1 Yohanese 5 - Ma Jou ai Demo-demo o Totobelohoka

Ngone kiani homakodora angamoi ngone hingaku-ngakuoka mata-mataika gea hodadioka Ma Jou ai ngofaka homoi-homoi

¹ De onagona dika yongaku abe ma titi o Yesusu Una gea nanga Koano abe Ma Jou wonahibehehongoka, ona gea mata-mata yomaboaka Ma Jouino ho yodadi to Una ai ngofa-ngofaka mata-mataika. Ho to Ma Jou ai ngofaka mata-mataika, onangika gea abe ngone kiani hakokidora. De gea nako hoka hidora nanga gianongoru womatengo abe de ai ngofakoka, gea itararonoka abe to una ai ngofa-ngofakikaoo hadora onangika angamoi ona yomaboa unangino gea.

² De hokogenangoo nako ngone hidora Ma Jouika, kiani ai ngofa-ngofakikaoo hadora. De nako hidora Ma Jouika de to Una ai behehongo ngoneino hanii-niiki, gea inahitaanoka abe ngone hagou-goungu hadora Ma Jou ai ngofa-ngofakikaoo.

^3-5 Angamoi nako ngone hidora Ma Jouika, gea ma titi haniiki to Una ai behehongo ngoneino. De gea tanu ko itubuhoua la ai behehongo ngone hanii-niiki, masara gea hatoli iuwini, angamoi ngone hodadioka Ma Jou ai ngofa-ngofaka. Abe ngone hongaku-ngakuoka ma titi o Yesusu Una Ma Jou ai Ngofaka, ho ma titi nanga ngongakuino gea de ngone hohikokikalaka o dunia naa ma kuahaika. De nako ngone ma dunia hohikalaka, gea hatoli igapanga la ai behehongika hanii-niiki. Ho iti ngone hanii-niiki to Una ai behehongika de gea inahitaanoka abe ngone hagou-goungu hidora Ma Jouika de ai ngofa-ngofakikaoo hadora abe nanga gogianongoru mata-mataika.

O Yesusu Una Ma Jou o Ngofaka idodutu

⁶ De ngone ka idadi duru hohioriki abe o Yesusu Kristusu Una gea wagou-goungu Ma Jou o Ngofaka mangale Una woboa o duniauku naa de iwihitaana ai wowango ma goronaka. De gea ihira-hira iwihitaana de o akere abe ma oraha iwiohiki, de ipaha ahao iwihitaanoli de ai awunino abe ma oraha iwihohonenge. De abeika gea ko ma titiua Una iwiohiki dika, masara iwiohiki ipaha de wogila-gila abe ai hininga ma dumutika ka hiadono iwihohonenge o gota isosalioainoka. De gea mata-mata iwihitaana la ngone ka idadi hohioriki abe Una gea to Ma Jou ai Ngofaka idodutu. De nagali abe Ma Jou o Womaha wonahingahuoka ngoneino ma titi o Yesusu, de ai demoino gea de enangoo iwihitaana o Yesusika abe Una gea Ma Jou o Ngofaka. De nako Ma Jou o Womaha, Una gea duru ko woelu-elukua masara ma gou-goungu dika wohingahu-ngahu, ho ka idadi duru hangaku to Una ai demoika.

⁷ Ho naga hamake ma titi hange abe inahitararono nanga hiningaino la duru hohioriki abe ma titi o Yesusu Una gea tanu onaguna.

⁸ De ma titi hange gea, moi Ma Jou o Womaha, de moi o akere, de moioli ai awunu, de gea hange mata-mataika imakiniiki abe to ena ma dumutu ka moiika dika. Abe gea mata-mataika iwihitaana o Yesusika ma titi Una wagou-goungu Ma Jou o Ngofaka.

⁹ De nako ngone o nyawa de o nyawa dika de homahikangahu, gea ngone hangaku manga hingahu ma demoika. Ho naa hongoli ka idadi hangaku Ma Jou ai hingahuika, angamoi nako o nyawa nanga hingahu ma demo de to Una, ma ka to Unangohi ai hingahu ma demo duru ma gou-goungu dika. De gea Ma Jou Una ma hirete abe ma dodihiraino de wonahingahuoka de ai demoino iwihitaana abe o Yesusu Una gea ai Ngofaka idodutu, ho ngone duru ka idadi hangaku ai demoika gea.

¹⁰ De onagona dika iwingaku-ngakuoka Ma Jou o Ngofakika, ona gea yodafongoka Ma Jou ai hingahu ma demo gea manga hiningaino de ihioriki abe ma demo gea igou-goungu. Masara onagona dika abe to Una ai demoika ko yongakua, gea imaketero hoka ona iwihiromanga Ma Jouika ato Una wotobaelu-eluku. Angamoi ona gea ko yongakua Ma Jou ai hingahu ma demoika abe ai demo gea ma goronaka wonahingahu ngoneino de wihitaana o Yesusika abe Una ai Ngofaka idodutu. Ho nako ma hitaana ma demo gea ko yongakua, gea tanu iwihiromanga Ma Jouika ato Una wotobaelu-eluku.

