2 Kokoano 6 - Ma Jou ai Demo-demo o Totobelohoka

O Elisa o heheranga wodiai abe o bahuku o behino wohipuda o akerino

¹ De Ma Jou ai uru ma dodofanga naga manga dodoomu moi abe ka ihikaika yomatoomuino la ka idadi o Elisa wadotoko masara manga tau ngade-ngade ko yawedonokaua. Masara o wange moiuku de naga womatengo manga doomuino wihingahu o Elisaika, wato, “Mia baluhu, nanga doomu ma ngi nenanga ko inawedonua abe ma oraha ngona nomidotoko de duru imiefotokaholi.

² Ho ngomi mimagahoko nomihigunoa midiai nanga doomu ma tau abe utuohi ilamoko abe ka idadi ngone mata-mata hogogere doka ma goronaka. De abe nako ngomi, ani gogilaongo, mia hidee mikokiloiki o Yorodani ma akerika de genangoka homoi-homoi o gota mimaleino, la imiwedono mia tau ma kiahonanga midiai.” Hokogea wihingahu manga dimonika manga hidee. De o Elisa wosanangi manga hideeika ho gea wato, “Irahai, ngini niloiki nidiai dika abe hoka ngona notemoka.”

³ Masara naga manga doomuino womatengo o nauru abe wogahoko unangika, wato, “Mia baluhu, ngomi ani gogilaongo duru misanangi abe nako ngonaoo nominiiki ho tomagahoko la nako ka idadi nominiiki.” De o Elisa wopaluhu, wato, “De ngohi tosanangi ani higaroika gea ho ngohioo ka idadi toiki.”

⁴ Ho ona yomakiniiki yoiki o Yorodani ma akere ma ngigorika de yomulaenge o gota ma bululunu yotolanga la idadi manga tau ma kiahonanga.

⁵ Ka de womatengo o gota wotolanga de ai bahuku ihokana ho itubuku doka ma akerika abe genangoka hatoli ma akere ilukuku. De una waamokiye wohidaere, wato, “Adoo, ahi baluhu, gea abe ma bahuku gea tomabauino ho gea ko to ngohiua!” Hokogea ai hininga ma huha wihingahu o Elisaika.

⁶ De Ma Jou ai uru ma dodofanga, o Elisa gea, wileha unangika, wato, “Ahi dodiawo, ka idadi nohihidumutu abe o kiauku itubuku?” Hokogea wileha de una wihidumutu abe o kiauku itubuku. De ahao o Elisa o gota ma jaga moi ma eteteke waotoino de o gota ma jaga ma dobiki waumo o bahuku ma dingiiuku. Ka de o gota ma dobiki gea waumo de itubuku ma bahuku ma dingiiuku ma akeruku de ka itodokanino de ma bahuku daukiye ipuda! De duru o akere ma lokuoka dika ipudaiye o bahuku o behino gea abe ko ilutuokaua.

⁷ De o Elisa witemo ai dodiawoika, wato, “De ma bahuku gea noiki nagoraka dika.” Ho una o nauru wodobongika ma bahuku wagoraka.

O Elisa wataokino o Arama manga tentara de ai budi ma demo

⁸ De ma moiuku o koano o Arama ma tonakoka waparangi o Isiraele ma nyawaika. De to una ai parangi ma hiaturu kiani yomakoketemohi de una abe o koano ai tentara manga hidimono. De ahao manga koano womaputuhu manga ngi o Isiraele ma tonaka ma batingoka abe genangoka yomatoomuino de yomahidiai yangohama de yaparangi o Isiraele ma nyawaika. De yoigo la ufa manga hidee gea o nyawa utu ihioriki.

⁹ Masara Ma Jou ai uru ma dodofanga, o Elisa, ngaro ufa o nyawa iwihingahu manga hidiai ma ngi angamoi Ma Jou wihingahu unangika abe o Arama ma nyawa manga koano ai hidee. Ho una duru itaiti ai hidingoto wihuloko woiki wihingahu o Isiraele ma nyawa manga koanoika abe o kiaka manga musu yomahidiai yangohama yaparangi, wato, “Ahi koano, ngona duru nomahidodiai de ani tentara abe niboa ma ngiino gea angamoi o Arama ma nyawa manga tentara ahao yomatoomuino genangoka la iniparangi.” De o ngi ma romangoo o Elisa wafetongo ai koanoika.

