1 Tesalonika 2 - Ma Jou ai Demo-demo o Totobelohoka

O Paulusu ona manga karajaanga de manga wowango ma datoro ma oraha ona nagahi o Tesalonika ma kotakahi

¹ De, mia gogianongoru, ngini nihioriki abe ma oraha gea ngomi nagahi nginioka de mihiboa o Abari ma Rorahai de gea mia karajaanga nginioka ko parahajaua.

² Barikua de miboa nginika de mia domoroini duru ilamoko la minidotoko, ngaro ahao gea de ngomi imihikangela ipahaino o Filiipioka. De gea marai niohiningaoo abe ma dihiraino hokokia o Filiipi ma nyawa utu imihikangela ngomino. Abe gea ngomi ko miboauahi nginika de o Filiipi ma kotakahi ona utu imihikangela de imingelo. De gea ipaha de ahao ngomi migila-gila de hiadono mimahiadono nginikali. De igoungu nginiokaoo naga utu nia dodiawo manga ngoe onangoo imilawana ngomino, masara Ma Jou womiduhunu de womihitomoroini la ka idadi miakunu imimoroini minihingahu nginika to Una ai Abari ma Rorahai.

³ De gea mia domoroini bote ma titi o kia hiadono duru minihigaro la o Abari ma Rorahai niodafongo? De gea ma titi abe ngomi mihioriki mia abari ma demo gea duru igou-goungu mata-mataika. De mia higaro ma demo gea ko ma titiua la o ngelukino, de gea ko iwa utu mia hininga ma dumutu ma dorouika hiadono ma abari gea mihingahu-ngahu o nyawaika. De gea duru ko ma titiua mia hiningaka miato miabudi o nyawaika.

⁴ Hokogenangua, masara ngomi naa mia hininga watailakoka Ma Jou de Una womietongo wato mia hininga ma dumutu itaana de to Una ai mau, ho womaputuhoka de gea ai Abari ma Rorahai womihitagongo ngomino. De gea mihingahu-ngahu de ko ma titiua la miato o nyawaika miahisanangi masara gea Ma Jouika dika miato wiwihisanangi. Angamoi gea Una abe ka ihikaika womitailako mia hiningaika.

⁵ De ngini nihioriki abe ngomi naa duru ko ma moiuahi minihigiriiri nginika de mia demo ma ilingino ma mutiti la miato hokogea ka idadi minihigiriiri iti ngini nianiiki mia dodotoko. De gea minidotoko de ko ma titiua miato miamake nginioka de aino o tiwi. De gea Ma Jou Una duru womihioriki mia hininga de wohioriki abe ngomi naa ko miohafinua ti ngini nia tiwika, masara gea minihingahu-ngahu nginika de gea mia hininga ma rorahai dika.

⁶ De gea ko ma titiua o horomati mimalingiri nginino eko o nyawa utuino, masara ko ma titiua gea hiadono minidotoko nginika. De igoungu ngomi ma dihira gea tanu ka idadi miniribuutu la hiadono mia horomati mimamake nginino, angamoi ngomi naa igoungu nanga Baluhu o Kristusu womihidingoto la ai abari mihingahu-ngahu o nyawaika, ho igoungu naga mia kuaha Unangoka de aino.

⁷ Masara nako ngomi gea mia hininga ko hokogenangua. Abe ngomi ko miapakeua mia kuaha Unangoka la miniribuutu la hiadono nimihoromati ngomino. Masara gea ngomi duru minibole-bole nginika abe imaketero hoka momatengo manga meme abe mapaliara muna ma hirete ami ngofa-ngofakika de ami dora.

⁸ De gea ngomi mia dora nginika hokogea ma amoko hiadono ngomi duru misanangi minihikodoku nginika Ma Jou ai Abari ma Rorahai de to ngomi ma hirete mia wowangoo. Abe gea ma titi duru minidora nginika ho miato ka idadi mia wowangoo mimahidoaka nginika la ka idadi minihiutumu nia wowangoika.

⁹ De ngini, mia gogianongoru, marai ngini ka niohiningahi abe to ngomi mia karajaanga de mia kangela ma oraha gea abe ka nginiokahi mimanoa. De gea o futu de o wange ka ihikaika mikarajaanga la ka idadi mimahidailako la gea miato Ma Jou ai Abari ma Rorahai minihingahu-ngahu de gea done minihitubuho nginika ma titi mia wowango ma perelu.

¹⁰ De gea ngini nihiorikoo to ngomi mia hininga de mia wowango ma oraha abe ngomi ka nginiokahi. Abe gea miniao ngini niwingaku-ngakuoka gea de mia hininga ma medebini, de itaana de to Una ai mau hiadono moioo de ko iwa abe ka idadi o nyawa imitae ngomino de hiadono imihitaana. De gea ngaro ngini eko ngaro Ma Jouoo ma hirete masara ngini de Una mata-mata nihikokioriki abe ahi hininga ma dumutu de ahi demoo ma nihioriki gea ma gou-goungu.

¹¹ De ngini genangoka nihiorikoo abe ma oraha gea ngomi miniao ngini homoi-homoi abe imaketero hoka naga womatengo o baba abe ai ngofa-ngofaka wao irahai.

¹² Abe ma titi gea duru ka ihikaika minilaru de minihigaro de hiadono duru migaho-gahoko nginika la ka idadi nia hininga de nia wowangoka ma datoro nimahitaana abe hokokia itiai Ma Jou ai nyawa kiani yowango. Abe Una gea winiahokoka ngini nia ngongakuino la gea nginioo ahao ka idadi niamake ai medebini ma dararono. De gea ahao niamake Unangino angamoi ngini nidadioka to Una ai nyawa de nigogere Unangoka. Ho gea ma oraha ngomi ka nginiokahi de ka ihikaika minihigaro la nia wowango niao itiai.

