1 Samuele 7 - Ma Jou ai Demo-demo o Totobelohoka

Ma Jou o Yawe ai Behehongo ma Peti yao o Kiriata-Jeari ma kotaika

¹ Ho o Bete-Semese manga gogahoko ka de yoihene de naga o Kiriata-Jeari ma nyawa yoiki yale Ma Jou o Yawe ai Behehongo ma Peti. De yao o Abinadaba ai tauika abe naga o loku ma geleforino o kotaka gea de to una ai tau ma goronaka yakelenga. De naga o Abinadaba ai ngofaka womatengo ai romanga o Eleasara de una ahao iwitingaka Ma Jouika de iwihitagongo la una Ma Jou ai Peti gea wogoana de wopaliara.

² De duru ma dekana Ma Jou ai Peti imanoa o Abinadaba ai tau ma goronaka o Kiriata-Jeari ma kotaka. De ma oraha gea o Isiraele ma nyawa duru de manga hininga ma huha yaomanga hiadono ihigari-gari. De manga huha ilamoko o taongo monaoko ma dekanino angamoi hokogea ma dekana yamao hoka Ma Jou o Yawe wahidogunoaika manga kangela ma goronaka.

O Samuele wahihira o Isiraele ma nyawa la manga lolaku yamake

³ De o taongo monaoko gea ipahaika de ahao o Samuele Ma Jou wipake la wodadi ai uru ma dodofanga. Ho Ma Jou ai hingahu o Samuele wadofanga o Isiraele ma nyawa mata-mataika, wato, “Ngini o Isiraele ma nyawa nako duru de nia hininga ma gahumu niagou-goungu nioigo nilioli Ma Jou o Yaweika la niwiniikoli, ka idadi. De hokonaa ma ngekomo, ihira nia popangao mata-mata abe niamake o homoa ma nyawaino, hiadono nimahuba-huba enangika, ibootohi ngini nimahuba-huba enangika. Ho ma oraha naa ngini kiani ena mata-mata nihikokibinaaha hiadono ko moiokaua naga nia hidogoronaka nia popangao. De ngaro o ngo Asitorete ma liate ma enangoo kiani niatolanga ka hiadono duru ko iwaka nia tonakoka. Kiani ngini nimaputuhu, niato nimahuba-huba duru Ma Jou o Yaweika dika de niwihingounu. Ka de hokogea nidiai ibooto de ahao Una winihihupu o Filistina ma nyawa manga kuahaino.” Hokogea o Samuele ai higaro ma demo o Isiraele ma nyawa mata-mataika.

⁴ Ho o Isiraele ma nyawa o Samuele iwihigihene de manga popangao ma rupa o Baala de o ngo Asitorete ihikokibinaahaka de yomahuba-huba Ma Jou o Yaweika dika ho manga leleani ka Unangika dika.

⁵ De ahao manga hihira o Samuele naga ai hingahu moioli o Isiraele ma nyawa mata-mataika wato, “Naa ahi gogianongoru, tiniahoko ngini mata-mataika la nikokiboa o Misapa ma kotaika. De ngohi genangoka ahao tinihidemo Ma Jou o Yaweika.”

⁶ De ona o Samuele iwihigihene ho duru ko manga ngoe yokokiboa o Misapa ma kotaino de genangoka yomatoomuino la yodiai o huhuba duru ma amoko. De manga huhubaino gea de ona ihitunguu Ma Jou o Yaweika manga toduba. Ho yomagui-guiti o akere o humuino de ma akere gea yakopoa Ma Jou o Yawe ai himangoka. De o wange moi ma gahumu duru ko yolo-olomua bowahu ka yomangaku dika manga howo-howono abe Ma Jou o Yaweika. De genangoka o Samuele o Isiraele ma nyawa waurusu abe manga howono watailako de ona abe itaana yahowonoka gea una dika manga hohowono waputuhu.

⁷ De ma oraha o Filistina ma nyawa yoihene abe o Isiraele ma nyawa yokokitoomuinoka o Misapa ma kotaka de ona yofikiri duru youtumu nako o Isiraele ma nyawa yaparangi genangoka ho manga tentara yakokitoomuino de yoiki la yaparangi onangika. Ho ka de o Isiraele ma nyawa ihioriki o Filistina manga tentara ko manga ngoe yoboa de duru yamodongo onangika.

