2 Korintusu 11 - Ma Jou ai Demo-demo o Totobelohoka

O Paulusu wahikohowono o hidingoto ma nyawa ma gou-goungu de abe ko ma gou-goungua

¹ De naa ngohi togahoko nginika la ngini ka nitotoihenohi ahi demoino de nia hininga ma dongohono, angamoi ahi demo naa ngade-ngade hoka womatengo iwitogohanga ai demo abe bootino totemo nginika. Abe ahi demo bootino de marai duru tomahikurutiyeholi hiadono ka idadi niataoko ahi demo imaketero hoka iwitogohanga ai demo. De igoungu abe ahao kangano tinihitiarioka tato ufa hokogea hotemo. Masara naga moi ma titi ma amoko toigo tinihitararono, ho duru togahoko la ngini nimatongohonohi de nimadoihene ahi demoino.

² De ngohi tamao ahi hiningaka abe kiani tinidatoko de tinigoana ngini la ufa nirehene nia ngongakuino abe ma hoanika. De ahi hininga gea imaketero dika hoka to Ma Jouoli ai hininga abe Unangoo duru woigo winidatoko ma titi nia ngongaku, done o rerehene ma dodotoko inibudi de inihirehene. De ngohi tamao kiani tinigoana angamoi tinihiketero ngini de o moholehe momatengo abe tinihiketehidatarunoka de o nauru womatengoika, de ma nauru gea o Yesusu Kristusu. De ngohi tato done ahao naga abe inihiatara nginika de nia hininga ahao irehene o Yesusu Kristusoka de aino la moiikali nianiiki.

³ De ngohi tohawana tato done ahao inibudi o rerehene ma dodotokino abe imaketero hoka duru ma dodihiraka de o Ibilihi ma haeke abe imibudi o ngo Hawa ma titi o dodihaino. De done ahao nia hininga ma dumutu itagi ko iahumokaua o Yesusu Kristusika masara nia hininga idadi hinooto.

⁴ De ngohi tohawana angamoi ngini genangoka ngaro o nyawa o kia dika yoboaino de inidotoko masara gea ngini niadafongo de niatoihene onangika. De abe o nyawa yoboa de inidotoko nginika abe ma titi o Yesusu, de ma dodotoko gea ma demo duru imakohowono de abe ngomi ma dihiraino minihingahuoka ma titi o Yesusu. De masara ngaro duru imakohowono ma ngini ka niodafongo dika manga dodotoko! De ngaro ma dihiraino de ngini niwidafongoka Ma Jou o Womaha, masara naa ma duru naga inidotoko ma titi o womaha moioli de ngini ka nihigihene manga dodotokika gea! De ngomi ma dihiraino minihingahuoka o Abari ma Rorahai de hiadono ngini niodafongo ma abari gea, masara naa hadongoo de nitoihenoli o nyawaika gea abe o abari moioli inidotoko nginika! De gea ma titi hiadono ngohi tamao abe kiani ngini tinigoana.

⁵ De ngohi tohioriki abe ona gea nia hidogoronaka de naga utu abe ihiromanga onangika ato bari o hidingoto ma nyawa abe ka onangohi yokurutiye. Masara abe ma titi ona gea, ngohi naa nako tomihidotelega ngohi de ona de ma hohutuloo de ko tamakeua abe onangohi yokurutiye de ngohi.

⁶ De igoungu abe nako ngohi todotoko eko totemo-temo o nyawa manga himangoka de marai ikuranga ahi demo inouhu nia ngaukoka. Masara nako ahi tobahiorikino de ko iwa ma kuranga ngohioka. De tanu ngaro ufa dika de gea tomahingahu nginika, angamoi ngini duru ma ngoeoka tinidotoko ho ahi demoino de duru nihiorikoka abe ma titi ahi tobahioriki ingodumu.

