1 Tesalonika 4 - Ma Jou ai Demo-demo o Totobelohoka

O Paulusu ona yahibehehongo onangika la utuohi iwihisanangi Ma Jouiye

¹ Ho naa, mia gogianongoru, ngomi minihibehehongo nginika. De gea nengokadau ma oraha ngomi nagahi nginioka de gea minidotokoka nginika abe hokokia kiani niwango la niwihisanangi Ma Jouika. De igoungu nengokadauinohi ngini naa nianiiki mia demo gea hiadono Unangika niwihisanangi. De masara naa ngomi duru minihigaro de minihibehehongo nginika ma titi nanga gogao nanga Baluhu idodutu o Yesusika, de gea minihibehehongo la ngini ka idogo-dogoli abe nianiiki mia dodotoko ma demo gea hiadono utuohi niwihisanangi Unangika ma titi nia wowango ma datorino.

² De ma dodihiraka mia behehongo ma demo nginika, abe gea minihibehehongoka de nanga Baluhu idodutu o Yesusu ai kuahaka de aino, de mia demo gea mioigo la ngini ufa niawohanga. Ho naa marai minihihohininga ma titi mia demo naa.

Abe ma titi Ma Jou ai mau la ufa hodiai o howono nanga badangoka

³ Abe hokonaa Ma Jou ai mau nginika. De gea ai hininga la ngini nitebi-tebini, ho duru ko idadiua nidiai nia badangino o howono.

^4-5 Abe Una ko woigoua abe ngini nimaaduru hoka onangoli abe ko iwihiorikuahi Ma Jou, angamoi ona gea manga badanga ma hafini ma dorou duru ka yahiparetahi onangika hiadono ma ngoe idadi o howono manga badangoka. Masara ngini naa ufa ko niwango hokogea, masara kiani ngini nimahitiari hiadono ka idadi niakunu nia badanga homoi-homoi nimahipareta la gea nia wowango ma datoro ahao duru itebini hiadono naga de ma horomatioka.

⁶ De gea kiani hokogea nimahipareta done niahowono nia gianongoruika de nimagora manga fekata eko manga rokata eko manga ngofaka eko manga dutu onagona dika. De nako hiadono idadi hokogea nginioka, gea ahao nanga Baluhu idodutu wahohowono ona abe yahowo-howonika, de gea wahohowono abe imaketero hoka ngomi nengokadau minihingahuoka de minihitiarioka miato ahao hokogea kiani wahohowono.

⁷ Abe Ma Jou wonaahoko ngone ko ma titiua la nanga wowangoka homahipeseke, masara wonaahoko la to Una ai himangoka nanga wowango itebinoka.

⁸ Ho onagona dika nginioka abe yaoluku mia hitiari ma demoika gea, ona gea tanu ko o nyawaikaua manga demo yaoluku masara gea ona iwioluku Ma Jouika, angamoi ma hitiari gea Unangoka de aino iboa. De Una gea abe winihidoakoka Ma Jou o Womaha nginika la wato Una winiduhunu hiadono nia wowango itebini, ho tanu duru ko idadiua nimahipongono ma titi ai hitiari gea.

O Paulusu ona yahigaro la utuohi yomakodora de ufa hiadono yodebeturu manga karajaangika

⁹ De naa minihigaro nginika la ngini mata-mata nimakodora nia gogianongoru mata-mataika. De mia higaro ma demo gea tanu koaho ka ngaro ufa dika de mitulihi nginika, angamoi igoungu nengokadauino de Ma Jou winidotokoka abe hokokia kiani nimakodora.

¹⁰ De igoungu ai dodotoko gea ena niodafongoka nia wowangoka hiadono nia dora gea itagioka nia gogianongoru mata-mataika abe o Makedonia ma tonakoka yogogere. De igoungu mia gogianongoru, ngini nia dora naga itagioka de irahai, masara naa ngomi minihigaro nginika la miato ka ihikaika nia dora gea idogo-dogo hiadono ka utuohi nimakodora.

