2 Korintusu 1 - Ma Jou ai Demo-demo o Totobelohoka

O Paulusu ai demo ihira-hira o Korintusu ma garejaika

¹ Ahi gogianongoru o Yesusu Kristusoka abe o Korintusu ma kotaka nimanoa, de nginioo o Akaya ma propinsi ma tonakoka abe nidadioka Ma Jou ai nyawa. Ngohi naa o Paulusu, abe Ma Jou wohiirikoka ngohi ma titi to Una ma hirete ai mau la todadi o hidingoto ma nyawa abe tahingahu-ngahu o nyawaika ma titi o Yesusu Kristusu. Abe o Yesusu Kristusu Una gea nanga Koano abe Ma Jou wonahibehehongoka. De o Timotiusu, nanga gianongoru o Yesusoka, una naga de de ngohi. De o hurata naa mihidingoto abe ngini Ma Jou ai gareja ma nyawaika ngaro o Korintusu ma kotaka nigogere de ngaro o ngi utuoka o Akaya ma tonakoka nigogere.

² Ho ngini mata-mata tinigahoko Ma Jou nanga Baba de o Yesusu Kristusu nanga Baluhiye la ai owa de ai hininga ma miriidi winihidoaka nginika.

Abe ngaro o Paulusu ai kangela ma ngoe de ma dubuho abe waohana, masara ma kangelaino gea de womadotoko abe Ma Jou Una o lalaru ma titi

³ De ngone kiani hihigiriiri nanga Jouika, abe Una gea to nanga Baluhu idodutu o Yesusu Kristusu ai Baba. Ho mangale ma titi gea ho duru itaana abe ngone hihigiriiri Ma Jouika. De Ma Jou Una gea ai dora duru itagi ngoneuku ho o hininga ma dora ma titi naga Unangoka. De Unangoo abe duru wonatobalaru ngoneino ho o lalaru ma titi enangoo naga Unangoka.

⁴ Abe ngaro o kangela o kia dika naga ngone haohana masara Una gea wonatobalaru. De ai lalaruino gea de Una wonahiakunu la ngoneoo ka idadi halaru o nyawaika abe onangoo ahao yaohana o kangela manga wowangoka. De gea ka idadi ngone hapake ma lalaru abe hamakeoka Ma Jouoka de aino la onangikali halaru.

⁵ De igoungu abe ngone duru ma ngoe hamake o kangela nanga wowangoka ma titi o Yesusu Kristusu hinii-niiki. Masara nagaoo o lalaru duru ma ngoe abe iboa o Yesusu Kristusoka de aino ngoneino la wonalaru nanga hiningaka.

⁶ Ho ngaro ngomi naa imihikangela de ngaro imilaru, masara ma bahauku de ngini niamake ma utumu genangino! Angamoi nako ma oraha imihikangela de gea ngini niamake to ngomi mia wowango ma datoro ma rahai dika abe ma oraha mia kangela ma goronaka, de genangino ahao inihigaro de iniduhunu nia wowangoka. De nako ahao ma oraha imilaru ma enangoo idadi o lalaru nginikali, angamoi gea de ngini ka idadi niamake abe hokokia Una womilaru ngomino. Ho gea de ahao nginioo ka idadi nimatongohono nia kangela ma goronaka abe imaketero hoka ngomioli mimatongohono ma oraha o kangela miaohana.

⁷ De gea ma titi hiadono ngomi duru mionganono abe ngini ko nirehenua nia ngongakuino ma oraha inihikangela. Angamoi ma oraha naa de nginioo naga nia kangela niaohana, masara ngomi naa duru mihioriki abe Ma Jou ahao winilaru nginika abe imaketero hoka ngomioli womilaru. De ai lalaru gea duru inaduhunu la ufa horehene Unangino.

⁸ De ahi gogianongoru, ahi demoino gea ma titi o kangela de o lalaru de ko tofeto-fetoua. Abe ngomi duru mioigo la ngini nihioriki ma titi to ngomi mia kangela miaohana nengokadauino abe ma oraha ngomi naga o Asia ma propinsi ma tonakoka. Abe mia kangela gea duru itubuhoholi, hiadono ngomi miamao mia hininga alufungoka de o kangela hiadono ngomi miato bote mia wowango ma baha adonoka. Ho ngini genangoka ufa niataoko ihowono abe niato mia kangela ko iwa. Koaho ngini duru nihioriki ma titi mia kangela ma dodubuho gea!

⁹ De gea ngaro ngomi duru mionganono abe hoka mihonengoka, masara genangino de mimadotoko la ufa mimahinganono ka ngomi ma hirete dika la miato ufa mihonenge. Masara koaho mimahinganono ka Ma Jouika dika, angamoi ka Una dika ka idadi wahimomiki o nyawa manga honengoka de aino la yowangoli. Ho ma oraha gea abe mionganono hoka mihonengoka de ngomi duru mimahinganono ka Unangika dika.

¹⁰ De igoungu ma oraha gea Una womiduhunoka mia boditoino la ufa mihonenge. De ngomi duru mihioriki abe Una ahao ka ihikaika womiduhunu ngaro o kangela eko o bodito o kia dika naga miaohana, angamoi ngomi duru mimahinganono ka Unangika dika.

