2 Kokoano 17 - Ma Jou ai Demo-demo o Totobelohoka

O Hosea una gea manga koano ma baha o Isiraele ma tonakoka

¹ De ipahaino de o Hosea abe ai baba o Ela una womulaenge wahikoano o Isiraele ma nyawa manga tonakoka. De ma oraha gea daku o Yehuda ma tonakoka de o Ahasa ai nyawa wahikoano ngade-ngade ai taongo ngimoi de hinooto ma dekanino. De o Hosea wogogere o Samaria ma kotaka ma oraha wahikoano o Isiraele ma nyawa dau o Isiraele ma tonakoka. De una wahikoano ai taongo hiwo ma dekana.

² De o Hosea gea unangoo wodiai itorou Ma Jou o Yawe ai himangoka masara ai dorou ko adonikaua abe ma dihiraino o kokoano yodiai itorou o Isiraele ma tonakoka.

³ De doka o Asuru ma tonakoka naga manga koano o Samanesere de una womaputuhu waparangi o Isiraele ma nyawa manga tonakoka. De ma oraha o Samanesere waparangi onangika duru wolaku abe ai tentara duru iwihikala o Hosea de to una ai tentara. Ho o Hosea wodadi imaketero hoka o Samanesere ai huhuloko dika hiadono o tao-taongiye kiani duru o tiwi ma amoko wihidoaka o Asuru ma nyawa manga koano o Samaneserika.

⁴ Masara o Hosea woigo wilawana o Samaneserika de hokonaa ai hidee, wato, “O Samanesere ai kuaha ngohino ka idadi tohiwedere.” De hokonaa wodiai abe una womatohiki woiki o Mesiiri ma nyawa manga koanoika la ufa o Samanesere wihioriki ma titi ai hidee. De o Mesiiroka manga koano abe iwihiromanga o So ahao o Hosea witutumu de womagahoko o duduhunu unangino nako o Asuru ma tentara iwingohamoli yaparangi o Isiraele ma nyawaika. Ho o Hosea ai hidee ma hiaturu hokogea wodiai de ai bobangu ma tiwi abe o tao-taongiye kiani wihidoaka ma koano o Samaneserika, ena gea ko iwaka abe ko wihidoakokaua. Masara o Samanesere ahao wohioriki o Hosea ai lawana ma hidee ho wohiaturu la o Hosea iwitaoko de iwibui o bui ma tauoka.

⁵ Ho gea o Isiraele ma nyawa manga koano iwibuioka de ahao o Asuru ma nyawa manga koano, o Samanesere, una de ai tentara yangohama o Isiraele ma nyawa manga tonakika de o taongo hange ma dekanino o Samanesere ai tentara wapake abe ka ihikaika yaparangi o Samaria ma kotaika la yangohama.

⁶ De ma bahaika o Samaria ma nyawa wahikala de gea yadaene o Hosea ai taongo hiwo ibooto abe wahikoano o Isiraele ma nyawa. De gea o Hosea iwibuiokahi ho ai kuaha iwederoka de o Isiraele ma nyawa manga ngoe o Samanesere wataoko de wao to una ai tonakika. De o Asuru ma tonakoka wahigogere de manga doomu ma ngoe abe manga ngi homoi-homoiika ai tonaka ma honongaka abe ihiromanga o Halaha ma tonaka. De utu o Isiraele ma nyawa wao ai tonaka ma honongali ma romanga o Gosana de wahigogere o Haboro ma akere ma ngigoroka. De o Isiraele ma nyawa utu wao ka hiadono o Madai ma nyawa manga tonakika de wahigogere to ona manga kota-kota ma goronaka.

Ma titi Ma Jou o Yawe wahohowono o Isiraele ma nyawa

⁷ De o kokangela gea adaene o Isiraele ma nyawaika angamoi ona yomahuba-huba o jou-jou ma homoaika. Hokogea ona yahowono manga Jouika, Ma Jou o Yaweika, angamoi duru iwiporetoka. De hokogea ma titi hiadono Ma Jou wohiboa o kangela onangika, ngaro ma dihira Una wahihupu manga ribuutu ma karajaangino o Mesiiri ma tonakoka de wagoana onangika la o bodito ko yadaenua manga dodagi ma goronaka.

