2 Korintusu 2 - Ma Jou ai Demo-demo o Totobelohoka

¹ Ho ngohi tomaputuhu tato koaho ngarouahi toboa tinitutumu done ma moioli tinihitubuho nia hiningaka, abe gea imaketero hoka nengokadauino de nia hininga ma huha naga ma titi tinitutumu nginika.

² Angamoi nako hoka toboa de tinihihuha ti ngini nia hiningaka, gea ahao done onagonali naga abe ka idadi ihihisanangi ngohi? Abe ka ngini dika genangoka nia wowangoino abe nihitobahisanangi ngohino. Ma nako hiadono ngini naga nia hininga ma huha, gea ko nihihisanangiokaua ngohino.

³ De genangino ma titi hiadono nengokadau ka tinihurata dika nginika de ko toboaua, done toboa nginika de ahao ahi hininga ihuha mangale ma titi nia howono abe tamake nginioka. Angamoi nako ngohi toboa nginika, tanu irahai tamake o hininga ma garago dika nginioka. De ngohi duru tohioriki abe to ngohi ahi garago gea ihititi ti ngini nia garagoka.

⁴ De abe nengokadau ma oraha ahi hurata gea totulihi ma gogiriaka de duru tohuha ahi hiningaka! De ngade-ngade hoka ahi hininga ihakara hiadono ahi koongo itifa. Angamoi gea ngaro ahi hurata ma demo de ma dubuhoka, tanu ko ahi hiningaua la tinihihuha nginika, masara ahi hininga la ka idadi ngini nihioriki abe hokokia ma amoko ahi dora itagi nginika.

O Paulusu wahingahu onangika abe ma titi womatengo wahowonoka ho ona kiani iwiapongo unangika

⁵ De abe ma titi o nyawa inahihuha nanga hiningaika, igoungu naga womatengo nginioka abe duru winihihuha. Abe ma titi nanga gianongoru womatengo gea nginioka abe wahowonoka, gea igoungu abe ma titi ai howonino hiadono duru to ngohi ahi hininga itubuho. Masara nako ngohi de ngini mata-mata, gea tanu ka nginiohi abe nia hininga duru itubuho ma titi ai howono. De gea igoungu abe ngini utu dika abe duru niamao o hininga ma huha, ho ko ngini mata-mataua o huha niamao.

⁶ Ho mangale ma titi una gea ai hininga womangalioka, ngohi tato ma oraha naa de to una gea ai hohowono iwiwedonoka abe wamake ngini niwoe-woeino.

⁷ De naa adonoka ma oraha la ngini niwiapongo de ka idadi niwilaru unangika, done de ai hininga ma dubuho iwilufungu. Angamoi nako ka ihikaika ai hininga itubuho done ahao duru iwilutu genangoka ho ai hininga ko idadiokaua ilio abe hoka ma dihirali.

⁸ Ho gea duru tinihigaro genangoka la niwihimatoko abe nia dora ka itagiohi unangika.

⁹ De nengokadauino ma oraha tinihurata nginika de ma titi moioli naga ahi hiningaka. De gea tinihurata la ka idadi tinihioriki nako ngini ka ihikaika nihihingounu ngohino eko koua. De naa tinihiorikoka abe ngini duru nihingounu ahi demoino.

¹⁰ Ho abe ma titi ngini niwiapongo una wahowo-howonika, gea ngohioo tiapongo. De ma oraha ngohi tiapongo una ma titi ai howono hokokia dika naga, gea tiapongo ma titi o Yesusu Kristusu ai kuahaka de aino. De ngohioo tiapongo unangika la idadi ti ngini nia utumu abe nia doomu ma goronaka.

¹¹ Abe nako ngone ko hiapongua, gea idadi o Ibilihi ma haeke ma ngekomo la hiadono nia doomuino nimareguoka ho nia rimoi aruwaeoka. Ho ngone koaho hiapongo nanga gianongoruika gea done o Ibilihi ma haeke ahao inahikala genangoka. De ngone naa hohiorikoka abe ma titi to ena ma hininga ma dorou ngoneino. De hokogea ma titi hiadono koaho niwiapongo nanga gianongoru gea nginioka.

