1 Samuele 28 - Ma Jou ai Demo-demo o Totobelohoka

O Pasala 28 ko atailakouahi O Saulu de o ngofeka abe ka idadi momaketemo de o hone-honenge ma nyawaika

¹ De ma oraha gea o Filistina ma nyawa yomahidiai la yomaketeparangioli de o Isiraele ma nyawaika. Ho ma koano o Akisi una wiahoko o Dautu de wihingahu wato, “Ngona de ani tentara ma nyawa kiani nihiniiki de homakutuono hoiki la haparangi ahi musuika.”

² De o Dautu wipaluhu wato, “Ka idadi ngomi miniduhunu! De genangino ahao ngona ma hirete nomimake de nomihioriki ma titi to ngomi mia hiakunu o parangi ma goronaka.” De ahao o Akisi witemo wato, “Gea irahai, de marai ngohi ahao ka idadi tonihidadi ahi hehebanga la ngona ka ihikaika naga duru ahi datekoka nohigoa-goana.”

³ De marai ma oraha gea o Isiraele ma tonakoka de o Samuele una wopahaka, ho o Isiraele ma nyawa mata-mata duru kahumutaigarika manga dekana. De una gea iwilungunu o Rama ma kotaka angamoi gea to una ai kota. De abe ma dihiraino o Saulu una wodiaioka o pareta moi de genangino wahuloko ai kokawaaha mata-mataika wato duru ko idadiokaua o nyawa yahoko de yomakoketemo de o hone-honenge ma nyawaika. Ho onagona dika abe naga manga hiakunu gea kiani yohupu o Isiraele ma tonakoka de yaika ma homoaika.

⁴ Ho ipahaino o Filistina manga tentara ma nyawa yomahidiaioka de ahao yoboaino de yomahidodogumu o Suneme ma kotaka. De doka manga daanoka de o Isiraele manga tentara ma nyawa yomatoomuino o Giliboaka.

⁵ Masara abe ma oraha o Saulu womalega dokaika de wamake o Filistina ma nyawa gea duru ko manga ngoe ho duru wohawanokaholi.

⁶ Ho o Saulu wileha Ma Jou o Yaweika wato, “Done hokokia koaho ngohi todiai?” De ngaro hokogea wileha masara Ma Jou duru ko wipalu-paluhua o Saulika. Abe ko wohidoakua o himatoko o nyawaika la genangino de o Saulu ka idadi wohioriki ai hininga. De ngaro Ma Jou ai uru ma dodofanga o Saulu ai leleha gea iwidofanga Unangika masara ko wopaluhua. De ngaro manga hidemo ma nyawa una waumo o Urimi de o Tumimi gea la genangino de ka idadi ihioriki Ma Jou ai hininga abe koaho hokokia o Saulu wodiai masara genangoo de Ma Jou ko wopaluhua ai leleha.

⁷ Ho ma bahauku de o Saulu wahuloko ai duduhunu ma nyawaika wato, “Ngini kiani nialingirohi o nyawaka la nimimake momatengo abe muna hoka o hone-honenge ma nyawa manga baluhu. Abe muna gea kiani naga ami hiakunu la yomakoketemo de o hone-honenge ma nyawa. Angamoi ngohi toigo toiki munangika de tomileha koaho hokokia todiai ma titi o Filistina ma tentara gea.” Hokogea o Saulu ai huhuloko ma demo onangika de ahao ona iwipaluhu ato, “Mia koano, naga momatengo o hone-honenge ma nyawa manga baluhu o Enedoro ma kapongoka.”

⁸ De manga demo gea woihene ipaha de ahao o Saulu womaturuuru abe womahinoauku de o baju biaha dika la ufa o nyawa iwihioriki abe una manga koano. Womaturuuru ibooto de ipaha o fufutuoka una de ai nyawa yahinooto yosobo yoiki ma ngofeka gea ami tauika. De yomahiadono ami tauika de o Saulu womahingahu munangika wato “Ngohi naga ahi perelu womatengoika abe wopahaka, ho kiani mimaketemo de una. Ho ka idadi ngona niahoko ai womaha naangiye la ngohi de una mimaketemo?”

⁹ Masara ma ngofeka gea duru moheranga de mipaluhu o Saulika mato, “Ho naa done sarakia? Marai ngonaoo nohioriki ma titi nanga koano o Saulu ai pareta ma demo abe wato onagona dika naga manga hiakunu la yomakoketemo de o hone-honenge ma nyawa manga womaha ona gea kiani yohupu ma tonakoka naa de yaika ma homoaika. Ho gea hiadono ngohi tato bote ngona naa nohitaili nohihihowono hiadono ihitaokino de ihihohonenge! Ho done ma titi o kia noigo nohihidilikoino ahi howono ma gogiriaka?”

¹⁰ Masara o Saulu duru womahikoboto munangika de Ma Jou ai romanga wato, “Koua, duru hokogenangua ahi hininga! Abe ngohi naa tofetongo Ma Jou o Yawe ai romanga tato nako ngona nohiduhunu de o hohowono duru ko inidaenua!”

¹¹ De ahao muna motemo mato, “Ho to onaguna ai womaha tiahoko naangiye la ngini nimaketemo?” De una wato, “Kiani niahoko o Samuele.”

