1 Yohanese 3 - Ma Jou ai Demo-demo o Totobelohoka

Abe ma titi nanga wowango Ma Jouoka

¹ De abeika homafikirohi hokokia ma amoko Ma Jou ai dora ngoneuku! De gea itararono abe Una duru wonadora angamoi abeika Una hiadono wonahiromanga ngoneino wato ngone to Una ai ngofa-ngofaka! De gea igoungu abe ngone naa hodadioka ai ngofaka idodutu, ho genangino de ka idadi hohioriki abe to Una ai dora ngoneuku duru ilamoko! De masara nako o dunia ma nyawa, ona gea ko inahiorikua abe ngone to Una ai ngofa-ngofaka. De ufa ngone hoheranga ma titi gea, angamoi ngaro Ma Jou ma ona ko iwihiorikua Unangikaoo. Ho tanu ngaro ufa hoheranga abe ngoneoo ona ko inahiorikua ma titi Unangoka de aino hoboa.

² Ahi gogianongoru abe duru tinidora nginika, ngone hagoungu hodadioka to Ma Jou ai ngofa-ngofaka! De gea ngaro duru hohiorikoka abe ai ngofaka hodadioka, masara naga ma titi moi abe ngone ko hohiorikuahi. De gea ko hohiorikua abe ma titi ahao dokengika de to ngone nanga rupa ahao hokokia. De ngaro nanga rupa dokengika ko hohiorikuahi masara ma oraha naa de duru hohiorikoka abe ahao ma oraha womahimatoko de gea to ngoneoo nanga rupa idadi abe hoka to Unangoli ai rupa. Angamoi ma oraha gea de ahao ngone ka idadi himake Unangika abe ai rupa ma gou-goungu. Ho gea to ngoneoo nanga rupa ma hungioli kiani naga la ka idadi homarihimanga ngone de Una.

³ De onagona dika abe ma oraha naa yongano-nganono abe ma titi ahao yomahirupa moi de o Kristusu, ona ahao ka ihikaika yomahitebini manga wowangoka la ka idadi yotebi-tebini, angamoi gea ona yoigo ato yomaaduru hoka o Kristusoli abe Una gea duru wotebi-tebini ai hiningaka.

⁴ Masara onagona dika abe yatobahowo-howono manga wowangoka, ona gea yalawana Ma Jou ai Paretaika, angamoi o howono mata-mata gea duru imakalawana de ai paretaika.

⁵ De hiokoo ona gea ka yahowo-howonohi, angamoi ngini nihiorikoka abe ma dodihiraino o Yesusu Kristusu woboa o duniauku naa la wonahihohe nanga howono ma kuahaino la ufa hogila-gila nanga howono ma goronaka, ho ona gea tanu ngaro ufa dika de yogila-gila enangika. De ngini nihiorikoo abe Unangoka duru ko iwa o howono.

⁶ Ho nako Unangoka o howono ko iwa, ho duru itararono abe onagona dika naga yomanoa Unangoka gea ona abe ko yahowo-howonua. Masara abe naga utu yatobahowo-howono, ona gea manga gogao Unangika itoakokahi ho ngade-ngade hoka ona gea ko iwihiorikua.

⁷ De ahi ngofa-ngofaka o ngongakuoka, ufa nimahigunoa hiadono o nyawa onagona dika de inibudi abe ma titi o howono nanga wowangoka. Angamoi kiani ngone duru hohioriki itararono abe nako o nyawa onagona dika o totiai yanii-niiki manga wowangoka, ona gea yomahitaanoka abe yototiai Ma Jou ai himangoka abe hoka o Kristusoli Unangoo duru wototiai.

⁸ Masara nako o nyawa utuoli abe o howono dika yanii-niiki, ona gea yomakiniiki de o Ibilihi ma haeke ma titi manga datorino, angamoi ena gea duru ma dodihirainohi de yatobahowo-howono. Ho ufa nimahigunoa hiadono o nyawa inibudi abe ma titi gea ena. De nako Ma Jou ai Ngofaka, Una gea woboa o duniauku naa la ka idadi o Ibilihi ma haeke ma datoro gea duru wohibinaaha enangika.