O Paulusu wohigila-gila wahingahu onangika ma titi ai dodagi ma ade-ade

¹² De naa ka idadi tohigila-gila ahi dodagi ma ade-ade nginika. Abe nengokadau ahi dodagioka de tomahiadono o Toroasa ma kotaika la o Yesusu Kristusu ai Abari ma Rorahai tahingahu-ngahu onangika. De genangoka nanga Baluhu idodutu duru wohihidoaka ma ngekomo la o Toroasa ma nyawa manga ngoe ka idadi yotoihene ahi demoika.

¹³ De ngaro hokogea masara duru ahi hininga ko iriiduahi angamoi nanga gianongoru o Titusu nginioka de waino ko woboauahi ngohino ho ko toihenuahi abe ma abari nginioka sarakia. Ho mangale ko tohiorikuahi nia hininga sarakia ho ngohi tomahilooa o Toroasa ma nyawaika de tosobo totagi-tagi o Makedonia ma tonakika la tilingiri ahi dodiawo o Titusu. De bootino de ahao tohigila-gila ma ade-ade naa abe hokokia ma abari tamake o Titusoka ma titi ngini.

O Paulusu ai tagongo duru kohagurutiye abe o Abari ma Rorahai wahingahu-ngahu o nyawaika

¹⁴ De naa ma titi moioli tagorakohi la gea tinihitararono nginika. Abe ngaro nanga wowango o duniaka de ma moi ma moi hamao abe o kangela imahilaku ngoneoka, masara ngone koaho hotarimakaseohi Ma Jouika. Angamoi Ma Jou ka ihikaika Una wolaku ma titi o Yesusu Kristusu ai datorino. De ma oraha naa ai lalaku gea wohimatoko o nyawa duru yowoe-woeika o duniaka naa. De Una ka ihikaika womihihira-hira ngomi abe miatobahingahu-ngahu ai abari, de gea imaketero hoka ngomioo milaku de de Una ma titi mia gogao o Yesusu Kristusika. De Ma Jou womipake ngomi la mihikabarihi ma gou-goungu ma titi o Kristusu abe o dunia ma amokika, abe imaketero hoka o manyanyi ma bounu ihihaili arihonongaika la o nyawa yowoe-woe ka idadi yaame ma bounu gea.

¹⁵ De ngomi naa abe miatobahingahu-ngahu o Abari ma Rorahai ma titi o Yesusu Kristusu, ngohi ka idadi tomihiketero tato ngomi hoka o manyanyi ma bounu duru irahai abe iwihisanangi Ma Jouika. De ma bounu gea ka idadi o nyawa mata-mata yaame, abe ngaro ngone Ma Jou wonaduhu-duhunoka de hamakeoka o wowango ma ngango, de ngaro ona utuoli abe ahao yamake manga baha o hohowono ka hiado-adonika.

¹⁶ Abe nako ona ahao yamake o hohowono, ona ma oraha yaame ma bounu de gea duru yaemono enangika angamoi o hohonenge dika yamake genangino ma titi ai abari yaoluku. Masara nako ngoneino abe ahao o wowango ma ngango hamake, gea ngone haame ma bounu de duru hoigo angamoi o wowango ka hiado-adonika ngone hamake genangino. De gea mia tagongo Ma Jouoka duru kohagurutiye hiadono ngohi tomaleha tato, “Done onagona ka yakunu to Una ai Demo-demo yahingahu-ngahu o nyawaika?”

¹⁷ De igoungu naga o nyawa utu abe manga tagongo gea imakadaene de to ngomi masara ona yao ko itiaiua angamoi ona gea yahingahu-ngahu Ma Jou ai Demo-demo la ato yomatiwi-tiwi dika genangino. Masara nako ngomi naa, ngomi ko mimaketeroua de ona gea. Abe ngomi mia hiningaka ko iwa ma titi ma dorouika hiadono miahingahu-ngahu, masara ngomi miao itiai mia tagongo Ma Jou ai himangoka. De gea mihidagi mia tagongo abe mitemo-temo o nyawaika de gea ka o Yesusu Kristusu ai kuahaka dika de aino.