1 Tawari 22 - Ma Jou ai Demo-demo o Totobelohoka

O Dautu ai hidiai la Ma Jou ai Tau yodiai o Yerusaleeme ma kotaka

¹ De ipaha o Isiraele ma nyawa manga koano o Dautu womaputuhu ma ngi o Yerusaleeme ma kota ma goronaka abe genangoka ahao ona ihigoko Ma Jou ai Tau. De o ngioka gea wahingahu ai nyawaika wato, “Nenanga ma ngi abe ahao hohigoko nanga Baluhu Ma Jou o Yawe ai Tau. Abe nenangoka ahao naga o huhuba iharo-harongo ma ngi la ngone o Isiraele ma nyawa ahao hapake la homahihuba nanga huhuba iharo-harongo.” Hokogea o Dautu womaputuhu ma ngi abe genangoka wohiaturu ona abe ihigoko Ma Jou ai Tau.

² Ho de ahao o Dautu wahuloko ai duduhunika la o homoa ma nyawa mata-mata abe yogogere o Isiraele ma tonakoka yatoomuino la wahikarajaanga de o hidiai ma karajaanga abe Ma Jou ai Tau ma kiahonanga ihidiai. Ho o homoaino ma nyawa gea yatoomuino ibooto de ahao ona yososawaro o hakaru yopawa ipopahagi la duru irikoto arihononga, ona wahikarajaanga la ma tau ma hakaru gea ona ihidiai. De ma hakaru gea ahao duru yofafo la ahao yodiai Ma Jou ai Tau ma lifunu de ma dadaduhu mata-mataika.

³ De ahao o Dautu wahidailako ona yotobakarajaangika de o behi kohangoe abe ka idadi yapake yodutuku o paku abe ahao yapake ma oraha yodiai o tau ma ngorana de o tau ma kiahonanga utu abe o gotaino. De wahidailako onangikaoo o tabaaga abe ihikasapuru de o hori, de gea ena ma ngoe hiadono o nyawa ko yakunua yakilo angamoi duru iwoeholi.

⁴ De naga o Dautu ai gota abe ma dobiki amomoi ma ago-agomo abe yafafoinoka ka hiadono o nyawa yokangela yaetongo. De gea o semara ma gota abe o Sidono de o Tirusu ma nyawa ma gurutoka de yaoino angamoi manga hidoaka o Dautika. De o gota gea abe duru ka enangohi iumuru de irahai, de una wosanangi wahidailako la yapake Ma Jou ai Tau yodiai.

⁵ De hokogea ma koano o Dautu ma dihiraino Ma Jou ai Tau ma kiahonanga duru kohangoe watoomuinoka la ma oraha ko wohonenguahi de duru ma hidiai ibooto. Abe una womatemo ai hiningaka, wato, “Ahi ngofaka o Saloomo ka o goduuruohi de ai tobahioriki ma titi o tau wodiai ka ikurangohi ho naa tiduhunu de ma hidiai nenanga. De Ma Jou o Yawe ai Tau ahi ngofaka o Saloomo ahao wohigoko kohaamoko de kiani duru irorahai. De ka onagona dika abe ma tau gea yamake de hiadono yoheranga angamoi duru ma hohailoa. Ho ona ahao to ena ma rorahai yoade-ade de manga higiriiri hiadono Ma Jou ai Tau to ena ma ade-ade itagi o tonaka mata-mataika. De ika-ika o nyawa mata-mataika ihioriki abe hokokia ma amoko de ma hohailoa hiadono yoheranga ho onangoo yoigo yoboaino la yamake abe ihohailoaholi. De mangale ma titi gea ngohi ma kiahonanga tohidiaiokahi de tatoomuino la ahao ahi ngofaka o Saloomo wapake ma oraha Ma Jou ai Tau wodiai.” Hokogea o Dautu ai hininga womahingahu.

⁶ De ahao o Dautu ai ngofaka o Saloomo wiahokino de wihibehehongo unangika la wohigoko o tau moi abe Ma Jou o Yawe, o Isiraele ma nyawa manga Jou, ka idadi wogogere ma goronaka.

