1 Tawari 28 - Ma Jou ai Demo-demo o Totobelohoka

O Dautu ai behehongo ma baha abe Ma Jou ai Tau ma karajaanga

¹ De ma oraha o Dautu duru iwiperekioka de una wahoko o Isiraele ma nyawa manga hohidimono mata-mataika ma moioli la yoboa o Yerusaleeme ma kotaino. Ho ona abe kiani yoboa yomatoomuino gea o Isiraele ma nyawa manga dutu homoi-homoiika manga haeke, de onangoo abe yahihira manga tentara manga doomu abe o doomu ngimoi de hinootoino gea. De nagali o tentara manga dimo-dimono abe yahihira manga regu yasana amomoi de abe onangoo yahihira manga regu yaratuhu amomoi, ona mata-mata gea kiani yokokiboa. De onangoo kiani yoboa abe manga karajaanga yahiaturu o koano ai gogilaongo de yahiaturoo ona abe yapaliara o Dautu de ai ngofa-ngofaka manga redi-redi de manga aewani ma duduono. De onangoo kiani yoboa abe o koano ai datekoka iwiduhunu de ona abe yahiaturu ai gogilaongo abe yokarajaanga o koano ai tauoka. De nagali kiani yoboa o nau-nauru abe duru iwidodiawo o Dautika de ona gea wagorakiye ma titi duru yoputurungu de yososawaro abe iwiduhunu ma dihiraino o poparangi ma goronaka. De ai tentara abe duru ihioriki ma dodagi yoparangi onangoo o Dautu wohiaturu la yokokiboa. Iti abe ona de manga kuahaka o Dautu ai kokawaaha yahihira de una wato kiani ona mata-mata naga ai himangoka o Yerusaleeme ma kotaka. Ho ona o Isiraele ma nyawa manga haeke mata-mata abe ona duru ko manga ngoe kiani yokokiboa manga koanoino de yomatoomuino ai himangoka.

² De ahao manga koano o Dautu una womaokoiye de wahingahu ona mata-mataika, wato, “Ahi popareta de ahi gogianongoru, naa ngohi togahoko la ngini mata-mata nitotoihene. Naa ma dekanoka ahi hininga ma hidee la o tau moi todiai duru ma rorahai abe ka idadi Ma Jou o Yawe ai Behehongo ma Peti igogere doka ma goronaka. Abe ena gea imaketero hoka Ma Jou ai lou ma dederu doka ai tau ma goronaka, de gea ma titi ka ihikaika Una wosanangi wogogere ai ngioka gea. Ho ngohi ma dekanino naa ahi hidiai ma ngoe la ngone ka idadi hodiai Ma Jou ai Tau gea.

³ Masara nanga Jou Una wohihingahu ngohino wato, ‘Ngona, Dautu, ko tonihigunoaua ngona o tau nodiai abe genangoka ahi romanga o nyawa ka ihikaika yagorakiye. De angamoi ngona ma dihiraino notobaparangi hiadono o nyawa manga ngoe manga awunu nakopoaka.’ Hokogea Ma Jou ai hingahu ngohino.”

⁴ “De Ma Jou o Yawe gea wagoungu abe ngohi hokogea todiaioka, masara abeika, ngaro hokogea ngohi, ma Una wohiiriki ngohi abe ahi baba ai tau ma goronaka ma nyawa mata-mataino. De Ma Jou ka ngohi dika wohiiriki la ngohi de ahi totoforauku womihidadi o Isiraele ma nyawa manga koano ka hiado-adonika. Abe ma dihira nanga tofora o Isiraele ai ngofaka o Yehuda Ma Jou wigorakiye de wihidadi ai nyawa manga hihira de ahao o Yehuda ma dutuino gea ahi baba o Isai wiiriki. De ipaha o Isai ai ngofa-ngofakino Una wohisanangi ngohino ho hiadono wohiiriki la wohihidoaka ngohino o koano ma kuaha ai nyawa o Isiraele ma nyawaika de wohihibehehongo o koano ma kuaha gea ka ihikaika wohidagi ka hiado-adonika.

⁵ De Ma Jou o Yawe wohihiowa de o ngofaka o nau-nauru ko manga ngoe de onangino wiiriki ahi ngofaka o Saloomo la una wohituruuru. Ho o Isiraele ma nyawa, abe Ma Jou o Yawe wonahikoano ngoneino, ngone mata-mata ahao o Saloomo ai kuahaka abe una Ma Jou wiirikoka la wogogere o Isiraele ma nyawa nanga koano ma kaderaka.

