2 Kokoano 22 - Ma Jou ai Demo-demo o Totobelohoka

O Yosia wahikoano ona abe yogogere o Yehuda ma tonakoka

¹ De ahao naga womatengo ai romanga o Yosia una duru ka o ngofakohi de iwihidadi o koano ma hungi abe wahikoano o Yerusaleeme ma kotaka. Abe o Yosia ai ngumuru ai taongo tufange dika ma oraha womulaenge o Isiraele ma nyawa wahikoano o Yehuda ma tonakoka. De una wahikoano ai taongo moruange de moiino ma dekana. To una ngoi meme o ngo Yedida abe ami baba o Adaya de una o Bosakata ma nyawa.

² De o Yosia ai wowango duru itiai hiadono Ma Jou o Yawe wisanangi ai datorika. De o Yosia ai datoro imaketero hoka ai tofora o Dautoli ai datoro, abe o Yosiaoo ko worehenua o totiai ma ngekomino masara ka ihikaika waniiki ma totiai dika.

^3-4 De o Yosia ai nyawa wahikoano ngade-ngade ma dekana o taongo ngimoi de tufangeino de una wohuha ma titi Ma Jou ai Tau ma ngoe irusakoka. De naga ai duduhunu o Safana abe wotobatulihi o koano ai hiaturu abe o kia dika naga. O Safana gea o Asalia ai ngofaka de to unangoli ai baba o Mesulama. De o wange moiuku o Safana gea o Yosia wiahokino de wihikarajaanga wato, “Safana, kiani noiki Ma Jou ai Tauika nitutumu nanga hidemo Ma Jouiye abe ka unangohi o hidemo wokokurutiye, ai romanga o Hilikia de ngona nadofanga ahi behehongo naa unangika, nato, ‘Nanga koano wonihibehehongo ngona o Hilikiaika la natailako o hidoaka Ma Jouika ma tiwi abe naga yagogono Ma Jou o Yawe ai Tauoka. O tiwi gea ma rupa o haaka abe ona Ma Jou ai Tau ma ngoranoka ma gogoana yodafongo mata-mata de ahao yagogono.

⁵ De ma tiwi gea ngona, o Hilikia, kiani naetongo la nohioriki hokokia ma amoko de ahao onangika nahidoaka abe yatagongo ma karajaanga abe Ma Jou ai Tau ihidiai. Abe o kiaka irusakoka gea ngohi ani koano tato kiani yadiai. De ona abe manga tagongo ma karajaanga gea, ka idadi ma tiwi gea yapake la idadi gea o nyawa manga hewa abe yotobakarajaanga Ma Jou ai Tauoka.

⁶ Abe ona o nyawa yoperelu abe yososawaro yotobadiai o gotaino o tau, de ona yososawaro o hakaruino abe o tau yodiai, de onangoo abe yososawaro o hakaru ihidemehele duru itiai la ihigoko o dadaduhu. De ona kiani yaijaino ma gota abe yoperelu de o hakaru yobaiti de yopawa itotiai la Ma Jou ai Tau ihidadiokali hoka ma dihirainoli.

⁷ De abe ona yatagongo ma karajaanga naa de ngaro ufa dika yotulihi abe ma tiwi hokokia ma amoko yapake homoi-homoiika abe manga karajaanga ma goronaka. Angamoi ona gea duru tahioriki ka idadi hangaku abe Ma Jou ai tiwi gea ko yapakeua ihowono.’” Hokogea o Yosia ai behehongo abe o Safana wadofanga o Hilikiaika.

O Hilikia wamake Ma Jou ai Behehongo ma Buku

⁸ De ipahaino de o Hilikia gea wihingahu o Safanika, wato, “Abeika, ngohi naa tamakeoka o buku nenanga abe ma dola Ma Jou ai Behehongo abe naga ai behehongo ma hiaturu de ai pareta mata-mata ingodumu ma bukuoka! De ma buku nenanga tamake Ma Jou o Yawe ai Tau ma goronaka ma oraha mimahidiai o karajaanga mihidagi.” Hokogea o Hilikia wihingahu o Safanika de ahao o buku ma lulu gea wihidoaka unangika de ahao o Safana wabasa Ma Jou ai behehongo ma buku gea.

⁹ De ahao o Safana woboa o Yosiaino de wihingahu wato, “Ahi koano, ka idadi naa tonihingahu abe ona Ma Jou o Yawe ai Tau ma ngoranoka abe o nyawa manga hidoaka o tiwi yotobadafongo, ona yodiai abe hoka nahibehehongoka onangika. Ho ma tiwi ena gea abe mata-mataika ma dihiraino yatoomuino, gea yahidoakoka onangika abe yatagongo itiai Ma Jou o Yawe ai Tau ma hidiai ma karajaanga ma hiaturu. De o hewa ma tiwi yahidoaka onangika abe yotobadiai ma karajaanga Ma Jou ai Tauoka.”

¹⁰ Gea o Safana wihingahu ibooto o Yosiaika de ahao wihimatoko Ma Jou ai Behehongo ma Buku gea, de wato, “Abeika o buku ma lulu nenanga abe nanga hidemo Ma Jouika o Hilikia wohihidoaka ngohino.” Hokogea wihingahu de ma buku gea wihimatoko o Yosiaika de ahao womulaenge ma buku gea wibasa unangika.

¹¹ De o Safana wibasa o Yosiaika de una duru wototoihene Ma Jou ai Demo-demo gea abe ma dihira Ma Jou wohitulihukuoka ai Pareta ma Bukuoka. De o Yosia duru ai hininga ihuhaholi ka hiadono ai baju ai badangoka de wakakihi la wohitunguu ai hininga ma huha.