⁸ De ona o Isiraele ma nyawa Ma Jou wao o Kanani ma tonakika abe ma dodihiraino naga o nyawa yogogere genangoka abe yomahuba-huba o popangaoika dika. Abe ma nyawa gea Ma Jou o Yawe wahihupuoka ma tonakino abe ma oraha o Isiraele ma nyawa wahigogere manga tonakoka gea. Masara ipahaino de ona ahao ko manga ngoe manga Jou iwiporetoka de yaniiki o nyawa ma dihiraino manga biaha hiadono onangoo yomahuba-huba o popangaoika. De o Isiraele ma nyawa manga kokoano onangoo yahigaro manga kokawaahaika la yaniiki to ona manga huhuba ma hiaturu o popangaoika.

⁹ De o Isiraele ma nyawa yodiai itorou irupa-rupa ho Ma Jou o Yawe Una duru ko wosanangiua manga datorika. Angamoi ona yodiai o popangao ma ngi abe genangoka ihigoko o pangao ma rupa de ena gea ihigiriiri de yomahuba-huba enangika. De hokogea yodiai abe manga kapongo ma eteteke ma goronaka, de manga gogoana ma ngioka, de ka hiadono manga kota ma amoko ma goronaka abe ihigilolitino de o dadaduhu de ma buturungoka. Ho ngaro o kiaka dika naga Ma Jou ai nyawa yogogere ma, genangoka mata-mataika nagau o popangao ma huhuba ma ngi-ngi.

¹⁰ De onangoo ihigoko ma ngoe o huhuba ma ngi abe yodiai o hakaruino abe o hakaru yafafoiye de ihidemehele de ena gea ma gurutiye de abe ma rupa hoka o liate ma amoko. De o loku-loku mata-mataika naga ma tubuoka o huhuba ma ngi ma gurutiye hokogea de o kiaka naga o gota ma amoko abe de ma fofongoka genangoka homoi-homoi naga o Asitorete ma liate.

¹¹ De ona o Isiraele ma nyawa yomahuba-huba o popangao ma huhuba ma ngi-ngioka abe o manyanyi yotufuku de manga horomati o popangaoika duru imaketero dika hoka o nyawa abe ma dihiraino ona yogogere manga tonakoka gea. De ona ma dihira gea Ma Jou o Yawe wahihupuoka ma oraha ai nyawa wahingohama. Ho duru o Isiraele ma nyawa yomahitaana abe yodiai duru itotorou de gea ma titi hiadono Ma Jou o Yawe ai ngamo ifae onangika.

¹² Igoungu, ona duru hokogea yomahuba-huba o popangaoika ka ihikaika ngaro Ma Jou o Yawe duru wahiree-reeika onangika de ai hitiari ma ngoe.

¹³ Abe Ma Jou o Yawe ai uru ma dodofanga wohigali-gali wahidingoto ai nyawaika. De nagaoo o nau-nauru abe wahiakunu la yatobamake Ma Jou ai himatoko la ona ka idadi ihioriki o kia dika abe Una wahimatoko onangika. Ho onangoo Ma Jou o Yawe wahidingoto manga gogianongoruika dau o Isiraele ma tonakoka de daku o Yehuda ma tonakoka de Ma Jou ai demo yadofanga onangika. Abe yahingahu Ma Jou ai nyawaika, ato, “Ngohi Ma Jou tinihiree-reeika tinihingahu, ngini kiani nitoba abe genangino nitobadiai itotorou la ka idadi nimangali nia hininga Ngohino. Ngini nihiorikokaoo mata-mata Ngohi tinihidoakoka abe nia popareta ingodumoka nginioka. Abe genangino tinihibehehongo de ngini niamake ahi pareta mata-mata ho kiani ngini nihingounu enangika. Nia totofora gea de ahi uru ma dodofanga ko manga ngoe tapake la ona inihingahu abe inihitiari nginika ngaro dau o Isiraele ma tonakoka, eko ngaro daku o Yehuda ma tonakoka ma, ahi hitiari ma ngoe tinihingahuokau.” Hokogea Ma Jou wahitiari ai nyawaika.