⁶ Abe Ma Jou wohihingahu ngohino, wato, ‘Ani ngofaka o Saloomo una ahao wodiai to Ngohi ahi tau de naga de ma loa-loaka. De mangale ma titi una gea tiirikoka la wodadi to Ngohi ahi ngofaka de Ngohi todadi to una ai baba.

⁷ De una o koano abe ai kuaha Ngohi Ma Jou tohidagi ahi nyawaika ka hiado-adonika iti una ka ihikaika de ai hininga ma gahumu waniiki ahi pareta de ahi behehongo ma hiaturu mata-mataika imaketero abe hoka ma oraha naa ena mata-mata waniiki itiai.’ Hokogea Ma Jou wotemo abe wonahidoaka ai behehongo de ai pareta ma hiaturu ma owa ngone o Isiraele ma nyawaino.”

⁸ “Ho naa ngini ahi kokawaaha ngohi tinihibehehongo Ma Jou o Yawe ai himangoka de ti ngini nia hihira manga himangoka, abe ona inihiwakili ngini mata-mataika onangoo naga yomatoomuino nenangoka. Ho ngini mata-mata duru nitotoihene ahi behehongo ma demo naa. Ngini o Isiraele ma nyawa duru tinihibehehongo ngini kiani niwihingounu Ma Jou o Yawe ka hiadono ai behehongo de ai pareta ma hiaturu abe wonahidoakoka ngoneino kiani ena gea ngini mata-mataika nihidodiai nianiiki. Kiani hokogea nia hingounu Unangika la ka idadi nanga totoforauku ka imahikauku yogogere o tonaka ma rorahaioka naa ka hiado-adonika.” Hokogea manga koano o Dautu ai hingahu ona mata-mataika abe wahitoomuino genangoka.

⁹ De ahao nagali ai demo ma dumutu o Saloomoika wato, “De naa ahi behehongo ngonaika ahi ngofaka o Saloomo, tonihibehehongo la ani baba ai Jou to Una ai hininga kiani nohitihira abe mata-mata nodiai. De nileleani Ma Jou de to ngona ani hininga ma gahumu de ka ihikaika nomahidiaioka nodafongo mata-mata abe Una wonihidumutu ngonaika. De angamoi Ma Jou o Yawe watailako mata-mata o nyawa manga kokihiningaika de ngaro manga hininga ma dumutu ma genangoo mata-mata wohiorikoka. De ufa hafikiri abe ngone ka idadi Ma Jou hibudi. De nako duru de nanga hininga ma gahumu de nanga jiwa ma gahumu hilingiri to ngone nanga Jou de ahao ai mau hamake ngoneino. Masara nako hinoaika de hiadono hiolukoka de igoungu, Una ahao wonaoluku ngone ka hiado-adonika.

¹⁰ Ho ngona ahi ngofaka o Saloomo abe ngona ma oraha naa nomulaenge abe Ma Jou ai Tau nodiai de kiani duru nomahisosoika Ma Jou o Yaweika abe Una woniiriki ngona la to Una ai Tau gea nohigoko. Ahi ngofaka, nomahiputurungu nokarajaanga de ani magawe!” Hokogea o Dautu ai behehongo ai ngofaka o Saloomoika.

¹¹ De ahao o Dautu wihidoaka o Saloomoika Ma Jou ai Tau ma gambara mata-mata abe yahitararono ma rupa de hokokia abe ahao yodiai. Abe naga Ma Jou ai Tau ma gambara abe ma tau ka genangohi duru ikurutiye to Una ai himangoka. De nagali ma gambara abe ma titi ma tau utuoli imakokadateke genangoka, de ma punga-punga abe enangoo ihigilolitino de ma dadaduhu gea. De naga o kiahonanga ma dogogono ma ngi enangoo wogambara de hokokia yodiai ai tau ma hononga dakuiye idateke hiadono mata-mata ingodumu ma hidee ma gambaroka. De nagaoo ma gambara abe hokokia ma goronaka yokokabatingi la idadi to ena ma kamara mata-mata. De nagaoo ma gambara abe yahitararono hokokia kiani o ngi ma debi-debini Ma Jou ai Tau ma goronaka yokabatingi de o ngoere ma biri-birini la idadi o ngi hinooto. De o ngi moi abe ahao kiani yodiai la idadi Ma Jou ai Ngi Kohamedebini abe genangoka yakelenga Ma Jou ai Behehongo ma Peti. De Ma Jou ai peti to ena ma dadamunu o Hikadame ma Ngi abe genangoka o nyawa manga howono ihitamunu.