⁹ Ho onagona dika yomaboali Ma Jouino, ona gea o howono ko anii-niikua, angamoi gea Ma Jou ai ngofa-ngofaka yodadioka, ho Ma Jou ai hininga imanoa onangoka. De ona gea tanu ko yadadiua yatobahowono angamoi duru Ma Jouoka de aino ona yomaboa.

¹⁰ De hokonaa ngone ka idadi hahikohowono o nyawa la hahioriki to onagona manga wowango ma datoro iboa Ma Jou ai hiningaka de aino de to onagonali abe manga datoro ihititi o Ibilihi ma haeke ma hiningaka. Abe onagona dika o totiai ko yanii-niikua manga wowangoka de manga gogianongoru o ngongakuoka ko yadoraua onangika, ona gea abe manga datoro ko imakiniikua de Ma Jou ai hininga abe tanu kiani imanoa ai ngofa-ngofaka homoi-homoioka. Masara to ona gea manga hininga imakadaene dika abe hoka o Ibilihi ma haekoli ma ngofa-ngofaka yodiai. Ho naa duru tinihigaro nginika la ufa nimaaduru abe hoka onangoli o Ibilihi ma haeke ma ngofa-ngofaka, masara kiani niwango nitotiai abe hoka itiai Ma Jou ai ngofa-ngofaka yowango, angamoi ngini niagoungu nidadioka to Una. Ho koaho ngini o totiai dika nianii-niiki de nia dora itagi nia gogianongoruika.

Abe ma titi kiani homakodora

¹¹ De naa ngohi tonahihohininga ma titi ma behehongo moi abe duru ma dodihirainohi de ngone hoihenoka. De ma behehongo gea inahibehehongo ato ngone kiani homakodora.

¹² De gea ufa ngone homaaduru abe hoka o Kainoli ai dohata ma dodihiraka, abe una gea ma titi widohata ai dodotika ho hiadono ai datoro itorou wodiai imaketero hoka o Ibilihi ma haeke abe enangoo ma datoro itobatorou. Angamoi una duru ma dodihiraka de witoma to una ai dodoto. De naa tonaleha, ma titi o kia hiadono una ai dodoto witoma? De gea ma titi to una ai datoro ka ma dorou dika masara nako to ai dodoto ai datoro gea ka ma totiai dika wodiai. De gea dika ma titi ho hiadono o Kaini widohata ai dodotika de hiadono witoma unangika.

¹³ De ahi gogianongoru, ngaro ufa dika de ngini niheranga ma titi o dunia ma nyawa inadohata ngoneino, angamoi ngoneoo nanga datoro itotiai. Ho ufa ngone homaaduru abe hoka to onangoli manga dohata, masara koaho ngone homakodora.

¹⁴ De nako ngone naa, ngone hohiorikoka abe Una wonagorakoka o hone-honenge ma kuahaino de wonahigogeroli o wowango ma ngango ma kuahakali. De gea ka idadi hohioriki mangale ma titi ngone homakodora nanga gogianongoru o ngongakuoka. De nako o nyawa ko iwa manga dora manga hiningaka, ona gea ka yomanoahi o hone-honenge ma kuaha ma goronakahi.

¹⁵ De onagona dika abe yadohata manga gogianongoruika, ona gea ka yomaketero dika abe hoka o nyawa yotobatoma. De gea ngone hohiorikoka nako o nyawa yotobatoma ona gea o wowango ka hiado-adonika ma hininga ko yanii-niikua enangika. Ho ngone naa ufa o dohata naga ngoneoka angamoi gea ena imakiniiki de o hone-honenge. Masara ngone naa homanoa o wowango ka hiado-adonika ma goronaka, ho kiani ngone homakodora.

¹⁶ De abeika ngone homafikirohi o Kristusu ai hininga ma dora abe wonahimatokoka ngoneino. De abe ma dihiraino to Una ai wowango womahidoaka la ngone naa wonaduhunu, de duru to Una ai datorino gea de ngone hamake o dora ma gou-goungu. Ho gea nako to Una ai dora ma gou-goungu imanoa ngoneoka, gea tanu ngone ka idadi homahigunoa la to ngoneoo nanga wowango homahidoaka la hato nanga gogianongoru haduhunu abe homahingongaku moioka.

