1 Timotiusu 6 - Ma Jou ai Demo-demo o Totobelohoka

O Paulusu ai higaro ma demo o gogilaongika

¹ De naa tohioriki abe nagahi nanga gogianongoru utu genangoka abe ka yokangelahi ma titi ona gea o nyawa manga gogilaongohi. Ho naa ngohi naga ahi higaro o gogilaongika gea. Abe ona gea mata-mata kiani duru yahayanga manga hohidimonika angamoi hokogea itiai Ma Jou ai himangoka. Abe nako ko iwa manga horomati manga hidimonika gea, gea de ahao done o nyawa utu yamake de yongelo Ma Jou ai romangika ato, “Ou, la gea manga ngongaku ko kia-kiaua nako manga hininga hokogea.” De done to ngone nanga dodotoko, enangikaoo ma yatae.

² De nako naga o gilaongo womatengo abe ai hidimono unangoo wingaku ho hiadono yahinootoo mata-mata iwiboringakuoka, o gilaongo gea kiani ilamokoli ai leleani de ai hayanga ai hidimonika gea. Abe ngaro ona yahinooto yomaketero dika Ma Jou ai himangoka, ma ko idadiua ai horomati ikuranga ai hidimonika ma titi ai hidimonoo wingaku Ma Jouika. Hokogea ko itiaiua, ma koaho ai leleani unangika utuohi irahai angamoi gea wileleani ai gianongoru o Kristusoka, ho hiadono koaho ai dora itagi ai hidimonika abe ai hidimono gea wodadioka ai gianongoru o Kristusoka. Ho ahi higaro naa ena totulihuku, gea togahoko la ngona nadotoko de nahigaro nanga gogianongoruika.

O hitiari abe ma titi ma dodotoko ko itaanua

³ De onagona dika abe yatobadotoko o nyawaika masara manga dodotokoka gea imakohowono de gea to ngohi abe ahao naa nabasaka, ona gea yomakalawana de to Yesusu Kristusu nanga Baluhu idodutu ai dodotoko. De to Una ai dodotoko gea mata-mata igou-goungu de inaduhunu ngone la howango hototiai.

⁴ De ona gea yadoto-dotoko abe ko itaanua, ona yadotoko hokogea angamoi ona ma hirete ko kia-kiaua yataoko itiai, de duru ka yomasade dika. O nyawa hokogea, manga hininga ma hafini o kadatoro de o kangamo, de gea ma bahaika ma hofoko o daleana, de o nyawa yomaketeliliara, de o doa-doana, de o nyawa utu ko yangakua manga dodiawoika.

⁵ De hiadono ma nyawa gea ka ihikaika yomakokalawana angamoi manga hininga itotorouoka de ma gou-goungu duru ko ihiorikokaua. De ona gea yomatemo ato bote nako iwileleani Ma Jouika, genangoka de aino ka idadi manga utumu yomamake abe yomatiwi-tiwi. Hokogea to ona manga hininga.

Nanga utumu Ma Jouino ma gou-goungu

⁶ De masara gea igoungu nanga utumu kohaamoko ngone homamake nanga wowangoka nako hileleani Ma Jouika, iti nanga hiningaka hamao abe Ma Jou ai hidailako ngoneino gea inawedono. Masara nako hamao hato ko inawedonua ai hidoaka ngoneino de hiadono utuoli nanga utumu homalingiri, gea nanga utumu ma gou-goungu hangofuoka.

⁷ Angamoi ngone nengokadau ma oraha homaboa o duniaino de duru ko kia-kiaua haoino. De imaketero hokogea ahao ma oraha ma dunia naa hodogunoaika, ma ko kia-kiaua haoika.

⁸ Ho iti naga ngoneoka nanga inomo de nanga baju, gea dika de koaho haetongo hato inawedonoka.

⁹ Masara o nyawa gea abe o tiwi de o kiahonanga iwoe-woe yoohafi-hafini, ona gea ma ngoe manga horoodo ma bodo gea o tiwika yahihafi-hafini hiadono ona hoka o modoi yalikoka. De nako hiadono yataokino, gea de ahao manga wowango hoka ihidulungunoka de o kangela ka hiadono ona yobinaaha.

¹⁰ Angamoi nako o tiwika yoodora, genangoka de aino iboa ma dorou irupa-rupa, abe ma hafini gea hoka idadioka ma dorou iwoe-woe ma lifunu. De mangale ma titi o nyawa utu manga horoodo o tiwika hiadono ona yomahirehenoka abe yooporetoka manga ngongaku. De manga ngongakuino yomahirehenoka de hiadono ona duru yomahihuha ma ngoe de yamao hoka manga hiningaka yatopoko angamoi manga horoodo gea. Ho ngone koaho hamao nanga hiningaka abe Ma Jou ai hidailako ngoneino inawedono.

O Paulusu wihigaro o Timotiusu ma totiaiika

¹¹ Masara ngona, o Timotiusu, ngona nitobaleleani Ma Jouika. Gea ho kiani ma dorou mata-mataika abe ahao kangano tafetongo ahi huratoka naa nodokaowara done nahowono Unangika. Ma koaho ma rorahai dika nanii-niiki. Abe Ma Jou ai totiai de ai hininga kiani nomahinoauku, de ani ngongaku de ani dora o nyawaika, de ani dongohono, de ani hininga ibole-bole o nyawaika, gea mata-mata kiani naniiki la hiadono gea mata-mata naga ani wowangoka.

