1 Samuele 9 - Ma Jou ai Demo-demo o Totobelohoka

O Samuele de o Saulu yomakamake

¹ Naga o Isiraele ma nyawa womatengo abe womahidutu o Benyamini ma dutuika ai romanga o Kisi de una wokaya abe ai kiahonanga ma ngoe de una de ai kuahaka. O Kisi ai baba o Abiele, de ai ete o Sero, de ona mata-mata o fam Bekora abe o Afia ma doomuino o Benyamini ma dutuoka.

² De o Kisi ai ngofaka ai romanga o Saulu abe ngaro o Isiraele ma nau-nauru mata-mataika ma, ka unangohi worahai de una wokurutiye hiadono nako o Isiraele ma nau-nauru mata-mataika yahikutuga de ka o Saulohi wofoloiiye o buhaanga moi de ma hononga.

³ De o wange moiuku o Kisi ai keledai muruono naga ihihanga de o Kisi wihuloko o Saulika wato, “Saulu, kiani ngona noiki nolingiri nanga keledai de irahai nanga duduhunu womatengo niahoko la una wonidodiawo.”

⁴ De o Saulu ai baba wihigihene ho una de manga duduhunu womatengo yosobo de o Efaraimi ma tonaka ma loku-lokuika yokokiloliti yaika yaino masara manga keledai ko yamakeua. De ahao yogila-gilaka yolingirohi hiadono o Salisa ma tonaka de o Salimi ma tonaka yaika yaino yolingiri. De ahao yomahiadono o Benyamini ma nyawa manga tonakika de genangokaoo yolingiri mata-mataika masara ngaro hokogea ma, ko yamakeuahi manga keledai abe ihihangoka gea.

⁵ De ma bahaika yowohama o Sufu ma tonakika masara manga keledai ko yamakeua genangokaoo ho o Saulu wotemo ai dodiawoika wato, “Marai holio dika angamoi hokonaa nanga dekana hiadono ahi baba nako nanga keledai de ngone, ka ngoneohi duru wonahininga wato done ngoneoo inahihangoka.”

⁶ Masara ai duduhunu gea wopaluhu wato, “Ahao naa ipuda ahi hiningaka abe tonganono naga womatengo wogogere nenangoka duru witobaleleani Ma Jou. De o nyawa mata-mata duru manga horomati ilamoko unangika angamoi ato bari mata-mata wotemo ma gou-goungu dika hiadono wato o kia dika ahao idadi, de igoungu, ahao idadi. Abeika una hilingiri. De marai una ka idadi wonahingahu o kiaika ma ngekomo la ka idadi nanga keledai hamake.” Hokogea ai dodiawo wihigaro o Saulika.

⁷ Masara o Saulu wopaluhu wato, “Marai ko idadiua angamoi ko iwa ngoneoka abe ka idadi hihidoaka unangika la una wonaduhunu. Abeika, ngaro nanga bilaono ma enangoo duru ko iwaka ho duru ma hohutuloo de ko iwa abe ka idadi hihidoaka unangika.”

⁸ De ai dodiawo wato, “Naga ngohioka o tiwi o se-senge moi ho sarakia ka idadi de gea ena dika wosanangi? Abeika hilingiri de hihidoaka ahi tiwi nenanga bote una ka idadi wonahidumutu nanga ngekomo abe kiani haniiki.”

^9-11 Ka de hokogea ai dodiawo wihigaro de o Saulu wopaluhu, wato, “Nako gea ka idadi! Abeika ngone hilingirohi!” Ho yogila-gila ma kotaika abe yamake naga o lokuoka abe manga himangoka. De ma oraha yodoa o lokuiye de yomakamake de o ngo-ngofeka abe o kotaino youti o akere yomahionoko o humuku dau. De yoleha o ngo-ngofekaika gea ato, “Ho sarakia nia kotaka naga una gea abe Ma Jou wihiakunu la una wotobahioriki abe ngaro naga moi ko idadiuahi masara una wohiorikoka ahao idadi?” Hokogea manga leleha angamoi ma dihira ona hokogea yahiromanga Ma Jou ai uru ma dodofanga.

¹² De ona yopaluhu ato, “Ngini nianiiki o ngekomo nena dika hiadono o kota ma ngoranika angamoi kangano dika una gea woboa genangino la nanga kota ma kokawaaha manga huhuba Ma Jouiye waniiki abe yodiai daku o lokuoka.

¹³ De kiani ngini nimataiti done ko niwidaenua angamoi itigioka ma oraha naga o ngolo-ngolomo o huhuba ma tauoka abe kiani una waniiki daku o lokuoka. Abe nako manga ngolo-ngolomo ma inomo una ko wahiowauahi de ona abe yahokino ko idadiuahi yaolomo manga huhuba ma inomo gea. Ho nako nimataiti una ko wodoauahi o huhuba ma tauiye de ka idadi nimakamake de una gea.” Hokogea manga higaro o Saulu de ai dodiawoika.

¹⁴ Ho ka de o Saulu de ai dodiawo yomahiadono o kota ma ngoranika de yomakamake de o Samuele genangoka angamoi ahao gea una o kotaino wohupu la ka idadi wodoa manga huhuba ma ngiiye.

