2 Korintusu 12 - Ma Jou ai Demo-demo o Totobelohoka

O Paulusu ai himatoko abe wamake Ma Jouino

¹ De ngohi ka tomahigiriiriohi la tomahitaana genangino ma titi ahi tagongo igou-goungu Ma Jouoka de aino wohihitagongo. Masara tanu ko toigoua tomahigiriiri angamoi tohioriki gea ka parahaja dika abe nako ngone o nyawa homahigiriiri. Ho naa tinihingahu nginika abe naga o himatoko muruono naga tamake abe nanga Baluhu idodutuoka de aino wohihimatoko.

² De o taongo ngimoi de iata ipahaikaka de Ma Jou wohigoraka ngohi daku o Horoga ma lape hangeiye abe ka enangohi duru ikurutiye abe o Horoga mata-mataika.

³ Masara ngohi ko tohiorikua, wohigoraka de ahi badanga eko ahi womaha dika igorakiye, ma gea ko tohiorikua. Ka Ma Jou dika Una ma hirete wohioriki.

⁴ Masara ngohi duru tohioriki abe wohigoraka Ma Jou ai ngi ma hohailoaiye abe o Horogaka. De genangoka abe toihene o dogogono ma demo abe ngone o nyawa ko hakunua hotemo angamoi nanga demo ko aboaikaua genangika. De ngaro hoka ngone ka hakunu hotemo, masara Una ko wonahigunoaua la ma dogogono gea hahingahu utuika.

⁵ De abe wohigorakiye o Horogaiye, gea tanu ngohi ka idadi tomahigiriiri ma titi ena gea, masara ngohi ka toluku dika. Angamoi ngohi tato koaho ahi bole-boleino dika tomahigiriiri.

⁶ De masara nako hoka ngohi tomaputuhu la tomahigiriiri ma titi ahi gogere o Yesusoka, gea ahi higiriiri ma demoino itaana ho ko tomahibodoua. Angamoi ngaro tomahigiriiri masara gea ka o demo ma gou-goungu dika ngohi tohidemoiye. Masara ngohi naa ka tomatongohono dika de ko tomahigiriiriua ma titi ma himatoko utuoli abe enangoo tamakeoka Ma Jouoka de aino, done o nyawa ihietongo ka ikurutiyeholi abe ma titi ahi higiriiri ma demoino. Abe koaho o nyawa ihietongo ngohi abe hokokia yamake ahi wowango ma datorino de abe hokokia yoihene ahi dodotoko ma demoino, de gea dika yapake la ihietongo ngohino.

⁷ De mangale ma titi ngohi tamakeoka Ma Jou ai himatoko gea abe duru ihohailoaholi, ho Ma Jou Una wato done genangino de ngohi ahao tomasade de tomagorakiye ngohi. Ho gea Ma Jou wohigunoa la ka ihikaika ihihikangela ahi badangoka. Abe gea Ma Jou wohigunoa la o Ibilihi ma haeke ma kawaaha moi ihitobahikangela la ufa ahi sade ilaku ahi hiningaka.

⁸ De ngohi ma hange ibooto tomagahoko nanga Baluhika la ahi kangela gea wagoraka ngohino.

⁹ Masara Una wopaluhu ngohino wato, “Ani kangela gea ko tagorakua, masara ahi hiowa ahao ka ihikaika itagi ngonaika. Abe ngaro ani kangela eko ani perelu o kia dika naga masara ahi hiowa gea duru iniwedonoka la iniduhunu. Angamoi nako o nyawa manga buturungu ko iwa, genangoka de ahao to Ngohi ahi kuaha ilaku onangika.” Hokogea Ma Jou wopaluhu ahi gogahoko ma demoino. Ho naa ngohi duru tohidogarago ma titi ahi bole-boleika, angamoi ahi bole-boleino de o Yesusu Kristusu ai kuaha ka idadi imanoa ngohioka de hiadono ilaku ahi wowangoka.

