1 Samuele 3 - Ma Jou ai Demo-demo o Totobelohoka

O Samuele ka o ngofakohi de Ma Jou womulaengoka womahingahu ai hininga unangika

¹ De ma oraha gea duru ka ma moi ma moi dika naga Ma Jou o Yawe ai hingahu abe wahidoaka ai nyawaika. De o himatoko Unangino enangoo duru ikuranga ai nyawa yamake. De naa ma titi o Samuele una ka o ngofakohi de o Eli wihiaturu de wihitararono abe hokokia wodiai la wileleani Ma Jou o Yawe.

² De ma oraha gea o Eli ai lako imulaenge ihomu-homu ho ko itararonokaua womahioriki. De o futu moiuku una womaiduoka to una ai kamaroka.

³ De ka ifufutuohi abe Ma Jou ai posi ko yahohonenguahi Ma Jou ai Tau o Ngoerino ma goronaka. De o Samuele unangoo womaidu abe ai ngi ko ikurutikaua de ma ngi abe genangoka Ma Jou ai Peti naga.

⁴ De itodokanino Ma Jou o Yawe wiahoko unangika wato, “Samuele, Ei, Samuele!”

⁵ De o Samuele womataiti womomiki de womapopaata o Eli ai kamarika de wotemo unangika, wato, “Ngohi naga! Ahi baluhu nohiahokino la ka idadi toniduhunu de o kia?” De o Eli womomiki de wipaluhu unangika wato, “Ngohi ko toniahokua, nolio nomaidu dika ani ngioka.” Hokogea o Eli wihuloko dika ho o Samuele wolio ai ngiika de womaiduokali.

⁶ De ahao Ma Jou o Yawe wiahokoli unangika wato, “Samuele!” De ma moioli o Samuele womataiti womomiki de womapopaatoli o Eli ai kamarika de ma moioli wotemo, wato, “Ngohi naga! Ahi baluhu nohiahokino la ka idadi toniduhunu de o kia?” De o Eli wipaluholi unangika wato, “Ahi ngofaka, ngohi ko toniahokua, nolio nomaidu dika ani ngioka.” Hokogea o Eli wihuloko dika ho naa o Samuele wolioli ai ngiika de womaiduokali.

⁷ De hokogea o Samuele wodiai mangale ko wohiorikuahi gea Ma Jou o Yawe abe wiahoko angamoi ko ma moiuahi naga Ma Jou o Yawe ai hingahu unangika.

⁸ Ho Ma Jou o Yawe wohigalioli o Samuele wiahoko de naa ma hangeou wiahoko. De ma moioli o Samuele womataiti womomiki de womapopaata o Eli ai kamarika de ma moioli wotemo imakadaene, wato, “Ngohi naga! Ahi baluhu nohiahokino la ka idadi toniduhunu de o kia?” De naa o Eli womafikiri marai gea Ma Jou o Yawe abe wiahoko o Samuelika.

⁹ Ho wihingahu unangika wato, “Ahi ngofaka, nolio nomaidu dika ani ngioka de nako ngona noihenoli womatengo woniahoko nopaluhu dika nato, ‘Ngona Ma Jou o Yawe toigo la nohitemo dika ngohino de ani gilaongo naa tonihigihene.’” Hokogea o Eli widotoko abe hokokia kiani wopaluhu de ahao o Samuele wolio ai ngiika.

¹⁰ De ahao naga ma himatoko abe hoka Ma Jou o Yawe womaokoino genangoka de o Samuele wiahokoli imaketero hoka kanganoli, wato, “Samuele, Samuele!” De o Samuele wopaluhu wato, “Ngona Ma Jou o Yawe nohitemo dika ngohino de ani gilaongo naa tonihigihene.”

¹¹ De ahao Ma Jou o Yawe wihingahu o Samuelika wato, “Abeika! Ngohi ko itedekanokaua de ahao todiai moi o Isiraele ma tonakoka abe ka de o nyawa yoihene ma ade-ade de ona duru ihidodokana.