¹⁷ Masara nako ma titi o kiahonanga dika de ngone ko homakuduhunua ngone de nanga gogianongoru abe naga de manga kurangoka, gea done sarakia Ma Jou ai dora imanoa ngoneoka? Abe nako to ngone nanga wowango ma perelu abe inawedonoka de hamake to nanga gianongoru womatengo abe naga ai kuranga masara nanga hiningaka ihitatokoka ho ko hiduhunua ma titi ai perelu, gea inahitaanoka abe to Una ai dora ko itagiua to ngone nanga hiningaka.

¹⁸ Ho ahi ngofa-ngofaka, ngohi tonahigaro tato ufa nanga dora nanga uruoka dika imanoa abe tanu gea ena nanga demo ma homoa dika. Masara koaho ngone hagou-goungu homakodora abe ma titi nanga wowango ma datorino de genangino homahitaana abe nanga dora itagi utuika.

¹⁹ De nako ngone homahitaana nanga wowango ma datorino abe hagou-goungu homakodora ngone de nanga gogianongoru, gea ka idadi hohioriki abe ma gou-goungoka ngone homanoa. De mangale ma titi ngone homanoa ma gou-goungoka, ho gea ka idadi nanga hininga iriidi to Ma Jou ai himangoka.

²⁰ Ho ngaro ngone ma moi ma moi homamao nanga hininga ko iriidua abe nagahi nanga howono ho kiani Una wonahohowono ngoneino, masara tanu ai hohowono gea ngoneino waofiokau. De nako to ngone nanga hininga de Ma Jou, ma ka to Unangohi ai tobahioriki duru ilamoko angamoi Una gea duru mata-mataika wohioriki. De gea Una duru ko wawohangua abe nanga hohowono waofioka ho ko inadaenokauali. Ho gea ka idadi ngone honganono abe duru ka to Unangohi ai hininga itaana ho ngaro ufa dika de hopusingohi ma titi nanga hininga gea nanga hohowonika. De gea ena ma titi hiadono to ngone nanga hininga ka idadi iriidi dika to Una ai himangoka de ko iwa nanga hawana.

²¹ De ahi gogianongoru abe duru tinidora nginika, naa ngohi tonahigaro tato nako to ngone nanga hiningaka de ko hohawanokaua ma titi ai hohowono ahao inadaene ngoneino, gea ka idadi homahitigi Ma Jouika abe ma oraha homaniata de gea ka idadi nanga hininga de ma domoroini.

^22-24 De nanga perelu o kia dika homagahoko Unangika de gea wonahidoaka. De nako ngone hoigo la nanga gogahoko Una wonahingodumu ngoneino, gea kiani hanii-niiki to Una ai behehongo ngoneino. De tanu to Una ai behehongo gea ngone hohiorikoka. Abe Una wonahibehehongo wato ngone kiani hingaku to Una ai Ngofaka ai romangika abe gea o Yesusu Kristusika, de nagali wonahibehehongo wato ngone kiani homakodora. De gea ai behehongo ngoneino abe ka enangohi duru ikurutiye. Ho nako ngone onagona dika abe ai behehongo gea hatobaniiki, gea ngone homanoa Unangoka, de Unangoo womanoa ngoneokali. De gea nako homagahoko Unangiye, ka idadi duru hongaku abe ahao wonahingodumu nanga gogahokino mangale to Una ai behehongo ngone hanii-niiki de nanga wowango ma datoro hotobadiai, de gea duru hihisanangi Unangika hiadono Una wosanangi nanga gogahoko wonahingodumu ngoneino. De abe ma titi ngone homanoa Unangoka de Unangoo womanoa ngoneokali, ena gea duru igoungu angamoi Una wonahidoakoka ngoneino Ma Jou o Womaha, de Una gea womanoa ngone homoi-homoioka. Ho genangino de ngone ka idadi duru hohioriki itararono abe Ma Jou wagou-goungu womanoa ngoneoka.