2 Kokoano 21 - Ma Jou ai Demo-demo o Totobelohoka

O Hisikia ai ngofaka o Manase wodadi o koano ma dorou o Yehuda ma tonakoka

¹ O Manase ai umuru adonoka ai taongo ngimoi de hinooto abe ma oraha una wituruuru ai baba ho unangoli wodadi o Yehuda ma nyawa manga koano. Una ka o ngofakohi ma oraha wodadi o koano de ngoi meme ami romanga o ngo Hesiba. De o Manase gea wahikoano o Yehuda ma nyawa ai taongo moritoa de motoa ma dekanino o Yerusaleeme ma kota ma goronaka.

² De o Manase una duru wodiai abe itotorou Ma Jou o Yawe ai himangoka angamoi una waniiki o nyawa manga biaha abe ma dihira Ma Jou o Yawe wahihupu o Kanani ma tonakino. Ho ona gea Ma Jou wahihupu de waturuuru de o Isiraele ma nyawa abe onangoli wahigogere o Kanani ma tonakoka gea.

³ Masara o Isiraele ma nyawa ika-ika de onangoo yomahuba o jou-jou ma homoaika. De ma dihira o Manase ai baba o Hisikia o popangao ma huhuba ma ngi wohikokibinaahaka abe naga o Yehuda ma tonaka ma goronaka. Masara ai ngofaka o Manase naa, una wohigokokali o popangao ma huhuba ma ngi abe ma dihira ai baba o Hisikia wohibinaahaka gea. Abe o Manase gea wodiaioli o pangao ma huhuba ma ngi la ka idadi ai nyawa yomahuba-huba o pangao o Baalika. De wohigokoli o pangao o ngo Asitorete ma liate ma ngoe abe ma liate ma himangoka gea ai kokawaaha yomahuba-huba enangika. De ona yoleleani o muru-murumu angamoi ato enangoo de ma kuahaka ho hiadono yomahuba-huba enangikaoo abe naga igogere daku o dihangoka. Ho o Manase abe wahikoano Ma Jou ai nyawa daku o Yerusaleeme ma kotaka abe naga o Yehuda ma tonakoka, unangoo duru wodiai itorou imaketero abe hoka ma dihira o Ahaboli. O Ahaba una abe ma dihira wahikoano Ma Jou ai nyawa dau o Isiraele ma tonakoka.

⁴ De o Manase una gea wodiaioo o popangao ma huhuba ma ngi duru Ma Jou o Yawe ai Tau ma goronaka. De hokogea wodiai ngaro Ma Jou o Yawe duru ma dodihiraka wohibehehongo abe ma titi ai tau, wato, “O Yerusaleeme ma kota tomadingakoka la ahi romanga o nyawa ka ihikaika yagorakiye ma oraha yomahuba-huba Ngohino genangoka.”

⁵ De Ma Jou o Yawe ai Tau ma datekoka naga o dodoomu ma loa hinooto de genangoka wodiai o huhuba ma ngi-ngi abe ma dumutu ko Ma Jou o Yaweikaua masara ma dumutu o muru-murumika.

⁶ De genangokaoo o Manase o haharongo ma huhuba ma ngi wodiai abe o nyawa yomahihuba manga ngofaka iharo-harongo o pangaoika, de o Manase to una ai ngofaka idodutu womahihuba iharo-harongo genangoka. De unangoo wotobadiai o nyawaika de womai-maihi la wohioriki abe ahao o kia idadi. De una wolingiri o tobahioriki o nyawaino abe yotobamai-maihika, de wolingiri o nyawaino abe ato bari ahao manga gomangino yamake ma tobahioriki. Hokogea o Manase wotobadiai abe Ma Jou o Yawe wato duru itotorou de ko idadiua to Una ai nyawa yodiai ma dorou hokogea. Ho naa Ma Jou o Yawe womalega o Manase ai datoro ma dorouika de duru ai ngamo ifae unangika.

