2 Korintusu 13 - Ma Jou ai Demo-demo o Totobelohoka

O Paulusu ai hitiari moiokahi onangika

¹ De ahao ma oraha tomahiadono genangika de gea ma hangeou abe toboa tinitutumu nginika. De nako ngini utu ngohi kiani tiniurusu ma titi nia howono, gea ahao taniiki o urusu ma hiaturu abe ihitulihukuoka Ma Jou ai Demo-demoka. Abe gea itemo ato, “O urusu ma goronaka de nako naga abe yatae o nyawaika ato ona gea yahowonoka, gea kiani naga o hakihii ma nyawa abe yahinooto eko yofoloi abe manga demo hoimoi la genangino ka idadi niahitaana nako igoungu ma nyawa gea yahowonoka eko koua.” Hokogea ma hiaturu abe ma dodihirainohi, de hokogea ngohi ahao taniiki nginioka.

² De ma dihiraino abe tinitutumu ma hinooto de gea ngini utu tinihitiarioka la ibootohi nianiiki nia howono gea. De naa ko toboauahi de ma moioli tinihitiari nginika de abe onagona dika genangoka abe ona ka yaniikohi o howono manga wowangoka. De gea tinihitiari tato ahao ma oraha tomahiadono nginika de onagona dika ko yoliouahi o totiai ma ngekomika, ona gea ahao yamake manga dodotoko ngohino.

³ De ipahaino abe niamake manga dodotoko gea de ahao ngini ka idadi nihioriki abe duru igoungu o Yesusu Kristusu wotobatemo to ngohi naa ahi uruino. De nako o Yesusu Kristusu ai demo nginika gea ko winibole-boleua winidotoko, masara Una gea ahao winidotoko de ai kuaha ma amoko, angamoi ai kuaha duru ilamoko nginika.

⁴ De igoungu ma dihiraino abe iwihidapakuika o gotaka gea de ma oraha gea naga ai bole-bole, masara naa ka wowangokali ma titi Ma Jou ai kuahaino. De hokogenangoo ngomi naa, abe ngomioka igoungu naga mia bole-bole, masara ngomi miwango Unangoka ho naga to Una ai kuaha ngomioka. De to Una ai kuahaino gea abe ahao ngomi miapake ma oraha miniurusu ngini.

⁵ De naa ngohi tinihigaro nginika tato ufa nihitailako to ngohi ahi wowango, masara koaho irahai ngini nimatailakohi ngini ma hirete de nimafikirohi la nihioriki nako niagou-goungu niwingaku o Yesusika eko koua. De ngini nihiorikoka abe nako niwingakuoka Unangika, gea o Yesusu Kristusu womanoa nginioka. Masara nako hoka ko niwingakua gea ahao Una ko iwiwa nginioka. De genangino de ngini ka idadi duru nihioriki abe o Yesusu Kristusu naga womanoa ti ngini nia badanga homoi-homoioka iti nia ngongaku naga Unangika.

⁶ De nako ngini ka idadi nimatailako de nimahioriki abe ma titi ti ngini ma hirete nia ngongaku naga, gea ngohi duru tonganono abe ngomioo ka idadi nimihioriki mia gogere o Yesusu Kristusoka. Abe nia ngongaku imihitaana ngomi naa abe ngomi o Yesusu Kristusu ai hidingoto ma nyawa ma gou-goungu, angamoi ti ngini nia ngongaku gea iboa to ngomi mia uruino.

⁷ De naa ngomi minigahoko Ma Jouika ma titi ngini la ngaro ma dorou o kia dika masara gea mata-mata ngini nioluku nidiai. De nako ngomi ko miboauahi nginika de ngini nia dorou nianoaka ho ko nianiikokaua nia wowangoka, gea ahao ngaro ufa de miniurusu ngini. De igoungu nako ko miniurusua, gea ko idadiua mimahitaana abe ma titi mia kuaha o Yesusu Kristusoka de aino la minidotoko nginika. Masara ngomi miato ngaro o nyawa imihioriki abe ngomi naga de o Yesusu Kristusu ai kuahaka, eko ngaro ko ihiorikua, masara genangino de ko mipusingua. Abe ngomi miato iti ngini o datoro ma rorahai niatobaniiki nia wowangoka.

⁸ De gea nako ngini niatobaniiki ma rorahai de ma gou-goungu gea, ngaro ufa dika de ngomi minidotoko nginika! Angamoi ka gea dika ma gou-goungu abe mioigo la ngini nitobadiai. Masara nako ngini hokogenangua de ahao ngomi kiani minidotoko la minihigaro ma gou-goungika.

⁹ De ngomi ka idadi migarago dika nako ahao ngini utuohi niputurungu nia ngongakuika ho ngomi ngaro ufa dika de miniurusu nginika. Ho gea ngaro o nyawa ko yamakeua to ngomi mia kuaha o Yesusu Kristusino angamoi ko miniurusua, masara gea ngomi ka idadiohi migarago dika ma titi nia wowango ma rorahai. De hokogea to ngomi mia niniata ma titi ngini, la ahao ngini nilio o totiai ma ngekomino de hiadono nia gogao itiaiokali Ma Jouika.

¹⁰ Ho naa ngohi ko toboauahi nginika de tomahingahuoka ahi hininga ma dola abe ahi hurata naa ma demoino. De hokogea tomahingahu angamoi ngohi tonganono la ahao ma oraha tomahiadono nginika de ngaro ufa de tapake o dodotoko ma dubuho nginika abe ahi kuahaino nanga Baluhu idodutuoka. De ahi kuaha gea nanga Baluhu wohihidoakino de gea ko ma titiua la tinihitubuho hiadono tinihirehene ma hoanika, masara gea wohihidoakino la ka idadi ngohi ahao tinihiputurungoli nia ngongakuika.

O Paulusu ai hurata naa wohibobaha

¹¹ De naa, ahi gogianongoru, ahi hurata tohibobaha de ahi higaro ma demo naa. Abe ngohi tinihigaro la ngini nigogarago, de nilio Ma Jou ai totiaiika. De ngohi toigo la ahi higaro ma demo niodafongo abe ahi huratoka naa, de nagali toigo la nia doomuoka nimakao irahai de nia hininga ma miriidi. De nako ahi demo gea mata-mata nianiiki, ahao Ma Jou ai hininga ma dora de ai hininga ma miriidi ka idadi niamake abe Una winihidoaka nginika. Angamoi Unangoka dika o dora de o hininga ma miriidi.

¹² De ngini o Korintusoka, abe ma oraha nimatoomuino de tinihigaro tato ka idadi nimakobounu angamoi hokogea nia biaha nimahikamatoko ti ngini nia tabea o Kristusoka. De nanga gogianongoru mata-mata nenangoka, ona ihidingoto manga tabea nginika.

¹³ De naa tinigahoko ngini la nanga Baluhu idodutu o Yesusu Kristusu ai owa winihidoaka. De tinigahoko la niamake Ma Jou ai dora Unangino. De abe o rimoi abe Ma Jou o Womahoka de aino, genangoo tinigahoko la Una ahao winihikodoku ngini mata-mataika.