⁷ De ngohi tohiorikoo abe ona yomahikurutiye gea ihilega ngohino de ihimake abe ahi hewa ko tomagahokua nginioka de aino. Ho ma titi gea hiadono ona ato bote ngohi marai o hidingoto ma nyawa abe hatoli ko kia-kiaua ihidaene. De gea igoungu abe ko tomagahokua nginioka de aino. De ma dihiraino abe Ma Jou ai Abari ma Rorahai ngohi tinihingahu-ngahu nginika de ngini nihioriki abe ngohi ko tomagahokua ahi hewa eko ma hibalaha o kia dika nginioka de aino. Abe ngohi tomahitipokouku de ka tinihidoaka dika o Abari ma Rorahai nginika abe o hibalaha ko tomagahokua nginioka. De gea ka tinihidoaka dika la tato ngini nidadi to Una ai ngofa-ngofaka abe nikurutiye Ma Jou ai himangoka. Ho naa ngohi tinileha, sarakia, naga nginioka abe nitomoroini nihiromanga ahi hininga ma rorahai gea niato tahowono?

^8-9 De abe ma oraha ngohi naga nginioka de tinileleani nginika de o Abari ma Rorahai, de gea naga ma oraha abe ahi wowango ma perelu ko ihiwedonua, masara gea ko ma moiuahi tinihitubuho de tomagahoko o duduhunu nginioka. Abe o gareja ma dodoomu utuinoli o Makedonia ma tonakoka manga tiwi yatoomuino de ihihidingoto ngohino la ihingodumu to ngohi ahi perelu mata-mata. De gea tamao ngade-ngade hoka tatohiki manga tiwi angamoi ko onangokaua tokarajaanga masara nginioka tinileleani de tokarajaanga. Masara ngaro hokogea ahi hininga ma ka tadafongo dika manga tiwi la ngini genangoka ngaro ufa de nihibalaha ngohino ma titi ahi leleani nginika. De imaketero hoka ma dihiraino ko ma iwa abe tinihitubuho nginika, hokogenangoo abe ma oraha nanga himangoka, angamoi naa ngohi tomaputuhoka abe ngohi duru ko tomagaho-gahokua o duduhunu nginioka de aino.

¹⁰ De mangale ma titi ngohi tileleani o Yesusu Kristusika de Una gea watobagou-goungu ai demoino, ho naa tinihingahu moi nginika de ngohioo tagou-goungu nginika. Abe ngaro nginioka o Korintusu ma kotaka de ngaro o kapongo eko o tonaka utuoli abe ti ngini nia tonaka o Akaya ma propinsioka, masara ngohi ahao duru ko tomagahokua o hibalaha o nyawaino ma titi o Abari ma Rorahai tahingahu-ngahu onangika.

¹¹ De gea ma titi o kia hiadono o hibalaha ko tomagahokua? Marai ma titi ko tinidoraua nginika? Koua, angamoi ahi hininga ma dora duru Ma Jou wohioriki abe duru itagi ngini mata-mataika.

¹² De ngohi ka togila-gilahi dika abe o hibalaha ko tomagahokua la tato done yotobadoto-dotoko ma nyawa utu ka idadi yomahingahu ato ona de ngomi ka mimaketero dika. Angamoi ona abe o rerehene ma dodotoko yotobadotoko nginioka, ona gea duru yoigo yomahingahu de yomahigiriiri abe to ona manga tagongo o Yesusu Kristusino de ka imaketero dika de to ngomioli mia tagongo.

¹³ Masara ona gea ko o Yesusu Kristusu ai hidingoto ma nyawa ma gou-goungua. Abe ona yoigo la inibudi nginika ho yomaaduru hoka ngomioli mia leleani ma datoro de yomahingahu ato o Yesusu Kristusu ai hidingoto ma nyawa.

¹⁴ De gea ngaro ufa hoheranga abe yoigo yomaaduru hoka ngomioli, angamoi ngaro o Ibilihi ma haeke masara enangoo gea imaaduru hoka o malaekatoli. Abe imahihawo de ma rupa moioli la to ena ma rupa imaketero abe hoka Ma Jou ai malaekata de ma dararonoka.

¹⁵ Ho ngini ufa niheranga abe nako o Ibilihi ma haeke ma duduhunu ma nyawa nginioka de onangoo yoigo hoka yomahihawo de hoka ma rupa moioli. Abe ona yoigo ato inibudi la hiadono ngini niaetongo onangika Ma Jou ai duduhunu abe bari yahidumutu o nyawa to Una ai totiaiika. Masara gea ka yomahihawo-hawo dika angamoi ko yagou-goungua iwileleani Unangika. De ona gea manga baha adonoka de manga hohowono ahao duru imakiniiki de manga datoro ma dorou abe yodiaioka.

