1 Tesalonika 5 - Ma Jou ai Demo-demo o Totobelohoka

Abe ma titi nanga Baluhu ai gahe ma wange abe ahao woboali

¹ De naa mia gogianongoru, tinihingahu ma hohutulu abe ma titi nanga Baluhu idodutu ai gahe ma wange abe woboali la wahohowono onangika ko iwingaku-ngakua. Abe ai gahe ma wange gea muruonoka, eko ma dodunguu naga o kia abe ahao idadi la duru hohioriki muruonoka de woboa, de ma titi gea tanu borotaua de mitulihi nginika angamoi ma dihiraino de minidotokoka miato moioo de ko iwa ihioriki ai gahe gea. Masara ka idadi ma hohutulohi tinihitararono nginika la gea duru niataoko itiai.

² Angamoi ngini naa duru nihioriki abe nanga Baluhu ai gahe ma wange gea imaketero hoka womatengo wotobatohiki woboa nanga tauino la inadohiki, abe ngone duru ko hohiorikua o futu o kia ahao una woboaino.

³ Abe ma oraha gea o nyawa yomakoketemo ato, “O wange naa ngone nanga hininga iriidi dika, angamoi nanga musu ko iwa de ko kia-kiaua ahao inahikangela ngoneino.” Masara duru ma wange gea ahao ka itodokanino gea yahidotadaene ma bodito onangika gea. Abe manga bodito gea iboa abe imaketero hoka momatengo de ami badangoka, abe ka de ami pokoro igoli de muna mohiorikoka abe ami kangela adonoka. Masara nako ami pokoro ko igoliuahi, gea mamao ami kangela ko itigiuahi. De hokogenangoo ona ma wange gea angamoi ona yamao manga bodito ko itigiuahi. Masara ma wange gea ngaro ona ato yoara eko yomaduhunu manga boditoino, ma ona duru ko yomagakunua, angamoi manga duduhunu de manga ngekomo gea ko iwaka.

⁴ Masara mia gogianongoru, ngini nigogere ko o fufutuokaua, ho nako ahao ai gahe ma wange gea iboa de gea ngini ikuranga initodokana. De abe nako ona ko iwingakuahi o Kristusika, ona gea igoungu ahao ma oraha gea de duru yatodokana abe imaketero hoka o nyawa womatengo wotobatohiki una gea woboainoka de wadohiki. Masara ngini naa nihioriki abe nanga Baluhu wonagaheoka wato ahao woboali, ho nako ahao ma wange gea adonoka abe woboa, ma, ngini ko niherangua de ko niwimodongua.

⁵ Abe ngini mata-mata nidadioka o dararono ma ngofa-ngofaka de o dawangeoo ma ngofa-ngofaka. Angamoi ngone hingaku-ngakuoka ngone ko hogogerokaua o fufutuoka, ho ngone naa ko o fufutu ma nyawakaua.

⁶ Ho ufa hiadono nanga dodagi ma goronaka de ngoneoo inakiooko abe imakadaene hoka o nyawa utuoli gea yakiooko abe ona gea yogogere ka o fufutuokahi. Masara ngone kiani howangoro la ka ihikaika homagoana de homatongohono.

⁷ Angamoi biaha o futu-futuoka o nyawa yomatobaidu, de nagali manga biaha o futu-futuoka o nyawa yotobaokere hiadono yadaluku.

⁸ Masara mangale ma titi ngone hodadioka o dawange ma nyawa, ho hiadono ngone naa kiani homatongohono ma dorouino. De gea ngone kiani nanga ngongaku de nanga dora gea homahinoauku ngoneuku la gea ena idadi hoka nanga dadatoko ma baju de inadatoko ma dorouino. De nagali nanga nganganono abe ahao ma wange gea de nanga Baluhu ko wonahohowonua masara wonagoraka ngone daku o Horogaiye. De nanga nganganono gea ka idadi hohiketero abe hoka nanga pea ma dadatoko ma sapeo, angamoi ngone kiani ka ihikaika homahihohininga ma titi nanga nganganono la nanga hiningaka atatoko de hiadono ufa hopusingi abe ma titi o hohowono.

⁹ De gea nanga nganganono duru iputurungu nanga hiningaka angamoi Ma Jou ko wonahideeua la wato ngoneoo ai ngamo de ai hohowono inadaene, masara gea Una ma hirete wonahidee abe o dunia ma kokangela ko idadiuahi de ngone wonagorakoka. De gea ka idadi wonagoraka mangale ma titi nanga gogao nanga Baluhu o Yesusu Kristusika.

¹⁰ Abe Una gea wohonenge la ngone de Una ahao homakutuono homahidogogere o ngi moioka. Ho ma oraha gea ngaro ngone ka howangohi ma wange gea abe woboali de wonagoraka, eko ngaro hohonengoka, ma, ngone mata-mata wonakokigoraka la hokokigogere Unangoka.

¹¹ Ho, mangale ma titi nanga nganganono gea ho ngini kiani ka ihikaika nigila-gila dika nimahikokagaro de nimahiketehipoputurungu nia ngongakuoka ma titi gea ahi demoino. De gea ngohi tohioriki naga idadioka nia hidogoronaka ma oraha naa.