⁷ De nagali abe o Manase una ma hirete wodiai ma dimo-dimo o Asitorete ma liate moi. De ma pangao gea wodiai ibooto de ahao enangoo wohigoko duru Ma Jou o Yawe ai Tau ma loaka. De hokogea o Manase wodiai ngaro ma dihira Ma Jou o Yawe wahibehehongo o Dautika de ai ngofaka o Saloomoika, wato, “To Ngohi ahi Tau nenanga abe nihidiai o Yerusaleeme ma kota ma goronaka tomadingakoka ahi romangika. Abe Ngohi tairiki o Isiraele ma nyawa manga dutu yangimoi de yahinootoino manga tonaka. De manga tonaka mata-mataino o kota moi tairiki la genangoka ahao Ngohi Ma Jou o Yawe tomanoa manga hidogoronaka. Ho duru to Ngohi dika ahi romanga o nyawa yagorakiye ahi Tauoka naa de ka hiado-adonika.

⁸ De nako o Isiraele ma nyawa ahi behehongo mata-mata onangika ihingounu, de nako ahi paretaoo, abe Ngohi ma dihira ahi gilaongo o Musa tihitagongo la wahidoaka onangika, nako enangoo yaniiki itiai, de Ngohi tosanangi onangika abe yogogere o tonakoka naa. De Ngohi tahibehehongo onangika Ngohi ahao ko tahigunoaua o nyawa utu yahihupu manga tonakino naa abe ma dihiraino tahidoakoka manga totoforaika.” Hokogea ma dihira Ma Jou ai hingahu o Dautu de o Saloomoika abe yadofanga o Isiraele ma nyawa mata-mataika.

⁹ Masara o Isiraele ma nyawa manga Jou ko iwihigihenua de manga koano o Manase wahigaro ma dorouika hiadono ka onangohi manga dorou ilamoko abe nako de ona abe ma dihira Ma Jou o Yawe wahihupu o Kanani ma tonakino. Abe o Kanani ma nyawa manga dutu kohangoe Ma Jou wahibinaaha ma titi yodiai itorou.

¹⁰ De Ma Jou o Yawe naga ai hingahu ai nyawaika ma titi manga howono. De wipake womatengo abe una wihidadi to Una ai uru ma dodofanga la ai demo gea wadofanga o Isiraele ma nyawa mata-mataika.

¹¹ De hokonaa ai demo onangika, wato, “O Manase, una abe o Yehuda ma nyawa wahikoano, una wodiai duru itorouholi. Abe ngaro tahidotelega una de o Amori ma nyawa abe ma dihira yogogere ai tonakoka ma, ka unangohi wodiai itorou. De una waribuutu o Yehuda ma nyawaika la onangoo yomahuba-huba ai popangaoika hiadono onangoo yahowono ilamoko Ngohino.

¹² Ho Ngohi Ma Jou o Yawe, o Isiraele ma nyawa manga Jou, kiani ona tahohowono. Abeika hokokia tahipoha de o bobinaaha ma hohowono o Yerusaleeme ma kotaika de o Yehuda ma nyawa manga tonakika. O kokangela yadaene onangika hokogea ma dubuho hiadono ka de o nyawa utu mata-mata yoihene dika manga kangela ma ade-ade de duru yatobatodokana de yoborohono de manga hawana.

¹³ Abe Ngohi ahao tahohowono o Yerusaleeme ma kota hiadono idadioka imaketero hoka o Samaria ma kotali ma dihira. De hiadono imaketero hoka ma dihira ko iwa abe itotiai ma koano o Ahaba ai tau ma goronaka de hokogenangoli ma oraha naa ko iwa abe itotiai o Yerusaleeme ma kota ma goronaka. Ho Ngohi ahao o Yerusaleeme ma kota tohiofi abe tohiketero de o dodai abe nako o nyawa yolomo ibooto de ahao manga dodai yaihoro hiadono duru iofioka arihononga! De duru imaketero hokogea Ngohi Ma Jou todiai o Yerusaleeme ma kotaika.

¹⁴ De ahao o Yehuda ma nyawa manga hou abe nagahi ma tonakoka gea onangoo tahidogunoaika de tahidoaka manga musu manga giamika. Ho ona yodadi hoka manga musu manga inomo abe yomagora o Yehuda ma nyawa manga inomo de manga kiahonanga yomale imaketero hoka yahikalaka o parangi ma goronaka ho yaemono onangika.