¹¹ De Ma Jou ai hingahu ma demo gea ma hidumutu hokonaa. De gea ai demoino wonahidumutu la ngone ka idadi hohioriki abe o wowango ka hiado-adonika Ma Jou wonahidoakoka ngoneino, de ma wowango gea duru ihititi to Una ai Ngofakoka dika.

¹² Ho onagona dika abe naga manga gogao Ma Jou o Ngofakika, onangoo naga o wowango ma ngango onangoka. Masara onagona dika abe manga gogao ko iwa Ma Jou o Ngofakika, ona gea duru ko iwa onangoka o wowango ka hiado-adonika.

O Yohanese wotulihi ai hurata naa la nanga ngongaku ihiputurungoli

¹³ De ahi hurata ma demo mata-mata naa tinihidingoto nginika abe niwingaku Ma Jou o Ngofaka ai romangika. De tinihurata nginika la tato ahi demoino gea de ngini ka idadi duru nihioriki de nionganono abe o wowango ka hiado-adonika ngini niamakeoka.

¹⁴ De ngone ngaro ufa hohawana abe ma oraha homaniata de homahitigi Unangika, masara koaho nanga hininga de ma domoroinoka hoboa Unangika nanga niniatoka. Angamoi hohiorikoka abe ngaro o kia dika homagahoko Unangika, masara nako nanga gogahoko gea itaana de to Una ai mau, gea ahao Ma Jou wonahigihene nanga gogahokino.

¹⁵ De mangale hohioriki abe Una wonahigihene, gea hohiorikoo abe nanga gogahoko o kia dika homagahoko Unangiye abe iti imakiniiki de to Una ai mau, de gea ena ahao wonahidoaka ngoneino.

¹⁶ Ho naa ma titi moi abe ka idadi homagahoko Unangiye. Abe nako ngini nia gianongoru womatengo niwimake abe una wahowono, gea ka idadi niwigahoko Ma Jouiye ma titi una wahowo-howono gea la ko wohonengua ma titi ai howonino gea masara ka idadiohi wowango. Masara igoungu nako o howono naga ma rupa hinooto, abe utu to ena ma hohowono kiani ma nyawa Ma Jou wahohowono onangika de o hohonenge. Ho nako nia gianongoru wahowo-howono gea de ai howono ma rupa abe kiani Ma Jou wihohonenge, gea ngaro ufa dika de una gea niwigahoko Ma Jouiye. Masara nako to una gea ai howono ma rupa ko hokogenangua, gea de ahao ngini ka idadi niwigahoko Ma Jouiye la marai una ko waniikokaua ai howono gea hiadono ngaro ufa de Ma Jou wihohonenge unangika. De nako hokogea niwigahoko de idadi irahai, gea ngade-ngade imaketero hoka nia gianongoru wamakeohi ai wowango ma titi nia niniata gea angamoi Ma Jou Una winihigihene ngini.

¹⁷ De igoungu abe o datoro ma dorou, gea mata-mataika o howono, masara ko mata-mataikaua abe kiani Ma Jou wahohonenge onangika ma titi manga howonino.

¹⁸ De ngone hohiorikoka abe onagona dika yomaboali Ma Jouino, ona gea ko yomanoaua o howonoka. Angamoi womatengo gea abe Unangoo womaboa Ma Jouoka de waino de wodadi Ma Jou o Ngofaka, Una gea ka ihikaika wagoana de wadatoko onangika, ho o Ibilihi ma haeke ngaro ma hohutuloo ma ko idadiua yaruwae hiadono ona yoruba de yahowono.

¹⁹ De ngone hohioriki abe nako o dunia naa mata-mataika, gea duru o Ibilihi ma haeke ma giamoka imanoa. De hohiorikoo abe nako ngone naa, ngone hagou-goungu hodadioka Ma Jou ai ngofa-ngofaka idodutu.

²⁰ De hohiorikoo abe Ma Jou o Ngofaka Una woboaka ngoneuku de wonahidoakoka o hiakunu nanga hiningaka la ka idadi hihioriki Ma Jou idodutuika. De ngone homanoaka Ma Jou idodutuoka angamoi ai Ngofaka o Yesusu Kristusokaoo ngone homanoa. De o Yesusu Kristusu Unangoo gea Ma Jou idodutu, de o wowango ka hiado-adonika ma titi naga Unangoka. De gea mata-mata duru tonahigaro la tato ngone duru ka idadi hohioriki de honganono enangika.

²¹ De ahi ngofa-ngofaka o ngongakuoka, ngini kiani nimahidodiai la ufa naga o kia dika utuoli de ngini nimahijou enangika, masara kiani Ma Jou idodutuika dika ngini niwinii-niiki.