2 Korintusu 3 - Ma Jou ai Demo-demo o Totobelohoka

O Paulusu wahiketero o Korintusu ma nyawa wato ona hoka ai hingaku ma hurata o nyawa utuika

¹ De ngohi tinihioriki abe ma dihiraino de ngini niato bote ngomi mimahigiriiri ngomi ma hirete. Ho ma oraha naa abe ngini niabasa mia demoino de marai naangoli ngini ka idadi niataoko abe ngomi ma moioli mimahigiriiri. Masara gea ti ngini dika nia hininga de tanu duru ko mia hiningaua la mimahigiriiri. De gea marai ngini niato bote mia demoino de mimahikurutiye la hiadono ngini ka idadi mia demo niodafongo. Masara tanu ngomi naa ngaro ufa dika de mimahigiriiri angamoi ngini dika ma hirete nimihioriki mia hininga ka hiadono ka idadi ngini nimihigiriiri ngomino! Abe ahi demo gea ma titi hokonaa. De igoungu naga o nyawa utu abe yomagao-gao o hingaku ma hurata la ka idadi yahimatoko ma hurata o nyawaika la ona yangaku de yadafongo onangika. Masara nako ngomi naa mia hiningaka miato borotaua dika de ngomi miapake o hingaku ma hurata nginika angamoi ngini ma dihirainohi de nimingakuokau. De ngomioo miamao miato ngaro ufa dika mimagahoko la ngini nitulihi o hingaku ma hurata abe ma dolaka niato nimingaku ngomino la ma hurata gea mimagao de ahao miahimatoko o nyawa utuika la ona gea ka idadi imingaku.

² Angamoi ma oraha miahingahu o nyawaika ma titi ti ngini ma hirete nia wowango ma rorahai, ma hingahu gea idadioka imaketero hoka to ngomi mia hingaku ma hurata moi abe ka idadi miahimatoko o nyawaika. Abe ka de o nyawa inimake ti ngini nia wowango ma datoro ma rorahai de ihiorikoka abe to ngomi mia karajaanga nginioka duru itaana de Ma Jou ai mau. De gea nia wowango ko o bukuokaua ihitulihuku, masara ihitulihuku to ngomi mia hiningaka la ngomi ka idadi miahingahu o nyawa mata-mataika ma titi nia wowango ma rorahai gea.

³ De duru itararono abe ngini nidadioka imaketero hoka o hingaku ma hurata abe iboa o Yesusu Kristusoka de aino. De abe ma hurata ma demoino wohitulihuku, gea Una womipake ngomi naa la mitotaka ai hurata gea abe wato wahidingoto o nyawaika. Abe gea ma titi womipake ngomi la nia wowango ma rorahai gea miahingahu-ngahu o nyawa manga ngoe-ngoeika. De gea nako ma tinta wapake, gea duru ko o tinta biahaua masara gea wipake Ma Jou Wotobawango ai Womaha. De abe ma buku, gea ko o hakaru ma baka-bakaikaua abe ai hurata ihitulihi genangika hoka ma dodihiraino o Musa ai Pareta o hakaruika ihitulihika. Masara gea o Yesusu Kristusu wohiaturu la ai hurata gea ihitulihika o nyawa manga hiningaka dika. Abe ma titi o Yesusu Kristusu duru wokarajaanga ti ngini nia wowangoka de gea wipake Ma Jou o Womaha nia kokihiningaka la nia hininga aturuuruoka. De gea ngomioo womipake la hiadono nia wowango aturuuruoka. Ho imaketero hoka o hurata moi abe o nyawa ka idadi yamake de yobasa la ihioriki ma dola, hokogenangoo o nyawa ka idadi inimake ti ngini nia datoro de inihioriki abe ngini nia wowango ko hoka ma dihirakaua.

⁴ De ngomi naa ka idadi mitomoroini dika mitemo hokogea Ma Jou ai himangoka mangale ma titi mia karajaanga ma hasili ma rorahai abe ti ngini nia wowangoka. De gea mia karajaanga o Kristusu ai buturungoka de aino dika de ko ngomiokaua ihititi.