¹² Abe ma dihira Ma Jou woniahoko ai wowangoino gea abe ma oraha nomahingahu o nyawa manga ngoe manga himangoka nato, “Ngohi naa tingaku nanga Baluhu idodutuika o Kristusika.” Ho gea ma oraha abe ahao ningaku de woniahoko ai wowangoino de ka hiadono ahao ani wowango ma baha o duniaka, gea tohiketero abe hoka o nyawa yomaketejai-jai yomapopaata de yomaribuutu la ato ka idadi yolaku. Abe ngonaoo ma kiani ani wowango ma dodagi ma goronaka de kiani nomaribuutu la hiadono ani ngongaku ka idadi ilaku ani wowangoka, de gea ani wowango ma baha adonoka de ahao nomahitongonaka abe gea ani hadia ani wowango ma ngangoino. Abe ma dihira de Ma Jou woniahoko, gea woniahoko la ma bahaika de ka idadi nasoino ani hadia ani wowango ma ngangoino gea.

¹³ De naa ngohi tonihibehehongo Ma Jou ai himangoka, abe o kia dika naga iwango de Una gea to ena ma wowango wohidoaka enangika. De tonihibehehongo o Yesusu Kristusoo ai himangoka, abe Unangoo ai demo duru igoungu nengokadau ma oraha o Pilatusu wihimanga. Ho hokonaa tonihibehehongo.

¹⁴ Kiani ngona ka ihikaika naniiki de nohingounu ahi behehongo mata-mata ngonaika la hiadono ko nahowonua genangoka de ko idadiua o nyawa initae ma titi gea. De ahi behehongo gea kiani naniiki ka hiadono ma wange nanga Baluhu idodutu o Yesusu Kristusu woboali.

¹⁵ Abe ahao adonoka ma wange gea abe Ma Jou wairiki de ahao idadioka o Yesusu Kristusu woboali. Abe Ma Jou, Una gea duru wohohailoa de duru de ai kuahaka la ka Una dika wohipareta mata-mataika. Abe Una o kokoano mata-mata manga Koano de o balu-baluhu mata-mata manga Baluhu idodutu.

¹⁶ De Una gea ka womatengo dika abe ko wohone-honengua ka hiado-adonika. De Una gea wogogere o dararonoka abe duru kohadararono. Abe hokogea ma mogiria ai dararono hiadono ngone o nyawa ko hapoaua homahitigika Unangika. De ko ma moiuahi o nyawa iwimake ai dararonoka gea, abe duru ko idadiua Una himake de nanga lako. Ho Unangika itiai nanga horomati hihidoaka ka hiado-adonika, de Unangika itiai hihigiriiri hato, “Unangoka naga ai kuaha de ai bobuturungu abe ko iwa ma bobaha.” Hokogea ma gou-goungu! Amin.

O Paulusu wahitiari o nyawa yokaya-kayaika

¹⁷ De nanga gogianongoruika abe duru de manga tiwioka o duniaka naa, onangika kiani ngona nahitiari. Nahitiari nato, “Ufa ngini nimasade de ufa nimahinganono nia tiwika. Angamoi ngone ko hohiorikua nako ka ihikaika naga de nanga tiwioka eko bote itebini dika de ihihangoka mata-mata. Ho ufa genangika nimahinganono, ma koaho Ma Jouika dika nimahinganono, angamoi Una duru wonahidailako mata-mata abe ngone hoperelu la howango hosanangi.” Hokogea ngona nahitiari onangika.

¹⁸ Ona kiani ma rorahai yotobadiai la manga datoro ma rorahai gea duru iwoe onangoka abe imaketero ma ngoe abe hoka manga tiwioli naga iwoe onangoka. Kiani ona manga hiningaka yoigo yahidoaka o nyawaika, abe yosanangi manga tiwi de manga kiahonanga ihikodoku manga gogianongoruika.

¹⁹ Angamoi hokogea ma ngekomo la o nyawa yokaya-kaya gea manga utumu o Horogaka yamake de agogono genangoka. De gea manga utumu ko ihelorua, masara ahao naga yadamaa ma oraha yohapongo daku o Horogaiye. Ho hokogea o nyawa yokaya-kaya ka idadi yomahitoona o wowango abe duru ma ngango. Hokogea ahi hitiari nanga gogianongoru yokaya-kayaika, ho ngonaoo hokogea nahitiari onangika.

O Paulusu ai demo ma bobaha

²⁰ Ahi ngofaka o Timotiusu, ngona kiani duru noogoana Ma Jou ai dodotoko abe wonihitagongoka ngonaika. De o nyawa manga demo abe ka yofeto-feto dika eko manga kadatoro abe ma titi ko iwa, o nyawa gea ko iwa manga horomati Ma Jouika, ho ngaro ufa dika de nohigihene manga demoika gea. Angamoi to ona manga demo gea nako ona yaetongo, ato o sosawaro ma demo, ma tanu ko isawaroua.

²¹ De o nyawa utu ato yomahinganono manga demoika gea, masara hiokoo mangale ena gea ma titi hiadono yangofuoka abe yomahirehenoka o ngongakuino. Ho ngona o Timotiusu, ngona kiani duru noogoana Ma Jou ai dodotoko gea abe wonihitagongoka ngonaika. Ho naa ngohi tinigahoko la Ma Jou ai owa ngini niamake.