¹¹ De abe mia kangela ma goronaka de Ma Jou womiduhunu, tanu nginioo nimiduhunu ma oraha gea, angamoi ngini nimigahoko Unangika ma titi ngomi. De abe ngini ko nia ngoe nimigahoko ma titi ngomi de hiadono Una winipaluhu nia niniata gea de womiduhunu ngomi, gea de ahao o tarimakase ma demo ma ngoe ihidumutu Ma Jouiye. Ho gea ma bahaika de o higiriiri nihiboa Unangika abe ma titi nia tarimakase ma demoino. Ho ahi gogianongoru, ngomi tato koaho ngone mata-mata duru hihigiriiri Ma Jouika ma titi ai lalaru kohaamoko abe wapake ngoneino ma oraha o kangela haohana.

O Paulusu wahitararono abe hokokia ai hininga hiadono ko woliouahi o Korintusika

¹² De ma titi o kia hiadono ngomi mimagahoko ti ngini nia niniata de duru mionganono abe ka ihikaika nimiduhunu nia niniatino? De gea ma titi abe to ngomi mia hininga mimatailakoka de gea ko imakalawanua de Ma Jou ai mau masara mia hininga gea imakiniiki dika de to Unangoli ai hininga. Abe ma titi to ngomi mia wowango ma datorino de miwango mitotiai, abe ngaro o dunia ma nyawa masara ona miao irahai, de hongoli ngini, duru miniao irahai nginika. De gea ko iwa mia hiningaka mia hidee o dorouika, masara gea duru mimahingahu mia hininga ma dola ma gahumu nginika la ngini nihioriki mia hininga ma dumutu hokokia. De ngomi ko mimahinganonua o dunia ma sosawaroika la imihihira-hira, masara ngomi mimahinganono ka Ma Jou ai hininga ma owaika dika. Ho mangale ma titi to ngomi mia hininga ma rorahai gea hiadono duru mionganono abe ngini ka ihikaika nimigahoko Unangika ma titi ngomi.

^13-14 De hokogenangoo de ahi hurata abe nengokadauino tohidingotoka nginika, abe ma hurata ma dolakaoo de ko iwa mia hininga ma dorou nginika. Abe gea ahi hurata ma demoino de ko iwa ma dogogono masara ahi demo tohiree-reeika nginika. De ko iwa mia hininga ma dumutu utuoli genangino, masara abe ahi hurata ngini niabasaka de ka genangino dika abe ngini niamake. De ma oraha naa ahi hininga marai ko mata-matauahi ngini niataoko, masara tonganono la ahao ti ngini nia dadaoko duru iahumu ma titi to ngomi mia hininga nginika. La gea ahao nako ma wange adono abe nanga Baluhu idodutu o Yesusu woboali de ngini ka idadi duru nimidogarago ngomino. De ma oraha gea ahao ti ngini nia hininga ma garago imaketero hoka to ngomioli mia garago, angamoi ngomi naa duru minidogarago ma titi ngini genangoka.

¹⁵ De gea ngohi duru tohioriki de tonganono abe ahao ma oraha homakamakeoli de ngini nihidafongo de nia hininga ma sanangi. Ho ngohi ma dihirainohi de tomaputuhoka tato toboa tinitutumu ma hinooto, angamoi toigo la tinihiutumu ma hinooto nginika.

¹⁶ Abe ngohi ma dihiraino de naga ahi hidee la ahi dodagi ma goronaka abe o Makedonia ma tonakika toiki de tinidulu nginika abe ngini nigogere o Korintusu ma kotaka. De ahao nginioka tosoboli de togila-gila ahi dumutu o Makedonia ma tonakika. De ahao genangoka de tolio de tiniduluoli nginioka. De gea tinidulu ibooto de ahao togila-gilali o Yudea ma tonakika. De tonganono abe ma oraha tinidulu ma hinootoka gea de ngini ka idadi nihiduhunu abe ma titi ahi dodagi ma perelu o Yudea ma tonakika. De hokogea to ngohi ahi hidee ma dihiraino abe tato tinitutumu la ngone homahiketehiutumu nanga hininga ma sanangioka de aino.

¹⁷ De igoungu ahi dodagi ma hidee gea ko idadiuali taniiki, abe ma oraha o Makedonia ma tonakoka tosobo de ko tiniduluokaua nginika. Ho marai naga ngini utu niato bote to ngohi ahi putuhu duru ko kia-kiaua angamoi tokelu-kelu genangino. De marai ngini utu niato bote ngohi de o dunia ma nyawa mia hininga imaketero dika. Masara gea ngini koaho ngaro ufa dika nitemo hokogea ma titi ngohi, angamoi ngini naa nihihiorikoka to ngohi ahi hininga ma rahai nginika! Masara nako o dunia ma nyawa to ona manga hiningaika dika yolegaika la genangino de manga hidee yodiai. Abe ona ngaro yotemoka ato, “Iya,” masara duru ko itedekanua de manga hininga aturuuruoka ho yotemoli ato, “Koua.”