¹⁰ De o Elisa ai hingahu gea ahao o Isiraele manga koano wadofanga ai kokawaahaika abe ahao manga musu gea yangohama onangika. De wahitiari abe o Arama ma tentara manga hidee yomatohiki la yangohama de yaparangi ho kiani ona duru ihidodiai abe yogoa-goana. Hokogea ma muruono naga abe Ma Jou ai uru ma dodofanga manga musu manga hidee wohirusaka. Abe una wihingahu o Isiraele ma nyawa manga koanoika ka hiadono o Arama ma nyawa manga koano ai hidee ka ihikaika wohirusaka.

¹¹ Ho o Arama ma nyawa manga koano ai hidee gea mata-mata ka ihikaika ko idaa-dadiua hiadono una ka wongamo de watae ai tentara ma hidimo-dimonika angamoi ona dika ihioriki manga parangi ma putuhu. Ho ona mata-mata manga koano wabehehongo la yoboa unangino de ahao waleha onangika, wato, “Marai tinihiorikoka abe naga womatengo nginioka abe wonafukunu nanga musuika. Ho onaguna nenangoka abe una ka ihikaika yahingahu nanga parangi ma hidee o Isiraele ma nyawaika?”

¹² De ai tentara ma hidimono womatengo wopaluhu, wato, “Mia baluhu, ma titi nanga parangi ma hidee ko ngomiokaua de aino itagi onangika. Masara naga womatengo abe una Ma Jou ai uru ma dodofanga o Isiraeloka ai romanga o Elisa abe ka ihikaika ma hingahu gea ihititi unangoka de ahao itagi manga koanoika. Ma Jou ai uru ma dodofanga gea Una wihiakunu hiadono ka idadi wihingahu to una ai koanoika abe to ngona mata-mata ani demo de ngaro gea nohidemo duru ani kamaroka dika, masara enangoo ka idadi wohioriki.” Hokogea o Arama ma tentara wihingahu ai koanoika.

¹³ De ahao o koano wahuloko ai tentara ma dimo-dimonika, wato, “Nako gea ngini o Elisa ai gogere kiani niolingiri la ngohi tahidingoto o tentara la yoiki iwitaoko.” Ka de ona gea o Elisa iwihioriki de manga hingahu iboa o koanoino ato, “O Elisa naga o Dotana ma kotaka.”

¹⁴ Hokogea woihene o Arama ma nyawa manga koano de wahidingoto ai tentara manga ngoe de manga gogoroba parangi de manga kuda ma ngoe. De yoiki duru o futu gorona de o Dotana ma kota ihigilolitino.

¹⁵ Ho duru o ngoru-ngorumino abe itawange itiai de o Elisa ai duduhunu womomiki de wamake hokogea manga musu yahigilolitoka abe de manga tentara duru de manga buturungoka angamoi manga goroba parangi de manga kuda ma ngoe, ho duru wohawanoka. De wolio wihingahu o Elisaika wato, “Ahi baluhu, abeika manga hidee naa ho done sarakia homaduhunu?”

¹⁶ Masara Ma Jou ai uru ma dodofanga wipaluhu unangika wato, “Ngona ngaro ufa nohawana abe nako hahidotelega abe naga naangoka abe nanga tentara inaduhunu de o tentara abe inamusu, ona abe inaduhunu ka onangohi yowoe.” Hokogea wihingahu ai duduhunika.

¹⁷ De ahao o Elisa womaniata, wato, “Ngonaika Ma Jou o Yaweika tomagahoko la ahi duduhunu naa nihiakunu la de ai lako wamake abe ona imiduhunu ma oraha naa.” De ahao Ma Jou o Yawe wihiakunu o Elisa ai duduhunika gea de duru de ai lako wamake igoungu naga o goroba duru kohangoe atauru de o kuda de ena mata-mata Ma Jou wohidadi o uku ma dokarino abe ma hoanino itagi de o lokuokaoo mata-mataika naga Ma Jou ai tentara gea. Ho gea Ma Jou ai tentara yowoe-woe naga yahigilolitino yagoana o Elisa de ai duduhunu.

