1 Yohanese 2 - Ma Jou ai Demo-demo o Totobelohoka

¹ Ahi ngofa-ngofaka o ngongakuoka, ahi hurata ma demo naa tohitulihuku de tohidingoto nginika la tato ibootohi ngini niahowono. Masara nako hiadono idadi abe niahowono, ufa niawohanga abe naga womatengo ka idadi winiduhunu de winihidemo Ma Jou o Baba ai himangoka. De Una gea o Yesusu Kristusu abe duru wotobatotiai, ho Una ka wakunu wonahidemo o Babaika nako idadi abe hahowonoka.

² De Una gea abe wodadioka nanga howono ma bobangu la Unangino nanga howono Ma Jou waofioka. De gea ka to ngoneua dika nanga howono wobanguoka, masara o nyawa duru mata-mataika o duniaka naa de to onangoo manga howono Una wobanguoka. Ho, ahi ngofa-ngofaka o ngongakuoka, ngohi duru toigo la tato ibootohi ngini niahowono.

Nako ngone hingaku-ngakuoka de duru hihioriki Unangika gea ngone hidora de hanii-niiki to Una ai behehongo ma demo ngoneino

³ De nako ngone hingakuoka de Ma Jou ai behehongo ma demo ngone hanii-niiki nanga wowangoka, gea inahitaanoka abe ngone hagou-goungu hihioriki Unangika.

⁴ Masara nako naga o nyawa yomahingahu ato, “Ngohi duru tihioriki Unangika,” masara ko yaniikua to Una ai behehongo, gea yahitaanoka abe ona yoelu-eluku dika de ko yomahigunoaua la Ma Jou ai demo ma gou-goungu yahihira-hira manga hiningaka.

⁵ Masara o nyawa onagona dika abe yanii-niiki to Una ai Demoika, ona gea yagou-goungu iwidora Ma Jouika de manga dora ma gahumu abe imaketero hoka Ma Jouoli wonadora ngoneino de ai hininga ma dora ma gahumu. Ho nako nanga dora ma gahumu itagi Unangika, de ai Demoika ngone hanii-niiki, gea inahitaanoka de ka idadi duru hohioriki abe ngone homanoa Unangoka.

⁶ Ho gea nako ngone homahingahu hato homanoa Unangoka, gea ufa ka nanga uruoka dika masara kiani nanga wowango ma dodagioka howango de homaaduru abe imaketero hoka to Kristusoli ai wowango ma dodagioka wowango.

Wahibehehongo la wato ona yomakodora

⁷ Ahi gogianongoru abe duru tinidora nginika. Abe ahi behehongo ma demo naa tinihibehehongo nginika, gea ko o behehongo ma hungiua tinihidogo nginika. Hokogenangua, angamoi ka ma dodihirainohi abe ngini ahao niwingaku Unangika de ma oraha gea niihenoka ma behehongo naa ena, ho duru ma dekanoka. De hokonaa ma behehongo abe ngohi tinihibehehongo nginika, tato kiani ngini nimakodora.

⁸ De ngaro ma behehongo ma demo gea tanu ma dekanoka masara ka idadi tohiromangoo enangika tato hoka ma behehongo ka ma hungiohi, angamoi naa ma duru hamakeoka o Kristusu ai wowango ma goronaka de wonahimatoko ngoneino abe hokokia homakodora. De tohiorikoka abe ngaro ti nginioo nia wowangoka ma idadioka abe nimakodora ngini o gogianongoruoka. Angamoi ma oraha naa de o fufutu ka ihutulu moduku de ma dararono ma gou-goungu gea imulaengoka inahitawange ngoneuku. Ho mangale naa ma duru de ahao o Kristusu ai dora ma gou-goungu imulaenge itagi o dunia ma lokuoka ho hiadono ngohi tohiromanga ma behehongo ma demoika gea, tato ena gea hoka o behehongo ka ma hungiohi.

⁹ De nako o nyawa yomahingahu ato, “Ngohi tomanoa ai dararonoka,” masara ona gea yadohata manga gianongoru abe yomahingongaku moioka, gea ko o dararonokaua yomanoa masara ka o fufutuokahi yomanoa ona gea.

¹⁰ Masara nako ngone hadora nanga gogianongoru abe homahingongaku moioka, gea ngone homanoa to Una ai dararonoka de duru ko iwa ma titi ngoneoka hiadono hopeleke de horuba o howonuku angamoi ma dararonoka dika ngone hotagi-tagi.

¹¹ De masara nako o nyawa onagona dika de yadohata manga gianongoru abe o ngongaku moioka, ona gea yomanoa o howonoka ho gea hoka o fufutuoka dika yotagi-tagi. De hongoli ona gea duru ko ihiorikua to ona manga dumutu o kiaika yoiki, angamoi ona gea yorafioka ma titi ifufutuokaholi hiadono ko yomahiorikokaua.

