2 Kokoano 4 - Ma Jou ai Demo-demo o Totobelohoka

O Elisa womiduhunu o ngofeka o baoika

¹ Ma oraha gea o Elisa de Ma Jou ai uru ma dodofanga utu naga ona yomahikasapurino la yodadi o doomu moi. De ipaha manga dodiawo Ma Jou ai uru ma dodofanga womatengo manga doomuoka wohonenge de ngoi bao mokangela. De o wange moiuku mofao gea moboa o Elisaino de muna ami hininga ihuhaholi momahingahu, mato, “Ngohi naa duru tokangela angamoi ahi rokata, abe wonileleani ngonaikaoo, naa ma duru wohonengoka de ngona nihioriki abe to una ai horomati ma modongo Ma Jou o Yaweika naga. Masara to una ai nagimi naga womatengoika de ngohi ko iwa ahi tiwi la ka idadi ma nagimi gea tofangu. De angamoi ko idadiua tofangu ho o nauru gea una woboa wato nako ahi tiwi ko iwa una wale dika ahi ngofaka o nauru yahinooto de ona ai huhuloko womadiai la gea ahi rokata ai nagimi waofioka genangino. De una gea wagoungu ahi ngofaka marai ahao wale ho ngohi duru tohuha.” Hokogea mihingahu o Elisaika.

² De o Elisa una womileha, wato, “Abeika, hokokia ngohi ka idadi toniduhunu? Ihira ngona nohihingahu ngohino abe ma kiahonanga o kia naga ani tau ma goronaka.” De muna mipaluhu, mato, “Ahi baluhu, duru ka o saitunu ma minya o boto moi dika naga ngohioka.”

³ De o Elisa womihibehehongo, wato, “Ngona noiki ani dodiawoika de onangikaoo mata-mata abe yogogere ani datekoka de nomabauino manga akere ma ngi ma boto abe ma homoa. De ufa ko iwoeua ma kiani iwoe, abe nako yosanangi inihibau manga akere ma ngi ma homoa, ka nomaleino dika mata-mata.

⁴ De ahao ma boto mata-mata gea ngona de ani ngofa-ngofaka niao nia tau ma goronaika. De ka de nihingohama ibooto de ahao ani tau ma ngorana natatokoka. De ahao ngona nale ani saitunu ma minya o boto moi gea de noguhe ma boto homoi-homoiuku hiadono yokokiomanga. Ho ka de o boto moi iomanga de ani ngofaka yagoraka de yatingaka de ahao o boto moioli yakelengali de enangoo noguheoli hiadono enangoo iomanga. De hokogea nikarajaanga ka hiadono nia boto mata-mataika yakokiomangoka.” Hokogea o Elisa womihibehehongo modiai.

⁵ Ho muna moiki de maniiki duru imaketero abe hoka o Elisa womihibehehongoka. De ahao ami ngofaka imidotakino o boto homoi-homoi ihikokawalimi.

⁶ Ho ko itedekanua de o boto mata-mata gea manga meme makokiomangoka moguhe de o saitunu ma minya gea! De ahao muna mahuloko onangika mato, “O boto moiohi nihihupu!” Masara yopaluhu ato, “Meme, ko iwaka ma boto!” Ka de hokogea de ami saitunu ma minya ko iuihokaua.

⁷ De ahao muna de ami garago mihingahu Ma Jou ai uru ma dodofanga, o Elisaika, abe mata-mata idadioka, de una womihibehehongo, wato, “Naa o saitunu ma minya gea duru to ngona dika ho ka idadi nafukunu de napake ani tiwi genangino la nofangu ani nagimi. De ngaro hokogea nofukunu masara nagahi ani saitunu ma minya ma hou ma amokohi la genangino ngona napake abe ngona de ani ngofa-ngofaka ka idadi nimahidailako ti ngini nia perelu.” Hokogea o Elisa womiduhunu de o heheranga.

O Elisa de o ngofeka o Suneme ma nyawa manga ade-ade

⁸ De o wange moiuku o Elisa woiki o Suneme ma kotaika de naga o ngofeka duru mokaya abe mogogere o kotaka gea de muna miahoko o Elisa la una ka idadi wolomo ami tauoka. De ahao nako o Elisa ai dodagi ma goronaka de kiani watilakuru o kota gea de una wotulu ami tauika de wolomo genangoka.

