1 Tawari 29 - Ma Jou ai Demo-demo o Totobelohoka

O Isiraele ma nyawa manga hidoaka la yaduhunu de Ma Jou ai Tau ihigoko

¹ De ahao manga koano, o Dautu, una wahingahu ona mata-mataika abe yomatoomuino genangoka, wato, “Ahi ngofaka, o Saloomo naa, una Ma Jou wiiriki la ka idadi una wohigoko nanga Jou ai Tau ma rorahai masara una ka o goduuruohi de ai tobahioriki ka ikurangohi. De o karajaanga naa duru ma amoko angamoi o tau duru ma amoko de kiani gea ena duru irahai. De o tau naa abe ko o nyawaua yogogere genangoka, masara nanga Jou, Ma Jou o Yawe, abe Una Wokokurutiye wogogere ma goronaka.

² De ngohi tohidailakoka ma kiahonanga abe naa ma dekanino ngohi tatoomuino. Abe ahao kiani yodiai to Una ai tau ma kiahonanga irupa-rupaino, ho tatoomuinoka o gurasi de o haaka de o tabaaga de o behi de o gota. De gea mata-mata ka idadi yapake genangino la yodiai ma tau ma kiahonanga o kia dika abe yoperelu. De utuohi naga o hakaru ma leto-letongo de ma bunga-bungaka irupa-rupa abe duru ihali. De ena utu ma gogurati, de utu ma bihi-bihi, de utu ma doka-dokara, de o hakaru ma leto-letongo gea duru kohangoe. De o hakaru abe duru inouhu de ma bunga-bungaka ma rorahai enangoo naga tohidailakoka kohangoe.

³ Hokogea ngohi tohidailakoka ma kiahonanga kohangoe abe yapake yodiai Ma Jou ai Tau. De angamoi duru ahi igo ilamoko ahi Jou ai Tauika ho ngohi tohidoakoo abe to ngohi ma hirete ahi gurasi de ahi haaka la enangoo yapake.

⁴ Abe ngohi tohidoakoka o gurasi ngade-ngade o kilo o sana o ratuhu moi abe ka enangohi o gurasi ma dutu. De to ngohi ahi haaka ngade-ngade o kilo o sana o ratuhu hinooto de moruata tohidoakoka. Ho ma gurasi de ma haaka gea ahao yapake la gea idadi ma dadaduhu ma lape.

⁵ Abe o gurasi de o haaka ona dika ka idadi yapake abe yososawaro yotutuku ialu-aluhu de yodimo-dimo. Naa, ngohi hokogea tohidoaka ho, irahai ti nginioo nia kiahonangino nimahidiai nia hidoaka Ma Jou ai Tau ma karajaangika. Ho iti o wange naa ngini abe de nia hininga ma igoka de aino niato nia dora ma hidoaka de gea ena niatingaka Ma Jou o Yaweika.” Hokogea manga koano o Dautu wahigaro ona mata-mataika.

⁶ De ahao naga manga ngoe yaduhunu de manga hidoaka abe naga o Isiraele manga fam ma hidimono homoi-homoiika manga hidoaka ihidiai, de hokogenangoo o Isiraele ma nyawa manga dutu yangimoi de yahinooto to onangoo manga hidimono yosanangi o Dautu ai higaroika. De ona abe yahihira manga tentara, de ona abe yahiaturu o koano de ai ngofa-ngofaka manga redi-redi de manga aewani ma duduono, ona mata-mataika yomahingahu ato, “Hokogea to ngomioo mia hininga la mia hidoaka naga Ma Jou ai Tau ma karajaangika de mia dora ma hidoaka miatingakoka ka Ma Jouika.”

⁷ De ona yagoungu abe manga hidoaka onangino duru ma ngoe de abe ma oraha yatoomuino de hokonaa yahidoaka manga kiahonanga. Naga o gurasi o kilo o sana o ratuhu moi de morihiwo, de o haaka gea o kilo o sana o ratuhu hange de moritufange, de o tabaaga abe ihikasapuroka de o hori o kilo o sana o ratuhu butaanga de moritumidi de motoa, de o behi o kilo o juta hange de o sana o ratuhu butaanga de moritumidi de motoa.

⁸ De ona abe naga manga hidoaka abe o hakaru duru ileto-letongo ihali de gea iwihidoaka womatengoika ai romanga o Jehiele abe una o Lewi ma dutuino abe o Gerosomo ma doomuoka. Una watagongo Ma Jou ai Tauoka abe ma kiahonanga o kia dika naga abe duru ihali-hali de gea mata-mata ma dogogono ma ngi una watagongo, ho manga hidoaka o hakaru ma leto-letongo iwihidoaka unangika.

