2 Kokoano 7 - Ma Jou ai Demo-demo o Totobelohoka

¹ De ahao o Elisa wipaluhu ma koanoika wato, “Abeika nototoihene Ma Jou o Yawe ai demo-demoino naa! Abe Una gea wotemo wato, ‘Nako itebinino o wange hokonaa de ahao naga o inomo ma amoko nia kotaka naa de ko ihaliokaua. Abe gea de ahao naga o nyawa o kota ma dadaduhu ma ngoranoka abe ka idadi yafuku-fukunu o tarigu ma rorahai o kilo hange de gea ma ija o haaka ise-senge moi dika! De nako o gandumu utu gea ka idadi o kilo butaanga de enangoo ma ija o haaka ise-senge moi dika! Ho itebinino de nia inomo duru imura!’ Hokogea Ma Jou ai hingahu ma demo ngonaika.”

² De o Elisa wotemo ipahaino de ahao ma koano ai duduhunu womatengo wotemo wato, “Ou, marai ani demoino gea de noeluku dika! Angamoi ngaro hoka Ma Jou Una ma hirete wafelenga o Horoga ma ngorana ma oraha naa naga la o gandumu gea wonahipurarahuku ngoneuku masara duru ko idadiua abe hoka ani demo gea notemoka!” De ai demo gea o Elisa woihene ipahaino de ahao o Elisa wipaluhu wato, “Gea duru igoungu idadi itebini, de ngona ahao namake ma inomo ma amoko gea de to ngona ma hirete ani lako hinooto. De ngaro namake de ani lako masara ngona ko namaoua ani uruino.” Hokogea o Elisa ai hitiari ma demo.

O Siria manga tentara mata-mata yokokiloara

³ De ma oraha gea naga o nyawa yaruata abe yapado-pado de ona yogogeruku o Samaria ma kota ma ngorana ma homoaka. De ona gea yomakoketemo ato, “Done ma utumu sarakia nako ngone hogoo-gogeruku dika naangoka? Angamoi duru inahafi-hafini dika ho ko inatedekanokaua de hoborihonenge ma titi nanga hafini. Koaho homaino-inomo dika!

⁴ Masara ngone o kiaikahi homalingiri nanga inomo? Angamoi nako hoka howohama ma kota ma goronaika ahao hohonenge dika ma titi onangoo doka ko iwaka manga inomo. Masara nako ngone ka homagoo-gogerohi naangoka dika ahao nanga baha imakadaene dika. Ho abeika hoiki o Siria manga tentara manga doomuika de homagahoko o inomo onangika. De gea homahiadono onangika de marai inatoma dika, masara gea ko adodoaua angamoi nanga baha itigioka naa. Ho marai ona inalega de manga hininga ma hiokoo de ka idadi inaduhunu la ufa hohonenge!” Hokogea ona yaruata yomahikagaro.