2 Kokoano 23 - Ma Jou ai Demo-demo o Totobelohoka

Manga koano o Yosia wohidiai manga behehongo ma hungioli Ma Jouika

¹ Ho ka de o Yosia woihene Ma Jou ai hingahu unangika gea de una wahokino o Isiraele ma nyawa manga dimo-dimono mata-mata abe naga o Yerusaleeme ma kotaka de ona utu ka hiadono mata-mataika abe naga o Yehuda ma tonakoka wato kiani yokokiboa unangino.

² De ahao woiki daku o loku ma tubuiye abe genangoka Ma Jou o Yawe ai Tau de abe ona iwiniiki naga o nau-nauru mata-mata abe wahokino, de nagaoo o Isiraele ma nyawa manga hidemo Ma Jouika, de ona Ma Jou ai uru ma dodofanga, de ai kokawaaha abe yogogere o Yerusaleeme ma kota ma goronaka, onangoo ko manga ngoe yomakiniiki Ma Jou ai Tauika. Ho naga manga doomuoka, abe Ma Jou ai Tau ma lokuoka gea, o Isiraele ma nyawa abe ona yototipokouku de hiadono ona yokokurutiye ona mata-mata yomatoomuino genangoka. De ahao o koano waleino o buku ma lulu gea abe yamake Ma Jou o Yawe ai Tau ma goronaka. De o Yosia una ma hirete wabasa Ma Jou ai behehongo onangika abe ma buku ma luluino la ona mata-mata genangoka ka idadi yoihene.

³ De ma oraha gea o Yosia womaokoino Ma Jou ai Tau ma liate ma amoko ma datekoka abe genangoka o kuaha ma dodunguu ma ngi abe una o koano ka idadi wapake. De una womaputuhoka wato o Isiraele ma nyawa manga behehongo, abe ma dihira yomahiketehibehehongoka de Ma Jou, naa ma hungioli wodiai wihibehehongo Ma Jou o Yawe ai himangoka. De o Yosia wato una ma hirete Ma Jou o Yawe wihingounu duru de ai hininga ma gahumu, de ai jiwa ma gahumu. Abe una womahibehehongo wato Ma Jou ai behehongo, de ai behehongo ma hiaturu, de ai pareta mata-mata waniiki itiai abe naga o buku ma lulu ma goronaka. De ahao o Isiraele ma nyawa mata-mata genangoka onangoo yomaputuhu abe imaketero hoka manga koanoli la yaniiki mata-mata abe naga Ma Jou ai Behehongo ma Bukuoka.

⁴ De ahao o koano naga moi wahibehehongo ai nyawa yamuruonika. De gea wahidumutu o Hilikiaika, abe una manga hidemo Ma Jouiye manga baluhu wokokurutiye, de manga hidemo utuika, de onangika abe yotobagoana Ma Jou ai Tau ma ngoranoka. Ho wahibehehongo wato ona mata-mata kiani ihihupu Ma Jou o Yawe ai Tauino o popangao ma kokiahonanga abe naga doka ma goronaka la ena mata-mata ihibinaaha. Ho ena mata-mata yale abe o Isiraele ma nyawa yodingakoka o pangao o Baalika, de o pangao o ngo Asitoretika, de o muru-murumika de ena mata-mata yao o Kidono ma dolaika de genangoka yatufuku. De ahao to ena ma dukuuru yao o Betele ma kotaika.

⁵ De ahao yatoomuino o nyawa mata-mata abe yahiromanga o popangao ma hidemo ma nyawa abe manga karajaanga yoleleani o popangaoika. Ona gea abe ma dihiraino o kokoano o Yehuda ma tonakoka yahikarajaanga hokogea masara naa o Yosia wohuloko wato ona ko idadiokaua yokarajaanga manga leleani gea. De ona o popangao ma hidemo ma nyawa abe yomahihuba de yoleleani o Baalika, de o wangeika, de o medeika, de o muru-murumu ma doomuika hoka o Loa Hange de o Koruku ma Bekaika, de o muru-murumu mata-mataika. De manga popangao ma huhuba ma ngi-ngi naga manga tonakoka mata-mataika abe iti o kiaka naga ma tonaka abe ka enangohi ikurutiye ngaro manga kota de manga kapongo ma goronaka eko ma datekoka de genangoka yodiai manga popangao ma huhuba ma ngi. De hokogea hiadono o Yehuda ma tonaka ma amokika, de hiadono o tonaka abe imakadateke, de o Yerusaleeme ma kotaka, naga o huhuba ma ngi-ngi duru kohangoe. De naa ona abe yoleleani o popangaoika gea o Yosia ko wahigunoakaua de ai huhuloko ma dumutu adaene ona mata-mataika.