¹⁸ De ma oraha manga musu yokokiboa la yahigororomino de o Elisa womaniata Ma Jou o Yaweika, wato, “De naa tomagahoko abe ona naa yoboa imihikangela Ngona Ma Jou nodiai manga lakoika la yolega-lega ka ma homu-homu dika.” Ho hokogea Ma Jou wohipoha manga lakoika la ibootohi yomahioriki abe de manga lako itararono. Hokogea o Elisa womagahoko de hokogea idadi ona o Arama manga tentara mata-mataika.

¹⁹ De ahao o Elisa watemo ai musuika wato, “Abeika ngini naa niboa niahowono ma ngekomo abe ngini nihapongo o kotaino naa de una gea abe niwilingiri ko iwiwa nenangoka masara ka idadi ngohi tiniduhunu. Ngohi tinihihira-hira la tiniao o ngiika abe genangoka una naga abe niwilingiri.” Hokogea o Elisa ai budi ma demo onangika de ahao wahihira yoiki o Isiraele ma nyawa manga kota ma ayo o Samariaika.

²⁰ Ho o Arama ma nyawa manga tentara gea yokokiwohamoka o Samaria ma kotaika de ahao o Elisa womagahokoli Ma Jouika, wato, “Ma Jou o Yawe naa ona tagahoko la manga lako mata-mataika nohitararono la ka idadi yomahioriki itiai.” Hokogea wagahoko de hokogea Ma Jou waduhunu hiadono manga lako itararono hoka ma dihirali. De ahao yomalega arihonongaika de ihikokiorikoka abe ona naga o Samaria ma kota ma goronaka.

²¹ De ahao o Isiraele ma nyawa manga koano wamake hokogea idadi de woboa o Elisaino de wileha unangika, wato, “Sarakia ona naa, ka idadi tahohonenge, ahi baluhu? Sarakia ngona noigo la ona tahohonenge dika?”

²² De o Elisa wopaluhu, wato, “Ngaro ufa ona nahohonenge. Abeika, nako ngona ma hirete o parangioka de ahao naga ani musu ma nauru yamuruono abe ngona de ani dae nataokoka. Sarakia, ona abe yowango-wango gea de ahao genangoka nahohonenge? Marai koua e? Ho ona mata-mata nenanga irahai nohiaturu la ona naleleani dika de o inomo de o akere la ka idadi yolomo de yokere ibooto de ahao nahigunoa la yolio manga koanoika.” Hokogea o Elisa ai hiaturu ma demo ai koanoika.

²³ Ho o Isiraele ma nyawa manga koano wahidiai abe hoka o rame-rame ma ngolo-ngolomo ma amoko. Ho o Arama ma nyawa manga tentara gea yolomo de yokere hiadono yakokipunuhoka de ahao o koano gea wahibehehongo la ona gea yolio to ona manga koanoika, de ona mata-mata yokokilio. De hokogea mata-mataika idadioka abe o Arama manga tentara ko yohonengua. Ho mangale ma titi gea hiadono ona de manga koano yamaleke de yotoba. De yomahitaana abe yotobaka angamoi ko yangohamokaua yahikangela o Isiraele ma nyawaika.

O Arama ma nyawa yaparangioli o Samaria ma kotaika

²⁴ Masara ma oraha ma dekana ipahainohi de ahao naga womatengoli o koano o Arama ma tonakoka abe unangoo ai romanga o Bene-Hadada imaketero hoka manga koano ma dihiraino gea. Ho ipahaino de una watoomuinohi ai tentara ma nyawa mata-mataika de yomakokiniiki yotagi-tagi o Samaria ma kotaika. De yomahiadono ma kotaika gea de yahigilolitino de manga tentara.

²⁵ Ho ko itedekanuahi de ona abe doka o kota ma goronaka duru yohafini angamoi manga inomo biaha yamataka. De ika-ika de ahao ona yolomo o inomo o fara moi. De gea ma inomo ma ija duru idogo ihali hiadono yofukunu o keledai ma aewani ma pea de to ena ma ija o haaka ise-senge moritufange. De ngaro o kumu-kumu ma ioko masara to ena gea ma ija o haaka ise-senge motoa la homaija abe ma duduga o mangko ma eteteke moi dika.