⁹ De ipaha muna ami hininga mihingahu ami rokatika, mato, “Ngohi tato una gea abe ma moi ma moi womidulu marai una o nauru abe ai wowango womadingakoka Ma Jouika.

¹⁰ Ho ngohi tofikiri irahai hidiai o kamara ma eteteke daku nanga tau ma lokuoka de ka idadi ai perelu hoka o koi, de o meja, de ma kuruhii, de ma hilo hohingodumu ai kamaroka. Hokogea hodiai la ka de wotulu o kapongino naa de ka idadi una womahidodogumu ngoneoka.” De ami rokata wosanangi ami hideeika de hokogea iwidiai o Elisa ai kamara de una gea wosanangi wapake.

¹¹ De o wange moi o Elisa woboali o Suneme ma kotaino de wodoa ai kamariye gea la womahiaini.

¹² De witemo ai duduhunu o Gehasika, wato, “Nouti nomihingahu nanga dodiawo abe muna o Suneme ma nyawa nato ngohi toigo la mimakoketemo.”

¹³ Ho muna moboaiye de o Elisa wihuloko ai duduhunu o Gehasika wato, “Ngona nomihingahu abe muna duru mimisanangi de ami leleani ngomino abe muna duru momihitihira ngomi de mia perelu.” Ho manga tarimakase ma demo gea o Gehasi womihingahu munangika. De ahao o Elisa wato, “Naa nomileha munangika abe hokokia mia balaha ngomioo la ka idadi mimiduhunu muna. Nomileha nako moigo tomidemo de ami gogahoko o koanoika eko o tentara ma hidimonika.” De muna mopaluhu o Elisaika, mato, “Ahi baluhu, ngaro ufa hokogea, abe ona ahi tauoka duru ihiao irahai.” Hokogea yomakoketemo ibooto de muna mosobo la ka idadi o Elisa de o Gehasi yomahiaini.

¹⁴ Muna mosoboka de ahao o Elisa wileha o Gehasika wato, “Ho sarakia ngona, naga moi abe nato ka idadi homiduhunu?” De una wopaluhu wato, “Abeika, muna ko iwa ami ngofaka de ami rokata una duru iwiperekioka.” Hokogea dika wihingahu o Elisaika.

¹⁵ De o Elisa wato, “Irahai ani hininga, nomiahokoli moboaiye.” Ho o Gehasi womibehehongoli de moboa o Elisa ai kamara ma ngoranino.

¹⁶ Ho muna momaokoino genangoka de o Elisa womihingahu, wato, “O taongo moiohi abe ngade-ngade adonokali ma tanggala naa de ngona nitotirino ani ngofaka o nauru.” Hokogea womihingahu de muna duru imitodokana de mopaluhu unangika, mato, “O ahi baluhu ufa! Ngona o nauru abe duru nileleani Ma Jou ho ufa nohihihuha de o ngeluku hokogea.”

¹⁷ Masara ahao ko itedekanua de muna igoungu de ami badangoka. De duru o taongo moi ma dekana ipahaika abe o Elisa womihingahuoka de igoungu, muna naga ami ngofaka o nauru imaketero hoka una womihibehehongoka.

¹⁸ De ami ngofaka gea una wolamoko de o wange moi ma oraha o gugutuku de ai baba naga o redioka waniiki ona abe manga gandumu youtuku. De ai ngofaka hokogea ai lamoko hiadono una ka idadi woiki witutumu ai baba manga redioka.

¹⁹ De una genangoka winii-niiki ai baba de itodokanino o ngofaka gea wokokururihi de wotemo, wato, “Ahi pea kohaodiri! Duru kohaodiri ahi pea!” De ai baba wihuloko ai gilaongo womatengoika, wato, “Ngona nigoraka de nihigilio ngoi memeika.”

²⁰ Ho manga duduhunu womatengo manga ngofaka wigoraka de wihigilio ngoi memeika de muna mitukurino ami uguroka la mihibuu-buu. Masara ngade-ngade o wange ikorona de ami ngofaka wohonenge.

²¹ Una wohonengoka de ngoi meme miao daku o Elisa ai kamariye de ai honenge mikelenga ai koioka. De ahao Ma Jou ai uru ma dodofanga ai kamara ma ngorana matatoko de ami ngofaka ai honenge minoaika doka ma goronaka.