⁶ De o ngo Asitorete ma pangao ma liate abe naga Ma Jou o Yawe ai Tau ma goronaka gea ena yao o Yerusaleeme ma kota ma hoanika de ahao o Kidono ma dolaka yatufuku. De yatufuku ibooto de ahao yawedere ka hiadono idadi hoka ma dukuuru dika de gea ihibarihi o lungunu ma ngi-ngioka abe manga nyawa biaha yatobalungunu genangoka.

⁷ De naga o nau-nauru Ma Jou o Yawe ai Tau ma goronaka abe manga badanga yomatobafuku-fukunu la ka idadi o nyawa yomakitigi de o nau-nauru gea la ato hokogea yomahuba o popangaoika. De to ona manga ngi-ngi enangoo o Yosia wohikokihibinaaha. De genangokaoo o ngo-ngofeka manga ngi abe yodumo la o ngoere yodiai abe o nyawa yapake ma oraha yomahuba o ngo Asitorete ma pangaoika. De ma ngo-ngofeka gea to onangoo manga ngi o koano wohibinaahaka.

⁸ De ona abe ma dihiraino yodadi manga hidemo Ma Jou o Yaweika ngaro o kiaka manga gogere o Yehuda ma tonaka ma kota-kotaka, onangoo mata-mata o Yosia wahigilio o Yerusaleeme ma kotaino. Ho ka de manga hidemo Ma Jouika yahikokigilioka o Yerusaleemika de ahao o Yosia womulaenge wohibinaaha o popangao ma huhuba ma ngi mata-mataika. De womulaenge manga tonaka ma dobikoka abe o Geba ma kotaka de ahao wogila-gila manga tonaka ma dobikika abe o Bereseba ma kotaika. De o popangao ma huhuba ma ngi-ngi wakokikilianga de wohibinaaha ena gea abe naga manga kota mata-mataika. De o Yerusaleeme ma kotaka naga manga kimalaa abe una o kota gea wapareta. De o kimalaa gea to una ai tau duru imahitigika o kota ma ngoranika abe nako o nyawa o Yerusaleeme ma kota yowohama ma ngoranino de naga manga gubadioka o kimalaa ai tau ma dadaduhu ma ngorana. De duru o kimalaa ai ngorana ma himangoka naga o popangao ma huhuba ma ngi-ngi genangoka de enangoo o Yosia wohibinaahaka.

⁹ De manga hidemo Ma Jouika abe ma dihira yoleleani o popangaoika de naa ngaro yahigilioli o Yerusaleemino, masara ona gea ko yahigunoakaua yoleleani Ma Jou o Yawe ai huhuba ma ngioka. De ngaro ko idadiua yoleleani Ma Jou ai huhuba ma ngioka masara ona gea yahigunoa la yolomo yomakokutuono de manga dodiawo o hidemo utu abe manga inomo o roti ko iwa ma ragi abe o Isiraele ma nyawa yahidailako Ma Jou ai hidemo mata-mataika.

¹⁰ De naga o Bene-Hinomo ma dolaka o pangao o Moloko ma huhuba ma ngi ma romanga o Tofete. De genangoka o nyawa to ona manga ngofaka yomahihuba de o uku o pangao o Molokika. De o koano gea duru wohibinaaha o Tofete gea la ko idadiokaua o Isiraele ma nyawa manga ngofaka ngaro o nauru eko o ngofeka genangoka yomahihuba.

