1 Samuele 6 - Ma Jou ai Demo-demo o Totobelohoka

O Filistina ma nyawa Ma Jou ai Behehongo ma Peti ihigilio o Isiraele ma nyawaika

¹ De naa adonoka o mede tumidi ma dekana abe Ma Jou o Yawe ai Behehongo ma Peti igogere o Filistina ma nyawa manga tonakoka.

² De ahao ona yahokino manga pangao ma hidemo ma nyawa de ona abe yososawaro yomai-maihi. Ho ka de yomatoomuinoka o ngi moioka de yaleha onangika, ato, “Ngini naa abe minitoomuinoka nenangoka gea ma titi Ma Jou o Yawe ai Behehongo ma Peti. De abe mimahinganono nginika gea la nimihingahu abe hokokia midiai de ena gea. Ho o kia ma ngekomo ma hiaturu la ka idadi Ma Jou o Yawe ai Peti gea mihigilio to ena ma tonakika?” Hokogea yaleha.

³ De manga hidemo ma nyawa de yososawaro yomai-maihi manga leleha yopaluhu ato, “Ngini kiani o Isiraele ma nyawa manga Jou ai Peti gea nihigilio masara kiani nagaoo nia howono ma huhuba manga Jouika. Ho kiani nihidingoto nia howono ma huhuba la de ena gea manga Jou ahao ma panyake gea wohitogumu la ibootohi imahorali. De gea ma ngekomo la ngini ka idadi nihioriki nako igoungu to ona manga Jou abe wohiboa ma panyake gea. Abe nako manga Jou ai Peti gea nihigilioka masara ahao ma panyake ko itogu-togumua de ahao ka idadi ngini nihioriki abe marai ko manga Jouokaua de aino ma panyake gea.”

⁴ Ho o Filistina ma nyawa gea yalehali onangika ato, “Hokokia ma rupa o howono ma huhuba abe kiani hohidingoto?” De ona yopaluhu hokonaa, ato, “Angamoi o hohowono ma panyake gea inidaene ngini ngaro o kokawaaha biaha de ngaro ti ngini nia hae-haekoo yamotoa ho kiani nidiai o gurasino ma rupa amo-motoaino angamoi hokogea ti ngini nia hae-haeke manga ngoe. Ho ma rupa moi nidiai kiani aniiki ma rupa o panyake abe itotoworaino nia badanga ma goronaka. Abe gea ena duru inihikangela. De angamoi naga o karafe kohangoe abe ma oraha naa duru yahirusaka nia tonaka mata-mataika ho kiani nidiaioo o gurasino o karafe ma rupa motoa abe ma rupa imaketero.

⁵ De ena mata-mata nidiai la niahidoaka o Isiraele ma nyawa manga Jouika la nihitunguu nia horomati Unangika. Hokogea de ahao marai Una ko winihikangelakaua ngaro ti ngini nia kokawaaha, de ngaro nia popangao, de ti ngini nia tonaka ma amokika. Masara ngone honganono mata-mataika manga Jou ko wahohowonokaua.

⁶ De ufa nginioo nia hininga niatogowini de niwilawana o Isiraele ma nyawa manga Jou hoka o Mesiiri ma nyawa de manga haeke o Firaunu iwilawana manga Jou! Abe ona gea ma dihira iwilawana manga Jouika ka hiadono ngade-ngade yokokibinaahaka. Ona gea o Isiraele ma nyawa ko yahigunoaua manga tonakino yohupu hiadono Ma Jou duru wahikangela de o hohowono ma kangela ma ngoe abe duru kohadubuho mata-mata.” Hokogea yahitiari la duru yaniiki manga hiaturu itiai ma oraha Ma Jou ai Peti ihigilio.

