1 Samuele 31 - Ma Jou ai Demo-demo o Totobelohoka

O Isiraele manga koano o Saulu wohonenge o parangi ma goronaka

¹ De naa ma moioli o Filistina ma tentara yangika o Isiraele ma tentaraika de yaparangi o Giliboa ma loku ma gogeleforoka. De o parangi ma goronaka naa o Filistina ma nyawa manga tentara ko yokalaua abe yoparangi duru de manga buturungoka hiadono o Isiraele manga tentara manga ngoe yoara.

² De o Saulu de ai ngofa-ngofaka ahao yahigilolitino o Filistina manga tentara de duru yaparangi onangika hiadono o Saulu ai ngofaka o Yonatana, o Abinadaba, de o Malakisua ona yahange gea yakokitomaka.

³ De o tentara abe yotigi-tigino de o Saulu, ona duru yomahiputurungu yomaketeparangi. De o Filistina manga tentara abe yososawaro yotoimi, ato o Isiraele manga koano unangohi kiani wohonenge. Ho manga hininga ahauku o Saulika de iwidoara de manga hihiipi iwidaene ka hiadono ahao wohonenge ma titi ai nabo itubuhoholi masara una woluku la o Filistina manga tentara iwihohonenge.

⁴ Ho o Saulu wohigogururihi unangika abe ai parangi ma dae wotobaao-ao, wato, “Ngona nohiduhunu de ani humaranga o dopo-dopoino! Kiani ngona dika nohihohonenge la ufa o Filistina ma nyawa ihitoma ngohi naa. Angamoi ona gea duru ko iwihiorikua Ma Jou ho done ona yoboaino de ihihohedu de ihitopoko de hiadono ihihohonenge, de gea idadi o himaleke ma amoko!” Masara ai duduhunu gea ko wapoaua angamoi duru wohawana ai koano wihohonenge, ho o Saulu ai humaranga o dopo-dopoino wahiata ma harumino de womahitamaaiye de wodomotumu ai dopo-dopouku ho woruba de hokogea o Saulu una ma hirete womahohonenge.

⁵ De una wotobaao-ao o Saulu ai parangi ma dae ka de una wimake ai koano wohonengoka de ahao unangoo wodiai imakadaene abe to unangoo ai humaranga o dopo-dopoino wapake la womahitamaaiye de wodomotumu ai dopo-dopouku ho unangoo womahohonenge de woruba duru o koano ai datekoka.

⁶ Ho duru o wange gea o Saulu de ai tentara abe naga unangoka yomakiniiki yokokihonenge. De to una ai ngofa-ngofakino yahange gea onangoo yokokihonengoka o wange gea.

⁷ De o Isiraele ma nyawa abe yogogere o Yisereele ma dolaka de ona utu abe yogogere doka o Yorodani ma akere ma honongaka yamake manga tentara duru ko iwaka de manga koano o Saulu de ai ngofaka yahange gea yokokihonengoka. Ho ka de yamake hokogea idadi de duru yohawanoka hiadono yokokiloara de manga kota-kota de manga kapo-kapongo yakokinoaka. Ho o Filistina ma nyawali yomahituruuru de onangoli yogogere o Isiraele ma nyawa manga kota de manga kapongo mata-mataika abe ma dutu yakokinoaikaka.

⁸ De ma dawangeino o Filistina ma nyawa yoiki o parangi ma ngiika gea la ka idadi yomagoraka ma kiahonanga abe naga o Isiraele manga tentara manga hone-honengoka. De ma oraha yomagoraka de o Saulu de ai ngofa-ngofaka manga honenge onangoo yamake o Giliboa ma geleforoka gea.

⁹ Ho o Saulu ai pea yatobikoka de ai parangi ma dadatoko mata-mata yakokigorakoka. De ahao o abari ma titi o Saulu de ai ngofa-ngofaka yohonengoka gea yahingahu manga hidingoto ma nyawaika. De onangoli yoiki ihigali-gali ma abari gea yoade-ade onangika abe yotobaleleani manga popangao ma tauoka de yogila-gila hiadono ma abari gea yomahikokangahu ho imahora-hora o Filistina ma nyawa manga tonaka mata-mataika.

¹⁰ De ahao o Saulu ai parangi ma dadatoko mata-mata ihingohama o ngo Asitorete ma popangao ma tau ma goronaika de genangoka yakelenga. De o Saulu de ai ngofa-ngofaka manga honenge gea yakokiao manga kota o Bete-Seanika de genangoka manga honenge homoi-homoiika yahidapakuika manga kota ma dadaduhu ma poretoka la yahimatoko manga nyawaika.

¹¹ Masara ka de o Isiraele ma nyawa o Yabese-Gileada ma kotaka yoihene abe hokogea yodiai de o Saulu ai honenge de duru yohuha.

¹² Ho manga nau-nauru abe yotobamoroini yoparangi yokokisobo yoiki o Bete-Seanika de yotagi-tagi manga futu moi de ko itebinuahi ma oraha yomahiadono o kotaika gea. De yomahiadono de ahao o Saulu de ai ngofa-ngofaka manga honenge yahiguti. De yahiguti ibooto de yao o Yabese ma kotaika de manga honenge yatufuku genangoka.

¹³ De ahao manga kuru yalungunu o gota ma amoko ma timiuku genangoka. De yodiai manga huha ma dodunguu abe ko yolomua o wange tumidino ma dekana.