2 Kokoano 3 - Ma Jou ai Demo-demo o Totobelohoka

Manga koano o Yorama ai datoro ma dorou ko adonikaua imaketero hoka ai baba o Ahaboli

¹ De manga koano o Yorama, abe ai baba o Ahaba, una womulaenge wahikoano dau o Isiraele ma tonakoka, abe ma oraha daku o Yehuda ma tonakoka, ma koano o Yosafata wohikoano ngade-ngade ai taongo ngimoi de tufange ma dekana. De o Yorama una ai gogere o Samaria ma kotaka de genangoka o Isiraele ma nyawa wahikoano o taongo ngimoi de hinooto ma dekana.

² De o Yorama gea una wodiai abe duru itorou Ma Jou o Yawe ai himangoka masara ai wowango ma datoro ngaro itorou masara ko imakadaenua hoka to una ai baba o Ahaba eko hoka ngoi meme o ngo Isebele manga datoro ma dorou. Abe ngaro wodiai itorou masara wahibinaaha o huhuba ma ngi ai baba wodiai o hakaruino abe o hakaru yafafoiye de ihidemehele hiadono ena gea ma gurutiye de ma rupa hoka o liate ma amoko. De o huhuba ma ngi gea o Ahaba wodingaka o pangao o Baalika la ka idadi ai kokawaaha yoiki genangika de yomahuba-huba o Baalika. De gea ena abe ai ngofaka o Yorama wohibinaaha la ibooto ai nyawa yomahuba-huba o Baalika genangoka.

³ Masara ngaro hokogea o Yorama o pangao ma ngi ma amoko gea wohihihanga masara una ka ihikaika wahowono Ma Jouika abe unangoo womahuba-huba o popangaoika hoka ai ete o Yerobeamoli. Abe o Yerobeama, una o Nebata ai ngofaka de wodadioka manga koano ma dihira gea. Ho ipahaino de ai danongo o Yorama unangoo duru ka ihikaika o Isiraele ma nyawa wahirehene Ma Jouino abe wahihira-hira o popangaoika la yomahuba-huba ka enangika dika.

⁴ De ma oraha gea doka o Moaba ma tonakoka naga manga koano ai romanga o Mesa. De o Mesa una gea wososawaro wapaliara o domba la duru ifaa-faatuku. De manga koano gea de o Isiraele manga koano yomahiketehibehehongoka ho kiani o Mesa o tao-taongiye wahidingoto o domba ma ngofaka o dutu o sana o ratuhu moi o Isiraele ma tonakika. De nagali ma gogo ma amoko kiani una wahidoaka o Isiraelika, abe gea o domba ma nauru o dutu o sana o ratuhu moi kiani yaguti de ma gogo gea wahidingoto o Isiraele manga koanoika. Ho ma domba ma ngofaka de ma gogo ma amoko gea idadi hoka manga pajaka abe o Moaba ma nyawa kiani yotobafangu o Isiraelika.

⁵ De ipahaino abe ma oraha o Isiraele manga koano o Ahaba wohonengoka de ahao o Mesa una womaputuhu wato wawohanga dika manga behehongo gea. Ho womulaenge wilawana o Isiraele manga koano ma hungi o Yorama abe ko wahidingotokaua manga bobangu o dombaino gea.

⁶ Ho o Yorama una wohupu ai gogere o Samaria ma kotaka de waino de wahoko o Isiraele ma tentara ma nyawa mata-mataika la yomatoomuino unangoka.

⁷ De ahao una wahidingoto ai demo o Yehuda manga koano o Yosafatika, de ai demoino gea una wato, “O Moaba manga koano una wawohangika mia behehongo de wohilawana ngohino. Ho naa tomagahoko la ngona nohiniiki de homakuduhunu haparangi o Moaba ma nyawaika.” De o Yosafata una wipaluhu wato, “Ka idadi toniniiki la ngone de ona homarihimanga. De ahi tentara ma nyawa de ahi kuda, gea mata-mata tonihidoaka ani giama ma hoatika la nahiaturu o parangi ma goronaka.

⁸ Ho ma ngekomo o kia koaho haniiki la hoiki haparangi onangika?” De o Yorama wopaluhu wato, “Irahai hotagi-tagi haniiki ma ngekomino abe atilakuru o Edomo ma tonaka ma kakaahaino.”

