1 Tesalonika 1 - Ma Jou ai Demo-demo o Totobelohoka

O Paulusu ona manga demo ihira-hira manga gogianongoru o Tesalonika ma nyawaika

¹ Mia gogianongoru o Yesusu Kristusoka abe o Tesalonika ma kotaka nimanoa. Ngomi naa o Paulusu de o Silasa de o Timotiusu. De naa mia hurata mihidingoto abe ngini o Tesalonika ma garejaka. De gea ngini minihiorikoka abe nia gogere naga nanga Baba Ma Jouoka de nanga Baluhu idodutu o Yesusoka, abe Una gea nanga Koano abe Ma Jou wonahibehehongoka. Ho naa ngomi minigahoko nanga Jouiye la ahao ai owa de ai hininga ma miriidi winihidoaka nginika.

O Paulusu ona yotarimakase Ma Jouiye ma titi o Tesalonika ma nyawa manga ngongaku

² De ngomi naa ma getongo mimaniata de ka ihikaika mitarimakase de minigahokoo Unangiye ma titi ngini mata-mata.

³ De gea mitarimakase angamoi ka ihikaika miohohininga abe ti ngini nia ngongaku ma karajaanga ma hasili, de abe ngini nia dora hokokia itagi nia gogianongoruika hiadono nimakuduhunu. De miohiningaoo abe ngini duru nionganono abe ahao nanga Baluhu idodutu o Yesusu Kristusu woboali de winigoraka. De gea ena ma titi hiadono ngaro o nyawa inihikangela ma ka idadi niakunu nimatongohono nia ngongakuoka ma titi nia nganganono gea. De gea mata-mata miohohininga de mitarimakase Unangika abe ma getongo mimaniata de minigahoko ma titi ngini genangoka mata-mataika.

⁴ De mia gogianongoru, ngomi duru minihioriki abe Ma Jou winidora nginika de winiirikoka la niwileleani Unangika. De gea ma titi moioli hiadono ngomi mitarimakase Unangika ma titi ngini genangoka.

⁵ De gea duru mihioriki abe winiiriki la niwileleani angamoi ngomi ka miohiningahi abe hokokia idadi ma oraha o Abari ma Rorahai mihingahu-ngahu nginika. Abe ma oraha gea ko ma titiua mia demo dika hiadono ngini niwingaku Unangika. Masara naga abe Ma Jou o Womaha duru womihiakunu ngomino la gea ma titi to Una ai buturungoka de aino minihingahu-ngahu nginika hiadono mia demo gea duru inihitaana de nihioriki abe gea mia demo igou-goungu. De ngaro nginioo ma nimihioriki hokokia abe mia demo de mia wowango ma datoro ma oraha gea ngomi nagahi nginioka, abe gea mata-mata midiai la ngini ka idadi niamake ma utumu ngomioka de aino. Ho mangale ma titi hokogea Ma Jou duru womiduhunu ma dihiraino abe minihingahu nginika o Abari ma Rorahai, ho ngomi duru mionganono de mingaku abe Una winiirikoka ngini de winiduhunu, de gea ngomi womipake la ka idadi ngini niwingaku Unangika.

⁶ De naga ma titi moioli hiadono ngomi duru mihioriki abe Ma Jou winiirikoka ngini. De gea ma titi abe ngaro o nyawa utu duru inihikangela nginika ma titi niangaku mia demoika, masara gea ngini ka nigarago dika, de nia garago gea ihititi Ma Jou o Womahino. Ho genangoka de duru itararono ngomino abe ngini nimaaduru hoka ngomioli de hoka nanga Baluhu o Yesusu Kristusoli. Angamoi ngaro ngomi eko ngaro Una, eko ngaro ngomi mata-mata ma nako hiadono o nyawa imihikangela ngomino ma ka migarago dika. De nginioo hokogea nimatongohono de nigarago ma oraha o kangela niaohana, ho duru itararono abe Ma Jou dika winiiriki ngini la nidadioka to Una ai nyawa.

⁷ De mangale ma titi nginioo nia dongohono gea de nia garago o Abari ma Rorahaiika, gea ho hiadono nia wowango gea idadioka o higaro moi nia gogianongoru mata-mataika. Abe ngaro ona yogogere genangoka o Makedonia ma tonakoka eko ngaro nia gogianongoru utu abe ona o Akaya ma tonakoka yogogere, ma ona gea mata-mata ka idadi yomaaduru hoka nginioli.

⁸ Angamoi nanga Baluhu ai ade-ade nginioka de aino itagi de hiadono imahora-hora o nyawa duru ko manga ngoe-ngoeika. Abe gea ko ma titiua o Makedonia de o Akaya ma tonakika dika itagi, masara gea itagi o tonaka mata-mataika hiadono o nyawa mata-mata inihioriki ma titi nia ngongaku Ma Jouika. Ho ngomi naa ngaro o kiaika dika mitagi-tagi, masara ngomi ngaro ufa dika de miade-ade o nyawaika ma titi ti ngini nia ngongaku,

⁹ de barikua ona dika ma hirete yomaketeade-ade de imihingahu ngomino ma titi hokokia idadi nengokadau ma oraha ngomi miboa nginika de minihingahu to Una ai abari nginioka. De yomaketeade-adeoo abe ma titi ngini nia pangao nianoaka de naa hiadono niwileleani nanga Jouikali abe Una gea Ma Jou idodutu de abe wotobawango. Ho naa nanga ade-ade abe hokokia idadi ma dihiraino nginioka abe minidoto-dotoko de hiadono nia wowango waturuuruoka, gea ma ade-ade itagioka de naa iliokali ngomino abe ma dihira minidoto-dotokika.

¹⁰ De naga moioli ona yomaketeade-ade, de gea ma titi abe ngini duru de nia magaweoka niwidodamaa Ma Jou ai Ngofaka la Una woboali o Horogaka de wauku. De gea ai Ngofaka o Yesusu, abe Una Ma Jou wihimomiki ai honengino. De gea Una dika abe ahao wonaduhunu ngone nanga hohowonino abe ma oraha gea wahohowono abe onangika ko iwingaku-ngakua. De naa nia wowango ma ade-ade duru itararono, de o nyawa ko manga ngoe nia ade-ade gea yoihenoka. Ho ngomi naa duru mitarimakase Unangika ma titi abe hokokia wokarajaanga ti ngini nia wowangoka.