¹⁰ De gea ma titi hiadono ngohi tato ngaro o kangela taohana ma titi o Yesusu Kristusika tilelelani, masara ka idadi tosanangi dika ahi kangela ma goronaka. Abe ngaro ahi badanga ihiboleoka de ngaro ihihitipokouku o nyawa manga demoino, de ngaro o kangela de o huha o kia dika naga taohana masara ka idadi tosanangi dika. Angamoi ngohi duru tohioriki abe nako ngohi ihiboleoka, duru ma oraha ena gea abe ngohi de ahi kuahaka ma titi o Yesusu Kristusu ai kuahaino wohihiputurungu.

O Paulusu ai hininga ma dora o Korintusu ma nyawaika

¹¹ De naa marai o nyawa utu naga abe yoihene ahi demo kangano de ona ato bote ngohi o bodo ma nyawa angamoi ifoloiholi tomahigiriiri ngohi ma hirete. Masara tanu ma titi moi dika hiadono ngohi tomaademo de tomahigiriiri hokonaa, de gea ma titi abe ngini genangoka nihiribuutu hiadono ngohi tamao kiani tomaademo done ngini ko nihingakua. De tanu ngaro ufa dika tomahigiriiri ngohi ma hirete, angamoi koaho ngini genangoka abe nihihigiriiri ngohino abe ma titi ma dihiraino de ahi tagongo tao itiai nginioka. De igoungu naga o nyawa utu nginioka abe yomahingahu ato bari ona o hidingoto ma nyawa abe ka to onangohi manga tagongo ikurutiye o Yesusu Kristusu ai himangoka. Masara nako ngini nimihidotelega ona de ngohi, de ngohi ma hohutuloo de ko tokalaua. Abe ngaro ngohi naa tanu ko kia-kiaua abe nako ka ngohi dika ma hirete, masara ona gea ko idadiua ihihikala ngohino ma titi mia tagongoka.

¹² De naa tinihihohininga abe ma titi ahi wowango ma datoro ma dihiraino abe ngohi nagahi nginioka, angamoi ahi datoro gea ena ihihitaana abe ngohi naa o Yesusu Kristusu ai hidingoto ma nyawa ma gou-goungu. Abe ma dihiraino de ngohi duru de ahi dongohono ma amoko nginika, de ngohi todiai o dodunguu de o heheranga ti ngini nia hidogoronaka.

¹³ De ahi datoro nginioka ka imakadaene dika de ahi datoro abe todiai o gareja ma doomu utuokali manga hidogoronaka, ho done niato ahi howono o kia naga abe tahowono nginika? Masara igoungu, marai naga moi dika ma kuranga abe ko todiaiua nginioka. De gea ko tinihitubuhoua abe ma titi ahi wowango ma perelu ko togahokua nginika. Ho nako ena gea ngini nihiromanga niato ahi howono nginika, ma oraha naa dika de tomahilooa la ngini nihiapongo ma titi ahi howono gea.

¹⁴ De naa abeika nitotoihene ahi demoino naa, angamoi ngohi tomahidiaioka la toboali tinitutumu nginika, abe gea ma hange ibooto tinitutumu. De gea ahao imaketero hoka ma dihiraino, abe ngohi ko tinihitubuhoua ma titi ahi perelu. Angamoi ngohi naa ko nia kiahonangua abe toigo tomale, masara gea ti ngini nia hininga dika tolingiri, la ka idadi tohingodumu nia ngongakuoka. De naa ka idadi o hiketero todiai. Angamoi nako o ngofa-ngofaka de manga dimono, gea onagona koaho ihidailako o wowango ma perelu? De gea ko o ngofakua ihidailako manga dimonika masara koaho o dimono abe yahidailako manga ngofa-ngofakika manga perelu. Ho gea duru itiai abe ngini ahi ngofa-ngofaka ngaro ufa dika de nihihidailako to ngohi ahi perelu.

