1 Samuele 4 - Ma Jou ai Demo-demo o Totobelohoka

¹ Ho nako naga o Samuele ai hingahu o Isiraele ma nyawaika ona mata-mata duru yototoihene ai demoika gea. De ma oraha gea o Isiraele ma nyawa de o Filistina ma nyawa yomaketeparangi. De o Isiraele ma nyawa manga tentara to ona manga dodogumu ma ngi imahikitigino de o Eben-Haesara de o Filistina manga tentara manga dodogumu ma ngi o Afekoka.

Ma Jou ai Peti o Isiraele ma nyawa yao o parangika masara de ahao o Filistina ma nyawa yahikala de Ma Jou ai Peti yomale

² De ahao o Filistina manga tentara yosobo yaparangi o Isiraele manga tentaraika de yomatobatatoro yomarihimanga yomaketepoparangi de ahao yomakingika yomaketeparangi de o Filistina manga tentara yolaku. De o wange gea yatoma o Isiraele ma nyawa manga tentara yasana iata de yahikalaka.

³ De o Isiraele manga tentara ka de yokala de manga tentara manga hou yolio manga dodogumu ma ngiika. De ahao o Isiraele ma nyawa manga dimo-dimono yomatoomuino de yomakokeleha ato, “Adodoa ho Ma Jou o Yawe wonahidogunoaika ka hiadono o Filistina ma nyawa inahikala?” De yomakoketemohi ato, “De sarakia nako Ma Jou o Yawe ai Behehongo ma Peti hale o Silo ma kotaka de ka idadi haoino. Abe nako ngone ena gea naga nanga hidogoronaka ma oraha haparangi de marai Ma Jou o Yawe ahao wonahidoaka o lolaku la wonahihupu nanga musu manga giamino.” Hokogea ahao yaputuhu ato kiani yodiai.

⁴ Ho yahuloko manga hidingoto ma nyawaika la yoiki o Silo ma kotaika de Ma Jou o Yawe ai Behehongo ma Peti yale. De Ma Jou abe ka Unangohi Wopoputurungu womanoa ai Behehongo ma Peti ma dadamunu ma lokuoka. De naa o Behehongo ma Peti gea yale de o Eli ai ngofa-ngofaka o Hofini de o Pinehasa naga Ma Jou ai Peti ma ngioka de ahao yaduhunu ona ho Ma Jou ai Peti yahidongotaka o parangi ma ngiika gea.

⁵ De ma oraha o Isiraele manga tentara yamake Ma Jou o Yawe ai Behehongo ma Peti iboaino manga dodogumu ma ngi ma goronaino de ona duru yomahagaaga. De manga garago ma ilingi kohaamokiye hiadono ma tonaka genangoka de ma dibiingoka.

⁶ De ka de o Filistina manga tentara yoihene manga gigoro gea de yomakokeleha ato, “Marai de ma titi o kia hiadono o Ibarani ma nyawa manga hagaaga ma ilingi ma amokiye hokogea manga dodogumu ma ngioka?” Hokogea manga leleha de o nyawa abe ihioriki Ma Jou o Yawe ai Peti ihiboainoka o Isiraele ma tentara manga dodogumino gea yahingahu onangika.

⁷ Ka de o Filistina manga tentara yoihene ma abari gea de duru yalufungoka de manga hawana ho hiadono yotemo ato, “Naga manga popangao iboainoka doka manga dodogumu ma ngioka la ahao yaduhunu o parangioka. Naa hoboditoka abe ko ma moiuahi naga hokonaa idadi hiadono ngone hohimanga o popangao o parangi ma goronaka.

⁸ O kokangela inadaenoka! De onagona ka idadi inaduhunu halawana o Isiraele ma nyawa manga popangao abe duru de ma buturungoka? Manga popangao nenanga igoungu ena gea abe ma dihira o Mesiiri ma nyawa yahibinaaha de o hibinaaha ma kiahonanga irupa-rupa ma oraha o Isiraele ma nyawa yoiki o tonaka ma kakaahaika.”

⁹ Hokogea manga hawana ma demo ho ahao manga hihira duru manga tentara yahigaro ato, “Ngini o Filistina ma nyawa kiani ngini ninauru la hiadono duru de nia buturungoka niaparangi onangika! De angamoi nako ko genangua ngone ahao hodadi to ona manga huhuloko imaketero hoka naa ma dekanino ona gea yodadi to ngone nanga huhuloko. Ho kiani duru de nanga domoroini haparangi abe hoka ko ma moiuahi de nanga buturungu ma gahumu hapake!”