O Tesalonika ma nyawa o kangela yaohana ma titi manga ngongaku Ma Jou ai Demo-demoika

¹³ De naga ma titi moioli hiadono ngomi ka ihikaika mitarimakase Ma Jouika ma titi ngini. De gea mitarimakase Unangika mangale ma dihira gea ngini duru niodafongo Ma Jou ai demo abe ngomi minihingahu nginika. Abe ma oraha mia demo gea niihene de niato, “Gea igoungu Ma Jou ai Demo-demo de gea ko to nyawaua manga demo inahingahu ngoneino.” De gea nia demoka duru itaana angamoi igoungu ma abari gea Ma Jou ai Demo-demo. De ai Demo-demo gea hiadono naa ka ikarajaangohi nia kokihiningaka abe ngini niwingaku-ngakuoka.

¹⁴ De gea mihioriki ngini niangaku ai Demo-demoika gea mangale ma titi ngini ma oraha gea ngaro utu inihikangela nginika ma ka idadi nimatongohono dika. De gea nia datoro duru imakiniiki de nanga gogianongoru o Yudea ma tonakoka manga datoro. Abe ona gea ma dihira abe ahao gea iwingaku o Yesusu Kristusika de manga date-datekoka abe onangoo o Yahudi ma nyawa, ona gea duru yahikangela nanga gogianongoruika ma titi manga ngongaku Unangika. De naa ma duruika nginioo naga utu nia date-datekoka abe onangoo o Tesalonika ma kotaka yogogere hoka nginioli, de gea ona utu duru inihikangela nginika. Ho ngini duru nimaketero hoka Ma Jou ai nyawa utuoli gea abe o Yudea ma tonaka ma gogarejaka yomatoo-toomuino. Abe onangoo gea manga dutu-dutu o Yahudi ma nyawa yahikangela onangika.

^15-16 De ngaro ma dodihirainohi ma ka hokogea dika to ona gea manga hininga. Abe gea igoungu o Yahudi ma nyawa utu ma dihira yatomaka Ma Jou ai uru ma dodofanga, de utu hiadono nanga Baluhoo de Unangoo o Yesusu iwitomaka. De naa ma duruika de ona utu imikiniiki ngomi naa ho gea hiadono kiani o kapongo muruono naga kiani mianoaikahi. De gea ona imilawana ngomino la ato ibootohi ngomi o Abari ma Rorahai miahingahu-ngahu onangika abe ko o Yahudi ma nyawaikaua done Ma Jou waduhunu manga howo-howonino. Ho ona gea duru ko iwihisanangiua Ma Jouika de hiadono ona duru yalawana o nyawa mata-mataika. De mangale ma titi ona gea ka ihikaika iwilawana Ma Jouika ho hiadono to ona manga howono ka ihikaika itou-touniye Ma Jou ai himangoka. De gea hiadono Una waetongo manga howono gea wato ifoloiokaholi. Ho ma bahaika de kiani Ma Jou ai ngamo yadaene ona gea o Yahudi ma nyawaika abe iwitobalawana Unangika. Masara ngini hoka onangua, abe ma titi nginioo hiadono duru mitarimakase Unangika, angamoi ngini ko niwilawanua ma ai Demo-demo duru niodafongo de niangaku genangika.

O Paulusu ona duru yahohininga o Tesalonika ma nyawa

¹⁷ De mia gogianongoru, abeika ngomi naa mia hininga. Abe nengokadau ma oraha o kangela inahikatingaka ngomi de ngini ho hiadono ngomi kiani mininoaika genangoka, de gea ngomi miamao mia hiningaka abe imaketero hoka ngomi o dimo-dimono de ngini mia ngofa-ngofaka inihihangoka angamoi ko idadiuahi homakamake de ngini. De gea ngaro igoungu nanga badanga homakitingaka ma gurutika masara nako to ngomi mia hininga gea nagahi nginioka de ka ihikaika miningano-nganono. Ho ngomi ma oraha gea de mia hiningaka duru mioigo la ngone ka idadi homakamakeoli hiadono duru mihitaili miboa nginika la homarihimangoli.

¹⁸ De gea ngomi duru mioigo la minitutumoli genangoka. De ngohi o Paulusu tanu ma muruono ibooto tato tosobo la tinitutumu, masara o Ibilihi ma haeke ena gea imita-tatoko ma ngekomo ho ko idadiuahi miboa.

¹⁹ Ho gea ma titi o kia hiadono mia hiningaka duru mioigo minitutumoli? Gea ma titi abe ngini naa nidadioka mia karajaangino ma hasili de ma hofoko abe Ma Jouoka. De gea igoungu abe duru ma titi nginioka ho hiadono ngomi misosanangi de mimorene, de gea naga mia nganganono Ma Jouika ma titi ngini. Abe nako ahao ma oraha gea abe nanga Baluhu idodutu o Yesusu Una woboakali de ahao ngone homakutuono hoboa ai himangino, de ahao gea ngomi miamake mia hadia to Una ai giamino ma titi ngini niwingakuoka Unangika.

²⁰ Ho gea duru igoungu ngini naa nidadioka ma titi ho hiadono ngomi ahao ma oraha gea miamake o higiriiri de o garago Unangoka de aino.