O Yohanese ai higaro ma demo onangika

¹² Ahi ngofa-ngofaka o ngongakuoka, ufa ngini niataoko ihowono ahi hurata naa ma demo nginika. Angamoi duru ko ma titiua tinihiromanga nginika tato ka o howonokahi nimanoa. Masara ahi hurata ma demo tohidumutu nginika mangale ngone hohioriki abe ti ngini nia howono aofioka ma titi o Yesusu ai romangino.

¹³ De abe ngini o balu-baluhu, ngohi ahi demo tohidumutu nginika mangale ngini niwihioriki Unangika abe ka ma dodihirainohi de Una gea nagau. De abe ngini hatoli ka o goohi, ngohi ahi demo tohidumutu nginika ma titi ngini nihikalaka enangika abe duru ma datoro itobalawanika.

¹⁴ De ngini to ngohi ahi ngofa-ngofaka o ngongakuoka, mangale ngini niwihiorikoka nanga Babaika ho ngohi ahi demo tohidumutu nginika. De abe ngini o balu-baluhu, mangale niwihioriki Unangika gea abe ka ma dodihirainohi de Una nagau ho ngohi tohidumutu ahi demo nginika. De abe ngini hatoli ka o goohi, mangale naga nia buturungu Unangoka de abe Ma Jou ai Demo-demo imanoa nia kokihiningaka, de abe nihikalaka enangika abe duru ma datoro itobatorou, de gea mata-mata ma titi hiadono ngohi ahi demo tohidumutu nginika.

Abe ma titi nanga hininga ma dumutu

¹⁵ De naa ngohi tinihitiari moi nginika, tato, ufa ngini niodora o duniaika naa de ufa niohafini to ena ma kiahonangika. Angamoi onagona dika yodora o duniaika, gea ona ko iwidoraua Ma Jou o Babaika.

¹⁶ De gea ko iwidoraua angamoi o dunia ma hininga mata-mata duru imakalawana de to Ma Jou ai hininga. Abe nako o dunia ma hininga gea naga ma dumutu hange. Abe hoka moi o nyawa manga hininga ma hafini ma dorouika, de naga moioli abe o kia dika naga manga lako yamake de gea yoigo yomahitoona, de naa moiohi abe o dunia ma hininga hangeino, de gea o nyawa manga sade ma titi manga kiahonanga ato bari iwoe de manga wowango ma gogere hatoli ikurutiye ho hiadono genangino de yomasade. Ho o dunia ma hininga gea duru ko o Babakaua de aino iboa masara ena gea ihititi ka o duniaka dika. De gea ma titi hiadono o nyawa abe yodora o duniaika de gea ona ko iwidoraua o Babaika.

¹⁷ De o dunia naa de to ena ma hininga abe o dorouika, gea mata-mata ko itongohonua ka hiado-adonika masara ahao ihibobaha de gea ena ko iwaka. Masara onagona dika abe ngone hanii-niiki Ma Jou ai mauika gea ko iwa nanga bobaha ka hiado-adonika. De gea ma titi hiadono ngohi tinihitiari nginika tato, ufa ngini niodora o duniaika.

Abe ma titi o Kristusu ai musu

¹⁸ Ahi ngofa-ngofaka, abe ma oraha naa naga hohiromanga hato ma oraha ma bobaha. De ngini ma dihirainohi de niihenoka ma abari abe o nyawaino ato, “Ahao ma oraha ma bobahaka de womatengo woboaino abe una duru witobalawana o Kristusika.” De to ona manga demo gea igoungu, de hongoli ngohi tinihingahu tato ngaro ma oraha naa masara nagau o nyawa manga ngoe abe ona gea iwitobalawana o Kristusika. De mangale ona gea hamakeoka, ho hiadono duru itaana de ka idadi hohioriki abe ma oraha ma bobaha adonoka.

¹⁹ De igoungu abe ona iwitobalawana gea ma dihiraino de onangoo inatobaniiki abe ma oraha homatoomuino nanga dodoomuoka, masara ipahaino de ahao ona yomatingaka ngoneoka de aino ho ko yaniikokauali nanga doomu. De ona gea ngaro ma dodihirainohi abe ka inatobaniikohi nanga dodoomuoka, masara ona gea tanu nanga gogianongoru ko idodutua abe ma titi o ngongakuoka. Angamoi nako hoka ona yagou-goungu iwingaku, gea ona ko yomatingakua ngoneino masara gea tanu ka inaniikohi hiadono ma oraha naa. Ho ma oraha ona gea yomatingaka de yomahitaanoka la ka idadi hahioriki abe ona gea nanga gogianongoru ko idodutua. De ona gea manga wowangoino hamakeoka ho hiadono ka idadi hahioriki abe tanu ona gea iwitobalawana o Kristusika.