O Paulusu ai kangela ma ngoe waohana

¹⁶ De naa ngohi ma moioli togahoko nginika la ufa niataoko ahi hininga hoka ihitogohangoka abe ma titi ahi demoino abe bootino totemo nginika. De ngaro ngini nihietongoka niato ngohi ihitogohangoka, ngaro hokogea ma togahoko la nitotoihenohi ahi demoino abe imaketero hoka o nyawa utu manga demo ngini ma ngoe nitotoihene, angamoi ngohioo kiani tomahigiriiri ma hohutulu.

¹⁷ De naa ko totemouahi de ngohi toigo tinihingahuohi abe ahi demo naa tapake, gea ko nanga Baluhu idodutua ai demo masara ka o bodo ma nyawa dika manga demo tapake la ka idadi tinidotoko moi genangino.

¹⁸ Abe mangale ma titi o nyawa manga ngoe yomahigiriiri ma titi manga gogere o duniaka, ho bote ngohioo ka idadi tomahigiriiri ma titi ahi gogere.

¹⁹ De ngohi tonganono ngini ka idadi nitotoihene ahi bodo ma demoino angamoi ngini duru nisanangi dika nitotoihene o bodo ma nyawaika abe naga inidotoko nginioka. De gea ngaro ngini nimaetongo niato o sosawaro ma nyawa masara abeika ngini ka nitotoihenohi onangika.

²⁰ De ngaro ona gea inihidadi imaketero hoka manga gogilaongo de ona inirusi-rusi nia kiahonangino, masara ngini ka niadafongo dika! De ngaro ona gea yoboaino de inibudi, de ngaro yomagorakiye abe inihipareta nginika, de ngaro hiadono duru inihitipokouku masara ngini ka niodafongo dika de nia sanangi!

²¹ Marai koaho irahai ngomioo miniao ngini hokogea abe ma oraha ngomi naga nginioka! Masara ngohi ihimaleke angamoi kiani tomangaku abe ngomi naa ko iwa mia domoroini la miniao ngini abe hoka onangoli iniao nginika! Hiokoo ngomi miniao de mia hininga ma rorahaiino dika! De naa tinihihohininga abe ahi demo kangano nginika, abe tato iti ufa niawohanga abe ahi demo naa, ena gea tanu o bodo ma demoino tapake. De abe ma titi ona gea abe yoboaino, ngaro ma titi manga gogere eko o kia dika utu naga abe ona yomahigiriiri genangino masara gea ngohioo ka idadi tomahigiriiri genangino.

²² Ho sarakia, marai ona yomahigiriiri abe ma titi ona o Ibarani ma nyawa. Masara ngohioo o Ibarani ma nyawa. De nako ona yomahingahu ato o Isiraele ma nyawa, gea ngohioo o Isiraeloka. De marai yomahigiriiri ma titi ona yomaboa o Abarahaama ai totoforauku. Iya, gea ngohioo tomaboa to una gea ai totoforaukuino.

²³ De marai ona yomahingahu ato iwileleani o Yesusu Kristusika, masara ngohioo tileleani Unangika. De naa ahi demo duru hoka womatengo iwitogohangoka ai demo tapake, masara naa o demo ma gou-goungu dika tomahingahu nginika. Abe nako ona de ngohi, masara ka ngohiohi duru irahai ahi leleani abe o Yesusu Kristusika. Angamoi ka to ngohiohi ahi karajaanga itubuho tokarajaanga ahi tagongoka. De nako ngohi de ona, ka ngohiohi ma ngoe ihitaoko de ihibuika, de nako ihipoha-poha gea duru ka ma moiua dika masara duru ma ngoe ihipoha-poha. De ngohi ma ngoe taohana o bodito ahi wowangoka.

²⁴ Abe ngohi naa ma motoa ibooto o Yahudi ma nyawa ihipoha-poha de o migi abe gea ma getongo ihipoha ma moruange de ma hiwo ahi badangino.

²⁵ De ma hange ibooto o nyawa ihipoha-poha de o gota, de nagali ma moi ibooto abe ihihakaru de o hakaru ma ago-agomo. De ma hange ibooto ngohi naga o gahioka de mia kapa ihiboha-boha ma pahika de hiadono mia kapa gea awede-wederuku. De naga ma moiuku ngohi o gahi ma goronaka de ka topuda-pudaika abe ahi wange moi de ahi futu moi.

