1 Samuele 29 - Ma Jou ai Demo-demo o Totobelohoka

O Pasala 29 ko atailakouahi O Filistina manga tentara ma hohidimono yoluku o Dautu ai duduhunu

¹ Ho o Filistina manga tentara yomatoomuino de yomahidiaioka o Afeke ma kapongoka. De o Isiraele manga tentara onangoli yomatoomuinoka o jobuubuoka gea abe imanoa o Yisereeloka.

² De o Filistina manga hohidimono yahikeregu manga tentara la o regu utu naga o nyawa yaratuhu moi de o regu utuoli naga yasana moi. Yomahiaturu hokogea de ahao yosobo yoaguru manga himangika la yoparangi. De nako o Dautu de ai nyawa, ona naga ma doomu mata-mata gea manga poretoka de yomakiniiki de o Filistina manga koano o Akisi.

³ Masara gea manga hohidimono yomalega onangika de ko yosanangiua, ho iwileha manga koanoika ato, “Ho done sarakia hiadono o Ibarani ma nyawa gea inanii-niiki?” De manga koano wapaluhu wato, “Naa una o Dautu abe ma dihiraino wodadi o Isiraele manga koano o Saulu ai hehebanga womatengo. Masara ipahaino de wiporete o Saulika de womahidogo ngohino la wohitobaduhu-duhunu. De naa duru ai dekana ngohioka hiadono o taongo muruono ipahaka, de ngaro ma dihiraino gea hiadono ma oraha naa masara ko ma moiuahi tamake ai howono.”

⁴ De ngaro hokogea manga koano ai demo masara ona duru yongamo ho ona iwitemo ato, “Kiani ngona nihuloko la o Dautu de ai nyawa yolio dika ma kotaika gea abe ma dihiraino nihidoaka unangika! De ufa hiadono una wonaniiki o parangioka, angamoi done ahao o parangi ma gogiriaka de ai hininga womaturuuru de wodadioka to ngone nanga musu? Abe nako hokogea ai datoro de ngoneoli wonaparangi de wonatoma, gea ahao una ka idadi duru wihisanangi ai koano o Saulika la ona yomakadameoli.

⁵ De ufa nawohanga abe ma dihiraino o Isiraele manga ngo-ngofeka yonyanyi ma titi o Dautu naa ma oraha yoselo, abe iwihigiriiri ato, ‘O Saulu wahohonenge nanga musu yasana, Masara o Dautu wahohonenge nanga musu yasana ngimoi yofoloi.’ Ho ngomi miato duru ko idadiua una naa wonanii-niiki!”

⁶ De ona yotemo ibooto ho manga koano wiahokino o Dautu de wihingahu unangika wato, “Ngohi ahi demoino naa de duru tagou-goungu Ma Jou o Yawe ai himangoka. Abe ngohi tonietongo o nyawa abe duru toningaku ngonaika, ho nako ngohi ahi hininga tosanangi dika la homakiniiki o parangioka. Angamoi ngaro ma dihiraino abe noboaino de nohinii-niiki de hiadono ma oraha naa masara ani howono moioo de ko tamakeuahi. Masara nako ahi tentara manga hohidimono, ona gea duru yoluku la ngona nominiiki ma oraha miparangi.

⁷ Ho naa tomagahoko la ngini ka nilio dika nia kapongika de ufa niaruwae ma hohidimono gea done inihihowono!”

⁸ Masara gea woihene de o Dautu wileha wato, “Ho naa done ahi soe eko ahi howono o kia ngonaika hiadono ngini nihiao itorou hokonaa? De adodoa ho ko idadiua tininiiki la homakutuono haparangi ti ngini nia musuika?”

⁹ De ahao o Akisi wotemoli unangika wato, “Iya, nako ngohi dika duru ko kia-kiaua ngonaka abe ani howono. Abe ngohi tonietongo ngade-ngade hoka Ma Jou ai malaekata womatengo. Masara gea ahi tentara manga hohidimono dika abe inioluku ato ko idadiua ngona nominiiki o parangioka.

¹⁰ Ho koaho itebini duru o ngoru-ngorumino abe ko itawangeuahi de ngini nimahidiai la nisobo. De ipaha ka de itawangeoka de ahao ngona de ani nyawa mata-mata nisobo nilio nia dumutika.”

¹¹ Ho ma dawangeino duru o ngoru-ngorumino o Dautu de ai nyawa yomomiki de yosobo yolioli o Filistina manga tonakika. Masara o Filistina manga tentara ona yomakiniiki yoiki o Yisereelika la yomaketeparangi de o Isiraele ma nyawa.