²⁰ Masara nako ngini naa, ngini niagou-goungu nidadioka to Una ai nyawa angamoi nanga Baluhu wotebi-tebini winihidoakoka Ma Jou o Womaha nginika ho ngini mata-mata ma gou-goungu nihiorikoka.

²¹ Ho naa ngohi tinihurata de ko ma titiua abe ma gou-goungu ko nihiorikua. Hokogenangua ahi hininga, angamoi ngini duru nihiorikoka ma dodotoko ma gou-goungu, de tanu gea ena ma titi hiadono tinihurata nginika. Angamoi ngini ma dodotoko ma gou-goungu nihioriki, de nihiorikoo abe nako o ngeluku gea moioo de ko iwa abe ma gou-goungoka de aino.

²² De naa tonaleha, sarakia, ka onagonahi abe duru to onangohi manga ngeluku ilamoko? De gea marai onagona dika abe yahingahu o nyawaika ato o Yesusu Una gea ko nanga Koanoua abe ma dodihiraino Ma Jou wonahibehehongoka ngoneino. De nako hokogea o nyawa manga hingahu ma demo, gea ona abe iwitobalawana o Kristusika ma titi manga demoino gea. De ona gea iwiolukoka Ma Jou ai Ngofakika de ai Babaikaoo.

²³ Ho o nyawa mata-mata abe yahingahu ato o Yesusu Una gea ko Ma Jou ai Ngofakua, gea ona yomahikokitaanoka abe duru ko iwa manga gogao ai Babaika. Masara nako o nyawa onagona dika de yahingahu ato o Yesusu Una Ma Jou ai Ngofaka, ona gea naga manga gogao o Yesusika de ai Babaikaoo.

²⁴ De naa ngohi tinihigaro nginika tato kiani ma dodotoko ma gou-goungu abe duru ma dodihiraino de ngini niihenoka, gea ena kiani imanoa ti ngini nia hininga homoi-homoioka. Angamoi nako ma gou-goungu gea ka ihikaika imanoa nginioka, gea ahao ngini nimanoa Ma Jou o Ngofakoka de ai Babakaoo.

²⁵ De nako ngone homanoa Unangoka, gea hamakeokau o wowango ka hiado-adonika abe ma dodihiraino wonahibehehongoka ngoneino. De gea ai behehongo o wowango ka hiado-adonika hamakeokau ma titi ngone homanoa de de Una.

²⁶ De ahi demo gea tohitulihi nginika la tato tinihitiari abe ma titi ona gea abe manga hininga ato inibudi nginika done tato inihirehene ma gou-goungoka de aino.

²⁷ Masara nako ngini, ngaro ufa dika de ona yotobabudi gea inidotoko nginika masara koaho nitotoihene ka Ma Jou o Womaha ai demoino dika. Angamoi ngini niwimakeoka Ma Jou o Womaha nia hininga homoi-homoioka abe ma dihiraino o Kristusu wihidoaka Una nginika. De mangale Ma Jou o Womaha naga nginioka ho ngaro ufa dika o nyawa utuoli gea inidotoko masara koaho ka Una dika winidotoko nginika. De Una gea ka idadi winidotoko ma titi mata-mataika abe ngini niperelu nia ngongaku ma wowangoka, de gea ai dodotokino moioo de ko iwa o ngeluku. Ho ngini kiani nimanoa to Una dika ai dodotokoka la gea o Kristusokaoo ngini ka ihikaika nimanoa.

²⁸ De naa, ahi ngofa-ngofaka o ngongakuoka, ngohi tinihigaro nginika tato ngini ka ihikaika nimanoa o Kristusoka dika. De gea nako Unangoka dika ngini nimanoa, ahao ma oraha Una woboali o duniauku naa de gea ngaro ufa ngini inimaleke to Una ai himangoka masara ka idadi nia hininga de ma domoroini abe ma oraha niwimake Unangika.

²⁹ De ngone hohiorikoka abe Ma Jou Una gea duru wototiai dika, ho genangino de ka idadi hohioriki abe o nyawa onagona dika o totiai dika yanii-niiki manga wowangoka, ona gea Ma Jouoka de aino yomaboakali. Angamoi o totiai ma titi imanoa ka Unangoka dika, ho nako o nyawa yaniiki to Una ai totiai manga wowangoka, gea hohioriki abe onangoo tanu Unangoka de aino yoboa abe imaketero hoka manga totiai enangoo iboa Unangino.