²² De ahao ami hingahu mihidingoto ami rokatika, mato, “Kiani nanga gilaongo womatengo de o keledai moi nihidingoto ngohino abe kiani tapake la duru tomataiti toiki titutumohi nanga dodiawoika, Ma Jou ai nyawa gea. Ngohi taika de ahao duru tomataiti tolioli naangino.”

²³ De ami rokata ahao wohidingoto ma keledai abe momagahoko de womileha wato, “Adodoa ho o wange naa nitutumu, naa o Hiaini ma wangeua, de ko o mede ma hungi ma ngolo-ngolomo ma orahua, ho de ma titi o kia noiki unangika?” Masara muna ahao mohidingoto ami babaluhu unangika mato, “Ahi rokata, ngaro ufa nohuha de ahi dodagi ma titi.”

²⁴ Ho muna momataiti ami gogogere mohipasi ami keledai ma poretuku de mofarene de muna mihingahu ami gilaongika, abe unangoo ai keledai ma poretoka, mato, “Hosobo! De ngona duru nomataiti de nako ngohi ko tonihibehehongua, ufa nomabole-bole ma titi ngohi.”

²⁵ De ona yoiki Ma Jou ai nyawa o Elisaika abe una naga o Karamele ma lokuoka. De muna ami gurutikahi de o Elisa womimake moboaino. De womihidumutu o Gehasika, wato, “Abeika, marai gea muna nanga dodiawo moboa o Suneme ma kotaino. Ngona nomataiti nomapopaata nomibuhuku de nomileha ona o tau moi yososanangi dika eko naga manga kangela.” De o Gehasi ahao womataiti wouti womileha hokogea.

²⁶ De muna mihingahu mato, “Iya, mata-mata ngomioka irahai dika.”

²⁷ Masara ka de muna momahiadonoka o Elisaika o lokuoka de muna momarubauku o tonakuku ai himangoka de duru ai lou arihononga masoika. De o Gehasi una waika munangika la womihirehene o Elisaino, masara Ma Jou ai nyawa gea wato, “Nominoaika dika, naga ami huha moi kohadubuho de Ma Jou o Yawe ko wohihingahuahi ami huha ma titi ngohino.” Hokogea o Elisa wotemo.

²⁸ De ahao muna motemo, mato, “Ahi baluhu, gea ngona ma dihiraka nohihingahu ngohino nato ahao ahi ngofaka tamake de ahi babaluhu tato o kia? Ngohi tonihingahu, tato, ‘Ufa ngona nohihidoaka ma nganganono la tamake ahi ngofaka!’” Hokogea ami huha momahingahu o Elisaika.

²⁹ De ahao o Elisa wihibehehongo o Gehasika, wato, “Ngona nomataiti nomahidiai noiki! Ahi tutukunu nagoraka de nosobo! De ufa notulu-tulu nimakoketemo de o nyawa. Nomataiti naika ami tauika de ahi tutukunu nakelengauku duru o ngofaka ai himanguku.” Hokogea o Elisa ai hiaturu.

³⁰ Masara o ngofaka ngoi meme gea mitemo o Elisaika, mato, “Abe imaketero hoka igoungu Ma Jou o Yawe wowango-wango de ngonaoo igoungu nowango-wango, hokogenangoli ahi demo naa duru tagoungu, ngohi naa ko tolioua nako ngona ko nohiniikua.” Hokogea ami hininga ho o Elisa unangoo wosobo wominiiki molio.

³¹ De o Gehasi una wohira woiki de angamoi duru womataiti ka hiadono woboa to muna ami tauika de o Elisa ai tutukunu wakelengauku o ngofaka ai himangoka. Masara ngaro duru waniiki o Elisa ai hiaturu unangika ma, ko kia-kiaua idadi. Ho una wagilio ma ngekomika de ahao yomakamake o ngekomoka de wihingahu o Elisaika wato, “Ma ngofaka gea ngaro todiai duru imaketero hoka nohihibehehongoka masara una ko womomikua!”

³² De ma oraha o Elisa womahiadono ma ngofakika gea, una igoungu wohonengokau genangoka Ma Jou ai uru ma dodofanga ai koioka.

³³ Ho una wowohama ka womatengo dika de ai kamara ma ngorana watatoko de ahao womaniata Ma Jou o Yaweiye.

³⁴ De ahao o Elisa womamotumuku o ngofaka ai badanguku. De naa widomotumuku unanguku la ai uru duru adaene o ngofaka ai uruika, de ai lako duru o ngofaka ai lakoika adaene, de ai giama arihononga wakelenga o ngofaka ai giama ma hoatuku. De o ngofaka ai roehe imulaenge ihaukoli!

