1 Samuele 8 - Ma Jou ai Demo-demo o Totobelohoka

O Isiraele ma nyawa yomagahoko la onangoo naga manga koano

¹ De ma oraha o Samuele womulaenge iwipereki de ai ngofaka yahinooto wahidadi la onangoo yahihira o Isiraele ma nyawa hoka manga babali waleleani.

² De ai ngofaka o riaka ai romanga o Joele de una widatekuku ai romanga o Abia de ona naga manga ngi o Bereseba ma kotaka. De genangoka o nyawa manga howono yatailako de ona abe itaana yahowonoka gea onangoo ka idadi manga hohowono yaputuhu.

³ Masara o Joele de o Abia gea manga wowango ma datoro ko imakadaenua de hoka manga baba o Samuele ai wowango ma datoro. Ona yomatiwi-tiwi ma oraha o nyawa manga howono yatailako. Ho ona abe yahowono nako ko yomabangua gea manga hohowono itubuho ma nako yomabangu gea ona ko yahohowonua eko manga hohowono ma goguwini dika. Hokogea manga biaha hiadono o Joele de o Abia o hiaturu ma totiai ko yaniikua.

⁴ Ho ika-ika de o Isiraele ma nyawa manga dimo-dimono yomatoomuino o Rama ma kotaka la ka idadi ona de o Samuele yomakoketemo ma titi to una ai ngofaka manga karajaanga yao ko itiaiua.

⁵ Ho ma oraha yomatoomuino o Samueloka de iwihingahu, ato, “Mia baluhu, mimahilooa masara ngomi naa minimake abe ngona naa iniperekioka de ani ngofa-ngofaka manga hininga de manga karajaanga duru imakohowono de hoka ngona nomihihira. Ho ngomi naa miato adonoka ma oraha ngomi o Isiraele ma nyawaoo kiani naga womatengo womihikoano. Nako o tonaka utu mata-mataika de manga koanoka ho ngomioo mioigo hokogea. Ho naa mia baluhu mimagahoko la ngona nomihidoaka to ngona ani duruuru de o koano.” Hokogea manga hininga ma igo yomahingahu.

⁶ De ka de o Samuele woihene o Isiraele ma nyawa manga dimo-dimono manga gogahoko la wahidoaka onangika ai duruuru de o koano de duru ai hininga ihuha. Ho woiki womaniata Ma Jou o Yaweiye.

⁷ De Ma Jou o Yawe wihingahu o Samuelika wato, “Samuele, to ona manga gogahoko naniiki dika de nahidoaka o koano. De angamoi gea ko ngonaua abe inioluku masara ma titi Ngohioo naa ona ihiolukoka angamoi ona ko yoigokaua abe Ngohi Ma Jou dika tahikoano onangika.

⁸ Abeika, ka ma dodihirainohi abe ona gea tahihupu o Mesiiri ma tonakino de ona ka ihikaika ihiporetika la ka idadi yaniiki o jou ma homoa dika abe manga hininga adaene enangika. De ma oraha naa yodiai ngonaikali imaketero hoka ma dihiraino abe Ngohino yodiai.

⁹ Ho ka idadi naniiki dika manga gogahoko de nahidoaka onangika womatengo abe ahao una wodadi manga koano masara kiani nahitararonohi de o hitiari abe de ma buturungoka abe hokokia o koano ai hiaturu onangika ahao duru de ma dubuhoka. Kiani gea ena ma hingahu yoihenohi la yomafikirohi.” Hokogea Ma Jou o Yawe o Samuelika wihingahu abe kiani wahitiari o Isiraele ma nyawaika.

¹⁰ Ho o Samuele wihingounu Ma Jou o Yawe de wahitiari o dimo-dimonika gea abe yomagahoko la wahidoaka o Isiraele ma nyawaika womatengo abe wahikoano.

¹¹ De hokonaa ai hitiari ma demo abe wahingahu onangika, wato, “Nako adonoka ngini niamake nia koano de ahao ai hiaturu nginika hokonaa, ti ngini nia ngofaka o nau-nauru ahao wahokino wahidadi o tentara ngaro ona yoigo eko ko yoigoua ma kiani ona iwihingounu. De ona utu wahokino gea ahao wahikarajaanga yapaliara ai kuda ma ngoe de yapake ai kuda gea la yao-ao ai goroba parangi. De utu wahuloko la ai gogoroba parangi ma himangoka yomapopaata o parangi ma goronaka.

