1 Yohanese 4 - Ma Jou ai Demo-demo o Totobelohoka

Abe ma titi hokokia hohikohowono Ma Jou o Womaha ai dodotoko ma gou-goungu de abe o dodotoko utuoli abe o ngelu-ngelukino

¹ De ahi gogianongoru abe duru tinidora nginika, naa moi tinihitiari ma titi o nyawa utu manga dodotoko de manga hingahu ma demo. Abe ngaro o nyawa yomahingahu ato bari Ma Jou o Womahoka de aino iboa manga demo, ma gea kalioli ngini nitangakuholi manga demoika gea, masara koaho ihira niatailakohi manga demo la nihioriki gea iboa Ma Jouoka de aino ekola o womaha utuokali de aino iboa manga demo gea. De tinihitiari hokogea angamoi naga o nyawa ko manga ngoeoka o duniaka naa abe yomahiromanga ato Ma Jou ai uru ma dodofanga, masara ona gea yotobaeluku dika de gea ko Ma Jou ai demoua abe o nyawaika yahingahu-ngahu.

² De hokonaa ngone ka idadi hahikohowono ona abe yomahiromanga hokogea la hahioriki gea onagona abe Ma Jou o Womaha wagou-goungu womanoa onangoka, de abe onagonali ko Ma Jou o Womahua abe wotemo manga uruino. De gea hatailako onangika de hahikohowono ma titi manga demo-demoino abe hokokia ona iwihiromanga o Yesusika. Ho nako womatengo ai demo ma goronaka de womahingahu wato wongaku abe ma dihiraino o Yesusu Kristusu womahihawo de ngone o nyawa nanga roehe de womaboa o duniaka naa. De nako hokogea ai demo, gea ka idadi hohioriki abe una gea Ma Jou o Womaha womanoa unangoka de wipake la wotemo ai uruino.

³ Masara nako o nyawa yomahiromanga ato Ma Jou ai uru ma dodofanga masara ona ko yongakua abe ma titi o Yesusu woboa o duniauku naa abe womahihawo de ngone o nyawa nanga roehe, ho ma titi gea ena ona yoluku yomahingahu, ona gea hahiorikoka abe ko Ma Jou o Womahua wotemo manga uruino. De abe yapake to ona gea manga uruino, gea ko Ma Jouokaua de aino iboa, masara gea tanu iboa o womaha utuino abe ma womaha gea imakiniiki de o nyawa manga hininga abe duru iwitobalawana o Kristusika. Abe ma dihirainohi de ka hiadono ma oraha naa de ka niihenohi abe womatengo duru witobalawana o Kristusika ahao woboa. De hoka kangano ahi demo ma goronaka de tinihingahuoka, naa tohigalioli totemo tato nagau o nyawa ko manga ngoe o duniaka naa abe to ona manga hininga ma dumutu la iwitobalawana o Kristusika, de manga hininga gea ena abe o nyawa utu yapake ma oraha yodoto-dotoko de yomahingahu ato bari manga demo Ma Jouoka de aino iboa. De gea ma titi hiadono tinihitiari nginika tato kiani niatailakohi o nyawa manga demo done inibudi ma titi manga demoino gea.

⁴ Masara nako ngini naa, ahi ngofa-ngofaka, ngini nidadioka to Ma Jou ai nyawa, ho tanu niahikalaka ona gea abe yodoto-dotoko o ngelu-ngelukino. De gea ngini nilaku ma titi nako Una abe womanoa ngoneoka de ena gea abe imanoa o dunia ma nyawaka, masara duru ka Unangohi ai kuaha ilamoko, de Una dika abe winihiakunu nginika la ka idadi ngini nilaku.