²⁶ De ahi dodagi duru kohangoe abe ngohi totagi-tagi, de genangino ma ngoe o bodito taohana. Abe nako o akeroka gea taohana o nguihi, de nako o dudungoka gea naga yotobaora-ora imigoana la ato imiora. De nagali ma bodito taohana ma titi o nyawaino, abe ngaro to ngohi ma hirete ahi gogianongoru o Yahudi ma nyawaino eko ngaro abe ko o Yahudi ma nyawaua, masara ma bodito taohana. De ngaro o kotaka eko ma homoaka eko o gahioka, ma naga ma bodito mata-mataika abe taohanoka. De ngaro o nyawaino abe ona yomahihawo-hawo de yomahingahu ato ahi gogianongoru o Yesusoka masara gea yoeluku dika, de onangoo manga hidee la ihibodito ngohino.

²⁷ De ngohi tomamaoka ahi karajaanga ma dubuho hiadono ahi badanga ma buturungu ko iwaka, de ma ngoe ihihidetebiniye hiadono o giooko ko tamakeua. De ma ngoe duru ihihafini de ahi ngomaha yodudungu, abe ahi inomo ko ihiwedonua ho ka tomatongohono dika ahi hafini ma goronaka. De nagali abe duru ihimaata angamoi ahi baju de ahi ngoere ko iwa la tomakorobitino.

²⁸ De gea mata-mata abe tamao ahi badangino dika, masara nagahi ahi hiningaoo ma huha abe o wange-wangeiye ihihitubuho ahi hiningaka. De gea ma titi ka ihikaika tongano-nganono de tomaleha o gareja ma dodoomu homoi-homoiika manga ngongaku ma wowango hokokia itagi.

²⁹ Abe nako naga nanga gogianongoru o kiaka dika de manga ngongaku ibole, de gea ngohioo ahi hiningaka tamao ihiboleoka. De nako hiadono toihene naga o nyawa abe yahirehene hiadono yoruba o howonika, gea to ngohi ahi hininga ma ngamo ifaeoka. De hokogea ahi badanga ma kokangela de ahi hininga ma huha abe tamaoka ahi wowango de ahi leleani ma goronaka.

³⁰ De mangale ma titi ngini nihihiribuutu la tomahitaana abe tagou-goungu tileleani o Yesusu Kristusika ho ngohi tamao abe kiani tomahigiriiri ma titi ahi tagongo Unangoka. Ho mangale ma titi kiani tomahigiriiri, ho koaho tomahigiriiri ma titi ahi bole-boleino gea. Abe ahi demoino gea de ka idadi nihihioriki abe ngohi naa o bole-bole ma nyawa dika.

³¹ De ahi demoino gea de duru ko tinielukua. De Ma Jou duru wohioriki abe ahi demo gea ma gou-goungu dika. Abe Una gea to nanga Baluhu idodutu o Yesusu ai Baba, ho itiai ka Unangika dika ngone hihigiriiri naa de ka hiado-adonika.

³² De naa moi tiniade-ade nginika abe ihihitaana to ngohi ahi bole-bole. Abe ma dihiraino ngohi naga o Damasiki ma kotaka, de ma oraha gea manga koano o Aretasa de nagali manga hihira manga tonakoka abe iwihiromanga manga gubernuuru. De ma gubernuuru una gea duru ko wohisanangiua ngohino hiadono wato ihitaoko, ho una wahuloko ai gogoana ma nyawa la ihigoana o kota ma dadaduhu ma ngoranoka. Abe una wato nako ahao ngohi toboa genangino la tato tohupu ma hoanika de ona kiani ihitaoko ma ngoranoka gea.

³³ Masara ahi dodiawo genangoka ihihuloko la ato tomanoauku o tupa ma amoko ma goronauku. De naga genangoka o doongo moi o kota ma dadaduhu ma poretoka. Ho ngohi tomanoauku de ihihidowora de o tali ka hiadono dau ma tonakuku. De hokogea ngohi ka idadi toara ma hoanika de ona ko ihitaokua! Ho abeika ahi buturungu de ahi domoroini abe ma dihiraino gea talawana ahi musuika, abe ngohi ka idadi toara ahi musuino! Ho genangino de tomahitaana abe ngohi naa ka o bole-bole ma nyawa dika.