¹² De ona utu nia koano wahidadi ai tentara manga hae-haeke abe yahidimono o tentara yasana de utu naga abe yahidimonoli o tentara ma dodoomu amo-moritoaino. De nia ngofa-ngofaka o nauru utu wahidadi ai huhuloko abe duru ko idadiua yomahiaturu manga wowangoka. De ona nia koano wahikarajaanga ai redi-redioka ho yokangela o tonaka ma beha-behaka ihikokawalimi de ai redi ma hasili yaleino, de ona utu kiani o behi yotutuku yodiai ai dae kohangoe de ai goroba parangi ma kiahonanga.

¹³ De nia koano gea ti ngini nia ngofaka o ngo-ngofeka onangoo wale de wahikarajaanga ai tauoka la una de ai nyawa manga inomo yotobahohakai, de o roti de o kukisi yaharo-harongo. De ona utu kiani yokarajaanga yodiai ai minya ma bounu ma rahai.

¹⁴ De ti ngini nia redi abe ka enangohi ma rorahai gea ena abe nia koano wakokile ngaro nia gandumu ma redi, ngaro nia angguru ma redi, de ngaro nia saitunu ma redi masara nako duru ai hininga yadaene ma tonakika gea de ka womale dika la ka idadi wahikodoku to una ai duduhunu ma doomuika.

¹⁵ De hokogea de ti ngini nia redi ma hasili mata-mataino ho ngaro nia gandumu de ngaro nia angguru ma hofoko ma, womale o hidoku moi abe imaketero hoka nia redi ma hasili niaregu ngimoi de o regu moi nia koano womale ho o redi ma dutu una wamake o regu hiwo. De gea abe o koano womale ahao wahikodoku onangika abe iwileleani, de onangika abe yahihira ai popareta ma nyawa de yahiaturu o nyawa utu manga ngoe abe yokarajaanga unangoka.

¹⁶ De ti nginioo nia huhuloko de nia duduhunu ma nyawa ahao onangoo nia koano womagahoko la yodadi to unangoli ai huhuloko. De hokogenangoli de ti ngini nia hapi de nia keledai enangoo womahitouna.

¹⁷ De nia koano gea winihulokoo la ti ngini nia aewani enangoo kiani niwihidoaka hiadono womale o regu amomoiika nia aewani ma duduonino ho o aewani ma dutu wamake o regu hiwo. Hokogea ngini ai kokawaaha mata-mataika nidadi imaketero hoka ti ngini nia koano ai huhuloko dika.

¹⁸ Ho o koano gea abe ngini naa nimagahoko ahao duru winihikangela ma ngoe. De ma oraha ma kangela abe tinihingahuoka naa ahao idadioka hiadono ngini niakokimakeokau de gea ngini ahao niboali ngohino. Abe niamao nia koano winihitubuho nginika de ahao nimagahoko, niato, ‘Samuele, kiani nomigahokoli Ma Jou o Yaweika la Una wohiuwini mia kangela mia koanoino.’ Hokogea ahao nikurubungu ngohino masara Una nia gogahokika gea ko winihigihenokaua.” Hokogea o Samuele wahitiari o Isiraele ma nyawa manga dimo-dimonika.

¹⁹ Masara ona yoluku o Samuele ai hitiari ma demo ihigihene de manga gogahoko ka imaketero dika unangika ato, “Ngaro hokogea ahao idadi masara ngomi mia hininga ko miaturuurua, kiani ngone o Isiraele ma nyawa naga to ngone nanga koano la ngone mata-mataika wonahikoano nanga tonakoka naa.

²⁰ Abe nako ngone ma oraha naa hato adonoka ma oraha ngone o Isiraele ma nyawa hodadi hoka o nyawa utu abe yomahikoano manga koanoika. To ngone nanga koano dika ahao wonapareta de wonahihira-hira o parangioka.” Hokogea manga mau ihigalioli iwihingahu o Samuelika.

²¹ Ho o Samuele woihene ibooto manga demo mata-mata gea de ahao womaniata de to ona manga demo gea wohigalioli Ma Jou o Yaweika.

²² De Ma Jou o Yawe wopaluhu wato, “Ngona naniiki dika to ona manga hininga de nahidoaka onangika manga koano abe hoka yomagahokoka ngonaika.” Ho o Samuele wihingounu Ma Jou de wahingahu o Isiraele manga dimo-dimono, wato, “Ngohi tokokiihenoka nia demo ho ngaro nikokilio nia tau homoi-homoiika.” Hokogea ma ade-ade abe ma oraha o Isiraele ma nyawa yoluku Ma Jou wahikoano iti naga o nyawa womatengo abe ka idadi ona yomahikoano unangika.