1 Timotiusu 1 - Ma Jou ai Demo-demo o Totobelohoka

O Paulusu ai demo ihira-hira o Timotiusika

^1-2 Ngohi o Paulusu tonihurata ngona o Timotiusika abe ngona ahi ngofaka idodutu ma titi o ngongakuoka. De ngohi naa Ma Jou wohihibehehongo la todadi o hidingoto ma nyawa abe tahingahu-ngahu o Abari ma Rorahai. Angamoi nanga Jou abe wonaduhunu nanga howo-howonino, de o Yesusu Kristusu nanga Koano abe Ma Jou wonahibehehongoka, abe Una gea nanga nganganono, ona yahinooto mata-mata ihihuloko ngohino de ihihidingoto la hiadono totobahingahu o nyawaika ma titi o Yesusu Kristusu. De naa tonigahoko Ma Jou nanga Babaiye la Una wonihidoaka ngonaika to Una ai owa, to Una ai hininga ma dora abe o nyawaika watobaduhunu, de to Una ai hininga ma miriidi.

O hitiari moi abe ma titi o rerehene ma dodotoko

^3-4 Ahi ngofaka o Timotiusu, ngohi duru toigo de togahoko la ngona ka nomagoo-gogerohi o Efesusu ma kotakahi de bole-boleohi nanoaika ma kota gea. De ahi gogahoko naa ka imakadaene dika abe ma dihira ma oraha ngohi o Makedonia ma tonakika toiki. Abe ma oraha gea duru togahoko la nogogerohi genangoka mangale ma titi naga o nyawa yamuruono naga o Efesusu ma kotaka gea abe yadoto-dotoko ko itiaiua. Abe manga dodotoko gea ka ma homoa dika de ko iwa ma titi. Ona yodotoko ma titi abe to ona manga totofora manga roma-romanga kohangoe ka hiadono manga tofora o Abarahaama de o Isaka, abe duru agorakiye ma roma-romanga gea. Masara gea yodiai dika o ade-ade ma titi manga totofora gea, de genangino yodotoko o nyawaika. Masara gea ma ade-ade ko igou-goungua. Ho ona gea kiani ngona natogumu la ibootohi yodotoko. Abe ngona kiani nataere onangika nato, “Ibootohi ngini niadotoko o nyawaika ma titi o totoade de ma titi o nyawa manga totofora onagona honanga.” Hokogea kiani nataere onangika gea angamoi manga dodotoko gea yodiai la o nyawa yomaketeliliara dika. De manga dodotoko hokogea ko yahigaroua o nyawa la yaniiki Ma Jou ai behehongo onangika. Ho nako hoihene manga dodotokino, gea duru ko inaduhunua. Angamoi abe inahidumutu hokokia haniiki Ma Jou ai behehongo ngoneino, gea duru ka nanga ngongaku ma dodotokino dika.

⁵ De duru ena gea ma titi hiadono toigo ngona nomagoo-gogerohi genangoka la nadotoko o nyawaika ma titi o dora. Angamoi ngohi duru toigo la hiadono o nyawa o Efesusoka gea naga manga dora ilaku manga hidogoronaka. Abe nako hiadono nanga dora ka idadi hokogea ilaku, la gea ngone kiani naga nanga hininga ma debi-debini, de kiani naga nanga ngongaku ma gou-goungu Ma Jouiye, de abe ma oraha nanga hininga ka de itemo de inahigaro ma totiaiika, ena gea kiani haniiki. Nako hokogea ngone, de ahao ka idadi nanga dora ilaku de itagi o nyawa utuika.

⁶ Masara ona gea abe manga dodotoko o Efesusu ma nyawaika ko itiaiua, gea ona yomahirehenoka o doraka de aino. De gea yomahirehenoka hiadono manga hininga ma dumutu itagi o nyawa manga demo-demoika abe yomaketeade-ade ma ngoe masara manga demo gea duru ko iwa ma titi, ka ma homoa dika.

⁷ De ona gea yoigo yomahidadi yotobadoto-dotoko Ma Jou ai Pareta o nyawaika, masara ngaro to ona ma hirete manga demo ma, ko ihiorikua ma titi. De ngaro ona duru ko ihiorikua, ma, yogila-gila dika Ma Jou ai Pareta yadotoko o nyawaika de yomahihawo-hawo dika abe ona ato duru ihioriki o dodotoko gea ma titi.

⁸ De masara gea ngohi ko totemoua tato Ma Jou ai Pareta itorou, angamoi ngone mata-mata hohiorikoka abe ai Pareta gea irahai de inaduhunu, iti ufa ngone hohikawalimi ai Pareta ma dumutu.

⁹ De abe ai Pareta ma dumutu gea, ngone hohiorikokaoo abe Ma Jou ai Pareta gea ko wahidumutua o nyawaika manga datoro itotiai. Hokogenangua, ma Ma Jou wahidumutu ai pareta onangika abe yatilakuru de yalawana ai pareta gea. O nyawa abe iwiporete Ma Jouika de yahowo-howono Unangika, de o nyawa abe ko yototiaiua de abe o dunia ma hafini, genangika dika yoohafini, ona gea mata-mataika Ma Jou wahidumutu ai pareta onangika. Abe de Ma Jou ai Pareta Una wahitiari onangika abe hoka manga baba eko manga meme yatoma eko ngaro naga utu ma, yatoma.

¹⁰ Eko o nyawa yomakitigi ko itiaiua, eko o nauru de o nauru de yomakitigi. Eko o nyawa abe o nyawa utu yataokino la ahao ka idadi yafukunu la yahidadi o gogilaongo. Eko o nyawa yotobaelu-eluku, eko ngaro ma oraha naga yaurusu o nyawa de o hakihii ma nyawa ona gea yaeluku yotobauru-urusika. De ngaro naga o kia-kia dika utu abe ko imakiniikua de o totiai ma dodotoko de ena gea o nyawa yotobadiai, onangikaoo gea masara Ma Jou wahitiari de to Una ai Pareta.