⁵ De naga ma ngekomo moioli abe ka idadi hapake la hahikohowono ona yotobadoto-dotoko la hahioriki onagona abe manga dodotoko Ma Jouoka de aino, de abe onagonali manga dodotoko ka o duniaka dika de aino iboa. De gea hahikohowono ma titi ma nyawa hokokia abe yototoihene manga dodotokino. De ona abe yotobaeluku, ona gea o duniaka dika ma nyawa ho ma oraha yodoto-dotoko de o duniaka dika ma sosawaro ihupu manga uruoka de aino. De gea o dunia ma nyawa utuoli yosanangi yotoihene manga demoino gea.

⁶ Masara ngomi naa to Ma Jou ai nyawa abe Una womihidadi ngomi to Una ai hidingoto ma nyawa, ho onagona dika abe iwihioriki Ma Jouika, ona gea imihigihene to ngomi mia demoino. Masara nako o nyawa utu abe ona ko to Unangua ai nyawa, ona gea ko imihigihenua ngomino. De ma titi o nyawa manga dodoihenino gea de ka idadi hahikohowono ona abe Ma Jou o Womaha naga onangoka de wahihira-hira ona la hiadono ona yaniiki ma gou-goungu ma demoika, de abe onangoli yatobaniiki o ngelu-ngelukika ma titi o womaha utuoli yahihira-hira ona gea.

O Yohanese wonahigaro la homakodora mangale o dora gea ihititi Ma Jouino

⁷ Ahi gogianongoru abe duru tinidora nginika, ngone naa irahai homakodora, angamoi o dora ma titi gea Ma Jouoka de aino, ho Una gea abe wonahiakunu ngone la ka idadi homakodora de nanga gogianongoru. De nako o nyawa yomakodora gea yomahitaanoka abe ona iwihioriki Ma Jouika de abe manga wowango ma hungi yamakeoka Unangino.

⁸ Masara nako o nyawa ko yomakodoraua gea duru itararono ngoneino abe ona gea imaketero hoka ko iwihiorikua Ma Jouika de manga gogao Unangika itoakokahi. Angamoi nako Ma Jou ai hininga, gea duru ihititi o doraka. Ho nako hoka o nyawa manga dora ko itagiua, ma oraha gea de ko yomanoaua Ma Jou ai hiningaka. Masara nako o nyawa iwihioriki Unangika gea ahao ka idadi yomakodora.

⁹ De ma dihiraino de Ma Jou wonahimatokoka ngoneino abe hokokia ma amoko to Una ai dora ngoneuku de gea abe ma oraha to Una ai Ngofaka ka womatengo dika wihidingoto o duniauku naa. De gea ma titi Ma Jou ai doraino dika hiadono wihidingoto ai Ngofaka ngoneuku la ngone ka idadi o wowango ma ngango hamake ma titi Unangino.

¹⁰ De nako o dora, tanu ko idadiua ngone hohiromanga hato to ngone nanga dora Ma Jouika gea o dora iree-ree dika. Masara nako to Una ai dora abe itagi ngoneino abe ma oraha wihidoaka ai Ngofaka la Una womahidadi nanga howono ma bobangu, de gea ena dika duru o dora iree-ree dika.

¹¹ Ho ahi gogianongoru abe duru tinidora nginika, abeika homafikiri Ma Jou ai dora kohaamoko gea ngoneino. De mangale ma titi to Una ai dora hokogea ma amoko ngoneuku, ho kiani ngoneoo homakodora o gogianongoru.

Ma Jou ai dora ma hofoko nanga wowangoka

¹² De nako ngone o nyawaka de naga womatengo abe ko ma moiuahi homakamake de una, gea ko iwahi nanga gogao unangika. Masara nako ngone de Ma Jou, gea imakohowono. Angamoi ngaro ngone o nyawa ko moiua himake de nanga lako, masara Una gea ka idadi womanoa ngoneoka de to Una ai dora enangoo ka idadi imanoa nanga hiningaka de duru ingodumoka. Ho ngone naa koaho homakodora ngone de nanga gogianongoru. Angamoi iti ngone homakodora de ka idadi nanga gogao ma rahai Unangika.