¹¹ De Ma Jou o Yawe ai Tau ma ngorana ma himangoka naga o punga moi. De ma punga gea itigino de o kamara moi abe o popareta ma nyawa womatengo wogogere genangoka ai romanga o Natana-Meleke. De ma pungaka gea naga ma rupa o kuda muruono naga abe o Yehuda ma nyawa manga kokoano yahuloko abe ona yososawaroika la yodiai. Ho ma rupa gea yodiai ibooto de ahao yakelenga genangoka de yodingakoka o wangeika la ka idadi o nyawa yomahuba-huba o wangeika. De nagali genangoka o gogoroba abe enangoo o Yehuda ma nyawa yodingakoka o wangeika. De ena ma rupa hoka o kuda muruono naga de ma gogorobaka yatauru de ma rupa ena gea ihigiriiri abe ma oraha yomahuba-huba o wangeika. Masara ma rupa o kuda mata-mata gea o Yosia wohihupuoka ka ma moi de ma gogoroba de wakokitufuku mata-mata. Hokogea manga koano o Yosia wodiai la ai kokawaaha ko idadiokaua Ma Jou ai Tau ma himangoka yomahuba-huba o wangeika.

¹² De ma dihira o koano moi naga ai tau daku ma lokuoka o popangao ma huhuba ma ngi muruono naga abe itigi o Ahasa ai kamarika. De ma huhuba ma ngi-ngi ena gea abe o kokoano yohira-hiraika abe yahikoano o Yehuda ma tonakoka ona ihigoko genangoka. De nagahi o popangao ma ngi abe ma dihira manga koano o Manase wahuloko o nyawaika yodiai o punga hinootoka duru Ma Jou o Yawe ai Tau ma datekoka. Ho o Yosia wohiaturu o huhuba ma ngi gea mata-mata ihikokihupuoka de hiadono ena gea yakokiwederoka. De ahao o popangao ma ngede-ngedere gea yatoomuino de yaumo o Kidono ma dolaka.

¹³ De o popangao ma huhuba ma ngi utuohi naga o Yerusaleeme ma kota ma poretoka abe idateke o wange ma hiwariha. Genangoka naga o loku moi ma romanga o Hibinaaha ma loku abe daku ma honongaiye naga o popangao ma huhuba ma ngi-ngi abe ma dihira o Saloomo wodiai genangoka. Abe naga genangoka o Sidono ma nyawa manga dula-dulaka ma pangao o ngo Asitorete, de o Moaba ma nyawa manga dula-dulaka ma pangao o Kamoso, de naga o Amono ma nyawa manga pangao o Moloko abe kiani o nyawa duru yaemono enangika. De o popangao ma huhuba ma ngi mata-mata gea o Yosia wohikokibinaahaka.

¹⁴ De naga genangoka o liate ma ngoe ma ago-agomo abe yodiai o hakaruino de ihidemehele abe yodingakoka o popangaoika. De o liate gea o Yosia ena mata-mata wohikokiwedere. De naga o liate abe o nyawa ihigoko la ihitunguu manga pangao o ngo Asitorete abe o Yosia wotolanga wamataka de ahao o tonaka genangoka wohitamunu de o nyawa manga kobongo.

¹⁵ De o Betele ma kotaka naga o pangao ma ngi abe imanoa o tonaka ma gurutiyeoka abe manga koano ma dihira o Yerobeama wodiai. De o Yerobeama una o koano abe duru wahigaro-garo o Isiraele ma nyawaika la yahowono Ma Jouika. De o huhuba ma ngi gea ma oraha naa enangoo o Yosia wohibinaahaka abe o huhuba ma ngi wakilianga de to ena ma hakaru wawedere hiadono idadi imaketero hoka o kafo dika. De o Asitorete ma liate enangoo o Yosia watolanga de watufuku.

¹⁶ De wohibinaaha o huhuba ma ngi gea ibooto de ahao womalega-lega arihonongaika de wamake naga o loku ma geleforoka abe o nyawa manga lungu-lungunu genangoka ho wahuloko la ai duduhunu yoiki genangika de o nyawa manga kobo-kobongo ihihupu o lungu-lungunino. De ahao o nyawa manga kobo-kobongo gea watufuku o huhuba iharo-harongo ma ngioka. De mata-mata o Yosia wodiai genangoka idadi duru imaketero abe hoka duru ma dodihiraka Ma Jou wahingahuoka. Abe naga Ma Jou o Yawe ai uru ma dodofanga womatengo woboa o huhuba ma ngiino gea de wapake de o hohowono ma hingahu Ma Jouino abe ika-ika de ahao hokogea idadi genangoka abe wotemokau.