⁷ De ahao ona yogila-gila yahingahu ma hiaturu utuohi abe kiani yaniiki, ato, “Ho gea mata-mata niahidiai ibooto de ahao kiani nidiai o goroba moi duru ma hungi de niolingiri o hapi ma beka hinooto abe ko ma moiuahi o goroba itauru. De kiani o hapi ma beka gea imangofakoka ho nagau ma hapi ma ngofaka. De o hapi ma ngofaka hinooto gea niatingakika de ma ayo ho ma ngofaka hinooto niokurungaika o kurungaka.

⁸ De ahao Ma Jou o Yawe ai Behehongo ma Peti nihibarene ma goroba ma hungiuku de to ena ma datekoka niakelenga o peti moioli abe ma goronaka nihingohamoka o karafe ma rupa motoa de o panyake itotoworaino ma rupa motoa abe mata-mata nidiai o gurasino. De ena gea idadi nia howono ma huhuba. De ahao ma goroba gea nihipasanga o hapi ma beka hinootoika gea de niapidili la nihigunoa ma hapi gea itagi o kiaika dika to ena ma hininga aniiki.

⁹ De ngini niogoana ma poretino la niolega nako itagi la ma dumutu o Isiraele ma tonakika de ka hiadono atilakuru nanga tonaka ma batingi de igila-gila manga kota o Bete-Semese ma kotaika. Nako ma dumutu o Isiraele ma tonakika de gea ka idadi ngone hohioriki igoungu Ma Jou o Yawe abe wonahipoha de o kokangela kohaamoko nenanga. Masara nako ma hapi gea ko itagiua genangika de ahao ka idadi hohioriki o kokangela nena ko ma titiua manga Jouino abe marai ko Ma Jou o Yaweua abe wohidingoto o panyake ma dorou de o karafe kohangoe hiadono naa ma kangela inadaene.” Hokogea ona manga hidemo de yososawaro yomai-maihi manga hiaturu ma demo o Filistina ma nyawaika.

¹⁰ Ho ahao manga hiaturu gea o Filistina ma nyawa yaniiki duru imaketero hoka yotemoka. O hapi ma beka hinooto abe de ma ngofaka duru ma gilauohi yaleino de ahao o goroba ma hungi ihipasanga o hapi ma beka hinootoika gea, de to ena ma ngofaka hinooto gea yakurunga o kurungaka.

¹¹ De ahao ihibarene o gorobauku Ma Jou o Yawe ai Behehongo ma Peti de ma peti utu gea abe genangika o Filistina ma nyawa ihingohamokau ma kiahonanga o gurasino motoa abe ma rupa o panyake itotoworaino de o karafe ma rupa motoa abe enangoo yodiai o gurasino.

¹² De igoungu ngaro o nyawa ko yaiwa o gorobaka masara o hapi ma beka hinooto gea ka de ma peti hinooto ihibarenoka de ka isobo ma hapi, to ena ma ngofaka anoaika de ma ayo aniiki dika ma ngekomo abe ma dumutu o Bete-Semesika abe naga o Isiraele ma tonakoka. De o hapi ma beka imoo-moo ko itoa-toakua ma ngekomika. De o Filistina ma nyawa manga haeke yamotoa gea ona yotagi-tagi yaniiki o goroba ma poretino ka hiadono o Bete-Semese ma batingika de ahao ko yaniikokaua masara ka yolega-legahi genangoka.

¹³ Naa de ma oraha o hapi de ma goroba iboa de naga o Bete-Semese ma dolaka o Isiraele ma nyawa yokarajaanga manga gandumu ma redi-redioka abe ma oraha adonoka yautuku manga gandumu. Ho ona yolega-lega de yamake o goroba gea iboaino. De ka de yamake Ma Jou ai Peti naga ma goroba ma goronaka gea de duru yogogarago.