¹¹ De duru hokogea dika o Abari ma Rorahai inahingahu ma titi Ma Jou ai Pareta, abe ai Pareta gea yahitiari abe o nyawa yotobadiai itorouika. De abe ma titi o Abari ma Rorahai, gea Ma Jou wohihitagongoka ngohino la tahingahu-ngahu o nyawaika. Abe Ma Jou Una duru wokokurutiye de duru wohohailoa. Ho duru ai Abari ma Rorahai gea ena abe tanu kiani yadoto-dotoko o nyawaika.

O Paulusu ai tarimakase ma demo o Yesusu Kristusika

¹² De naa ngohi duru totarimakase nanga Baluhu idodutu o Yesusu Kristusika, angamoi Una gea wohihiputurungu ngohi la hiadono ka idadi tileleani. De nagali totarimakase Unangiye mangale ma titi Una wohilega ngohino de wohietongo ahi hiningaka titobaniiki de hiadono wohihitagongo ngohino la o Abari ma Rorahaioka ngohi ka idadi tileleani Una.

¹³ De gea wohihigunoa tileleani ngaro ma dihira ngohi tingelo Unangika, de to Una ai nyawa duru tahikangela, de ma titi ahi sade hiadono ngohi duru tihitipokouku Una. De ngaro hokogea ma dihira ngohi todiai, masara ka tamakeohi Ma Jou ai hininga ma mobole ngohino hiadono Una ko wohihohowonua ngaro ma dihira gea ngohi ko tingakuahi Unangika. Ho gea mata-mata todiai de duru ko tohiorikua abe talawana Ma Jou ai mauika.

¹⁴ De ahao nanga Baluhu idodutu ai owa duru kohagiria wohigopoa ngohiuku hiadono ngohi ka idadi tingaku Unangika de tidora Unangika de hiadono o nyawaikaoo tadora. De ahi ngongaku de ahi dora gea tamake ma titi ahi gogao o Yesusu Kristusika.

¹⁵ De naa o demo moi tonihingahu abe ma demo gea hohioriki duru igou-goungu. Abe o Yesusu Kristusu, Una woboaka o duniauku naa la wato o howo-howono ma nyawa waduhunu manga howonino. Ma demo gea duru igoungu de kiani hodafongo de hangaku enangika. De nako o howo-howono ma nyawa mata-mataika, ma ka ngohiohi ahi howono itorou.

¹⁶ De mangale ma titi ngohiohi ahi howono itorou, ho tanu itiai Ma Jou wohihohowono ngohino. Masara o Yesusu Kristusu wato womahimatoko ai dongohono ngohino ho hiadono ko wohihohowonuali. Ho gea Una wohihidadi la ngohi todadi hoka o dodotoko moi la o nyawa ka idadi ihioriki hokokia ma amoko to Una ai dongohono o nyawaika. Ho gea Una womahimatoko abe nako ngohioo ka idadi tingaku Unangika de tamake o wowango ka hiado-adonika, gea o nyawa utuoo duru ka idadi iwingaku de o wowango ma ngango gea yamake Unangoka de aino.

¹⁷ De naa tihigiriiri nanga Koanoiye, abe Una gea naga ka hiado-adonika, de ko iwa ai bobaha. Abe Una duru ka womatengo dika Ma Jou de Una ko himake-makeua de nanga lako. Ho Unangika dika kiani nanga higiriiri de nanga horomati hohiboa naa de ka hiado-adonika. Amin.

O Paulusu ai higaro ma hohininga ma demo o Timotiusika

¹⁸ Ahi ngofaka o Timotiusu, ahi gogahoko ngonaika abe totulihi ahi hurata ma goronaka naa, gea idadioka ahi behehongo ngonaika. De ahi behehongo gea duru imakiniiki de ma himatoko ma demo abe ma dihira o gareja ma hihira yamake Ma Jouoka de aino abe ma titi ngona. Abe ma demo gea yamake Unangoka de aino de ahao ona ihidemo nginika. De naa tonihihohininga ma titi ma himatoko gea la tato tonihigaro ma totiaiika. Abe nako ka ihikaika nomahohininga de naniiki ma himatoko ma demo Ma Jouoka de aino gea, gea ahao inihiputurungu la ka nakunu ma dorouika nalawana. Abe gea ngade-ngade imaketero hoka ma himatoko ma demo gea idadioka ani dae moi la ka nolaku ma oraha naparangi ma dorouika.

¹⁹ De ma oraha ma dorouika naparangi, kiani nomahigagaoika ani ngongakuika de kiani naniiki abe ma oraha ani hininga ka de itemo de gea abe inihigaro ma totiaiika. Angamoi naga yamuruono naga abe ngaro ka ihikaika manga hininga ka de itemo de yahigaro ma totiaiika, ma ko ihigihenua. De mangale ma titi ko ihigihenua ho hiadono to ona manga ngongaku duru iwederoka abe hoka imaketero de o kapa moi yoduhuputu o hakaru ma amo-amokika de duru iwede-wederuku ma kapa gea. Hokogenangoo de to ona manga ngongaku iwederoka.

²⁰ Abe ona gea tafeto-fetongo, marai o Himeneusu de o Alesandere de yamuruono naga utu. Masara ona yahinooto gea taputuhoka tato manga hohowono hokonaa. Ona yahinooto gea jai-jai tahidoakohi o Ibilihi ma kuahaika la yamake genangino manga dodotoko moi la ibootohi iwingelo Ma Jouika.