1 Samuele 30 - Ma Jou ai Demo-demo o Totobelohoka

O Pasala 30 ko atailakouahi O Dautu ona yahikala o Amaleke ma nyawaika

^1-5 O Dautu de ai nyawa yotagi-tagi manga gogiriakahi la yolio manga kapongo o Sikagika. Masara abe ma oraha ona ko yaiwa manga kapongoka gea de o Amaleke ma nyawa yotagi-tagi yabaata o nyawa-nyawaika. Abe utu o Yehuda ma nyawaika yabaata abe dakuiye yogogere, de nagali abe yoboa o Sikagino de yabaata onangikali. Ho gea yangohama ma kapongo ma goronaika de yataokino o nyawa mata-mata genangoka. Abe ngaro o Dautu ai tentara ma nyawa manga feka-fekata de manga ngofa-ngofaka masara ona yataokino de yaoika. De ngaro o Dautu ngoi fekata yahinooto, o ngo Ahinoama de o ngo Abi, masara onangoli yataoko de yaoika. Masara ma nyawa mata-mata gea yataokino dika manga ngango de yaoika ho ko yatomaua. De ahao o Amaleke ma nyawa gea yatufuku ma kapongo ho duru youkuoka hiadono yokokikonitoka. De ipahaino abe manga futu hangeino adonoka de o Dautu de ai nyawa yomahiadono o Sikaga ma dingiika. Yomahiadono de yamake ma kapongo gea ma rusaka de abe manga fekata de manga ngofaka ko yaiwaka de manga hiningaka duru yohuhaholi. De ahao ona mata-mata duru kahumutaigarika manga dekana hiadono manga koongo ko iwaka.

⁶ De mangale ma titi o Dautu ai nyawa manga fekata de manga ngofaka o Amaleke ma nyawa yataokino de ko yaiwaka hiadono manga hiningaka de yajanggutu ho duru iwingamo unangika. Ho ona yomakoketemo ma titi gea de yomahikokagaro la iwihohakaru o Dautika hiadono wohonenge. De ngaro hokogea masara Ma Jou o Yawe wihiputurungu o Dautu ai hiningaika la ka idadi ai hininga iriidi.

⁷ De ahao o Dautu wihuloko manga hidemo ma nyawa Ma Jouika o Abiatara wato, “Abeika ngona naoino ani baju o efodo gea la ka idadi hohioriki Ma Jou ai hininga ma mau.” Ho o Abiatara wao ma efodo gea o Dautino.

⁸ De gea o Dautu wileha Ma Jou o Yaweika wato, “Sarakia, koaho ngohi tahidoduru mia musu gea? De nako tahidoduruika ka idadi tadaene?” De Una wipaluhu wato, “Irahai la ngona nahidoduruika angamoi ahao ka idadi nadaene, de hongoli ka idadi naduhunu ani nyawa mata-mata nia musu manga giamoka de yaino!”

⁹ De o Dautu woihene Ma Jou ai demo gea ho una de ai nyawa yaratuhu butaanga gea yomataiti yosobo la yahidoduru manga musuika. De ipahaino ona yomahiadono o Besoro ma akerino.

¹⁰ De genangoka ai nyawa yaratuhu hinooto duru yalolamaanoka de yomahingahu unangika ato ko iwaka manga buturungu ho ko idadiokauali yotagi-tagi, kiani yomahiainohi. Ho ona yomahiainohi dika genangoka masara manga hou abe yaratuhu iata, ona de o Dautu ka yogila-gilahi yahidoduru manga musuika.

^11-12 De manga dodagi ma gogiriaka abe yotagi-tagi o dumuleoka de yomakamake de o Mesiiri ma goduuru womatengo. Ho iwiao o Dautino masara una duru ai badanga ilamaanoka angamoi gea ai futu hangeino o akere ko wokerua de o inomo ko wolomua. Ho iwihidoaka unangika o roti de o akere, de nagali o angguru ma hofoko ma doolenge o hahaku hinooto, de o roti ma hohutulu abe naga o gogilioro ma hofoko doka ma roti ma goronaka. De gea mata-mata waolomo de waokere de ko itedekanuahi de wowangoroli angamoi ai buturungu ilioino.

^13-14 De ahao o Dautu wileha ma goduuruika wato, “Ho ngona naa o kiaino ma nyawa, de to ngona ani dutu onaguna?” De una wopaluhu wato, “Ngohi naa o Mesiiroka ma nyawa, masara ahi dutu una o Amaleke ma nyawa. De naa ma duruino ngomi mitagi-tagi o Yehuda ma tonakika abe idateke dakuiye la miabaata o Keriti ma nyawaika de o Kalebe ma nyawaika de manga kiahonanga mimahitongomi dika. De ahao miloiki o Sikalaaga ma kapongika de miatufuku la duru youkuoka. Masara gea ipaha de ahao ngohi ihigogama, ho ma futu hange ibooto de ahi dutu gea wohinoaika dika ma titi o gogama gea ihidaene.”

¹⁵ Ho o Dautu wilehali unangika wato, “Sarakia, ka idadi ngona nohihihira-hira la ka idadi tadaene ona gea abe yatobabaata o nyawaika?” De una ma goduuru wopaluhu wato, “Iya, ka idadi, iti ngona nomahikoboto de napake Ma Jou ai romanga abe nohihibehehongo la ufa nohitoma de ufa hiadono nohihigilio ahi dutuika. De nako hokogea nomahikoboto de ahao ka idadi ngohi tonihihira-hira hiadono hadaene ona gea.”