⁵ De nako hoka to ngomi dika mia hiakunu, gea duru mihioriki abe ko kia-kiaua miakunu midiai abe to Una ai karajaangino. Masara ngomi naa miapake to Ma Jou dika ai hiakunu la ka miakunu mihidagi to Una ai karajaanga abe womihitagongo ngomino.

⁶ Abe Ma Jou Una gea womihiakunu ngomi la ka idadi miahimatoko to Una ai behehongo ma hungi o nyawaika, la ona ahao ka idadi o nyawa yongaku enangika. De o behehongo ma hungi gea ko apakeua o paretaino abe ihitulihuku hoka ma dodihiraino, masara ma behehongo naa iboa Ma Jou o Womahoka de aino. Angamoi o pareta ma dodihiraino gea ihiboa o hohonenge dika, masara ma behehongo ma hungi abe Ma Jou o Womahino, gea inahidoaka o wowango ma ngango ngoneino. Ho ka Una dika womihiakunu la ngomi ka idadi miahingahu-ngahu ai behehongo ma hungi o nyawa-nyawaika.

O Paulusu wohidotelega Ma Jou ai behehongo ihira-hira de abe to Una ai behehongo ma hungi

⁷ De abeika homafikirohi de hohidotelega o behehongo ihira-hira de o behehongo ma hungi naa. De igoungu abe ma dodihiraino de o behehongo ihira-hira hatoli ikurutiye de naga de ma horomatioka. Abe ma oraha ma behehongo gea idadi de Ma Jou wohitulihi ai Pareta o hakaru ma baka-bakaika, de gea o Musa ai himanga duru de ma dararonoka. De gea o Musa woutioka o lokuoka de wauku ho ma dararono ai himangino imulaengoka ihihanga. De ngaro ko ikiriakaua masara o Isiraele ma nyawa ma oraha iwilega unangika de ona ko yakunua angamoi ka itararonoholi ma medebini ma dararono unangino. Ho o behehongo ihira-hira gea ngaro ka ihiboa o hone-honenge dika, masara ena gea naga de ma horomatioka.

⁸ Ho abe nako ma behehongo ihira-hira ngone hato de ma horomatioka, genangino de ka idadi hohioriki abe ma behehongo ma hungi abe Ma Jou o Womahoka de aino ka enangohi duru de ma horomatioka.

⁹ Angamoi ma behehongo ihira-hira ka idadi inahitaana ma titi nanga howono hiadono kiani hohonenge, de ngaro hokogea inahohonenge masara enangoo naga de ma horomatioka. Ho hongoli ma behehongo ma hungi duru ka enangohi ikurutiye de duru de ma horomatioka, angamoi ma behehongo ma hungi inahikadame ngone de Ma Jou la Una ka idadi wonadafongo.

¹⁰ De nako hohidotelega ma behehongo hinooto gea, tanu ka idadi hotemo hato ma behehongo ihira-hira ma horomati ko kia-kiaua abe nako de ma behehongo ma hungi ma horomati, angamoi naangohi duru ikurutiyeholi to ena ma horomati.

¹¹ De gea ngone hohioriki abe Ma Jou wohiaturu la ma behehongo ihira-hira gea ka hiado-adonikaua ilaku, masara jai-jai dika. De ngaro ma behehongo gea ko itongohonua masara naga de ma horomatioka. Ho hongoli ma behehongo ma hungi naa ena abe itongohono ka hiado-adonika, abe enangohi gea duru ilamokiye to ena ma horomati!

¹² De mangale ma titi nanga behehongo ma hungi naa duru ikurutiye de abe nanga nganganono enangika duru ko ikelu-kelua, ho ngomi ka idadi duru mitomoroini mia tagongo mihidagi.