¹² De naga o nyawa yamotoa yokokurutiye o Yehuda ma tonakoka abe o Yosia wabehehongo la yoboa unangino. Ona o Hilikia, una manga hidemo Ma Jouika, de o Ahikama abe ai baba o Safana, de o Akaboro abe ai baba o Mikaha, de o Safana abe wotobatulihi o koano ai hiaturu o kia dika naga, de o Asaya una abe ka ihikaika o koano ai datekoka la witobaduhunu de o sosawaro ma demo. Ho ona yamotoa yokokiboa de ahao wahibehehongo onangika abe hokokia kiani yodiai.

¹³ De o Yosia ai demo hokonaa onangika, wato, “Ngini niloiki Ma Jou ai Tauika de ngini ninahidemo Ma Jouika ngaro ngohi de ngaro nanga nyawa mata-mata o Yehuda ma tonakoka de kiani ninahidemo Ma Jou o Yaweika. De ngini niwileha Unangika abe ma titi ma demo-demo abe ngone hamakeoka ai buku ma lulu ma goronaka nenanga. Ngone kiani hohioriki angamoi naa duru ma dekana ai demo-demo gea hanoaika masara ma oraha naa hamakeokali. Ngohi tohioriki Ma Jou o Yawe ai ngamo ifae ngoneino angamoi nanga totofora ko ihingounua ai demo-demoika abe habasa ai buku ma luluino naa. Abe ngone naa duru ma dekanino ko haniikua ai behehongo ngoneino. De ai behehongino gea abe inahitararono hokokia Ma Jou wato kiani ngone hodiai la to Una ai mau haniiki!”

¹⁴ Ho o Hilikia, abe manga hidemo Ma Jouika, de o Ahikama, o Akaboro, o Safana, de o Asaya ona yoiki o kapongo ma hungika abe naga o Yerusaleeme ma kota ma goronaka la ka idadi imitutumu momatengo Ma Jou ai uru ma dodofanga abe ami romanga o ngo Huda. Ona yolingiri Ma Jou ai hingahu onangika de ato, “Marai muna ka idadi monaduhunu.” O ngo Huda gea o Salumu ngoi fekata de to una ai baba o Tikawa de to unangoli ai baba o Harasa abe una wohiaturu manga pakeanga abe ona yotobaleleani Ma Jou ai Tauoka.

¹⁵ Ho ona yomakoketemo de o ngo Huda de mahingahu ona yamotoaika, mato, “Igoungu, Ma Jou o Yawe, abe to ngone o Isiraele ma nyawa nanga Jou, Una wonahingahuoka ma titi abe ngini niboaino nilingiri ho ka idadi nilio unangika abe winihidingoto ngohino.

¹⁶ De ngini niwihingahu hokonaa Ma Jou o Yawe wotemoka, wato, ‘Ngohi o kota nenanga de o nyawa mata-mata yogogere o kota ma goronaka ka ma moi tahikokibinaaha imaketero abe totemokau o buku ma lulu ma goronaka abe naa ma duruika niabasaka.

¹⁷ De hokogea Ngohi totemo angamoi ahi nyawa ko ihiniikokaua Ngohino de o huhuba ma ngoe yomahihuba o jou-jou ma homoaika, de yomadiai manga popangao ma ngoeika hiadono Ngohi duru tangamo onangika. Ho ma oraha naa duru ahi ngamo ifae nia kotaika nenanga de ahi ngamo gea ko itogu-togumua.’ Hokogea Ma Jou ai demo abe kiani tadofanga nginika.”

¹⁸ De ahao o ngo Huda ka motemohi ona yamotoaika, mato, “Masara ngini kiani nilio o Yehuda ma nyawa manga koanoika, abe una gea winihidingoto la ngini nilingiri Ma Jou o Yawe ai hininga. Ho niwihingahu unangika, niato, ‘Mia koano hokonaa Ma Jou o Yawe, o Isiraele ma nyawa manga Jou, wotemo ngonaika, wato, “Ngohi Ma Jou o Yawe naa tonihingahu ma titi abe ngona ma duruino noihenoka ahi bukuino.

¹⁹ Ngohi Ma Jou o Yawe tonimake abe ma oraha ahi demo gea inibasa ahi bukuino de ngona duru nomatoduba de nomahitipokouku to Ngohi ahi himangoka. Abe ma oraha ngona noihene ahi hohowono ma demo o kotaika nenanga de duru ngona nohuha. De hokogea ani hininga ihuha angamoi ahi demo gea yadaene o kota ma kokawaaha mata-mataika de hiadono ahi hohowono ti ngini nia tonakoo ka yadaene mata-mataika. De angamoi Ngohi ahao tinihiofioka ngini abe nigogere nia tonaka ma amokika abe tinihikokihupuoka nia tonakino. Masara ka de ngona noihene ahi hohowono ma demo gea de ani huha duru ilamoko ka hiadono ani baju nakakihi de ani toduba nohigari ahi himangoka. Ho Ngohi Ma Jou o Yawe toihene ani toduba ma demo.

²⁰ De ma titi ani hininga ma toduba gea ho hiadono ahi hohowono ma hibinaaha o kotaika naa ko tohidingotuahi abe ma oraha ngona ka nowangohi. Ho ma kokangela gea ngona ko namakeua de ka idadi de ani hininga iriidi abe ma oraha ngona nohonenge. De gea ani tonaka naga de ma dameokahi abe ma oraha inilungunu.” Hokogea nanga Jou ai hingahu o koanoika abe wohihidoaka ngohi o ngo Hudaino.’” Ho ka de o Yosia ai hidingoto yamotoa gea yoihene Ma Jou ai hingahu manga koanoika de yomahilooa o ngo Hudaika de yolio o Yosiaika de unangikali iwihingahu.