¹⁷ Ho naa o Yosia o nyawa manga kobo-kobongo gea watufuku o huhuba iharo-harongo ma ngioka ibooto de ahao wamake o lungunu moi de ma dodunguuoka abe naga o hakaru moi ihigoko o lungunu ma lokuoka gea. De waleha o Betele ma nau-naurika, wato, “Nako o lungunu gea to onagona manga lungunu?” De ona yopaluhu ato, “Una Ma Jou ai uru ma dodofanga abe ma dihira wotemoka abe ika-ika ahao idadi imaketero abe hoka naa ngona nodiaioka o huhuba ma ngioka naa.”

¹⁸ Ka de gea o Yosia woihene de wotemo, wato, “Nako gea to una ai lungunu ufa haruwae de hanoaika dika, ho kiani ai kobongo genangoka dika igoo-gogere.” Hokogea o Yosia wabooto ai hibinaaha o popangaoika o Beteloka.

¹⁹ De ahao o Yosia wogila-gila dika wodiai abe imaketero hoka wodiai o Beteloka hiadono woiki o Isiraele ma tonaka daukuku abe idateke de ma oraha naa ihiromanga o Samaria ma tonaka. De manga kota-kota wogetongo wodulu de wohibinaaha o popangao ma huhuba ma ngi-ngi abe o Isiraele ma nyawa manga kokoano yohira-hiraika ihigoko o kiaka naga ma tonaka abe ikurutiye de genangoka yairiki la yomahuba-huba o popangaoika. De to ena ma huhuba ma ngi mata-mata gea wohibinaaha angamoi o Isiraele ma nyawa duru manga hininga adaene o popangaoika gea. De gea ma titi hiadono Ma Jou o Yawe duru ai ngamo ifae onangika.

²⁰ Ho o Yosia wakokitoma to ona manga popangao ma hidemo ma nyawa mata-mataika. Abe ona o popangao yoleleani yahohonenge de ahao manga pangao ma huhuba ma ngioka de duru o haharongo ma huhuba ma lokuoka de manga honenge yahidutufuku ka ma moi de o nyawa utu manga kobo-kobongo. Ho o Samaria ma kota-kota o Yosia wakokidulu ibooto de ahao wogila-gila wolio o Yerusaleeme ma kotaika.

²¹ De genangoka, o Yerusaleeme ma kotaka, o Yosia ahao Ma Jou ai Behehongo ma Buku wohidoakiye de wahigaro ai kokawaahaika mata-mataika abe ko manga ngoe yomatoomuino genangoka, de wato, “Abeika Ma Jou o Yawe ai Behehongo ma Buku naa abe kiani ngone haniikoli. Naa ngone ka idadi homulaengoli haniiki Ma Jou ai behehongo ngoneino abe wohitulihuku o bukuoka naa. De naga ai behehongo moi ngoneino, abe inahitararono ato o tao-taongiye o Totilakuru ma rame-rame ngone o Isiraele ma nyawa kiani hohirame-rame Unangika de haniiki to ena ma hiaturu abe naga o bukuoka naa.” Hokogea o Yosia wahigaro onangika.

²² De una o koano wato yomulaengoli o Totilakuru ma rame-rame ihirame-rame angamoi duru ma dekanoka o Isiraele ma nyawa Ma Jou ai behehongo ko yaniikokaua. Abe manga Totilakuru ma rame-rame ma baha ihirame-rame gea duru ma dihira abe ma oraha o Isiraele ma nyawa manga hihira yomaketeturuuru yahihira o Isiraele ma nyawa mata-mataika. Abe ma oraha gea to ona manga koano Ma Jou ko wahidoakuahi onangika. Ho ma oraha o Saulu wahikoano ka hiadono o kokoano ko manga ngoe o Isiraele ma tonakoka de o Yehuda ma tonakoka yahikoano masara o Totilakuru ma rame-rame o Isiraele ma nyawa ko ihirame-rameokaua. Ho ngaro o taongo iratuhu ma dekana masara hokogea ma dekana abe o Isiraele ma nyawa ko yaniikokaua manga Totilakuru ma rame-rame.