⁷ De wihingahu unangika wato, “Ahi ngofaka, tomahingahu ngonaika ma titi Ma Jou ai Tau. Naa ma dekanoka ahi hininga ma hidee la o tau moi todiai duru irahai abe idadi to Una Ma Jou o Yawe ai Tau la hokogea ahi horomati ahi Jouika tohitunguu Unangika.

⁸ Masara ahao Ma Jou o Yawe wohihitararono ngohino, wato, ‘Ngona, Dautu, o nyawa ko manga ngoe natomaka ma oraha o poparangi ma goronaka. De angamoi duru manga awunu ilamoko nakopoa ahi himangoka ho hiadono ngona ko tonihigunoaua ahi tau nodiai abe gea idadi o horomati ma ngi to Ngohi ahi romangika.

⁹ Ma, abeika, ahao to ngona ani ngofaka o nauru womaboa abe una wodadi ani duruuru la wahikoano ahi nyawa de una tihiromanga o hikadame ma nyawa. Ngohi ka idadi unangika tihidoaka o hiaini o parangino angamoi una ahao wososawaro o nyawa wahikadame de wahiriidi. Ngohi Ma Jou tihiakunu hokogea la una winihikokadame de ona abe ko o Isiraele ma nyawaua abe ona yogogere o tonakoka abe inihigilolitino. De ma titi gea to una ai romanga o Saloomo angamoi unangika tihidoaka o dame ma hiaturu de o hiriidi abe ilaku o Isiraele ma tonaka mata-mataika ka hiadono ai wowango ma baha.

¹⁰ De una gea wohigoko ahi tau abe genangoka ahi romanga o nyawa ka ihikaika yagorakiye. Una wodadi to Ngohi ahi ngofaka de Ngohi todadi to una ai baba. De una o koano abe to una ai kuaha Ngohi tohidagi ka ihikaika ahi nyawaika. Abe tonihibehehongo tato to una ai kadera ma kuaha naga o Isiraele ma nyawaka ka hiado-adonika.’”

¹¹ “Hokogea Ma Jou wotemo ngohi ani babaino. Ho naa, Saloomo, ngohi tonigahoko la Ma Jou o Yawe Una ka ihikaika naga ngonaka la ka idadi Una wonihiakunu ma amoko ngonaika. Abe kiani Ma Jou o Yawe wonihihira ma oraha ai tau nodiai la duru itagi irahai ka hiadono nabooto. De hokogea ka idadi tonigahoko, ahi ngofaka, angamoi duru hokogea Ma Jou wohihibehehongoka wato ngona ahao woniduhunu.

¹² De duru honganono Ma Jou o Yawe wonihiakunu la duru nososawaro de ani mangaratii duru ilamoko. De ani hiakunu Unangino ngona ahao napake la ma oraha ngona nahipareta o Isiraele ma nyawa mata-mataika de ani tagongo gea nao itiai. La gea ngona duru naniiki Ma Jou o Yawe ai pareta ma behehongo itiai angamoi Una to ngona ani Jou.

¹³ De ngona duru noutumu abe nako nomahidodiai naniiki o pareta ma behehongo de o behehongo gea ma hiaturu mata-mata abe Ma Jou o Yawe wihidoaka o Musaika. De ngona nohioriki Ma Jou ai pareta wato kiani o Isiraele ma nyawa mata-mata yaniiki. Kiani ahi ngofaka duru nomahiputurungu de ani domoroini napake. Ngaro ufa ngona nohawana abe ahao o kia naga idadi de ufa ani hininga ma huha ilaku ka hiadono ani hininga ietekoka.” Hokogea o Dautu ai hiowa ma demo o Saloomoika.