⁹ De o Isiraele ma nyawa manga hidoaka Ma Jou o Yaweika gea duru ihititi manga garagoka de aino. Ona ka de yoihene abe ma titi manga hidoaka hokogea ma amoko de ma ngoe de duru yososanangi de manga higiriiri duru ilamoko. De manga koano o Dautu unangoo ai higiriiri duru ilamoko abe wodogarago ai nyawa manga hininga ma dumutu Ma Jouika.

O Dautu womaniata de ai higiriiri Ma Jouiye

¹⁰ De o Dautu duru wihigiriiri Ma Jou o Yaweika ka hiadono ona mata-mata yoihene abe yomatoomuino genangoka, de hokonaa ai higiriiri ma demo, wato, “Mia Jou, ngomi mata-mata mia higiriiri mihiboa Ngonaiye, Ngona Ma Jou o Yawe, abe Ngona mia tofora o Isiraele, to una ai Jou, De ngaro o nyawa manga higiriiri ihiboa Ngonaiye ka hiado-adonika.

¹¹ O bobuturungu de o kuaha Ngona ma dutu mata-mataika, De o medebini ma dararono, de o gogere abe duru kohagurutiye, De o Horoga ma hohailoa ena mata-mata ihititi Ngonaka, Mata-mata abe naga o Horogaka de o duniaka gea ka to Ngona. Ngaro o koano abe wahikoano o Isiraele ma nyawa masara, O koano ma kuaha gea duru ka Ngonaka abe ani giama ma hoatoka, Ngona mia Baluhu idodutu ho duru itiai abe ngomi o nyawa mata-mata minigorakiye.

¹² De o kiahonanga de o tiwi abe o nyawa yomadoomuino, De ena gea ihikaya, de ona duru yoigo o horomati yamake o nyawaino, Masara manga kaya de manga horomati enangoo iboa Ngonaka dika de aino. Ko moiua la Ngona ko naparetaua, De to Ngona ani giamoka naga o kuaha de o buturungu, De ngaro onagona dika abe Ngona nairiki la nato nagoraka, Ka idadi Ngona nahiputurungu de o kuaha nahidoaka onangika.

¹³ De ma titi gea ena ho ngomi mata-mata mitarimakase Ngonaika, De ani romanga duru ikurutiye de ihohailoa, Ho to Ngona ani romanga miagorakiye de minihigiriiri Ngonaika.

¹⁴ Abe ma kiahonanga nenanga miatoomuino o wange naa, Ena gea ngomi miato mata-mata to ngomi mia hidoakino, Masara ena gea mata-mata ka Ngonaka dika de aino, Ho naa mihigilio Ngonaikali, abe Ngona ihira nomihidoaka ngomino.

¹⁵ Ngomi migogere nenangoka hoka o homoaino ma nyawa, To ngomi mia totofora hokogea, de ngomioo hoka onangoli, Abe ngaro o kiaka dika migogere o dunia ma lokuoka, To ngomi mia wowango hoka o gurumini dika ma dekana, Abe ka itodokanino idadi, de ko itedekanua de ihihangoka. Mia wowango o duniaka ufa mionganono abe ahao ko iwa ma baha.

¹⁶ Ho mia Jou, Ma Jou o Yawe, mimahingahu Ngonaika, Ma kiahonanga naa Ngonaika dika ma dumutu mimahuba-huba, Abe ma titi to Ngona ani Tau hiadono ngomi miatoomuinoka, Masara nenanga miamake ka Ngonaka dika de aino mata-mata. Ho migahoko Ngonaika miato napake la ihiboa o higiriiri Ngonaiye.

¹⁷ De ahi Jou ngohi naa tohioriki o nyawa manga hininga natailako, Ngona nakokitailako abe to ngomi mia hininga mata-mataika, de nohioriki nako naga itiai abe midiai, De Ngona minihisanangi abe ma oraha mia wowango miao itiai. Ngohi de ahi garago tohidoaka ma kiahonanga naa abe ani himangoka, Ngohi de ahi hininga tagou-goungu tohidoaka ani tauika, Abe ona yomatoomuinoka nenangoka to Ngona ani nyawa mata-mata, De onangoo duru yososanangi dika yomahidoaka Ngonaika, De duru ngohioo togarago tamake to ona manga hidoaka naa.

¹⁸ Ma Jou o Yawe abe to ngomi mia totofora yomahijou Ngonaika, O Abarahaama, de o Isaka, de o Yakubu to ona manga Jou, Ngonaika tagahoko la ani nyawa naduhunu manga hiningaka, La ona homoi-homoiika ka ihikaika yoigo inileleani ka Ngonaika dika. Ngona nodiai la ka ihikaika naga manga igo la inihingounu Ngonaika.