⁹ De ma koano yahinooto gea yomakoketemo ipaha de ahao ona de manga tentara ma nyawa mata-mata yosobo yomakiniiki ma tonaka ma kakaahaino. De ma tonakoka gea de naga manga dutu adaene o Edomo ma nyawa. Ho o Edomo manga koano de ai tentara ma nyawa onangoo yomahidogo onangika ho ma koano yahange de manga tentara mata-mataika yokokisobo yomakokiniiki manga dumutika. De manga dodagioka de kiani yopaki-pakiti ma tonakoka gea abe manga dekana manga futu tumidino. Ho mangale ma titi manga dekana ho manga akere de manga aewani ma akere gea imataka.

¹⁰ De o Isiraele manga koano o Yorama wamake hokogea de una wotariana wato, “Ho ngone naa done sarakia? Angamoi Ma Jou o Yawe bote wohiaturoka la wonahidoaka ngone naa to nanga musu o Moaba ma nyawa manga giama ma hoatika!”

¹¹ De ahao o Yehuda manga koano o Yosafata una wotemo wato, “Masara bote naga womatengo Ma Jou ai uru ma dodofangino ngoneoka. Ho koaho hihuloko unangika la una wonagahoko Unangiye de genangino ka idadi hohioriki irahai o kia ngone hodiai!” De ahao o Yorama ai tentara ma hidimono womatengo wotemo wato, “Naga ngoneoka o Elisa abe o Safata ai ngofaka, de una gea ma dihiraino de wodadi o Elia ai duduhunu.”

¹² Ka de o Yosafata woihene ma hidimono ai demo gea de una wato, “Igoungu, o Elisa una gea Ma Jou o Yawe ai uru ma dodofanga ma gou-goungu.” Ho ma oraha gea dika de ma koano yaruange ona yosobo yoiki la ka idadi iwitutumu o Elisaika.

¹³ De ona iwiadono o Elisaika de o Elisa wileha o Isiraele manga koanoika wato, “Adodoa ho ngona noboa ngohino? Koaho noiki ani baba de ngoni meme manga nyawaika. Angamoi naga manga ngoe abe yahiromanga ato o uru ma dodofanga de ona yatobaleleani ani dimonika. Ho koaho noiki nomagahoko o duduhunu onangino!” Masara ma koano o Yorama wipaluhu wato, “Ko idadiua! Angamoi maraioka Ma Jou o Yawe Una gea abe womiahoko ngomi o koano imihange naa la wato womihidoaka ngomi o Moaba ma nyawa manga giamika!”

¹⁴ De ahao o Elisa wipaluhu unangika wato, “Ngohi naa tileleani Ma Jou o Yawe dika abe Una duru Wokokurutiye. De naa tomahibehehongo moi de ahi koboto ma demoino tofetongo to Una gea ai romanga. Abe tagou-goungu tonihingahu tato nako ngona nomatengo dika noboa ngohino de gea ani gogahoko ma demo duru ko tolegaikaua ho duru ko toniduhunua. Masara naga ahi horomati ani dodiawo ma koano o Yosafatika abe wahikoano o Yehuda ma nyawaika. Ho mangale ma titi ahi horomati itagi unangika ho ka idadi tinigihene nginika.

¹⁵ Ho naa kiani niahokohi o nyawa abe yosawaro yoluiti eko yokuti o musik ma kiahonanga la ka idadi toihenohi o musik ma rahai.” De naga womatengo woboaino de wodiai la o Elisa ka idadi woihene o musik. De wotoihene ai gogiriaka de o Elisa iwilufungu de Ma Jou o Yawe ai kuaha.

¹⁶ Iwilufungu de ahao una wotemo wato, “Hokonaa Ma Jou o Yawe ai demo nginika, Una wato, ‘O tonaka ma dolaka naa abe ko iwa o akere nenangoka de ngini kiani niobaiti o wairi / luhungu ma ngoe.

¹⁷ Angamoi Ngohi ahao tohiboa o akere la ma wairi / luhungu gea akokiomanga. De ahao ngaro ngini ko niamaoua o hidaloko de ko niamakeua o awana, masara ahao ngini naa de nia aewani mata-mataika ka idadi niokere genangino.’

¹⁸ Hokogea to Una ai demo nginika. De ai karajaanga gea ngaro o heheranga wodiai masara gea duru igapanga de hatoli ko kia-kiaua. Angamoi Unangoo winiduhunu hiadono ngini ka idadi niahikala o Moaba manga tentara ma nyawaika!