¹⁵ De abe kanugonino de Ma Jou o Yawe wihingahuokau o Samuelika abe ahao hokonaa idadi, wato,

¹⁶ “Nako itebini o wange hokonaa de Ngohi ahao tihidingoto womatengo o Benyamini ma nyawa abe woboa manga tonakino la ngona de una nimakamake. De una gea ahao ngona napake o minya abe atingakoka Ngohino de nihituagi ai mumukuku la unangika nihitunguu abe Ngohi tiirikoka la ahao una wahihira-hira ahi nyawa o Isiraele ma nyawa. Una gea ahao ahi nyawa wahihupu o Filistina ma nyawa manga kuahaino angamoi Ngohi tomalega onanguku de ahi dora ma hiokoo de manga huha ma gari Ngohiye togihene ho una gea ahao tigoraka la wahihira-hira ahi nyawa.”

¹⁷ Ho ipahaino de o Samuele wimake o Saulu woboa unangino de Ma Jou o Yawe witemoli o Samuele ai hiningaika, wato, “Naa una abe kanugono tonihingahuoka tato una ahao wapareta ahi nyawa.”

¹⁸ Hokogea Ma Jou wotemo de o Saulu woboa o Samuele ai himangino o kota ma ngoranoka gea, de wileha, wato, “Ahi baluhu, nako ka idadi togahoko la ngona nohihingahu ngohino abe o kiaka to una ai tau abe una Ma Jou wihiakunu la una wotobahioriki abe ahao idadi?” Hokogea woleha o Samuelika.

¹⁹ De o Samuele wopaluhu, wato, “Ngohi naa abe ngini nihilingiri! Ho hokonaa kiani nidiai, ngini nihira nidoa o lokuiye nenanga hiadono o huhuba ma ngiika. Genangoka ngone holomo homakutuono de ahao kiani nimaidu nenangoka de itebini o ngorumino de ahao ngohi tinihigunoa la ngini nisobo. De ma oraha gea tinihingahu abe ma titi nilingiri la ka idadi tinihidumutu ma ngekomo abe kiani nianiiki.

²⁰ De ngaro ufa ngini nipusingi ma titi o keledai ma ngoe gea abe ihihangoka naa o wange hangeino ma dekana angamoi ma keledai gea ani baba ai nyawa yamakeoka. De ngona naga nenangoka nohitutumu la ka idadi tonihingahu abe ahao idadi ngonaika. Abe ngona de ani tau ahao nidadi o Isiraele ma nyawa manga nganganono.” Hokogea o Samuele wihingahuoka o Saulika.

²¹ De ahao o Saulu wopaluhu wato, “Masara, ahi baluhu, ngohi naa o Benyamini ma dutuino abe nako o Isiraele ma nyawa manga dutu ngimoi de hinootoino ka ngomiohi mia dutu mihutulu. De ngaro to ngohi ahi fam ma ka ngomiohi mia famoka mihutulu o Benyamini ma dutuino. Ho ngomi ko kia-kiaua o Isiraele ma nyawa manga himangoka, ho adodoa ho ngona nohihingahu hokonaa?” Hokogea o Saulu duru wopusingi o Samuele ai demoika.

²² De ahao o Saulu de ai dodiawo yohira daku o huhuba ma ngiiye yomahiadono ma, ka de o Samuele unangoo womahiadonoka genangiye de o Saulu de ai dodiawo wangotaka manga doomu ma tau ma amoko ma goronaika. De genangoka wahigila-gila ka hiadono o horomati ma kuruhiika de genangoka wahuloko yogogeruku. De nagaoo genangoka o nyawa yamoruange yahokino la yaniiki manga huhuba ma ngolo-ngolomo. Masara naa ngaro ona mata-mataino ma, o Saulu de ai dodiawohi yamake o ngi abe ka enangohi ihitunguu manga horomati onangika.

²³ De ahao o Samuele witemo unangika abe manga ngolo-ngolomo ma inomo wahakai wato, “Ma roehe duru ma rorahai gea abe kangano tonihidoaka tato ma roehe gea to una abe duru hihoromati, naa una abe wogogeruku ahi datekoka. Ho naa adonoka ma oraha ma roehe gea naoino de nakelenga o Saulu ai himangoka naa.” Hokogea o Samuele wohiaturu.

²⁴ Ho una abe wahakai ma roehe gea abe ka enangohi ma rorahai manga ngolo-ngolomoka waleino de wakelenga o Saulu ai himangoka. De o Samuele wihuloko o Saulika wato, “Naa ena duru to ngona dika ani inomo ho ngona naolomo dika! Abe ngona ko noboainouahi de nanga dodiawo utu abe naga nenangoka nanga ngolo-ngolomo yaniiki, ona ko tahokinouahi de ma roehe naa ngohi tairikokau de tonidingakokau ngonaika la ma oraha naa idadi to ngona ani inomo!” Hokogea o Samuele ai hingahu manga himangoka mata-mataika abe naga genangoka. Ho o wange gea o Saulu wolomo de o Samuele.

²⁵ De o ngolo-ngolomo gea ibooto de ahao yolio o kotauku de o Samuele wihidiai o Saulu ai ngingidu ma ngi daku o tau ma poretiye abe genangoka yomahidodogumu.

²⁶ De ma dawangeino ahao itawange de o Samuele wiahokoka o Sauliye wato, “Saulu nomomikoka! Naa adonoka kiani ngona nosobo.” Hokogea dika de o Saulu womataiti womahidiai de genangoka una de ai dodiawo yosobo yomakiniiki de o Samuele.

²⁷ De ahao yomahiadono o kota gea ma poretika de o Samuele witemo o Saulika wato, “Ani dodiawo gea nihuloko la una wohira.” Ho o Saulu ai duduhunu gea ai gurutikaka de ahao o Samuele wihingahu, wato, “Saulu, ngona tonitumungu nenangoka jai-jai angamoi naga o hingahu Ma Jouino abe ka ngonaika dika.” Hokogea o Samuele ai hingahu ma demo o Saulika.