¹⁶ De ahao una wihihira-hira o Dautu la ona mata-mata yomakiniiki yahidoduru o Amaleke ma nyawaika hiadono yadaene. De ma oraha gea o Amaleke ma nyawa naga o homoa ma tonakoka de duru yomahikabarihika de ihirame-rame manga lolaku ma oraha yabaata o nyawaika. Abe ona yolo-olomo de yotobaokere de yoselo-selo ma titi manga kiahonanga duru ilamoko abe yomagoraka o Filistina ma nyawaino de o Yehudaoo ma nyawaino.

¹⁷ Ho o Dautu de ai nyawa ka yangohama dika manga hidogoronaika de yomulaenge yahohonenge. De gea yogila-gila yaparangi onangika ma futu gea de hiadono yahidetebiniye. De ngaro ma dawangeino gea masara ko yomatogu-togumuahi yaparangi onangika, ho duru ma wange gea ma gahumu ka yaparangiohi hiadono yofutukuoli de ahao yomatogumu yahohonenge. De o Amaleke ma nyawa manga hou abe ka yowangohi gea manga goduuru yaratuhu iata dika abe yofarene manga untauku la ka idadi yoara.

¹⁸ Ho o Dautu ka idadi waduhunu ai nyawa mata-mata de wahigilio manga kiahonanga abe ma dihiraino o Amaleke ma nyawa yataokoka. De ngaro to una ngoi fekata yahinooto masara ka idadi waduhunu manga musu manga giamino.

¹⁹ Abe ko moiua ai nyawa yahihanga de ngaro to ona mata-mata manga kiahonanga masara enangoo moioo de ko iwa abe ihihanga, ka idadi yataokinoli mata-mata.

²⁰ De nagali o aewani ma duduono ma ngoe genangoka abe o Dautu wataokino, ho to una ai nyawa yao ma aewani gea manga himangoka ma oraha yolio manga kapongika. De ona yomahikangahu ato, “Ma aewani naa mata-mata idadi o Dautu ai parangi ma lolaku ma kiahonanga.”

²¹ De ipahaino o Dautu ona mata-mata yomahiadono o Besoro ma akerika abe genangoka ai nyawa yaratuhu hinooto yomagoo-gogerohi angamoi ma dihiraino de manga badanga ilolamaanoka. De ona yaratuhu hinooto yamake o Dautu de ona abe yomakiniiki de una yoboaino ho yoiki yabuhuku. De o Dautu wotemo onangika wato, “Ahi gogianongoru, duru tosanangi homakamakeoli!”

²² Masara naga ai nyawa yamuruono abe iwinii-niiki abe manga hininga itorou dika, de ona gea yahigurubungu ato, “Ona naa ko inaniikua ma oraha haparangi nanga musuika, ho ko itiaiua hahikodoku onangika nanga parangi ma lolaku ma kiahonanga. Ho koaho hahigilio dika manga feka-fekata de manga ngofa-ngofaka onangika de ahao hahuloko dika la yosobo inanoaika de yomaturuuru o ngi moiikali!”

²³ Masara o Dautu woihene manga demo gea de wotemo wato, “Koua, ahi gogianongoru, ufa hokogea hodiai! Abe koaho ufa nanga horoodo ilaku nanga hiningaka, angamoi ma aewani de ma kiahonanga gea Ma Jou o Yawe Una ma hirete wonahidoaka ngoneino. De Una gea abe wonadatoko de wonaduhunu hiadono ka idadi hahikala nanga musu gea abe ma dihiraino inabaata ngoneino.

²⁴ Ho ti ngini nia hininga gea duru ko itiaiua. Angamoi nanga gogianongoru abe ko inaniikua ma oraha hoparangi, ona yomagoo-gogerohi naangoka de yagoa-goana to ngone nanga kiahonanga abe hanoaikahi onangoka. Ho mangale ma titi gea ngohi tato irahai la ma oraha hahikokodoku nanga parangi ma lolaku ma kiahonanga de ngone homoi-homoi nanga regu imakoketero dika.”

²⁵ Hokogea o Dautu ai putuhu, de ipahaino de ai demo gea idadi o pareta moi. De ngaro ma oraha gea ka hiadono ma oraha naa naga abe ma ade-ade ihitulihuku masara ngone o Isiraele ma nyawa ka haniikohi ai pareta ma demo gea.

²⁶ De ahao o Dautu de ai nyawa mata-mata yomakiniiki yolio manga kapongo o Sikagika. De yolioino de ahao una wohikeregu ma parangi ma lolaku ma kiahonanga de wohidingoto ma regu gea o Yehuda ma nyawa manga dimono homoi-homoiika abe yomaketedodiawo de una. De nagali o Dautu ai demo ona homoi-homoiika abe imakiniiki de ma kiahonanga gea, abe una wato, “Naa to ngona ani hadia abe nengokadauino ngomi miagoraka Ma Jou o Yawe ai musu ma nyawaka de aino.”

^27-31 De ma hadia gea wohidingoto o dimo-dimonika abe o Betele ma kapongoka de abe o Ramoto ma kapongoka abe idateke dakuiye, de abe o Yatiroka de abe o Aroere ma kapongoka, de abe o Sifimotoka de o Esetemoaka de o Rakaloka. De nagali abe wohidingoto o dimo-dimonika o Yerameele ma kota-kotaka, de abe o Keni ma kota-kotaka de o Horamaka de o Borasanoka de o Atakoka de abe o Heboronoka. De naga o kapongo utuoli muruono naga abe o Dautu wohidingoto o hadia to onangoli manga dimo-dimonika.