⁸ De duru yomataiti yomagahoko o Samuelika, ato, “Mia baluhu, kiani ngone o Isiraele ma nyawa nonagahoko Ma Jou o Yaweika la Una wonaduhunu la ufa o Filistina ma nyawa inahibinaaha.”

⁹ Ho o Samuele waleino o domba ma ngofaka abe ka ihuhuohi de wahihuba abe o huhuba iharo-harongo ma gahumu Ma Jou o Yaweika. De o Isiraele ma nyawa duru wagahoko o duduhunu Ma Jou o Yaweino de Ma Jou o Yawe wapaluhu.

¹⁰ Abe ka de o Samuele womulaenge waharongo manga huhuba iharo-harongo gea de o Filistina ma nyawa yomahiadonoka yomahidiaioka yaparangi. De ma gogiriaka waharongo de itodokanino Ma Jou o Yawe daku o Horogauku wotemo de ai ilingi ma kuruuhu duru kohabuturungu. De Ma Jou ai ilingi hoka o kuruuhu ma amokiye ho ka de gea yoihene de o Filistina manga tentara manga hawana yahifafara ho duru yahikapusaka hiadono igapanga o Isiraele ma nyawa yaparangi onangika ka hiadono yahikala.

¹¹ De o Filistina manga tentara yoara masara o Isiraele manga nau-nauru duru yanii-niiki yatoma-toma moduku ka hiadono o Bete-Kara yatilakuru ma honongauku.

¹² De ahao o Samuele wairiki o hakaru ma amoko moi de ena gea wohibelohuku la imaokoiye o kota hinooto ma hidogoronaka abe o Misapa ma kota de o Sene ma kota ma hidogoronaka la idadi o hohininga moi ma titi Ma Jou o Yawe ai duduhunu onangika. De o hohininga ma hakaru gea wohiromanga o Eben-Haesara abe ma titi wohitararono, wato, “Ma Jou o Yawe wonaduhunu ka hiadono ma oraha naa!”

¹³ Hokogea o Filistina ma nyawa yahikala ka hiadono ma dekana de ko yamoroinokaua o Isiraele ma nyawa yangohama de yaparangi onangika. De ka hiadono o Samuele ai wowango ma bahaika de Ma Jou o Yawe duru de ai buturungu walawana o Filistina ma nyawaika.

¹⁴ De o Isiraele ma nyawa manga kota abe naga o Ekono de o Gaata ma hidogoronaka, abe ma dihira o Filistina ma nyawa yale, ahao ma oraha naa ma kota mata-mata gea ihigilio o Isiraele ma nyawaika. De naga o Isiraele ma nyawa manga tonaka utuohi ma ngoe abe enangoo ma dihira yomale o Filistina ma nyawa masara naa enangoo mata-mataika ihikokihigilioka o Isiraele ma nyawaika. De ma oraha gea o Isiraele ma nyawa de o Amori ma nyawa onangoo yomakadameoka.

¹⁵ De o Samuele una o Isiraele ma nyawa manga hihira ka hiadono ai wowango ma bahaika.

¹⁶ De o tao-taongiye una wotagi-tagi o kota utuika la ma kotaka gea de ka idadi o Isiraele ma nyawa watobauru-urusu. Abe manga howono watailako de ona abe itaana yahowonoka gea una manga hohowono waputuhu. Ho ihira woiki o Betele ma kotaika de waurusu ai gogianongoru genangoka, de ahao womaturuuruoli o Gigala ma kotaikali de genangoka ai nyawa waurusu, de ipaha ahao womaturuuruoli o Misapa ma kotaikali de genangokali ai karajaanga imaketero dika.

¹⁷ Ho nako genangoka ai nyawa waurusu ibooto de ahao wolio ai tauika o Rama ma kotaka. De genangokaoo naga o nyawa abe kiani manga howono watailako de ona abe itaana yahowonoka gea una manga hohowono waputuhu. De o Rama ma kotaka gea una wodiai o huhuba ma ngi abe wapake la o huhuba womahihuba Ma Jou o Yaweiye.