²³ Masara naa de abeika, o Yosia wahikoano ngade-ngade ai taongo ngimoi de tufange ma dekanino de una wohiaturu la o Totilakuru ma rame-rame ihirame-rame Ma Jou o Yaweika o Yerusaleeme ma kotaka.

²⁴ De utuohi o Yosia manga tonaka wohitebini abe o kia naga abe ko Ma Jouokaua, de to Una ai mauokaua de aino, gea ena wohibinaaha. Abe ona yotobamai-maihi o tokatino ma duduhunu, de abe ona yatobagahoko o goma-gomangika, ona mata-mata gea ahao ko moiokaua naga. De ma dihiraino o tau homoi-homoiika naga manga gogoana manga babatingino de naga o popangao ma rupa duru ma ngoeohi abe duru Ma Jou waemono enangika. Ho enangoo o Yosia wohiofioka o Yerusaleeme ma kotaka ka hiadono o Yehuda ma tonaka mata-mataika ena gea ko iwaka.

²⁵ De ngaro o Isiraele ma nyawa manga kokoano yododihiraika de ngaro manga kokoano abe o Yosia iwihidoduruino masara ko moiua abe manga koano manga hininga ka ilio Ma Jou o Yaweika hoka o Yosiali. Una duru womangali ma gou-goungu Ma Jouika de ai hininga ma gahumu, de ai jiwa ma gahumu, de ai buturungu ma gahumu. Abe o Yosia duru waniiki itiai Ma Jou ai behehongo, de ai pareta ma hiaturu mata-mataika duru wohingounu abe o Musa wotulihi Ma Jou ai Pareta ma Bukuoka.

²⁶ De ngaro hokogea o Yosia Ma Jou ai mau wohidagi ai wowangoka de ai tonakokaoo masara Ma Jou o Yawe ai ngamo kohahaukohi o Yehuda ma tonakika ma titi mata-mata gea abe manga koano o Manase gea wodiai duru itorouholi.

²⁷ Ho ma titi gea abe o Manase wodiai abe ma oraha ai danongo o Yosia ko wodadiuahi manga koano, hiadono Ma Jou o Yawe womaputuhokau wato, “Ngohi ahao abe ahi nyawa yogogere o Yehuda ma tonaka gea onangoo ahao tahiofi ahi himangoka imaketero abe hoka ma dihiraino Ngohi o Isiraele ma nyawa tahiofioka ka hiadono tahihupu ahi himangino. Ho ngaro naa o Yerusaleeme ma kota Ngohi tairiki la idadi ahi gogere nenangoka, de naga ahi tau abe tato ka ihikaika ahi romanga, Ma Jou o Yawe yagorakiye genangoka, masara ngaro hokogea ma Ngohi tomaputuhokau ena gea mata-mata tahiofi ahi himangoka.” Hokogea Ma Jou wotemo de ahao hokogea wodiai.

²⁸ De manga koano o Yosia ai ade-ade utuohi naga ma oraha una wohikoano o Yehuda ma tonakoka, de ai ade-ade gea mata-mata ihitulihukuoka o bukuoka abe ma romanga, “O Kokoano abe Ihikoano o Yehuda ma Tonakoka manga Ade-ade.”

²⁹ De ma oraha o Yosia wohikoanohi de o Mesiiri ma nyawa manga koano o Neko, una de ai tentara yohongaiha o Efaraata ma akeriha la ato o Asuru ma nyawa manga koano iwiduhunu ma oraha waparangi o Yehuda ma tonakika. De ma oraha yaparangi de o Yosia wahihira ai tentara la manga musu manga himangoka yahitogumu o Megido ma tonakoka la ufa ona yomahiadono o Yehuda ma tonakika. Masara manga koano o Neko de ai tentara ona o Yosia de ai tentara yomarihimanga, de o Neko wolaku ka hiadono o Yosiaoo iwihohonenge genangoka o Megido ma tonakoka.

³⁰ De o Yosia ai duduhunu yamuruono naga abe ai honenge yakelenga o parangi ma goroba ma goronaka de iwihigilio o Yerusaleeme ma kotaika de iwilungunu to una ai lungunoka. De ahao o Yehuda ma tonakoka o Yosia ai ngofaka o Yoahasa o Isiraele ma nyawa iwihitunguu la unangoli iwihidadi manga koano ho una gea wodadi ai baba o Yosia ai duruuru.