1 Timotiusu 4 - Ma Jou ai Demo-demo o Totobelohoka

O Paulusu ai hitiari ma titi ona yodoto-dotoko abe ko itiaiua

¹ De ngaro ma gou-goungu imanoa Ma Jou ai garejaka de ihingahu-ngahuoka o nyawaika, ma, nagahi o nyawa abe yomahirehene genangino. Masara abe ma titi ona gea ngone hahiorikoka angamoi Ma Jou o Womaha wonahitararonoka. Abe Ma Jou o Womaha wonahingahu moi de duru itararono Una wato, “Naga ma oraha ahao iboa de o nyawa utu yomahirehene de ma ngongaku yanoaka.” Abe ona ahao ihigihene o dodotokika abe o ngelu-ngeluku dika, de ma dodotoko gea duru ihititi o toka-tokatoka.

² De ma dodotoko hokogea ihikabarihi o nyawaino abe yotobaelu-eluku de yomapohu-pohuku dika. Ona gea duru ko ihigihe-gihenua manga hiningaika abe ma oraha ka de itemo de yahigaro ma totiaiika. Ho gea ma bahaika de ona gea manga hininga ko ihiorikokaua o kia itiai de o kia ko itiaiua. Abe gea imaketero hoka nanga kaioli. Nako hiadono nanga kai duru youku, gea ika-ika de nanga kai gea ko amaokaua. De gea duru imaketero de to ona manga hiningali abe ona ko amaokaua manga howono.

³ De ona gea yadotoko o nyawaika ato ko idadiua o nyawa yoilaka de ko idadiua o inomo utu yaolomo. Masara ngone hingaku-ngakuoka Unangika de abe to Una ai gou-goungu hataoko itiai, ngone ka idadi ma inomo gea hohitarimakase Ma Jouika de haolomo dika. Angamoi ma inomo mata-mata Ma Jou watulaadauku.

⁴ De mata-mataika abe Ma Jou wotulaadauku, gea irahai mata-mata. Ho ngaro o inomo o kia dika ma ufa gea haoluku, masara koaho gea hodafongo de hohitarimakase Ma Jouika.

⁵ Angamoi ma inomo gea ka ma dodihirakahi de Ma Jou wonadingakoka ngoneino abe wato ngone ka idadi haolomo. Ho mangale ma titi Una wonadingakoka de ngone hohitarimakase hiadono ngone ka idadi ma inomo gea haolomo. Ho ngone naa ngaro ufa dika de hohigihene manga dodotokika gea.

O Paulusu wihigaro o Timotiusika ma titi ai leleani o Kristusika

⁶ Ahi ngofaka, nako ahi dodotoko o huratoka naa ngona nadotoko nanga gogianongoruika la hiadono ona yangaku genangika, gea nomahitaana nodadioka o nyawa abe nileleani irahai o Yesusu Kristusika. De naa moioli tonihigaro tato kiani nogila-gila ani hininga nomahitoofo de o ngongaku ma dodotoko ma rorahai gea, abe hoka nengokadauino ka ihikaika naniiki de nomahitoofo genangino.

⁷ Masara nako o totoade abe ko kia-kiaua ma titi de abe imakalawana de Ma Jou ai gou-goungu, gea ufa nohigihene enangika. De koaho ngona ani hiningaka nomadotoko de nomaribuutu la Ma Jou ai mau natobaniiki.

⁸ De igoungu nako nanga badanga, ka idadi homaribuutu la hiadono nanga buturungu idogo abe nanga roehe itotoomu, de genangino nanga utumu ma hohutulu hamake. De gea irahai, masara nanga utumu gea ma hohutulu dika hamake angamoi nanga badangoka dika ma utumu. Masara ka nenangohi ilamoko nanga utumu hamake nako homahiputurungu nanga ngongakuino la hiadono utuohi haniiki itiai to Una ai mau ngoneino. De genangino hamake nanga utumu iwoe. Abe utu ngaro nanga wowango o duniakahi naa ma hamakeoka nanga utumu. De ahao utuohi nanga utumu hamake daku o Horogaka.

⁹ De gea ma demo duru igou-goungu de ka idadi hodafongo de hangaku enangika.

¹⁰ De ngone naa duru hokarajaanga de homaribuutu la haniiki itiai Ma Jou ai mau ngoneino, angamoi to ngone nanga nganganono ma gahumu naga Ma Jouoka. Abe Una gea wowango ka hiado-adonika, de Una o nyawa mata-mataika manga Duduhunu. De hongoli Una wonaduhunu ngoneino abe hingakuoka Unangika, angamoi wonaduhunu ngone nanga howo-howonino.

¹¹ Ho ma dodotoko ahi huratoka naa ngona kiani nahuloko de nadotoko nanga gogianongoruika abe yogogere genangoka o Efesusu ma kotaka.

¹² De ufa ani datoroka naga ma titi hiadono o nyawa iningelo ngonaika ma titi ngona ka o goduuruohi dika. Masara koaho to ngona ani wowango ma totiai naga la hiadono ona ka idadi yomaaduru abe hoka ngonali ani wowango. Abe ngaro ani demo, de ani datoro, de ani dora o nyawaika, de ani ngongaku, de ngaro ani hininga ma hohailoa, ma, kiani gea mata-mata itiai Ma Jou ai himangoka la hiadono nia gogianongoru gea ka idadi yomaaduru abe hoka ngonali ani wowango.

¹³ De ma oraha naa de ka hiadono abe ahao ngohi toboa tonilega, gea ka ihikaika kiani nabasa Ma Jou ai Demo-demo nanga gogianongoruika, de ufa nomatogumu ona nahigaro ma totiaiika de nadotoko onangika.

¹⁴ De ufa ani hiakunu Ma Jouoka de aino gea ufa nodogunoaika. Abe nengokadau ani hiakunu gea namake ma oraha ona o gareja ma hihira inifokumu de initingakoka Ma Jou ai karajaangika. Abe ma oraha gea inifokumu de Ma Jou o Womaha wahimatoko de wahitararono abe hokokia wonihiakunu ngona. Ho ufa namalaika ani hiakunu gea.

¹⁵ De ngona kiani nomahidodiai la ahi behehongo ngonaika abe ahao naa totulihuku, gea naniiki hiadono to ngona ani hininga ma dumutu duru itagi ka genangika dika. De nako hokogea nodiai, ahao o nyawa mata-mataika ka idadi inimake de inihioriki hokokia noaguru ma totiaiika.

¹⁶ De kiani nomaagoana ma titi ani wowango de ani dodotoko. Abe kiani ka ihikaika ngona nomahigagaoika ahi behehongika, la hiadono ngaro ngona ma hirete de ngaro ona nadoto-dotoko, ma nginioka mata-mata ko moiua niamake Ma Jou ai hohowono.