¹⁴ Masara ngaro Ma Jou ai hitiari ma demo hokogea o Isiraele ma nyawaika ma ko iwihigihenua. To ona manga pea ma rihiki imaketero hoka manga totoforali manga pea ma rihiki ho onangoo ka ihikaika yoluku iwingaku manga Jouika, Ma Jou o Yaweika.

¹⁵ De ai popareta de ai behehongo o Isiraele ma nyawaika, abe ma dodihiraka de manga totofora yomahiketehibehehongoka de Ma Jou, ona gea ahao yoluku yaniiki ma behehongo gea ngaro Ma Jou ai hitiari ma ngoe onangika. De yomahuba-huba o popangaoika dika abe duru parahaja yomahinganono enangika. De hokogea manga wowango ma datoro ho to onangoo manga wowango ka parahaja dika. Ona yoigo o nyawa manga datoro yaniiki abe manga tonaka imakadateke de o Isiraele ma nyawa manga tonaka. De hokogea ona yodiai ngaro duru Ma Jou o Yawe wahibehehongo wato duru ko idadiua o nyawa utu manga biaha yaniiki.

¹⁶ Abe ona yalawana Ma Jou o Yawe ai behehongika ka hiadono manga pangao yodiai abe ma rupa o hapi ma ngofaka hinooto. De ona o pahitaaka yapake yodiai abe o hapi ma rupa o gurasino eko ma kiahonangino abe ma dogowini hoka o behi. De ihigoko o liate abe genangoka yomahuba-huba manga pangao o ngo Asitoretika, de yomahuba-huba o pangao o Baalika. De onangoo yomahuba-huba o muru-murumika abe ena gea daku o dihangoka de yangaku o muru-murumika gea naga de ma kuahaka manga wowangoka.

¹⁷ De ona yoleleani o popangao ka hiadono manga ngofaka ngaro o nauru eko o ngofeka ma, yahihuba o popangaoika abe manga ngofaka yodadi manga huhuba iharo-harongo. De naga utu yalingiri o duduhunu abe yotobamai-maihino abe onangika yomagahoko manga gomangika la enangino yaduhunu. Hokogea to ona manga biaha abe yogogere dau o Isiraele ma tonakoka hiadono manga hininga ma dumutu ma dorouika dika de ka ihikaika yahowono Ma Jou o Yawe ai himangoka ho ona hokogea ka hiadono ai ngamo duru ifae onangika.

¹⁸ De mangale ma titi Ma Jou o Yawe duru wangamo o Isiraele ma nyawaika hiadono Una ahao waduhuoka ai himangino. Ho ona dika abe yogogere o Yehuda ma tonakoka wahigunoa yogogerohi ai behehongo ma tonakoka.

¹⁹ Masara abe ona yogogere o Yehuda ma tonakoka onangoo ko iwiniikua manga Jou itiai angamoi yoluku ihingounu Ma Jou o Yawe ai behehongika. Abe ona yomaaduru imaketero hoka manga gogianongoru o Isiraele ma tonakoka ma titi to ona manga wowango ma datoro ka imakadaene dika.

²⁰ Ho ma oraha gea ahao o Isiraele to una ai totoforauku mata-mataika Ma Jou o Yawe waoluku ka hiadono wakokihohowono. De Una wapake abe manga musu wahigunoa la o Isiraele ma nyawa ona yahiofi hiadono yahihupu to Una ai himangino.

²¹ De igoungu ma dihira abe ma oraha o Dautu wodadi manga koano de o Isiraele ma nyawa mata-mataika yogogere ai kuahaka. Masara ka de uku de o Isiraele ma nyawa yahowono ilamoko hokogea de ona abe yogogere o Isiraele ma tonaka daukuku idateke ona Ma Jou o Yawe wahikatingaka de ona abe dakuiye yodateke. Ho ona dau ko idadiokaua yomahikoano o Dautu ai duruuruika, abe ona to una ai totoforauku de abe yahikoano o Yehuda ma tonakoka. De o Isiraele ma nyawa abe Ma Jou wahikatingakoka hokogea ona ahao o Yerobeama iwihidadi manga koano. De o Yerobeama gea duru wahirehene o Isiraele ma nyawa Ma Jou o Yaweino abe wahigaro o howonika abe duru kohaamoko.