¹⁰ Hokogea o Filistina ma nyawa manga tentara yomahiketehiputurungu ho ma oraha yaparangi o Isiraele ma nyawaika de yahikalali. De naga o hibinaaha kohaamoko abe o Isiraele manga tentara yasana moruange yokokihonenge o wange gea. De manga hou duru de manga hawana yoara yolio manga dodogumika abe genangoka manga tau o ngoerino ma ngoe.

¹¹ De Ma Jou o Yawe ai Behehongo ma Peti gea o Filistina manga tentara yaoraka de yao. De o wange genangoo o Eli ai ngofaka o Hofini de o Pinehasa yohonenge o parangi ma goronaka.

Ma Jou ai hidemo ma nyawa o Eli wohonenge

¹² De ma wange gea naga o Isiraele manga tentara womatengo o Benyamini ma dutuino abe wosobo manga parangi ma ngioka de woara womapopaata de ko wotogu-togumua hiadono womahiadono o Silo ma kotaino. De ngade-ngade womahiadono o kotaino gea de ai pakeanga wakakihoka de duru wokutu ai mumukuku de o tonaka ma kafo la wohitunguu ai hininga duru ihuha.

¹³ De o Eli naga duru o ngekomo ma datekoka abe kanganoinohi wogogeruku genangoka wadodamaa o abari o parangino. De una de ai hininga ma huha iwihifafara angamoi wafikiri done sarakia nako ihihanga eko yahirusaka Ma Jou ai Peti. De ka de o Benyamini ma nyawa wowohama o kotaika de wahingahu abe kangano idadi o parangioka. Una wahingahuoka de ka itodokanino o Silo ma kota ma nyawa ko manga ngoe yopoaka de manga huha ma gari hiadono ona o kota mata-mataika ka idadi yagihene.

¹⁴ De o Eli unangoo woihene manga gari ma ilingi ma amokiye gea de woleha, wato, “Gea ma titi o kia hiadono o nyawa manga gigoro hokogea?” De una abe ahao gea woboa una womataiti o Eli ai datekika la ka idadi wihingahu.

¹⁵ De angamoi o Eli una ma oraha naa ai ngumuru wadonoka ai taongo morihiwo de tufange ibooto de ko womahiorikokaua.

¹⁶ De una o tentara wihingahu unangika wato, “Ahi baluhu, ngohi naa o parangioka de taino. Ngohi naga o parangi ma goronaka duru o wange naa dika de tomapopaata naangino.” De o Eli wileha wato, “Ho o kia idadi genangoka?”

¹⁷ De una wopaluhu wato, “Ngone o Isiraele ma nyawa inahikalaka. De ka hiadono nanga tentara duru yosana abe yohonengoka o wange naa. De hiokoo, ahi baluhu, ani ngofaka yahinooto, o Hofini de o Pinehasa, onangoo yohonenge o parangi ma goronaka. De Ma Jou ai Peti enangoo ihihangoka angamoi nanga musu yaoka.”

¹⁸ Ka de hokogea abe idadioka Ma Jou ai Petika woihene de o Eli womakibanga ai poretoko de ai tomara itobiki de wohonengoka duru ai kuruhii ma datekoka o kota ma ngoranoka gea. De hokogea iwiotakuku de wohonenge angamoi duru iwiperekioka de duru ai badanga kohaamoko angamoi duru wokutufuru. Una gea wahihira o Isiraele ma nyawa o taongo moruata ma dekana.

¹⁹ De o Eli ngoi hunungu abe o Pinehasa ngoi fekata, muna de ami badangoka de ngade-ngade ami gahe adonoka ma oraha gea. De muna ka de moihene abe Ma Jou ai Peti manga musu yaoka, de ami rokata wohonengoka, de ami dunungu unangoo wohonengoka, de gea ami pokoro imulaenge igoli-goli.

^20-22 De ma oraha momagerewoto ami ngofaka o nauru de mihiromanga o Ikaboda abe ma titi, “O kiaka ai medebini ma dararono?” Muna de ami hininga ma huha motemo mato, “O Isiraele ma nyawa nanga dararono Ma Jouino duru inanoaikaka!” De ami huha ma titi Ma Jou ai Peti iboditoka, de ami rokata unangoo woboditoka, de ami dunungu unangoo wohonengoka. De ka de ami ngofaka mihiromanga ibooto de ahao ma moioli de ami ilingi duru de ma huhaka motemoli mato, “Ma Jou ai medebini ma dararono ko imanoakaua o Isiraele ma nyawa manga hidogoronaka angamoi inaoraka Ma Jou ai Behehongo ma Peti.” Hokogea motemo de o ngo-ngofeka abe imiduhunu duru yoigo imilaru ato, “Dodiawo, ngaro ufa de nohawana, nomangakunoka o ngofaka o nauru!” Masara muna ko mopaluhua de ko momatodokanua angamoi muna mohonengokau.