1 Samuele 5 - Ma Jou ai Demo-demo o Totobelohoka

Ma Jou ai Behehongo ma Peti o Filistina ma nyawa manga hidogoronaka de duru yahikangela

¹ O Filistina ma nyawa manga tentara Ma Jou ai Behehongo ma Peti yaora o Isiraele ma nyawaino o parangioka ma oraha o Eben-Haesara ma tonakoka yomaketeparangi. De ahao Ma Jou ai Peti gea yao manga kotaika abe ihiromanga o Asodo ma kota.

² De Ma Jou ai Behehongo ma Peti gea ihigila-gila yao manga jou o Dagono ma tauika de ihingohama ma goronaika de ahao yakelenga duru manga pangao ma datekoka.

³ De ma dawangeino o ngoru-ngorumino naga o Asodo ma nyawa yoiki manga jou o Dagono ma tauika de ka de yowohama ma goronaika de yatodokana angamoi manga pangao irubaka duru imamotumuku Ma Jou o Yawe ai Behehongo ma Peti ma himangoka! Ho gea yamake de manga pangao ihigokoli.

⁴ Masara ma dawangeinoli de idadiokali abe manga pangao o Dagono irubakali duru imamotumuku Ma Jou o Yawe ai Behehongo ma Peti ma himangoka hoka kanugonoli masara ma oraha naa to ena ma pea de ma giama mata-mata ikokitobikoka de ipuraraha duru o pangao ma tau ma ngorana ma ngiuku. Ho o Dagono ma pangao naa ka ma badangokahi dika naga.

⁵ De gea ma titi ho hiadono ma oraha o ade-ade naa ihitulihuku de ona abe yaleleani manga pangao o Dagono, eko ngaro onagona dika abe yomahuba manga pangaoika gea, ona mata-mata duru ko yomoroinua o Dagono ma tau ma ngorana ma ngi yadoko.

⁶ De ahao Ma Jou o Yawe womulaenge wahikangela o Asodo ma kota ma nyawa de o panyake ma dorou abe itotoworaino manga badangoka. De o Filistina ma nyawa abe yogogere o kapo-kapongoka abe imakatingaka de o Asodo ma kota ko ikurutikaua onangoo yadaene hiadono duru ikiriaholi o Filistina ma nyawa yopanyake abe yogogere genangoka.

⁷ Ho de ahao o Filistina ma nyawa ato marai manga panyake gea ma titi Ma Jou ai Peti naga manga hidogoronaka ho ona duru de manga huha yotemo ato, “Ko idadiokaua o Isiraele ma nyawa manga Jou ai Peti gea hohigunoa igogere ngoneoka! Manga Jou gea duru de ai kuaha ma buturungu wonahikangela de ma dubuhoholi. Abe ngaro ngoneino de ngaro to ngone nanga pangao o Dagonika ma inakokidaene.” Hokogea manga hininga ma huha ihidemo.

⁸ Ho ona yabehehongo manga haeke yamotoaika la ona yokokiboa yatutumu o nyawa abe yogogere o Asodo ma kotaka. De ma oraha manga haeke yamotoa gea yoboa de yaleha onangika ato, “Mia balu-baluhu kiani nimihingahu abe hokokia ngomi naa midiai de o Isiraele ma nyawa manga Jou ai Peti gea.” Hokogea manga gogahoko manga poparetaika. Ho manga haeke yamotoa gea yomakoketemo ma titi Ma Jou ai Peti gea ka hiadono naga manga putuhu de ahao yahingahu o Asodo ma nyawaika ato, “Ka idadi o Isiraele ma nyawa manga Jou ai Peti gea niao nanga kota o Gaataika.” Ka de hokogea manga popareta manga putuhu yoihenoka de o Isiraele ma nyawa manga Jou ai Peti yagoraka de yaturuuru abe yao o Gaata ma kotaikali.

⁹ Masara ka de Ma Jou ai Peti iboaka o Gaata ma kotaino de genangokali Ma Jou o Yawe womulaenge o Filistina ma nyawa wahikangela de o panyake ma dorou gea abe itotoworaino manga badangoka. De ngaro ona o dimono abe yaperekioka eko ngaro o ngofa-ngofaka ma imaketero dika ma panyake yadaene onangika ho duru o Gaata ma kota ma nyawa yomodongoholi Ma Jou ai Petika. De ona de manga boaka yomahohaangara.

¹⁰ Ho onangoli o Gaatoka Ma Jou ai Peti yao o Filistina ma kota moiikali ma romanga o Ekono. Masara ka de o Ekono ma kota ma nyawa yamake ona yoboa ihidomoku Ma Jou ai Peti gea de onangoo duru yomodongo enangika de yopoa-poaka ato, “Abeika yaoino Ma Jou ai Peti gea la ngomioo imihohonenge!” Hokogea manga hawana ma demo.

¹¹ De ona yomataiti yabehehongo manga haeke yamotoaika la manga popareta ma nyawa gea yokokiboa de yomakoketemoli manga hiaturu Ma Jou ai Petika. Ho ka de ona yokokiboaka o Ekono ma kotaino de yomatoomuino de naga o Ekono ma nyawa duru yomagahoko onangika ato, “Mia balu-baluhu nimihigihene, o Isiraele ma nyawa manga Jou ai Peti gea kiani nimataiti nihigilio to ena ma tonakika! Nako hokogenangua ngini nidiai de ko ngomiua dika mihonenge masara to ngomi mia nyawa mata-mata o kotaka nenanga ahao mihonenge ree-ree!” De hokogea marai yagoungu angamoi o panyake Ma Jouino duru kohadubuho de imulaengoka manga kota ma goronaka. De o hawana kohaamoko imahora-hora o kota ma amokika.

¹² De ngaro o nyawa utu ko yohonengua masara ona abe yadaenoka yokangelaholi de o panyake ma dorou gea abe itotoworaino manga badangoka. De manga gari idoa o dihangiye angamoi o Ekono ma kota mata-mataika naga o nyawa ko manga ngoe yoari-ari.