¹² Ho mata-mata abe Ma Jou o Womaha wohiboa o Dautu ai hiningaika gea wodiai ai hidee ma gambara. Abe Ma Jou o Yawe ai Tau ma loa homoi-homoiika, de ma kamara homoi-homoiika, de o huhuba ma tiwi ma ngi de o huhuba ma hidoaka ma hali-hali ma dogogono ma ngi-ngi enangoo ingodumu ma gambaroka. De naga enangoo ma ngi-ngi abe ahao o kiahonanga abe iwidingakoka Ma Jouika yagogono enangoo o Dautu wodiai ma hidee ma gambara. De gea ma gambara mata-mata wihidoaka o Saloomoika o Isiraele ma nyawa manga hihira manga doomu ma himangoka.

¹³ De ahao wihidoakoo o Saloomoika o hiaturu ma buku abe naga ma titi o Lewi ma nyawa manga leleani ma karajaanga ma hiaturu ihitulihuku ma bukuoka gea. De nagali manga hidemo Ma Jou o Yaweika to onangoo manga leleani ma karajaanga ma hiaturu genangoka. Abe o buku ma goronaka gea naga ma hitararono hiadono to ona gea manga regu-regu ma hiaturu abe enangoo ma dihira ihitulihukuoka o bukuoka. De nagaoo ma hitararono abe hokokia ma rupa de hokokia yodiai Ma Jou ai Tau ma kiahonanga mata-mata abe yapake manga leleani ma goronaka. Abe naga ma hitararono ma titi Ma Jou ai Tau ma kiahonanga mata-mataika abe hokokia kiani o Isiraele ma nyawa manga hidemo Ma Jouika ena gea yapake de yapaliara. De kiani ma hiaturu gea yaniiki itiai ma oraha o nyawa yoboaino la yomahuba-huba de ma oraha manga huhuba yahihuba Ma Jouika. O hiaturu ma hitararono ma buku mata-mata gea ka ma moi o Dautu wihidoaka o Saloomoika.

¹⁴ De utu abe enangoo o Dautu wihidoaka naga ma hiaturu abe hokokia ma dubuho o gurasi ma dutu abe yapake yodiai ma kiahonanga abe kiani o gurasino. De imaketero hokogea to ena ma hiaturu abe naga hokokia ena ma dubuho o haaka ma dutu kiani yapake yodiai ma kiahonanga abe kiani o haakaino yodiai. Ho ma hiaturu ena mata-mata ihitulihukuoka de iwihidoaka o Saloomoika.

¹⁹ De o Dautu wotemo wato, “O buku mata-mata naa ngohi totulihukuoka duru imakadaene de gea abe Ma Jou o Yawe wohihimatoko ngohino, de wohihiakunu la to ena ma dulihi duru Unangoka de aino. Una wohiduhunu la hiadono ngohi tomangaratii ai hidee ka hiadono ma titi abe duru ma alu-aluhu mata-mataika la ufa hiadono naga ngona nodiai ihowono.”

²⁰ De ahao o Dautu wohigalioli wihingahu ai ngofaka o Saloomoika, wato, “Ahi ngofaka, kiani nomahiputurungu de duru nototomoroini! De ngaro ufa ngona nohawana ngaro o kia naga ahao idadi de ufa ani huha ilaku hiadono ani hininga ietekoka angamoi Ma Jou o Yawe, abe to ngohi ahi Jou, Una ka ihikaika naga ngonaka. Una ko wonihigunoaua la ngona nokala o karajaanga ma amoko naa ma goronaka. Una woniniiki de woniduhunu ka hiadono ani karajaanga naa nabootoka abe ma titi Ma Jou o Yawe ai Tau nodiai. De Ma Jou wonihisawaro la nahiaturu itiai ona iwitobaleleani manga leleani ma dodagi.

²¹ De nanga hidemo Ma Jouika de manga duduhunu o Lewi ma nyawaino, ona mata-mata yomahidiaioka la ihidagi manga leleani ma karajaanga mata-mata abe to ona manga tagongo Ma Jou ai Tauoka yokarajaanga. De ahi ngofaka, naga o nau-nauru ko manga ngoe abe de manga hiakunoka la manga karajaanga ma alu-aluhu de ka hiadono manga karajaanga ma ago-agomo ka idadi yodiai. De onangoo gea yomahidiaioka yaniiki to ngona ani hiaturu mata-mataika. De nanga popareta ma nyawa de nanga hihira mata-mata nenangoka ona ahao ihingounu ani behehongo de ani huhulokika mata-mata onangika.” Hokogea o Dautu ai demo o Saloomoika.