1 Timotiusu 3 - Ma Jou ai Demo-demo o Totobelohoka

O Gareja ma Hihira kiani manga wowango hokokia?

¹ De naa o demo moioli tonihingahu abe duru igou-goungu. Abe o nyawa onagona dika de manga magaweoka abe duru yoigo o gareja ihihira, gea ona yomalingiri o karajaanga moi duru ma rorahai.

² Masara ona gea kiani o nyawa abe manga wowangoka ko iwa manga datoro la hiadono o nyawa utu ka idadi yatae-tae onangika. Abe una duga-duga ngoi fekata ka momatengo dika. De kiani una ka wakunu womatongohono, de kiani ai hininga ma totiai iwihihira-hira, de kiani o nyawa utu naga iwihayanga unangika, de nako hiadono o nyawa iwirekata unangika, gea kiani wadafongo de wao irahai abe iwirekatino. De una kiani naga ai hiakunu la o nyawaika wadotoko.

³ De ufa wotobaokere o daluku eko wotobangamo masara kiani waabole-bole o nyawaika de ai hininga iriidi. De ufa wohafini o tiwi.

⁴ De abe ai tauoka, una kiani wapoa wahihira-hira de wahiaturu itiai to una ai tau, abe ai ngofa-ngofaka kiani naga manga hingounu manga babaika de kiani nagaoo manga hayanga o nyawaika.

⁵ Abe naa moi tonihingahu, nako hiadono o nauru womatengo ko wapoaua wahikaaturu to una ma hirete ai tauoka, gea done sarakia de una wakunu wahihira-hira ai gogianongoru Ma Jou ai tauoka?

⁶ De una gea ufa ai ngongaku ka ikilauohi abe ko womotedekanuahi wingaku Ma Jouika. Angamoi nako hokogea done womasade de hiadono wamake ai hohowono abe imaketero hoka ma dihira o Ibilihioli ma hohowono amake abe ma titi ahao o gareja ma hihira gea iwihiguti ai gogeroka de auku.

⁷ De moioli kiani naga womatengo gea ai wowangoka nako una woigo wato o garejaka wahihira. Abe ngaro o nyawa o gareja ma homoaka abe ko iwingakuahi Ma Jouika, ma, kiani onangoo manga hininga iwisanangi unangika de iwihayanga unangika gea. Angamoi nako ko iwihayangua, done ahao iwihohedu unangika de hiadono o Ibilihi iwihikala o gareja ma hihira gea. Ho duru kiani una gea ai wowango ma datoro itotiai nako woigo o gareja wohihira.

O Gareja ma Duduhunu kiani manga wowango hokokia?

⁸ De o gareja ma duduhunu, onangoo ma kiani o nyawa utu yahayanga onangika abe imaketero hoka o gareja ma hihirali o nyawa yahayanga onangika. Ho o gareja ma duduhunu gea, kiani manga wowango itotiai. Ufa ona yomahihawo-hawo dika de manga ngeluku ma demo, de ufa o nyawa abe o angguru ma gohaka ma teongo ifoloiholi yokere, de ufa ona abe yosanangi yarusi o nyawaika la hiadono manga tiwi yomamake genangino.

⁹ Masara ona kiani duru yomahigagaoika o ngongaku ma dodotokika abe Ma Jou wonahimatoko ngoneino. De abe ihiorikoka o ngongaku ma dodotoko gea, kiani ona ka ihikaika yaniiki abe manga hininga ma oraha ka de itemo de ka yahigaro ma totiaiika.

¹⁰ De ona gea ko niahiromanguahi o gareja ma duduhunu de gea kiani yatailohi manga wowangoka la nihioriki ona yapoa eko koua. Abe nako ngini niatailoka de ko iwa nia dodaere eko nia hohowono onangika, gea de ahao ka idadi yaleleani o garejaka.

¹¹ De ma ngo-ngofeka abe o garejaka yaduhunu, onangoo ma kiani manga wowango hokogea itotiai hiadono o nyawa utu yahayanga onangika abe imaketero hoka ma nau-nauroli. O ngo-ngofeka gea ufa yotobahiade-ade masara kiani ona ka yakunu yomatongohono de ka ihikaika manga gogianongoru ka idadi yangaku onangika.

¹² De abe o gareja ma duduhunu kangano, to una ngoi fekata duga-duga ka momatengo dika. De kiani una wapoa wahiaturu itiai to una ai ngofa-ngofaka de ai tau ma goronaka mata-mata.

¹³ De o gareja ma duduhunu onagona dika abe yaleleani irahai o garejaka, ona gea ahao yamake o hayanga ma amoko manga gogianongoruino. De nako yaleleani irahai, gea yamake moioli, abe to ona manga nganganono idogo o Yesusu Kristusika hiadono ona duru yotomoroini abe ma oraha yomahingahu o nyawaika ma titi manga ngongaku nanga Baluhoka. Hokogea dika aika ahi hitararono ma titi ona o gareja ihihira-hira de onangoli o gareja yatobaduhunu.

O hurata naa ma titi o kia hiadono o Paulusu wotulihi?

^14-15 De naa ma oraha ahi hurata ngonaika totulihi ma gogiriaka de igoungu naga ahi hidee la ngohi tato ko itedekanokaua de toboa tonitutumu. De masara ngohi tomahitiari tato, “Done o kia naga bote idadi de ngohi tokapaanga tomahiadono ngonaika de gea ma dekana de ahao ahi behehongo naa namake.” Hokogea tomahitiari ho hiadono ngohi tomaputuhu tato ahi behehongo tatihira ngonaika abe o huratoka de tonihidingoto. La ahi behehongino gea de ngona ka idadi nohioriki hokokia ngone Ma Jou ai tauoka kiani howango de hokokia homakao ngone de nanga gogianongoru. Abe nanga gareja gea to Ma Jou ai gareja abe Una wowango ka hiado-adonika. De to Una ai gareja yagorakiye Ma Jou ai gou-goungu imaketero hoka o tau ma lifunu de ma liate ka hiadono ateruiye ma ponata.

¹⁶ De naa o nyanyianga moi abe to ena ma demo o nyawa ko moiua la yodimoaka. Abe ma nyanyianga naa inahitararono hokokia ma hohailoa Ma Jou ai dodotoko abe naa ma duru wonahimatoko ngoneino. De hokonaa ma nyanyianga ma demo. Ai rupa o nyawa woboaino, De ai wowango o malaekata yolega-lega, Ai totiai Ma Jou o Womaha wihitaana, De ai abari ihihora onangika ko iwihiorikuahi Ma Jou la onangoo ka idadi yoihene, Ai dodotoko o dunia ma nyawa yangaku, De wosobo daku o Horogaiye wogoraka.