¹⁹ De ahi ngofaka naa o Saloomo una tigahoko la unangoo niduhunu, To unangoo kiani naga ai igo la wonileleani de ai hininga ma gahumu. Ka ihikaika o Saloomo niduhunu la una woigo wonihingounu, La una duru waniiki itiai ani behehongo, de ani pareta, de ani hiaturu. Una duru tigahoko la niduhunu wohigoko to Ngona ani Tau, Abe hoka ngohi naa ma dekanino nohiduhunu de ani Tau ma hidiai. Ho genangika dika aika ahi gogahoko Ngonaika ahi Jou.”

²⁰ De hokogea o Dautu womaniata ibooto de ahao ona wahigaro mata-mataika genangoka wato, “Ngini ma oraha naa kiani duru niwihigiriiri ti ngini nia Jou, Ma Jou o Yawe!” Ho ona mata-mata de manga ilingi ihiboakiye manga higiriiri Ma Jou o Yaweika, abe Una manga totofora manga Jou. De onangoo yatilabukuku de yomaponuku ka hiadono manga pea itiki ma tonakuku la ihitunguu manga horomati ilamoko Ma Jou o Yaweika de manga koanoikaoo manga horomati.

O Saloomo iwihitunguu wodadioka o Isiraele ma nyawa manga koano

²¹ De ma dawangeino manga huhuba duru iwoe abe yomahihuba Ma Jou o Yaweika de naga manga huhuba iharo-harongo kohangoe. Abe ma aewani yahihuba iharo-harongo o hapi ma nauru ibaluhoka o dutu o sana moi, de o domba ma nauru ibaluhoka enangoo o dutu o sana moi, de nagali o domba ma nauru ma goohi enangoo o dutu o sana moi. De naga manga huhuba o ngokerino, de o huhuba utu duru ma ngoe. De o Isiraele ma nyawa manga huhuba mata-mata gea yahihuba manga Jouika.

²² De ona mata-mata duru manga garago ilamoko ma oraha yorame-rame de yolomo de yokere. De ona ahao yodiai o Saloomo ai dodunguu ma titi una iwihidadioka manga koano de naa ma hinooto ibooto yodiai abe ma dihiraino de iwihitunguuokau la wodadi manga koano. Ho naa Ma Jou o Yawe ai himangoka o minya yaleino de iwihituagi o Saloomo ai mumukuku hiadono yoduguihi ai badanguku la iwihitunguu wodadioka manga koano. De iwihitunguu ipaha de ahao naga womatengo ai romanga o Sadoko unangoo hokogea yodiai unangika la iwihitunguu abe wodadioka manga hidemo womatengo Ma Jouika.

²³ Ho o Saloomo wogogeruku o koano ma kaderaka de ai baba o Dautu wituruuru. De una duru woutumu abe ma titi gea mata-mata wodiai de idadi irahai. De o Isiraele ma nyawa mata-mataika iwihingounu itiai.

²⁴ De o Dautu ai duduhunu abe ai popareta ma nyawa mata-mata de o nau-nauru abe duru iwidodiawo de yoputurungu de yososawaro o poparangioka onangoo yomahibehehongo ato, “Ngomi mia koano o Saloomo wiwileleani abe imaketero hoka ai baba o Dautoli wiwileleani.” De o Dautu ai ngofa-ngofaka o nau-nauru mata-mataika onangoo iwihibehehongo manga hingounu o Saloomoika.

²⁵ De Ma Jou o Yawe ahao o Saloomo duru wigorakiye hiadono una duru wokokurutiye o Isiraele ma nyawa manga himangoka. Abe nako manga koano o Dautu de manga koano o Saloomo o Isiraele ma nyawa manga horomati utuohi ilamoko o Saloomoika. De nako o Dautu de o Saloomo hohidotelega de ma titi manga kiahonanga utuohi ilamoko Ma Jou wihidoaka o Saloomoika.

Manga koano o Dautu ahao wohonenge

²⁶ Ho naa ma dekanino o Dautu, abe ai baba o Isai, wahikoano o Isiraele ma nyawa mata-mataika.

²⁷ De una wahikoano onangika ai taongo moruatino ma dekana. Abe ai kaderaka wogogere o taongo tumidi o Heborono ma kotaka de ahao o Yerusaleeme ma kotaikali una womaturuuru ho genangokali wogogere ai taongo moruange de hangeino ma dekana.

²⁸ De ma oraha una wohonenge una duru iwiperekioka de ai sanangi nagahi abe ai wowango ma dekanino de naga ai utumu. De una wokaya de o kiahonanga, de nagali o nyawa manga horomati duru itagi ma amoko unangika. Ho wopahaka de ahao ai ngofaka o Saloomo wituruuru ho unangoli wokoano.