³⁵ De o Elisa womomiki de waika waino o kamara ma goronaka ma muruono de ahao womamotumoli o ngofaka ai badanguku imaketero hoka kanganoinoli. De itodokanino o ngofaka gea wohorene ma tumidi de ai lako wafelanga.

³⁶ De ahao o Elisa o Gehasi wiahokino de wihuloko, wato, “Ngoi meme nomiahokino.” Ho ka de muna moboa de munangika wotemo wato, “Naa ani ngofaka ho ngona ka nile dika.”

³⁷ De muna motilabukuku o Elisa ai lou ma himanguku de ami hininga iomangaholi de ami tarimakase unangika. De ahao ami ngofaka migoraka de mitotiri dau ami tau ma goronauku.

O Elisa o padoha ma inomo wohidadi o inomo ma rorahai

³⁸ De ma oraha o hiwara ikiria hiadono manga inomo ikuranga manga tonakoka de o Elisa woikoli o Gigalika. De genangoka naga Ma Jou ai uru ma dodofanga manga doomu yomatoomuino de o Elisa wadotoko. De o dodotoko ma goronaka de wihuloko ai duduhunu o Gehasika la wahakai, wato, “Ngona nanga uku nonadaulu de ahao napake o manyila kohaamoko la nonahakai abe iti naga ka idadi haolomo de nohakai la ma teongo ilamoko.”

³⁹ De naga womatengo manga doomuoka o Elisa ai gilaongo gea widuhunu de o inomo, ho una woiki ma hoanika la walingiri o gauku abe ka idadi yaolomo. De una wamake o gumi-gumini o fara moi abe de ma hofoko ma rupa hoka o walu ma eteteke ho ai baju ma barene watupukuriye wohiluluino la ma hofoko gea wodofi ai bajuku hiadono aomanga. De ahao wolio manga ukuika de ma hofoko gea wakori ma manyilauku de una ko wohiorikua o gumini ma hofoko gea o padoha.

⁴⁰ Masara ka de ona yomulaenge manga inomo gea yaolomo ngaro ka ma hohutulu dika de ihioriki yapadoha de yopoaka o Elisaika, ato, “Mia baluhu, Ma Jou ai uru ma dodofanga, o inomo naa o padoha!” Ho ona ko yaolomokaua.

⁴¹ De o Elisa wato, “O tarigu nohileino!” De ahao ma tarigu gea woderero manga inomuku o manyila ma amo-amokuku de ahao wotemoli, wato, “Naa idadioka haolomo de ko inapadohakaua.” De ahao ona ma inomo gea yokokiolomo de ko yapadohakaua.

O heheranga moioli abe o Elisa wahiolomo Ma Jou ai uru ma dodofanga yaratuhu moiika

⁴² De naga o wange moiuku o nauru abe una gea o Baala-Salisa ma kapongino de o inomo wagao la Ma Jou ai uru ma dodofangika wahidotaka. De ma inomo gea ma roti ma gahumu monaoko abe ahao kangano yaharongo de nagali o gandumu ma goo, abe ahao yautukino ai gandumu ma domorino, de mata-mata gea wihidoaka o Elisaika. De o Elisa wihuloko ai gilaongika wato, “Ma inomo naa nahikodoku nanga dodiawo Ma Jou ai uru ma dodofangika la ona mata-mata ka idadi yokokiolomo.” Hokogea wohibehehongo.

⁴³ De ai gilaongo wato, “Ho done sarakia ma roti gea ma gahumu ka monaoko dika de tahiolomo abe ona o nauru yaratuhu moi nenangoka?” Hokogea woleha. Masara o Elisa ka wohigalioli ai gilaongika, wato, “Ma inomo naa nahikodoku nanga dodiawo Ma Jou ai uru ma dodofangika la ona ka idadi yokokiolomo angamoi Ma Jou o Yawe wato ma inomo naa yawedonoka de ahao ona yapunuhoka ka hiadono nagahi ma inomo ma hou!”

⁴⁴ De una wagoungu angamoi ona Ma Jou ai uru ma dodofanga yaratuhu moi gea yolomo ka hiadono yakokipunuhoka de nagahi ma hou! Ho duru idadi imaketero abe hoka Ma Jou o Yawe wohibehehongoka o Elisaika.