¹³ De abe mihidagi mia tagongo de ngomi ko mimakadaenua de o Musa ma dodihiraino. Abe ma dodihiraino gea de Ma Jou ai medebini hatoli ikurangohi itararono o nyawaika. De gea ma titi hiadono o Musa ai himanga watamunu de o ngoere ma belaka la wato done o Isiraele ma nyawa yodamaana ai himangika ma titi ma dararono gea abe imulaenge ihihanga. Ho ona yamake Ma Jou ai medebini ma dararono gea o Musa ai himangoka masara ko itararonua yamake. De genangoka abe ngomi ma oraha naa duru mimakohowono de o Musa ma dodihiraino, angamoi ngomi ko miatamunua to Una ai medebini ma dararono gea. Abe ko iwa ngomioka abe miagogono eko miatamunu la ufa o nyawa yamake, masara ngomi ka mihiree-reeika mia abari ma demo o nyawaika la ma dararono gea ka idadi yamake de itararono.

¹⁴ De ngaro ma dodihiraino gea de o Musa ai himangoka naga Ma Jou ai medebini ma dararono, masara o Isiraele ma nyawa ka yolukohi iwihigihene Ma Jou ai demoika, ho ona duru manga pea idadi itogowinoka. De ika-ika de ko akunokaua yataoko Ma Jou ai demo abe o Musa wadofanga onangika. De ma dodihiraino gea de ka hiadono ma oraha naa naga abe totulihi ahi gogiriaka nginika de o Isiraele ma nyawa manga totoforauku manga pea ma dogowini ka hokogea dika. Abe ngade-ngade imaketero hoka ma dodihiraino o Musa ai himanga ma dadatoko, de hokogenangoo ma oraha naa o Isiraele ma nyawa manga hininga ma dadatoko nagahi. Abe ma oraha ona yabasa ma behehongo ihira-hira gea de duru ko yahiutumua genangino. De manga hininga ma dadatoko gea ka idadi agoraka onangoka de aino iti ona iwingaku o Yesusu Kristusika, angamoi Una dika ka idadi wagoraka. Masara nako ko iwingakuahi gea ma dadatoko nagahi manga hiningaka.

¹⁵ Ho igoungu, abe ngaro hiadono o wange naa de o Yahudi ma nyawa ma oraha yobasa o Musa ai Paretaino masara manga hininga ma dadatoko nagahi onangoka.

¹⁶ Masara abe nako womatengo ai hininga waturuuru de wingaku nanga Baluhu idodutuika, gea ahao ai hininga ma dadatoko agorakoka la ai hininga itararonoka de to Una ai dararono.

¹⁷ De nako nanga Baluhu idodutu de Ma Jou o Womaha, ona yahinooto gea ka hoimoi dika. Ho nako nanga Baluhu idodutu ai Womaha naga womanoa o nyawaka, gea duru ko iwaka manga hininga ma dadatoko onangoka ho ka idadi yomahitigi Ma Jouika de yamake to Una ai dararono. Masara onagona dika abe manga hininga ko aturuurua, ona gea manga hininga ka ifufutuohi ho ko idadiua yamake ai dararono.

¹⁸ De ma demoino gea de ka idadi hamake abe ngone mata-mata abe hingaku-ngakuoka ko iwaka nanga hiningaino ma dadatoko. De nako ngone homahiketero de o Musa, una igoungu womatatoko ai himanga ma titi Ma Jou ai medebini ma dararono naga ai himangoka. Masara nako to ngone nanga himangoka gea ko iwa ma dadatoko, ho nanga Baluhu idodutu ai medebini ma dararono ka idadi ihabaka nanga himangino la o nyawa utu yamake nanga Baluhu ai medebini ma dararono ngoneoka. De mangale nanga Baluhu ai Womaha ka ihikaika wokarajaanga nanga kokihiningaka, ho ka ihikaika wohidogo ai medebini ma dararono ngoneino. De hokogea wohidogo ai medebini ma dararono ngoneino ka hiadono utuohi imakiniiki to ngone nanga hininga de to Unangoli ai hininga la ka idadi homaketehiningamoi de Una. De hokogea ma behehongo ma hungi ma abari duru kohagurutiye abe Ma Jou womihitagongo ngomino la miahingahu-ngahu o nyawaika, ho gea ngomi duru mitomoroini mihiabari arihonongaika!