¹⁸ Masara ko hokogenangua to ngohi ahi hininga. Abe imaketero hoka Ma Jou wotemo duru watobagou-goungu dika, ho ngomioo ma gou-goungu dika mitemo-temo. De to ngohi ahi demo nginika de duru ko iwa ahi hininga la tinieluku. De gea nako ngohi totemo tato, “Iya,” de gea duru ko taturuurua masara ka hokogea dika ahi demo.

¹⁹ De ngohi totobatemo ma gou-goungu dika nginika angamoi ngohi tomaaduru hoka o Yesusoli ai hininga. Abe o Yesusu Kristusu Una to Ma Jou ai Ngofaka, de Una gea abe ngomi imiruange minihingahu-ngahu nginika, abe ngohi de o Silasa de o Timotiusu. De o Yesusu Una gea nako hiadono wotemoka wato, “Iya” de gea duru ko ma iwa abe ahao waturuuru ai hininga la ko idadiuali ai demo. Abe ma titi nako hoka waturuuru gea imaketero hoka Una wotemoka “Iya” masara de ipaha de wotemoli wato “Koua,” masara to Una ai hininga duru hokogenangua. Masara abe ma titi o Yesusu, ngone ka idadi hotemo hato Una ka ihikaika ma gou-goungu dika wotemo, de Una wohingodumu ai behehongo mata-mataika. Ho ngomi naa mimaaduru abe hoka to Unangoli ai demo gea.

²⁰ De hongoli Ma Jou ai behehongo mata-mata abe Una wotemoka, gea wohiaturu la ai Ngofaka o Yesusu wodiai de wohingodumu ma behehongo gea mata-mataika. De gea ma titi hiadono o Yesusu wohiboa o higiriiri Ma Jouika. De mangale ma titi ngone hamake abe o Yesusu wohingodumu Ma Jou ai behehongo gea, ho ngoneoli hotemo hato, “Iya, igoungu! Amin!” De nanga demoino gea de ngoneoo hohiboa o higiriiri Ma Jouika. Ho mangale ma titi Ma Jou de Ma Jou ai Ngofaka ona yatobagou-goungu manga demoino, ho ngomioo duru mimaribuutu la o demo ma gou-goungu dika mitemo-temo mia uruoka de aino.

²¹ De hokonaa Ma Jou ai behehongo ma demo muruono naga abe Una ko wawohangikaua masara watobagou-goungu wohingodumu. Abe Una wonahidogogere ngomi de ngini la ngone hogogere o Yesusu Kristusoka. De Unangoo abe wonahiputurungu nanga hiningaka de wonahiakunu la ufa hokelu-kelu nanga ngongakuoka masara duru homahingutukuku genanguku. De Una gea abe womadingakoka ngone la hodadi to Una ai nyawa abe hileleani Unangika.

²² De nagali abe Una wonahitunguuoka ma titi wonahidoaka Ma Jou o Womaha ngone homoi-homoiino la Una gea wodadi to ngone nanga dodunguu to Ma Jou ai himangoka abe ma titi hodadioka to Una ai nyawa. De Ma Jou o Womaha, Una gea nanga hingaku ma dodunguu. Ho mangale ma titi Una naga womanoa nanga kokihiningaka ho naa ngone duru hohioriki abe ahao hamake nanga utumu abe ma dodihiraino de Ma Jou wonahibehehongoka ngoneino. Ho abe imaketero hoka Ma Jou watobagou-goungu ai behehongo ma demoika, ho ngomioo mia hiningaka la duru mioigo mihingodumu mia behehongo ma demo mata-mataika.

²³ De abe nengokadauino de igoungu naga ahi hidee la tinitutumu, ho naa tinihingahu nginika ma titi o kia idadi ngohino hiadono ko tinitutumua. De naa ngohi tohibehehongo de tafetongo Ma Jou ai romanga abe Una ma hirete wodadi to ngohi ahi hakihii abe ngohi ko tinielukua. Ho ngohi duru tagou-goungu abe ahi demo nginika. Ho naa tomahingahu tato ngohi ko tolioua nginika angamoi tato done ngohi duru tinitaere nginika de o dodaere ma dubuho. Angamoi ngohi tomahioriki abe nako ma oraha gea toboa nginika de ahao duru tinitaere, ho tomaputuhu la ngarouahi toboa tinitutumu ngini o Korintusoka done tinihitubuho nginika. De abe ma titi gea duru ko tinielukua.

²⁴ Masara ufa niataoko ihowono to ngomi naa mia hininga. Abe ngomi ko mia hiningaua la mimahidadi ti ngini nia koano ma titi nia ngongaku ma dodagioka. Abe ko ma titiua ngomi minihuloko miato kiani hokonaa de hokonaa nidiai. Angamoi ngomi minihioriki abe ti ngini nia ngongaku duru imahingutukoka o Yesusu Kristusoka. Ho ngomi naa mia hininga la miniduhunu dika, abe tanu ngone homakutuono homakuduhunu nanga ngongakuoka. De gea mioigo miniduhunu la hiadono ti ngini nia hininga homoi-homoi duru aomanga de o garago ma titi nia ngongakuino.