2 Kokoano 25 - Ma Jou ai Demo-demo o Totobelohoka

O Babele ma koano woparangi o Yerusaleeme ma kotaika de wahikokibinaaha

¹ De ma oraha o Sedekia wohikoano o Yerusaleeme ma kotaka ngade-ngade o taongo hiwoino ma dekana de ahao una woluku waniikohi o pareta o Babelino. Ho mangale ma titi o Sedekia ai lawana hiadono o Babele manga koano o Nebukanesara ai tentara mata-mata watoomuino de yoiki la ka idadi yaparangi o Yerusaleeme ma kotaika. De o Babele ma nyawa manga tentara yomahiadono ma tanggala o mede ngimoiuku de ma wangeoo ngimoiuku abe ma oraha ona yomahiadonoka o Yerusaleeme ma kotaika de ma kota gea yahigilolitino. De o Babele ma nyawa manga tentara gea yodiai manga tako-tako la ka idadi o Yerusaleeme ma nyawa yangohama angamoi o kota ma dadaduhu duru ikurutiye de duru iputurungu ka hiadono ko idadiua yakilianga ho ko kiaikaua yaboa. De ngaro o tako-tako biaha ma ko idadiua ho kiani o tonaka de o hakaru duru iwoe yaoino de yafafo ma tonaka de ma hakaru gea la manga tako-tako ma ngekomo yodiai abe ihiheharika ka hiadono o kota ma dadaduhu daku ma bareniye. De hokogea yodiai manga tako-tako ma ngekomo abe ato ahao yaniiki ka hiadono yomahiadoniye la ato yangohama o kota ma goronaika.

² De genangoka o Babele manga tentara duru ka ihikaika ihitaili la yangohama o Yerusaleeme ma nyawaika. De ona o kota ma goronaka moioo de ko iwa abe ka idadi yohupu manga kotaino ho ona duru yohuha ma titi manga perelu o inomo. De manga kangela naa idadi ma oraha o Sedekia wohikoano ngade-ngade ai taongo hiwo ibooto.

³ Ho o taongo hinooto ipahaika ka hiadono adaene o mede ma iatuku de ma wange hiwouku de manga inomo o Yerusaleeme ma kota ma goronaka duru ko iwaka hiadono o nyawa yohonenge ma titi o hafini.

⁴ De ma oraha gea de ahao o Babele manga tentara o kota ma dadaduhu o ngi moioka yakilianga. Ka de hokogea yakilianga de o Yerusaleeme ma nyawa manga koano de to una ai tentara mata-mata ato yoara masara kiani yodamaa la o futu gorona de ahao ka idadi yokokihupu o kota ma ngoranika abe naga o kota ma dadaduhu hinooto ma hidogoronaka. De ona ka idadi yoboa o koano ai bunga-bunga ma redino la yohupu ma ngoranino gea de ahao ona duru yoara yomapopaata abe manga dumutu o Yorodani ma dolaika. Hokogea yohupu ma kotaka de yaino doka ma hoanika.

⁵ Masara o Babele ma tentara yakiniiki. De o Yerusaleeme ma nyawa manga koano una ahao iwidaene o Yeriko ma kota ma daanika de genangoka iwitaoko masara o Sedekia ai tentara abe yomakiniiki naa yomahikabarihoka yoara de manga koano o Sedekia gea iwinoaika.

⁶ De una iwitaokoka ho iwiao o Babele manga koanoika abe naga o Ribala ma kotaka de genangoka o Sedekia iwitailako abe ma titi ai lawana manga koanoika. De iwihitaana abe ma titi ai howono de ahao iwihohowono.

⁷ De o Sedekia ai hohowono duru kohadubuho abe o Nebukanesara wohiaturu abe kiani walega-lega abe ma oraha ai ngofa-ngofaka yahokino de yatoma homoi-homoiika duru manga baba ai himangoka. De o Sedekia ka de wamake ibooto ai ngofa-ngofaka yakokitomaka de ahao to una ai lako yakulapete de gea ma gomono yaumoka. Hokogea o Sedekia iwihikangela de ahao iwipakiti de o rante o tabaagaino abe ihikasapuru de o hori de una ahao iwiao o Babele ma kotaika.

Ma Jou ai Tau o Yerusaleemoka ihibinaaha

⁸ De ngade-ngade o mede moi ipahaino de o hidimono womatengo o Babeloka abe ai romanga o Nebusaradana woikoli o Yerusaleemika la utuohi wohirusaka. De ma oraha wodiai hokogea duru adaene o mede motoa de ma wange tumidoka abe o Nebukanesara wohikoano o Babele ma kotaka ai taongo ngimoi de hiwo ma dekanino. De o Nebusaradana, abe naa woiki duru de ai kuahaka o Yerusaleeme ma kotaika, una wileleani o Nebukanesarika abe una o koano ai gogoana ma doomu manga hidimono.

⁹ De o Nebusaradana wowohama o Yerusaleeme ma kota ma goronaika de ahao Ma Jou o Yawe ai Tau watufuku, de o koano ma tau abe duru irahai de abe yatingakoka la manga kokoano dika yogogere genangoka ma enangoo gea, ka watufuku. De o tau ma rorahai mata-mata o Yerusaleeme ma kotaka abe ma dihiraino o Yerusaleeme ma nyawa abe yokokurutiye yogogere genangoka, ma enangoo o Nebusaradana wohikokihibinaahaka de o uku.

¹⁰ De ahao o Nebusaradana una gea o Babele ma nyawa manga tentara mata-mata wahikarajaanga la o Yerusaleeme ma kota ma dadaduhu duru yakokikilianguku.

¹¹ De ma oraha gea o Yerusaleeme ma nyawa o Nebusaradana watoomu manga hou abe nagahi o kota ma goronaka. De ona watoomu ibooto de ahao wao ka ma moi de o Isiraele ma nyawa manga tentara ma nyawa abe yomahingahu manga hininga ona yomaturuuruoka ho naa yomahikoano o Babele ma nyawa manga koanoikali. Ho ona mata-mata o Babele ma nyawa manga tentara yaoka de yahingohama to ona manga tonakikali.

¹² Masara o Nebusaradana gea wahigunoa o Yehuda ma nyawa utu abe duru yohu-huha la ona ka idadi yogogerohi manga tonakoka. De ona wahikarajaanga la o angguru ma redi, de o redi mata-mata utu abe naga o Yehuda ma tonakoka, ona gea kiani yapaliara.