1 Timotiusu 2 - Ma Jou ai Demo-demo o Totobelohoka

Hokokia kiani homaniata ma demo Ma Jouiye

¹ Ho naa, ahi ngofaka, abe ma titi ani karajaanga o garejaka, duru ihira ngohi tonihigaro la ngini niwingaku-ngaku nimaniata de o nyawa mata-mataika niagahoko Ma Jouiye. Abe kiani ona niagahoko Ma Jouiye la to Una ai owa de ai duduhunu ona yamake, de abe ma oraha nimaniata de kiani nitarimakaseoo Ma Jouika ma titi ona.

² De onangoo abe yahipareta o nyawaika, hoka o kokoano de onagona dika naga de manga poparetaka, onangoo ma kiani niagahoko Ma Jouiye ma titi ona. De ma oraha nimaniata gea de ka idadi niagahoko la nanga popareta Ma Jou wahiowa. Ho itiai nanga popareta hagahoko Ma Jouiye la Una wahikokaaturu ona gea la ngone nanga wowango de ma utumoka. Abe nako Una wahikokaaturu nanga popareta gea, de ahao ngone nanga wowangoka hatoli iriidi de naga de ma dameoka, de ngone ka idadi howango de haniiki duru itiai Ma Jou ai mau ngoneino de homakao duru irahai ngone de nanga date-datekoka.

³ De nanga niniata de nanga gogahoko gea irahai de iwihisanangi Ma Jou nanga Duduhunika.

⁴ Abe Una gea ai mau wato o nyawa mata-mataika waduhunu manga howo-howonino, de Una woigo la o nyawa mata-mataika ihioriki de yataoko itiai ma gou-goungu.

⁵ Abe ma gou-goungu gea hokonaa. Ma Jou Una ka womatengo dika, de nagali nanga hidemo abe Una wakunu wonahiketerimoi ngone o nyawa de Ma Jou, Unangoo gea ma ka womatengo dika. De ma nyawa womatengo gea o Yesusu Kristusu.

⁶ De Una gea ai wowango womahidoaka la ai datorino gea de womahidadi ngone o nyawa mata-mata nanga hiluasa ma bobangu. Abe gea imaketero hoka ngone o gogilaongo de Una wonabangu la wonahiluasa nanga kangelaino. De ai hohonenge gea idadi duru ma gaheoka abe hoka ma dihira Ma Jou wahibehehongoka. Ho ma wangeoka gea de Ma Jou womahitaana abe duru woigo la wato o nyawa mata-mataika wakokiduhunu manga howonino. Hokogea ma gou-goungu abe Ma Jou woigo la o nyawa mata-mataika ihioriki de yataoko itiai.

⁷ De mangale ma titi Ma Jou ai mau gea hiadono Una wohihitagongo ngohi la ai Abari ma Rorahai toiki tatobahingahu-ngahu onangika abe ko o Yahudi ma nyawaua. De gea ena totemoka duru tagou-goungu de ko toelukua! Ho gea wohihitagongino ngohino la wato o Abari ma Rorahai gea de nanga ngongaku ma dodotoko ma gou-goungu ngohi tahingahu-ngahu o nyawa mata-mataika. Ho ahi ngofaka, duru tonihigaro la ngini mata-mata genangoka nimaniata de o nyawa mata-mataika niagahoko Ma Jouiye.

O Garejaka ma hiaturu ma titi o ngo-ngofeka

⁸ Ho naa ngohi tinihibehehongo la nimatoomuino ma getongo abe nimahuba-huba Ma Jouika de kiani o nau-nauru o balu-baluhu yomaniata Ma Jouiye. Masara gea kiani ma nauru abe manga wowango ma datoro imakiniiki de Ma Jou ai mau. Ona gea ko idadiua naga o ngamo eko o kadatoro manga wowangoka. Ho nako to ona manga wowango itebini Ma Jou ai himangoka, gea de ahao ka idadi manga giama yagorakiye de yomaniata Ma Jouiye.

⁹ De nako o ngo-ngofeka, onangoli ma naga ahi behehongo moi ma titi ona. Abe tahibehehongo la ma oraha ngini o gareja moi nimatoomuino de o ngo-ngofeka naga yomahinoauku de o baju abe imakiniiki de nia hininga ma dumutu nia dodoomuika gea. Ma ngaro ufa de yomasade, ma koaho yomahinoauku de manga baju biaha dika. De ufa yomatadauriye la manga tadauru gea o fara moi abe ma rupa ihailoa, de ufa yomahinoa de o gurasi eko o biagaro ma hakaru eko o baju duru ma hali. Angamoi nako hokogea yomadiai, gea ma titi ona yoigo ato o nyawa utu yalega-lega onangika.

¹⁰ Ho nako ona yoigo yomahihawo de ma rorahai, koaho yomahihawo de manga datoro ma hohailoa Ma Jou ai himangoka, angamoi ena gea abe itiai yodiai nako yomahingahu ato yoboaino la iwihigiriiri Ma Jouiye.

¹¹ De ma oraha nimatoomuino de kiani o ngo-ngofeka yomariidi de yototoihene ma dodotokino, la ahao manga hingounu naga ma dodotokika abe gea yoihene.

¹² Ngohi ko tahigunoaua o ngofeka la yadotoko eko yahulo-huloko o naurika, ma kiani yomarii-riidoka dika.

¹³ Angamoi ma dodihiraka o Adama una wohira Ma Jou wihidadi, de ahao o ngo Hawa muna moturu womihidadi.

¹⁴ De naa moioli o Adama una o Ibilihi ko iwibudiua, masara ma ngofeka gea ka idadi imibudi de hiadono mahowonoka Ma Jouika.

¹⁵ De masara ngaro mahowonoka Ma Jouika de o ngo-ngofeka mata-mata yamake manga hohowono abe ma titi manga odiri duru kohagiria ma oraha yomagerewoto, ma ka idadiohi ona yamake o wowango ka hiado-adonika. De o wowango ma ngango gea ka idadi yamake iti manga ngongaku ko idomo-domoua, de manga dora ka itagiohi manga gogianongoruika, de duru yaniiki Ma Jou ai totiai manga wowangoka. De gea mata-mata yodiai manga wowangoka, iti de manga dongohono yodiai.