¹⁵ De hongoli ngohi naa ka idadi ahi kiahonanga mata-mata tohidotodoakoka de ahi hininga ma sanangi la iti tohiputurungu nia ngongakuoka ka hiadono ko nikelu-kelua. De ngaro hiadono to ngohi ahi wowango kiani tomahidoaka la tinihiutumu ngini nia ngongakuino ma, ka tosanangi dika. De tosanangi tomahidoaka nginika de to ngohi ahi dora ka idogohi nginika, masara naa ma duruika tamao abe ti ngini nia dora ikuranga itagi ngohino.

¹⁶ De marai naga utu nginioka abe nihimoteke niato irahai ngohi ko tinihitubuhoua ma titi ahi perelu, masara nagahi nia gurubungu ngohino. Abe utu marai yato bari tinibudioka de nia tiwi tinidohiki abe ma titi ahi budi ma sosawaroino.

¹⁷ Masara to ona gea manga gurubungu done sarakia? Abe nanga gogianongoru gea abe ma dihiraino de tahidingoto ona nginika, sarakia, ona yoboa de inibudi nginika? Koua, hokogenangua manga hininga.

¹⁸ De nengokadau ma oraha o Titusu tihigaro la woiki winitutumu, de nagali nanga gianongoru womatengoli abe yomakiniiki yoboa nginika, sarakia ona? Marai ona gea inibudi nginika? Duru ko hokogenangua, angamoi nako ngohi de o Titusu de to ngomi mia hininga ka moi, de ngaro mia wowango ma dodagi ma enangoo ka moi dika.

¹⁹ De marai naga ngini utu genangoka abe niato bote mia demo mata-mata gea de ka mimademo dika. Masara naa ngomi ko minielukua de mimahingahu ma gou-goungu Ma Jou ai himangoka abe miato to ngomi mia hininga duru hokogenangua. Abe to ngomi mia demo mata-mata ihititi abe mia gogere o Yesusu Kristusoka. De hongoli mimahingahu nginika abe duru minidora de abe mia datoro mata-mata abe ngomi midiai, gea midiai la inihiutumu nginika hiadono ngomi miato la utuohi niputurungu nia ngongakuoka.

²⁰ Abe bote mia datoro de ngaro mia dodotoko utu de ngini ko niosanangiua genangika. De ngaro ko niosanangiua masara genangino nia ngongaku ka idadi idogo. De gea ngohi tohawana done ahao tomahiadono nginika de ko tinisanangiua angamoi ti ngini nia hininga ko niaturuuruahi. De nako ngohi ko tinisanangiua, ahao boteua nginioo ko nihisanangiua ngohino angamoi gea kiani tinidotoko nginika. Abe ngohi tohawana ahao o howono muruono naga tamake nginioka, abe nimaketeribuutu, eko nimaketetaleana, de nimakangamo, de nimareguoka nia doomu ma goronaka. De tohawanoo marai nagali abe nia gogianongoru manga roma-romanga niawea-weara, de abe niahiade-ade ma titi nia gogianongoru, de nimasadeoka, de nia doomuoka ma hiaturu itatoro ko itiaiua ho hiadono ko iriidua nia doomu ma goronaka.

²¹ De gea ngohi tohawana abe ahao Ma Jou wohihitipokouku ma moioli ma titi ngini nia wowango ma datoro genangoka. De nako idadi hokogea, to ngohi ahi hininga ahao duru ihuha ma titi ngini utu genangoka abe ma dihirainohi de niahowo-howono masara ko nitobauahi de ko niliouahi abe Ma Jouika. Abe ngini utu ka nianiikohi nia datoro ma dorou abe hoka nimahitorou, de nimakitigi ko itiaiua de utuika, de nia gimono ma dorou duru inihipareta nginika. Ho ngohi tonganono ahao ma oraha tomahiadono nginika de nia datoro mata-mata gea niakokinoaka la to ngone nanga hininga mata-mata iborisanangi de ngaro ufa ihuha.