¹² Ho muna miahoko imaketero hoka o Saulu ai gogahoko de o Samuele ai womaha iboaiye onangiye. Masara ma oraha muna mimake o Samuele gea de duru mohawanoka de mopoakiye o Saulika mato, “Ngona naa boteua o Saulu, ho nohibudioka la ka idadi nohipoha de o hone-honenge ma hohowono ngohiuku!”

¹³ De gea ma koano wato, “Koua, ufa nohawana! Nohihingahu dika abe o kia ngona namake.” De muna mopaluhu mato, “Ngohi timake womatengo wodoa dau ma tonakoka de waiye abe ai rupa hoka o jouoli!”

¹⁴ De o Saulu womilehali wato, “Ho nako ngona duru nomalega unangika de hokokia to una ai rupa?” De gea muna mopaluhu mato, “Una gea abe woboaiye marai o nauru abe iwiperekioka, de una womahikorobiti de o baju ma guru-gurutuku!” Ami demo gea o Saulu woihene de ahao una duru wohioriki abe una gea wagou-goungu o Samuele. Ho una womaponuku ka hiadono ai pea itiki ma tonakuku la womahimatoko ai horomati o Samuelika.

¹⁵ De gea o Samuele wotemo o Saulika wato, “Ho naa done ma titi o kia ngona nohiruwae de nohiahoko la toboaino?” De o Saulu wipaluhu wato, “Ngohi naa duru tokangelaka ho ahi hininga duru ihuha, angamoi o Filistina ma nyawa yoboaino la imiparangi ngomino. De ahao ngohi tileha Ma Jouika la ka idadi tohioriki to Una ai hininga, masara Una gea duru ko wohipaluhua. Abe ko wohidoakua o himatoko o nyawaika la genangino de ngohi ka idadi tohioriki ai hininga. De ngaro ma oraha Ma Jou ai uru ma dodofanga ahi leleha gea iwidofanga Unangika masara ko wopaluhua. Ho gea ma titi hiadono naa toniahokino, la ka idadi ngona nohihingahu koaho hokokia todiai.”

¹⁶ De ahao o Samuele wopaluhu wato, “Masara Ma Jou o Yawe woniporetoka ho ngona de Una nimakumusuoka, ho gea done sarakia ngohi naa ka idadi toniduhunu? Ko takunua!

¹⁷ De to Una ai datoro ngonaika duru imakadaene de ai demo ma dihiraino abe to ngohi ahi uruino tonidofanga. Angamoi gea Una wato wonihiguti la ibootohi ngona nahikoano o nyawaika. De hongoli wato wonihiguti ipaha de ahao wigoraka ani gianongoru womatengoli la wonituruuru, abe gea ma titi o Dautu, la unangoli wodadi wokoano.

¹⁸ Angamoi ngona naa ko nohingounua Ma Jou o Yawe ai huhuloko ma demo abe wato kiani nohidagi to Una ai ngamo duru ihauku o Amaleke ma nyawaika. Ho mangale ma titi ona gea ko nahibinaahaua hiadono o wange naa Una wonihohowono hokonaa.

¹⁹ De hongoli Una ko itedekanuahi de winihidoaka ngona de o Isiraele manga tentara ma nyawa o Filistina ma nyawa manga giamika. Abe itebini dika de Una wohiaturu la ona inihikala ngini mata-mataika, de ngona de ani ngofa-ngofaka nihonenge de ahao niboa naangino la ngone homahingi moioka dika.

²⁰ De o Samuele ai demo gea o Saulu woihene ipahaino de duru iwitomomonoka ho ka womahitudukuku ma tonakuku. De ma wange gea una duru ko kia-kiaua wolomo ho duru iwihafini hiadono ai badanga ilamaanoka.

²¹ De ma ngofeka gea momalega unangika de mimake abe duru iwitomomonoka, de ahao mitemo unangika mato, “Ahi baluhu, kangano ma oraha ngona nohihuloko la tiahoko o Samuele gea de tomatemo tato marai o hohowono ma dubuho ihidaene ma titi ahi datoro gea. De ngaro hokogea tomahitiari masara naga ahi hingounu ngonaika de ka uku dika tiahoko una gea ai womaha.

²² Ho mangale ma titi ahi hingounu ngonaika hiadono naa tomagahoko la ngona nohihigihene ahi demoino. Abe ngohi duru tonihigaro la ngona o inomo naolomo, iti ma hohutulu dika, la genangino inihiwangoro de inihiputurungokali. De naolomo ipaha de ahao naga ani buturungu la ka idadi nolioika ani dumutika.”

²³ Masara gea o Saulu ka woluku dika wolomo. De ahao to una ai nyawa yahinooto abe iwitobanii-niiki onangoo duru iwihigaro unangika, de ma bahauku de wahigihene manga demoika. Ho una ma tonakoka de womaokoiye de ahao wogogeruku o kuruhiioka abe naga genangoka.

²⁴ De ma oraha gea ma ngofeka ami tauoka naga ami hapi o dutu moi abe duru ikutufuru. Ho muna momataiti maluiti ma hapi gea la ka idadi mahakai. De nagali ami tarigu, ho male genangino de mohidoojo de ahao maharongo la naga o roti abe ko iwa ma ragi.

²⁵ Ho ma roti de ma hapi ma roehe gea mahidoaka o Saulu de ai duduhunika, de ona yaolomo. De yolomo ibooto de ipahaino yofutuoka de ahao ami tauoka de ona yosobo.