2 Korintusu 10 - Ma Jou ai Demo-demo o Totobelohoka

O Paulusu womademo abe ma titi wileleani o Yesusika

¹ De naa ngohi o Paulusu duru togahoko nginika la ahi demo ahi huratino naa niodafongo. De gea togahoko de tapake to Yesusu Kristusu ai hininga ma dodipokouku de ai hininga ma rorahaiino. De tohioriki abe ngini utu genangoka nihihigurubungu ngohino de niato, “Ou, nako una gea ai gurutika de gea naga ai domoroini la wonahurata de o demo ma bobuturungu. Masara nako de wonaadono ngoneino de duru ai domoroini ko iwaka masara una ngade-ngade de wohawanoka to ngone nanga himangoka.”

² De ngini utu nitemo niato ngomi naa miwango hoka o nyawa biaha dika abe ko iwa mia hiakunu Ma Jou o Womahino. Ho ngohi tato marai ahao ma oraha toboa tinitutumu de kiani tapake ahi domoroini de ahi demo ma buturungu nginika abe homarihimanga ngini de ngohi, la ngini ka idadi nihioriki abe ahi kuaha igoungu Ma Jou o Womahoka de aino iboa. Masara tanu ngohi tonganono la ngaro ufa dika de tinitemo hokogea abe ma oraha homakoketemo.

³ De igoungu abe ngomioo o nyawa dika abe mimanoa o duniaka naa. Masara nako miaparangi Ma Jou ai musuika de ko o duniaua ma hiaturu de ko o dunia ma biahaua miapake, de ko o nyawaua dika ma buturungu miapake.

⁴ Abe ngomi naa ko miapakeua o duniaka ma dae masara ngomi miapake to Ma Jou dika ai dae abe ena gea duru de ma buturungoka. De ngomi miapake ai dae gea angamoi ngaro ai musu ma buturungu naga, masara ka to Ma Jouohi ai dae duru iputurungu hiadono ka idadi wohiwedere ai musu ma buturungu. De ngaro naga o hilawana ma demo o nyawa manga hiningaka abe yongaku enangika hiadono iwioluku Ma Jouika, masara ngomi ka idadi mihibinaaha manga demo gea ma titi Ma Jou ai kuahaino miapake.

⁵ De naga o nyawa utu abe ona yomahingahu ato manga tobahioriki ma gogurutiye. Ho ona gea yomagoraka de hiadono yotemo ato nako de Ma Jou ai tobahioriki masara ka to onangohi ikurutiye. Masara enangoo gea ngomi ka idadi mihikala manga tobahioriki mata-mata abe Ma Jou ai kuahaino. De gea mihikala de ahao o nyawa gea ka idadi yomangali de iwihingounu o Yesusu Kristusika.

⁶ De abe ma titi ngini naa, ngomi duru mioigo la ngini niwihingounu Unangika, ho minihidoakohi nia oraha la ka idadi niwigilio de niwiniiki nanga Baluhika. Masara nako ahao ma oraha mimahiadono nginika de gea ngomi mimahidiaioka la minidotoko de ma dubuho abe ngini onagona dika ko niwihingounua Unangika.

⁷ De naa moi tinitaere nginika, abe ngini gea nako o nyawa niatailako la niahioriki ona gea hokokia manga wowango, gea ngini niolega dika manga badanga ma rupaika de ko niafikirikaua ma titi manga hininga ma dumutu hokokia. Abe marai naga utu nginioka duru yomahingahu abe ona o Yesusu Kristusu ai nyawa de Una wahitagongo moi la ona iwileleani Unangika. De nako manga demoino de yomahingahu ato ona yodadi o Yesusu Kristusu ai duduhunu masara ma titi ngomi naa de ona ato ko iwa mia tagongo o Yesusu Kristusino, gea ona kiani yomafikiroli manga hiningaka. Angamoi nako ona yagou-goungu yodadi to Una ai duduhunu, gea ona koaho to ngomi mia wowango yongano-nganonoli de manga hininga ma rorahaiino la hiadono duru ihioriki abe ngomioo midadioka o Yesusu Kristusu ai duduhunu de wiwileleani Unangika. Ho ngini koaho niatailako o nyawa manga hininga la genangino de ka idadi duru niahioriki manga wowango hokokia ma ngekomo. Ufa niolega o nyawa manga badanga ma rupaika dika.

⁸ De naa ngohi tamao abe ka tomahigiriiriholi ma titi to ngomi mia tagongo de mia kuaha nanga Baluhoka, de ngaro totemo hokogea masara ko ihimalekua. Angamoi ma kuaha gea nanga Baluhu idodutuoka de aino womihitagongo ngomino la minihiputurungu ngini nia ngongakuika, de ko ma titiua la ngomi minihirehene o homoaika.

⁹ De ngohi ahi hininga ko ma dumutua la tinihihawana ahi hurata ma demoino naa la ahao nihimodongo ngohino. Masara koaho ngini nihioriki abe ahao tinihiree-reeika nginika.