¹⁵ De hokogea tahohowono angamoi ona duru yotobadiai itotorouholi ahi himangoka hiadono ahi ngamo duru ifae onangika. Abe hokogea ahi ngamo itagi manga howono ma datorika angamoi ona naa duru ma dekanino de ka ihitobalawana dika ahi nyawa. Abe ngaro ma dihiraino ma oraha manga tofora tahihupu o Mesiiri ma nyawa manga tonakino de ka hiadono ma oraha naa, masara ona ka ihikaika yodiai Ngohino itorou hiadono tongamo onangika.

¹⁶ De Ngohi duru tingamo o Manaseika mangale ma titi una duru wahigaro o Yehuda ma nyawaika la ka ihikaika yahowono Ngohi Ma Jou o Yawe ahi himangoka. De hongoli ahi ngamo ifae unangika abe una duru o nyawa manga ngoe watoma ngaro ko yahowonua. De hokogea manga awunu wakopoa o Yerusaleeme ma kota ma dobikoka ka hiadono ihahuru ma dobikika.” Hokogea Ma Jou o Yawe ai hingahu abe ai uru ma dodofanga wadofanga o Yehuda ma nyawaika.

¹⁷ De mata-mata utu abe o Manase wodiai de ai howono ma ade-ade gea ihitulihukuoka o buku moioka ma romanga, “O Kokoano abe Ihikoano o Yehuda ma Tonakoka manga Ade-ade.”

¹⁸ De ma oraha o Manase wohonenge de iwilungunu o redioka moi abe naga to una ai tau ma loaka de ihiromanga o Usa ai redi angamoi una abe wohiaturu o redi gea ai romanga o Usa. De ahao o Manase to unangoli ai ngofaka, ai romanga o Amono ai baba wituruuru ho unangoli ahao wahikoano ona o Yehuda ma tonakoka.

O Manase ai ngofaka o Amono wodadi ai baba ai duruuru

¹⁹ De naa o Amono wodadi manga koano ma hungi o Yerusaleeme ma kotaka de ai umuru ai taongo monaoko de hinooto ma oraha womulaenge o Yehuda ma nyawa wahikoano. De una ai dekana wahikoano ai taongo hinooto dika. De o Amono ngoi meme o ngo Mesuleme abe ami baba o Harusu abe una o Yotaba ma nyawa.

²⁰ De o Amono una wodiai itorou Ma Jou o Yawe ai himangoka imaketero hoka ai baba o Manaseoli.

²¹ Abe o Amono waniiki to ai baba ai datoro ho unangoo womahuba-huba o popangaoika de ena gea woleleani imaketero hoka ai babali.

²² Abe una duru Ma Jou o Yawe wiporetika, ngaro to una ai totofora yomahijou ka Ma Jou o Yaweika dika. Masara una ka ma dihirainohi de ko waniikua Ma Jou o Yawe ai hininga.

²³ De ahao ona abe manga koano o Amono iwileleani ko iwisanangiua unangika hiadono ato iwihidee iwitoma. De ahao idadi o Amono iwitoma duru to una ai tau ma goronaka ho una wohonengoka.

²⁴ Masara ai gogilaongo abe iwihidee o Amonika hiadono iwitoma ahao onangoo yakokitomaka. Angamoi o Amono ai kokawaaha utu ato ai gogilaongo yahowonoka ma titi manga koano iwitomaka. De ahao o Amono ai ngofaka o Yosia unangoli iwihidadi manga koano abe ai baba ai duruuru.

²⁵ De mata-mata utu abe o Amono wodiai naga ma ade-ade ihitulihukuoka o buku moioka ma romanga, “O Kokoano abe Ihikoano o Yehuda ma Tonakoka manga Ade-ade.”

²⁶ De ma oraha o Amono wohonengoka de iwilungunu de ai lungunu ma ngi o Usa ai redioka. De ahao ai ngofaka o Yosia unangoli ai baba wituruuru ho unangoli wahikoano o Yehuda ma nyawa.