¹¹ De naa moioli ngomi minihigaro nginika la ngini duru de nia magaweoka nihitaili niwango niriidi, abe gea borotaua de ngini nimahikasapuru de niahiaturu o nyawa utu manga wowangoika la hiadono niahikangela onangika, masara gea koaho ka ti ngini ma hirete dika nia wowango nimahikaaturu. De naa moioli minihigaro, kiani ngini homoi-homoi niborikarajaanga de ufa niodebeturu nia karajaangika, ngaro nia redioka eko ngaro nia tau ma goronaka, ma ufa niodebeturu nia karajaangika gea. De mia higaro ma demo gea ka imakadaene dika abe hoka nengokadau minidotokoka nginika.

¹² De gea mata-mata minihigaro nginika la bote ahao naga o nyawa ko iwingaku-ngakua de inimake nia datoro gea ma ka ma rorahai dika nia datoroka, de gea ahao naga manga horomati nginika. De nako naga nia magawe nia karajaangika, gea ahao ka idadi ngini homoi-homoiika nimahidailako ti ngini ma hirete nia wowango ma perelu, ho gea ngaro ufa de ngini nimahinganono utuika la hiadono ti ngini nia perelu inihidailako.

O Paulusu ona yalaru onangika ma titi abe manga gogianongoru yohonengoka gea ahao yomomiki

¹³ De naa, mia gogianongoru, ngomi duru mioigo la nihioriki abe hokokia ona abe yohone-honengoka nanga gogianongoru. De gea ngomi mioigo la nihioriki angamoi done nia hininga ihuhaholi ma titi abe ona yohihangoka. De gea igoungu nako o nyawa abe ko iwingaku-ngakua, ona gea duru manga hininga ihuha nako hiadono naga manga dutu eko naga womatengoani abe manga dodiawo wohonenge. De gea ma titi ko iwa manga nganganono o wowango ma ngangoika. Masara ngini naa hokogenangua, angamoi ngini duru nihioriki abe nanga gogianongoru o Yesusoka gea naga manga nganganono o wowangoika.

¹⁴ Abe ngone naa hongaku ma titi abe o Yesusu Una wohonenge de ahao womomikokali ai honengino. Ho mangale gea ngone hongaku ho hiadono kiani hongakuoo abe ahao ma oraha o Yesusu woboali de gea Ma Jou wahimomiki nanga gogianongoru mata-mataika abe yohonengoka la ona gea ahao yomakiniiki de de o Yesusu daku ma hoaniye. De gea Ma Jou wahimomiki ona de gea o Yesusu ai demo ma ilingoka dika de aino wahuloko onangika la hiadono ona yokokimomiki manga honengoka de yaino. De gea ahao ona yoboa Unangino de ahao yomakiniiki de de Una dakuiye.

¹⁵ De naa moi to nanga Baluhu idodutu ai hingahu ma demo tadofanga nginika. De gea ai demo wato ngone onagona dika ka howangohi abe ma oraha gea nanga Baluhu idodutu woboali, de gea igoungu ahao Una wonagoraka ngone. De masara ma oraha gea abe Una ko wonagorakuahi de ihira wahimomikohi ona yohone-honengoka.

¹⁶ Abe ma wange gea nanga Baluhu Una ma hirete woboa o Horogaka de wauku wouti. De gea Una waamo-amokiye wohiboa-boaka de ai pareta ma demo wato, “Naa ngini nimomikoka!” De ma oraha gea o malaekata manga haeke to unangoo ai ilingi yoihene, de gea nagaoo yoihene Ma Jou ai guguli ma ilingi. De gea ka de yoihene de ahao ona yohone-honengoka abe iwingakuoka o Kristusika, ona gea manga badanga ahao yomomikoka manga honengoka de aino la ka idadi yowangoli.

¹⁷ Ho ona gea yomomiki ibooto de ahao ngone abe ka howangohi o dunia ma lokuoka, ngone de ona abe yomomikino, ka itodokanino de ngone mata-mata hoborigorakoka ka ma moi daku ma lobi-lobiiye la ka idadi nanga Baluhu hikokibuhuku daku ma hoanoka. De ma oraha genangoka de imahikaika de ngone ko homakitingakokaua Unangino ka hiado-adonika, ho ka ihikaika ngone de de Una.

¹⁸ Ho ngini naa kiani nanga Baluhu ai demoino gea niapake la nimahikokalaru done ngini nia hininga ihuhaholi ma titi nanga gogianongoru abe yohonengoka.