²⁶ De ahao o wange moiuku de o Isiraele manga koano naga wotagi-tagi o kota ma dadaduhu ma lokuino. De wotagi-tagi ai gogiriaka de naga momatengo miahoko unangika mato, “Ahi baluhu o koano, ngohi naa duru tomagahoko la ngona nohiduhunu!”

²⁷ De ma koano womipaluhu wato, “Koaho ngona nomagahoko o duduhunu Ma Jou o Yaweino dika! De nako Una gea ko woniduhunua, maraioka ngohioo naa ko idadiua toniduhunu! Angamoi ngohioka ko iwaka o gandumu de ko iwaka ahi angguru ma gohaka ma teongo.

²⁸ Masara tonileha dika, ani kangela ma titi hokokia?” De muna gea mipaluhu mato, “Marai naa ma duru ngohi de ngohi dodiawo naa mimahiketehibehehongo moi. Abe mangale ma titi ngomi duru imihafini ho mohihigaro mato kiani mia ngofaka miaolomo. Ho muna mato, ‘Abeika, o wange naa ka idadi to ngona ani ngofaka miolomo, de ahao itebinino de to ngohi ahi ngofaka miolomo.’

²⁹ De ami demo gea todafongo, ho to ngohi ahi ngofaka wiwihakai de ahao wiwiolomo. De ma dawangeino de ahao tomitemo tato kiani mitoma ami ngofaka la ka idadi wiwiolomo masara muna migogonoka. Ho ami behehongo ma demo mawohangoka dika!”

³⁰ De ma oraha ma koano woihene ma demo-demo gea de ai hiningaka duru wohuhaholi ho hiadono ai baju wakakihoka. De ahao wogila-gila wotagi-tagi ma dadaduhu ma lokuino de o nyawa mata-mata ka idadi iwilega dakuiye de yamake ai pakeanga ma kekekere abe womahinoauku ai baju biaha ma timiuku.

³¹ De ma koano womatemo de womahikoboto moi wato, “Duru tagou-goungu tato o wange naa dika de ngohi kiani titoma o Elisa la tohikitingaka to una ai pea ai badangoka de aino! De nako gea ko todiaiua de tomagahoko la Ma Jou wohihohonenge dika!” De ma koano ai demo hokogea angamoi una ai hiningaka wato to ona manga kangela mata-mataika ihititi o Elisa ai demo-demoka.

³² De una womahikoboto ipahaino de ahao wihidingoto ai nyawa womatengo la woiki o Elisa ai tauika de wiaoino ma koano ai himangino. De o Elisa naga ai tauoka de nagali o Samaria manga hihira yamuruono naga yomakoketemo de una ai tau ma goronaka. De ma koano ai hidingoto ma nyawa ko womahiadonuahi de o Elisa wotemo o Samaria manga hihiraika gea ma titi manga koano wato, “Naa tinihingahu dika abe naga o tobatoma ma nyawa abe wihidingoto ai nyawa womatengo ngohino. De o tobatoma ma nyawa gea wohihideeoka wato ahi pea watobiki. De ma oraha naa ma nyawa gea ngade-ngade womahiadono naangino. Ho ma oraha una woboa ahi ngoranino de ngini kiani duru niogoana ma ngorana la ufa wowohamino. De marai to una ai baluhu, ma koano, marai unangoo bootino woboaino abe wihidoduruino ai hidingoto ma nyawaino. Ho kiani nihidodiai niogoana ma ngorana.”

³³ De o Elisa ka wotemo-temohi ai gogiriaka de igoungu ma koano ai hidingoto ma nyawa womahiadono, de ai poretino naga ma koano unangoo woboa o Elisa ai tauino. Ona yahinooto yomahiadono de ahao ma koano witemo o Elisaika wato, “Nanga kangela mata-mataika abe naa ma duru idadioka ngoneino, gea mata-mata Ma Jou o Yaweoka de aino iboa! Ho done ma titi o kia hiadono ngone ka hihiainohi la Una wonaduhunu? Gea marai duru ka parahaja dika!”