^14-15 De o hapi igila-gila ka hiadono iwohama o gandumu ma redi moi abe ma dutu o Bete-Semese ma nyawa ai romanga o Yosua. Ho ma goroba gea imahiadono ai gandumu ma redi ma goronaika de genangoka imatogumu angamoi ko itagiokaua ma hapi. De duru genangoka naga o hakaru kohaamoko ho ahao naga o Lewi ma nyawa yoboa de ona ihiguti Ma Jou o Yawe ai Behehongo ma Peti de yakelenga o hakaru ma amoko ma lokuoka. De ma peti utu gea abe naga to ena ma goronaka ma huhuba ma kiahonanga ngimoi, abe gea o Filistina ma nyawaino manga hidoaka, enangoo yakelenga o hakaruoka gea. De o hapi ma beka hinooto gea yatoma de o goroba yapela-pelakuku la idadi o hidaulu ma gota de ahao ma hapi hinooto gea o Lewi ma nyawa yahihuba abe o huhuba iharo-harongo. De o wange gea naga utuohi o huhuba iharo-harongo abe yahihuba Ma Jouika genangoka.

¹⁶ De o Filistina manga haeke yamotoaka abe kangano ma goroba gea yaniiki ona nagahi doka manga tonaka ma batingi ma honongaka ho ona yawuni-wuningi mata-mata gea abe o Isiraele ma nyawa yodiai de ahao duru o wange gea dika de yokokilio o Ekono ma kotaika.

¹⁷ De o panyake itotoworaino ma rupa ma gahumu motoa gea ihititi o Filistina ma nyawa manga haeke yamotoa ho ena gea idadi to ona manga howono ma huhuba homoi-homoiika. Ho ena gea to ona manga dodunguu abe yahipareta o Filistina manga kota ma amoko motoa abe ma roma-romanga o Asodo, o Gasa, o Asekelono, o Gaata, de o Ekono.

¹⁸ De ma rupa o karafe o gurasino motoa gea ihititi o kota motoa ma ago-agomo gea de to ena ma kapo-kapongo abe naga imakadateke de o kota-kota motoa gea. De o hakaru ma amoko gea, abe naga o Yosua ai redi ma goronaka, idadioka o hohininga abe ka de o nyawa yamake ma hakaru gea de yomahihohininga abe idadioka genangoka. Abe o hakaru ma amoko ma lokuoka gea yakelenga Ma Jou o Yawe ai Behehongo ma Peti ho ahao idadi o hohininga o Isiraele ma nyawaika. De ma hakaru nagahi genangoka ka hiadono ma wange naa abe to ena ma ade-ade totulihukuoka.

¹⁹ Masara ma oraha gea naga o Isiraele ma nyawa abe duru yahowono genangoka. Abe naga o Bete-Semese ma nau-nauru yamoritumidi ona gea duru yoigo yolega-lega Ma Jou ai Peti ma goronauku. Ho ona yamoritumidi gea Ma Jou ai Behehongo ma Peti ma dadamunu yafelenga de yolega ma goronauku. Ka de hokogea yodiai de Ma Jou o Yawe wahohonenge o nau-nauru yamoritumidino ka ma moiuku angamoi manga howono Unangika. De o Bete-Semese ma nyawa duru yoari-ari de manga hininga ma huha mangale Ma Jou o Yawe wahohowono yamoritumidi gea hiadono yokokihonengoka.

²⁰ De ona o Bete-Semese ma nyawa naga yomakokeleha ato, “Onagona yapoa yomaokoino Ma Jou o Yawe ai himangoka abe Una Ma Jou duru wotebi-tebini?” De yomodongo Ma Jou ai Petika hiadono yomulaenge yomakokeleha ato, “O kiaikali ka idadi Ma Jou ai Peti hohidingoto?”

²¹ De ma bahaika yairiki manga hidingoto ma nyawa abe ka idadi manga demo yototaka o Isiraele ma nyawa manga hidimonika abe yogogere o Kiriata-Jeari ma kotaka. Ho manga demo ahao manga hidingoto yadofanga manga hidimonika, ato, “Ngomi o Bete-Semesoka duru misanangi minihingahu abe Ma Jou o Yawe ai Behehongo ma Peti o Filistina ma nyawa ihigilioka de ena naga ngomioka. Ho naa mimagahoko la ngini niboa de niale.” Hokogea o Bete-Semese ma nyawa manga gogahoko.