¹⁹ De to ona manga kapo-kapongo de ngaro hiadono manga kota-kota abe yahigilolitino de ma dadaduhu masara ngini ahao niahikala mata-mataika. De to ona manga gota ma rorahai ngini ahao niakokitolanga, de manga jojobuubu niakokitokeme la ma akere ibootohi ihupuino, de manga tonaka mata-mataika niahirusaka ma titi o hakaru duru kohangoe nihibarihi aika aino.” Hokogea o Elisa ai demo onangika.

²⁰ De ipaha ma dawangeino abe ma oraha yotobadiai manga huhuba o ngorumino de ahao abeika, naga ma akere iboaino! Gea ihahuru o Edomo ma tonakoka de aino de ahao manga wairi / luhungu akokiomanga de ma akere!

²¹ De duru ma oraha gea doka o Moaba ma tonakoka de ona yoihene ma titi ma koano yaruange de manga tentara abe yomatoomuinoka de yotagi-tagi yoboaino la yaparangi onangika. Ho o Moaba ma nauru mata-mataika abe ka idadi o humaranga yomahidabanino onangoo yomatoomuino. De ahao ona gea yokokiloiki manga tonaka ma batingika de yagoa-goana manga musu genangoka.

²² Masara ma dawangeino de o wange ma dararono itararonuku ma akeruku abe naga ma wai-wairoka / luhu-luhungoka de duru ihabaka / ihaba-habakika. Ho o Moaba ma tentara gea yokokimomiki de yomalega doka manga batingi ma honongaika de yamake gea hoka o awunu ma rupa mata-mataika.

²³ Yamake hokogea de o Moaba ma nyawa ona yomakoketemo ato, “Abeika ma awunu ga doka! Marai ma koano yaruange manga tentara ona dika yomaketepoparangi hiadono ona mata-mata yomahibinaahaka! Ho abeika ngone hoiki dokaika de homangaiki / homagoraka dika to ona manga kiahonanga mata-mataika!”

²⁴ Masara ma oraha o Moaba ma nyawa gea yomahiadono o Isiraele ma nyawa manga dodogumu ma ngioka de o Isiraele ma tentara yokokihupu manga ngiino de yabaatika. De gea yaparangi onangika hiadono yahikala ho o Moaba ma nyawa yomadohuku de yomadogilioro yomahiloara to ona manga tonakika. De o Isiraele ma nyawa yakiniiki ka hiadono o Moaba ma tonakika, de genangoka ona yahibinaaha mata-mataika.

²⁵ Abe manga kapongo de manga kota yahiwedere, de manga tonaka mata-mataika yahirusaka ma titi o hakaru duru kohangoe ihibarihi aika aino, de manga jojobuubu yakokitokeme la ma akere ibootohi ihupuino, de to ona manga gota ma rorahai ona yakokitolanga. De ma bahauku ma hou o Moaba ma kota moiokahi abe ko yahibinaahauahi, de gea ma romanga o Kiriharesete. Ho o Isiraele ma tentara abe ona homoi-homoi naga de manga kawaioka, ona yahigilolitino ma kota gea. Yahigilolitinoka de ahao ona yomulaenge yaparangi ma kotaika gea, ho o kawai ma doto duru kohangoe ihoho de ahao yadiodaka o kota gea ma nyawauku.

²⁶ Ho abe ma oraha o Moaba manga koano wamake abe to una ai nyawa ko yapoaua yomaduhunu de una wao ai nyawa yaratuhu tumidi abe yososawaro de manga humaranga. De ona yohupu ma kotaino de ihitaili la iwiadono o Edomo manga koanoika de iwitoma. Masara ona ko yapoaua iwiadono angamoi ma koano ai nyawa duru iwigoa-goana.

²⁷ De ahao o Moaba manga koano wile to una ma hirete ai ngofaka o riaka abe tanu una ahao wituruuru ai baba de wodadi manga koano. Ho wiao ai ngofaka gea o kota ma dadaduhu ma lokuiye de genangoka wihidadi o huhuba iharo-harongo. De ma koano ai ngofaka gea wohonenge ipahaino de ahao naga o dohata duru ma amoko abe ihidumutu o Isiraele ma nyawaika. Ho ona yomadohuku dika de yogilio to ona ma hirete manga tonakika.