²² De ahao o Isiraele ma nyawa ka ihikaika manga hininga ma dumutu la yaniiki o Yerobeama ai higaroika, ho idadi manga biaha abe yomahuba o popangaoika de yoluku yanoaika abe idadioka manga biaha gea. De yoigo dika yogila-gila yodiai itorou imaketero hoka to Yerobeamoli ai datoro itorou abe duru womatobahuba o popangaoika.

²³ Ho gea ma titi Ma Jou o Yawe ma bahaika ai nyawa wakokiduhuoka ai himangino, de gea duru idadi imaketero hoka to Una ai uru ma dodofanga mata-mata yahingahuokau ai nyawaika. Ona ihigali-gali yahitiari o Isiraele ma nyawaika abe nako ona manga Jou ko iwiniikokaua de ahao Una wapake manga musuino la wahigunoa yataoko de yao o Asuru ma tonakika. De duru hokogea igoungu idadioka abe yataokino de yaoika o homoa ma tonakika, de o Isiraele ma nyawa gea ka yogogerohi o homoa ma tonakoka gea ka hiadono o wange naa abe manga ade-ade naa tatulihuku.

O homoaino ma nyawa o Asuru ma koano wahigogere o Isiraele ma tonakoka

²⁴ O Asuru ma nyawa manga koano wahihupu o Isiraele ma nyawa manga tonakino ibooto de ipaha waturuuru de o homoaino ma nyawa. Abe ona wale utu o nyawa o Babele ma tonakino, de utu o Kuta ma tonakino, de utu o Awa ma tonakino, de nagaoo abe o Hamatino de o Sefaraimino. Angamoi ona gea mata-mata o Asuru ma nyawa manga koano ai kuahaka ho kiani iwihingounu unangika. Ho o homoaino ma nyawa gea yaturuuru o Isiraele ma nyawa de onangoli yogogere o Samaria ma kotaka de abe ma kota-kota utuokali o Isiraele ma tonakoka gea.

²⁵ De ona abe o homoa ma nyawa genangoka yogogere, onangoo ngaro manga gogere Ma Jou o Yawe ai behehongo ma tonakoka masara onangoo ko yomahubauahi Ma Jou o Yaweika. Ho mangale ma titi gea Una ahao wohidingoto o boki abe o singa ma ago-agomo la o homoa ma nyawa utu yatoma genangoka.

²⁶ Ho ahao o nyawa genangoka yomaketeade-ade ma titi ma boki gea ho ipahaino de naga o hingahu iboa o Asuru ma nyawa manga koanoino. De ma hingahu hokonaa itemo, “Mia koano kiani nohioriki ma titi o nyawa gea abe ngona nahigogere o Isiraele ma nyawa manga kota-kotaka ko ihiorikuahi abe ona ahao hokokia yomahuba itiai Ma Jouika abe wahipareta o tonakoka gea. Ho Una Ma Jou gea wohiboa o boki o singa ma ago-agomo la yahibinaaha angamoi ona yomahuba Unangika ihowono.” Hokogea ma hingahu abe iboa o Asuru ma koanoino.

²⁷ De ma hingahu gea wodafongo ho wahibehehongo ai popareta ma nyawaika wato, “Ngini kiani niwilingiri o Isiraele ma nyawa una gea Ma Jou ai hidemo ma nyawa womatengo abe ma dihira wogogere o Samaria ma kotaka. Ho ka de niwimake de ahao niwihigilio o Isiraele ma tonakika. De ngohi ahao tihikarajaanga unangika la ona abe naa ma duru tahigogere genangoka, ahao onangika wadotoko Ma Jou ai hiaturu abe ilaku ma tonakoka gea, de ena gea abe ahao kiani wahitararono onangika.” Hokogea o Asuru ma nyawa manga koano ai hiaturu ma behehongo.

²⁸ Ho naga Ma Jou ai hidemo ma nyawa womatengo abe unangoo iwihihupu o Samaria ma kotaino de naa una abe o Asuru manga koano wihuloko wolio o Betele ma kotaika. De genangoka una wadotoko onangika la ka idadi yomahuba itiai Ma Jou o Yaweika.