki abe Unangoo ahao womihimomiki ngomi ma titi mia gogao o Yesusika. De ipaha ahao wonatoomuino ngomi de ngini la ngone ka ma moi wonahiboa to Una ai himangino.

¹⁵ De ngomi naa mia kangela de mia bodito ka mimatongohono la genangino de ngini niamake ma utumu. Abe nako ngomi ka miahingahu-ngahuohi ai Abari ma Rorahai hiadono Ma Jou ai hininga ma owa utuohi ihikabarihi o nyawa-nyawaika, gea ahao to ona manga tarimakase Ma Jouika ka idogo-dogo hiadono duru iwihigiriiri Unangika.

¹⁶ De mangale ma titi mia kangelaino de ihihofoko o higiriiri Ma Jouika, ho ngomi naa mia hininga ko itoakua masara ka ihikaika imimagawe wiwiniiki Unangika. De igoungu abe mia badanga ma buturungu ka ihihanga moduku ho ahao mihonenge, masara mia ngongaku ma hininga ka ihikaika Ma Jou wohiwangoro la ka idadiohi ngomi migila-gila wiwileleani Unangika.

¹⁷ De to ngomi mia kangela ma dodubuho abe ma oraha naa miaohana, gea tanu ka idadi mihiromanga enangika ma goguwini dika angamoi ma kangela gea ka jai-jai dika de ipahaka. De nako mihidotelega mia kangela abe ma oraha naa miaohana de mia utumu duru kohaamoko abe ahao miamake Unangino, gea mia kangela ngade-ngade ko kia-kiaua. Angamoi mia kangelaino gea de ihihofoko o medebini ma dararono kohaamoko abe Una ahao womihidoaka ngomino. De ahao mia dararono gea itongohono ka hiado-adonika.

¹⁸ De gea ngomi ko mipusingua de mia kangelaika abe miamake ma oraha naa naga, angamoi o kia dika naga hamake o duniaka naa de gea ko itongohonua. Masara ngomi naa mia hininga ma lako itagi ka ma rorahaiika abe ahao hamake o Horogaka ngaro ma oraha naa de ko idadiuahi hamake de nanga lako. De ma rorahai gea abe ko hamakeuahi ma oraha naa, gea ahao ka idadi itongohono ka hiado-adonika. Ho to ngomi mia hininga itagi ka enangika dika.