¹⁰ Angamoi igoungu naga utu yotemo ato, “Ngaro ufa himodongo o Paulusika, angamoi ai huratino dika ai demo duru ma dubuho de ma buturungu, masara nako una woboa wonatutumu de ka idadi himake de hihioriki abe duru ai buturungu ko iwa. De nako wonadotoko, de ai demoino gea ka wofeto-feto dika.” Hokogea o nyawa utu manga demo ma titi ngohi.

¹¹ Masara koaho ona gea ihioriki abe mia demo mia huratoka ko imakohowonua de mia wowango ma datoro abe ma oraha miboa la homarihimanga ngini de ngomi. Angamoi ahi demo o kia dika naga ahi huratoka naa de gea ahao tohingodumu abe ma oraha miboa minitutumu genangoka.

¹² De igoungu abe o nyawa utu nginioka yomahikurutiye abe ona yomahingahu ato naga manga tagongo duru ikurutiye o Yesusu Kristusino. De mangale ma titi manga hininga gea, ho ona ngaro ufa yopusingi ma titi ngomi naa abe ko kia-kiaua imidaene. Angamoi bote ona gea duru ko moiua yomaketero de ona ma titi manga gogere duru ikurutiyeholi. Ho done sarakia ngomi naa ka idadi mimahidotelega de ona la miato ngomi naa mia gogere imaketero hoka to onangoli? Marai ngomi duru ko miadonikaua manga gogere abe ato bari duru ikokurutiye. Masara mia demo naa tanu ka o sosaguulu ma demo dika abe miabukuleloro ona gea angamoi ngaro hokogea yomahingahu masara manga demo ko yagou-goungua abe ma titi manga tagongo eko manga gogere ma gogurutiye gea. De ona gea tanu duru yobodo angamoi yomahidotelega ona de ona dika la ihioriki ka onagonahi bari yokurutiye, masara gea ko o sosawaro ma gou-goungua abe yapake.

¹³ De nako ngomi naa, nako hoka o tagongo eko o kuaha ko iwa ngomioka de ahao ngomi duru ko mimahigiriiriua genangino. Abe to ngomi mia hininga ma dumutu gea la ka ihikaika mia tagongo midiai Ma Jouika de ufa mirehene genangoka de aino. De ngomi mihioriki abe mia tagongo nginioka gea iboa ko ngomiokaua de aino masara ka Ma Jouoka dika de aino womihitagongo. De gea ma titi hiadono ngomi mioigo la mia tagongo miao itiai abe ma titi ai Demo-demo minihingahu-ngahu nginioka.

¹⁴ De abe ma titi mia tagongo, Ma Jou Una ma hirete womihitagongo la wiwileleani ti ngini nia hidogoronaka. Angamoi ma dodihiraino de ngomi naa ma hirete miboa nginika o Korintusu ma kotaka, de ahao to Yesusu Kristusu ai Abari ma Rorahai ngomi minihingahu-ngahu nginika. Ho gea ma titi hiadono ngohi tato duru ko idadiua o nyawa utu imitae ngomino ato ngini naa ko mia tagongo ma kuahakaua.

¹⁵ De ngomi naa ko mimahitongomiua o nyawa utu manga karajaanga ma hasili, angamoi ka ma dihirahi de ngomi ma hirete mikarajaanga nginioka. De ngomi duru mionganono abe ti ngini nia ngongaku ka idogo-dogohi Ma Jouika la ahao to ngomi mia karajaanga ma utumu abe naga nginioka enangoo ka idadi idogo-dogo. De gea ahao ma utumu ka idadi duru itobafaata abe o nyawa utu manga wowangoka.

¹⁶ De nako hiadono mia karajaanga ma utumu itobafaata nginioka, gea de ahao ngomi mia hininga naga la miloiki o tonaka utu-utuikali. Abe ma tonaka gea utuohi ikurutika de ti ngini nia tonaka, la genangikaoo ka idadi mihingahu-ngahu o Abari ma Rorahai. De o tonaka ma hungioka gea de ngomi mionganono abe ko iwa o kadatoro abe ma titi to onagona manga tagongo naga la iwileleani o Yesusu Kristusika ma tonakoka gea. De genangoka marai ngaro ufa ngomi mimademo de mimahigiriiri ma titi mia leleani abe Ma Jouoka de aino womihitagongo.

¹⁷ Angamoi Ma Jou ai Demo-demoka de inahitiari ma titi nanga higiriiri. Abe ma dodihiraino de ihitulihukuoka ato, “Ufa o nyawa yomahigiriiri ona ma hirete, masara ona gea koaho iwihigiriiri nanga Baluhu idodutuika dika ma titi to Una ai datorino.” Hokogea ihitulihukuoka ma dodihiraino.

¹⁸ De ai demo gea duru igoungu, angamoi nako homahigiriiri ngone ma hirete, gea nanga demo tanu ma homoa dika. Masara nako hiadono nanga Baluhu wonahigiriiri ngone, gea de ahao o demo abe duru de ma titioka. De marai hokogea ahi hininga abe ma titi o higiriiri ma demo.