¹⁴ De ahao o Dautu wihingahuoli abe ma titi Ma Jou ai Tau ma hidiai, wato, “De ahi ngofaka ma oraha naa kiani tonihingahuoo gea ma titi Ma Jou ai Tau ma hidiai de ma hiaturu abe ona yokarajaanga kiani yaniiki itiai. Ngohi ma dekanino naa tatoomuino o gurasi ma dutu hiadono naga abe ngade-ngade o kilo o juta hange ifoloioka, de nagali o haaka ma dutu o kilo o juta moruange ifoloi abe ka idadi enangoo gea napake. De naga utuohi iwoe hiadono ko idadiua hapoa hakilo o behi de o tabaaga abe ihikasapuroka de o hori ho ngaro hokokia noperelu ma ko namataua. De tohiaturu ma gota de ma hakaru abe ahao napake enangoo ma hidiai duru iwoe masara ngona marai ahao noperelu o hakaru de o gota utuohi iwoe.

¹⁵ Masara naga o nyawa de manga hiakunoka irupa-rupa duru yowoe abe ka idadi nahikarajaanga. Ona naga abe yososawaro o hakaru yopawa la idadi o pahagi iata de ona ka idadi nahikarajaangohi o hakaru yatobafai-faiti to ena ma ngioka o loku-lokuoka. De naga o nyawa utu abe yososawaro o tela yofafo de o bas abe yososawaro de o gota yodiai ma hapa irupa-rupa abe ona yotobadiai o tau. De onangoo naga abe manga hiakunu de manga sosawaro yotutuku itiai o gurasi, de o haaka, de o tabaaga abe ihikasapuroka de o hori. De yotutuku ibooto de ahao o nauru utu duru yososawaro yodimo-dimo de yorogi-rogi.

¹⁶ Ho ngaro o gurasi, eko o haaka, eko o behi, eko o tabaaga, ma, naga ona abe de manga hiakunu yodiai mata-mata abe ngona ahao noperelu. Ho naa, ahi ngofaka, adonoka ma oraha nomulaenge nokarajaanga de ma moioli tonigahoko la Ma Jou o Yawe ai Tau wonihiakunu nodiai. De igoungu, Una ka ihikaika naga ngonaka.” Hokogea o Dautu Ma Jou ai Tau ma hidee de ma karajaanga wohidoaka o Saloomoika.

¹⁷ De ahao o Isiraele ma nyawa manga hihira mata-mata o Dautu watoomuino de wahibehehongo ona mata-mataika la ai ngofaka o Saloomo iwiduhunu.

¹⁸ De waleha onangika wato, “Sarakia, nginioka ko iwiwa ti ngini nia Jou, Ma Jou o Yawe? Una winikokiniiki e? De sarakia, Una ko winihikokadameua de ona abe ko o Isiraele ma nyawaua abe ona yogogere o tonakoka abe inahigilolitino? Igoungu, Una duru wonahiriidoka ngone de ona. De ngini o Isiraele ma nyawa ma dimo-dimono, hokogea abe ahao idadi onangokaoo abe yogogere o tonaka mata-mata abe imakadateke de to ngone nanga tonaka, angamoi nanga Jou wahikokidoakoka ahi giamino o nyawa mata-mata gea. Ho ona mata-mata ka ma moi de manga tonaka yogogere Ma Jou o Yawe ai kuahaka. Ho ona gea to ngoneoo nanga kuahaka ma goronaka yogogere angamoi Ma Jou wonahidadi ngone o Isiraele ma nyawa to Una ai nyawa.

¹⁹ Ho gea ma titi Ma Jou o Yawe womalega ngoneino de ai hiokoo de ai dora hiadono duru wonaduhunu kohangoe. Ho ngini o Isiraele ma nyawa manga dimo-dimono kiani duru de nia hininga ma gahumu de nia jiwa ma gahumu niapaliara nia gogao ti ngini nia Jouika. De naa ko itedekanokaua de nimulaenge nihigoko Ma Jou o Yawe ai gogere ma ngi ma debi-debini. De ma oraha niabootoka de ahao ka idadi Ma Jou o Yawe ai Behehongo ma Peti nihingohama ai ngi duru ma debi-debinika. De genangoka niakelenga de ma kiahonanga abe Una ma hirete womadingakoka la ona abe iwileleani Ma Jou o Yawe ka idadi yapake la hiadono ngini mata-mata to Una ai romanga niagorakiye.” Hokogea o Dautu ai behehongo o Saloomoika de ai popareta ma dimo-dimonika onangoo yoihene.