O Paulusu ona manga behehongo ma baha yahibehehongo onangika

¹² De naa, mia gogianongoru, ngomi naa duru migahoko nginika abe ona nia gogianongoru genangoka inihihira-hira la miato onangika kiani niahoromati. Abe ona gea duru yotobakarajaanga nginioka ma titi nanga Baluhu ai karajaanga ona yotobadiai. De gea ona yotobakarajaanga nia hidogoronaka, gea ona inihitiari de inidotoko nginika abe hokokia kiani niwango itiai nanga Baluhoka.

¹³ De onangika ngini kiani duru niahayanga de niadora ma titi ona manga karajaanga ma amoko nginioka la ato iniduhunu nginika. De ngini mata-mata genangoka kiani nimakao irahai de nia hininga ma rorahai dika.

¹⁴ De naa, mia gogianongoru, nagahi mia behehongo utuoli nginika. De naa ngini kiani niahitiari onangika abe yodebeturu manga karajaanga homoi-homoiika. De nako naga utuoli abe manga hininga ihuha eko ihawana, onangika gea kiani niahiputurungu. De onagona dika yoperelu o duduhunu, gea onangika kiani ngini niaduhunu. De o nyawa mata-mataika ngini kiani niao irahai de nia dongohonoka.

¹⁵ De nako hiadono nia gogianongoru utu abe yahowono nia gogianongoru utuika, de ona gea kiani duru niagoana done yomahibalaha de ma dorou manga gogianongoruika. De gea ufa hiadono idadi hokogea nginioka, masara ngini kiani ka ihikaika nihitaili la ma rorahai dika nidiai nia gogianongoruika de o nyawa utu mata-mataikaoo.

¹⁶ De ngini kiani ma ora-orahiye nigogarago,

¹⁷ de kiani ka ihikaika nimaniata Unangiye,

¹⁸ de ngaro o kia dika niohimanga ma gea kiani ka ihikaika nitarimakase Ma Jouiye. De hokogea kiani ka ihikaika nidiai angamoi hokogea Ma Jou ai mau ngone mata-mataino abe hogogere o Yesusu Kristusoka, abe woigo wato ngone ka ihikaika hotarimakase Unangika.

¹⁹ De ngini ufa niatukoro Ma Jou o Womaha ai karajaanga nia wowangoka,

²⁰ abe moi ma titi nako Una Ma Jou o Womaha winihingahu ma demo moi abe wobawilika nia hiningaika, de gea ufa niaoluku ai demo gea abe winihimatokoka.

²¹ De gea ngaro tinihibehehongoka tato ufa ai demo niaoluku, masara kiani tinihitiarioo tato nako o nyawa manga demo abe manga demo gea bari Ma Jou o Womahoka de aino iboa, de gea manga demo mata-mata kiani nihidodiai de niatailakohi la nihioriki igoungu eko ko igoungua. Ho nako gea ma demo abe niatailakoka de igoungu, gea kiani niodafongo de nianiiki.

²² Masara nako o nyawa manga demo abe niatailakoka de ko igoungua, genangika mata-mata ufa nihigihene de ufa nihingounu manga demo gea ma dorouika.

O Paulusu ona yagahoko Ma Jouika la ahao wahitebini manga gogianongoru o Tesalonika ma kotaka

²³ De naa ngomi minigahoko nanga Jouiye, abe mihioriki Una gea dika ma hirete wonahiowa ngone mata-mataino hiadono nanga hininga iriidi Unangoka. De gea ngomi minigahoko la ahao Una winihitebini de gea hiadono nia debi-debini duru ingodumu. Abe gea minigahoko la Una duru winihitebini ngini la ngaro nia hininga mata-mata de ngaro nia hafini mata-mata, de ngaro nia wowango ma datoroo mata-mata, masara gea mata-mataika ma dumutu ka ma rorahaiika dika de hiadono duru itebini de ko iwa ma howono nginioka. De gea minigahoko la Una ka ihikaika woogoana nia debi-debini gea ka hiadono ma wange gea nanga Baluhu idodutu o Yesusu Kristusu woboali, la genangoka de duru ko iwaka nia howono.

²⁴ Ho ngomi naa duru mionganono abe Una gea igoungu ahao winiduhunu hiadono ngini nitebini. De gea Ma Jou winiahoko nia ngongakuino angamoi duru woigo wato ngini nidadi ai debi-debini ma nyawa. Hokogea ai hidee ma dodihirainohi ngoneino, de ngone hohioriki Una gea watobagou-goungu wodiai abe naga ai hiningaka wohideeoka. Ho duru mihioriki abe Una gea igoungu ahao winihitebini nginika.

O Paulusu wohibobaha ai hurata

²⁵ Mia gogianongoru, ngomi duru migahoko nginika la niminiata Ma Jouiye.

²⁶ De ma oraha ngini nimatoomuino de ka idadi nimakobounu angamoi hokogea nia biaha nimahikamatoko ti ngini nia tabea o Kristusoka.

²⁷ De naa ngohi duru tinihibehehongo de nanga Baluhu idodutu ai kuaha la ngini ahao mia hurata naa niabasa nanga gogianongoru mata-mataika genangoka la gea onangoo ka idadi yoihene naa mia demo.

²⁸ De naa ngomi minigahoko Unangika la ahao nanga Baluhu idodutu o Yesusu Kristusu winihiowa nginika.