¹² De abe ma wange gea adonoka idadi de mata-mata idadi imaketero abe ma dihira Ngohi tihingahuokau o Elika abe tihohowono. Abe ko unangua dika adaene masara ka hiadono ai ngofa-ngofakuku adaene ka hiadono to una ai tauikaoo tahohowono. Ho ma oraha ahi hohowono imulaenge de Ngohi tohigila-gila ka hiadono ma bahaika.

¹³ De Ngohi ma dihiraino o Eli tihitiariokau abe ahao Ngohi tahohowono una de ai ngofa-ngofakuku ma titi ai ngofa-ngofaka manga demo itorou Ngohino. O Eli wahioriki ai ngofaka yahinooto gea manga datoro ma dorou masara ko wadaerua hiadono manga toba ko iwa.

¹⁴ Ho Ngohi duru tagoungu tohibehehongo o Eli de ai ngofa-ngofakika abe ko iwa manga huhuba yakunu ihiofi manga howono ka hiadono ona yaomanga manga hohowono.” Hokogea Ma Jou o Yawe ai hingahu o ngofaka o Samuelika.

Ma Jou o Yawe ai hingahu ahao o Samuele wohidemo

¹⁵ De o Samuele womaiduokali ka hiadono o ngorumino. De ahao woleleani hoka ai biaha ho Ma Jou o Yawe ai tau ma ngorana wafelenga arihononga masara ko woikua o Elika angamoi wohawana wihingahu unangika ma himatoko ma hingahu abe o futuika wamake idadi.

¹⁶ Masara o Eli ahao o Samuele wiahokino ho woboaino de o Eli wato, “Ahi ngofaka o Samuele.” De o Samuele wopaluhu wato, “Ahi baluhu ngohi naga nenangoka.”

¹⁷ De o Eli wogahoko o Samuelika wato, “Ngohi togahoko la noade-ade ngohino abe o futuika Ma Jou wonihingahu ngonaika. De ma titi moioo de ufa nohihipongono ngohino abe kiani nohihingahu ani tobahioriki mata-mata abe namake Ma Jou ai hingahuino. De nako naga Ma Jou ai hingahu abe ko nohihingahua marai Ma Jou ahao ngonaoo wonihohowono utuohi ilamoko angamoi ena gea nagogono dika la hiadono ufa ngohi tohioriki.” Hokogea o Eli ai demo o Samuelika.

¹⁸ Ho o Samuele wiade-ade o Elika mata-mata gea abe Ma Jou o Yawe wihingahuoka de ma titi moioo de ko iwa abe ko wihingahua. De ahao o Eli woihene ibooto de wotemo wato, “Gea Ma Jou o Yawe ai hiaturu. Ho o kia dika Una wato itiai wodiai ngaro wodiai dika.”

¹⁹ De ipahaino o Samuele ai gurutiye ka idogohi ka hiadono wobaluhiye, de ka ihikaika Ma Jou o Yawe naga widuhunu unangika. Abe Ma Jou wohiaturu la to Una ai hingahu ma demo mata-mata abe o Samuele wohidemo ahao idadi duru imakadaene de abe wotemoka.

²⁰ Ho o Isiraele ma nyawa mata-mata yoihene ma titi o Samuele ngaro manga tonaka ma dobikoka abe o Daana ma kotaka ka hiadono o Bereseba ma kotaika abe naga manga tonaka ma dobikika. Ho ona iwihioriki o Samuele wagou-goungu abe una Ma Jou o Yawe ai uru ma dodofanga.

²¹ De Ma Jou o Yawe ka ihikaika womahimatoko o Samuelika o Silo ma kotaka abe genangoka ma dihira womahimatoko unangika. De ka ihikaika Ma Jou wihingahu ai demo o Samuelika ho ai tobahioriki ma titi Ma Jou ai hininga ka idogo-dogo ka hiadono o Samuele duru wihioriki Ma Jou ai hininga.