¹³ De mangale ma titi Una wonahidoakoka ngoneino Ma Jou o Womaha la Una womanoa ngone homoi-homoioka, ho ma titi genangino ho duru hohioriki itararono abe ngone hagou-goungu homanoa Unangoka de abe Unangoo wagou-goungu womanoa ngoneokaoo.

¹⁴ De naga ma titi moioli abe inahitaana ngoneino ma titi nanga gogao Ma Jouika. De gea abe ngomi ai hidingoto ma nyawa ma dihiraino de to Una ai Ngofaka ngomi wiwimakeoka, ho naa ngomi ka idadi miagou-goungu minihingahu nginika miato Ma Jou o Baba wihidingoto ai Ngofaka la wodadi o duniaka naa nanga Duduhunu.

¹⁵ Ho onagona dika abe yomahingahu ato yongaku ma titi o Yesusu Una gea Ma Jou o Ngofaka, ona gea Ma Jou womanoa onangoka, de onangoo yomanoa Ma Jouokaoo. De manga demoino gea de yomahitaanoka ma titi manga gogao Ma Jouika.

¹⁶ De naga moiohi abe inahitaana ngoneino ma titi nanga gogao Ma Jouika, de gea abe Ma Jou ai dora naga imanoa ngoneoka. Angamoi ngone duru hohioriki de hongaku ma titi Ma Jou ai dora itagi ngoneuku. De mangale ma titi abe Ma Jou ai hininga gea duru ihititi o doraka, ho ka idadi hohioriki abe onagona dika yomanoa o doraka gea ona yomanoaoo Ma Jouoka, de Ma Jou Unangoo womanoa onangokali.

¹⁷ De mangale ma titi abe to ngone nanga wowango ma datoro o duniaka naa de gea imakiniiki de to Kristusoli ai wowango ma datoro ma dihiraino, ho genangino de ka idadi hotemo hato to Una ai dora duru ingodumoka abe to ngone nanga hiningaka. Ho ma titi ai dora ingodu-ngodumoka ngoneoka ho ahao ma wange adonoka abe Una wonatailako nanga datoro de gea ko hohawanua. De ma wange gea ngone naga de nanga domoroinoka ma titi ai dora imanoa ngoneoka.

¹⁸ De nako o dora ma gou-goungu imanoa to ngone nanga hiningaka, gea ko idadiua o hawanoo imanoa ngoneoka. Angamoi o dora ma gou-goungu ngoneoka gea ihihupu o hawana nanga hiningaka de aino la ufa enangoo imanoa ngoneoka. De nako hoka ngone hohawana, gea ma titi o hohowonika homodongo. Masara ngone naa ko homodongua o hohowonika ma titi to Una ai dora duru ingodu-ngodumoka naga ngoneoka.

¹⁹ De ngone naa ka idadi nanga dora itagi utuika mangale ma titi Una wohira wonadora ngoneino. Abe nako ma dihiraino to Una ai dora ko itagiua ngoneino, gea ngone duru ko hakunua hadora o nyawa utuika.

²⁰ De abeika ngone hafikirohi ma titi nanga dora gea. Abe nako o nyawa yomahingahu ato, “Ngohi naa tidora Ma Jouika,” masara ngaro manga demo hokogea ma ona iwidohata manga gianongoruika, de ona gea yoeluku dika de ko yagoungua iwidora Ma Jouika. Angamoi nako ngone ko hadoraua nanga gogianongoruika abe ona ka idadi hamake de nanga lako, ho gea done sarakia de hidora Ma Jouika abe Una gea duru ko himakeua de nanga lako? Gea ko idadiua!

²¹ Ho ngone naa ufa hawohanga to Una ai behehongo ngoneino abe ma dihiraino wonahibehehongoka wato, “De onagona dika iwidora Ma Jouika, ona gea kiani manga gogianongoruikaoo yadora.” Ho gea kiani ngone homakodora de nanga gogianongoru.