1 Samuele 27 - Ma Jou ai Demo-demo o Totobelohoka

O Pasala 27 ko atailakouahi O Dautu womanoa o Filistina ma nyawa manga tonakoka

¹ De ipahaino de o Dautu womatemo wato, “Marai nagahi o Saulu ai hiningaka abe wohihidee ngohino wato wohitoma. Ho koaho ngohi toara o Filistina ma nyawa manga tonakika la tomanoa genangokahi. De ahao ngaro o Saulu wohilingi-lingiri ai dekana o Isiraele ma tonakoka masara ko wakunua wohimake, de ika-ika ahao womatogumu dika wohilingiri.”

² Ho womatemo ipahaino de wahokino ai nyawa abe yaratuhu butaanga. De ahao ona mata-mata de manga tau homoi-homoi ona yomakokutuono yoiki o Gaata ma kotaika abe genangoka manga koano ai romanga o Akisi. De o Akisi una gea o Maoko ai ngofaka.

³ De nagali o Dautu ngoi fekata yahinooto de de una, abe o ngo Ahinoama de o ngo Abi o Nabala ngoi bao. Ho ona mata-mata yomanoa o Gaata ma kotaka.

⁴ De ipahaino abe ma oraha o Saulu woihenino ma titi o Dautu woara de womanoa o Gaatoka de womputuhu wato ko wilingirokauali o Dautu.

⁵ De ipaha o wange moiuku o Dautu womagahoko ma koano o Akisika wato, “Iti ngona o koano nohisanangi ngohino de tomagahoko la ngohi de ahi nyawa nomihigunoa migogere o kapongo moioka abe o homoa ma tonakoka. Angamoi koaho ngaro ufa dika de ngomi mata-mata migogere to ngona o koano ani kotaka naa, done miniruwae dika ma titi mia ngoe.”

⁶ De ma koano wosanangi de o Dautu ai gogahoko ho ma wange gea dika de wahidoaka onangika o Sikaga ma kapongo la yomanoa genangoka. De ma oraha gea ka hiadono ma oraha abe ma ade-ade naa ihitulihuku de o Sikaga ma kapongo gea ka ihikaika o Yehuda ma nyawa manga kokoano yahikoano enangika.

⁷ Ho o Dautu ona manga dekana abe yomanoa o Filistina ma nyawa manga tonakoka gea manga taongo moi de manga mede iata ma dekanino.

⁸ De abe ma oraha yomanoa genangoka de o Dautu de ai tentara ma nyawa ka ihikaika yoiki yabaata manga musuika. Abe yabaata o Gesuru ma nyawaika de o Girisi ma nyawaika de o Amaleke ma nyawaika. De manga musu gea duru ma deka-dekanoka ona yogogere ma tonakoka gea, abe manga tonaka ma batingi gea o Suruoka ka hiadono o Mesiiri ma tonaka ma batingika.

⁹ De abe manga dodagi ma getongo abe yabaata manga musuika de ma nyawa gea duru yahibinaaha mata-mataika la ngaro o nauru de ngaro o ngofeka masara ona yokokihonengoka. De abe manga musu manga pakeanga de manga aewani ma duduono gea mata-mata yale de yomahitoona dika. Ho manga domba de manga hapi de manga keledai de manga unta, gea mata-mata yataokino de yao manga kapongika. De gea yolioika de ahao o Dautu woiki la una de ma koano o Akisi yomarihimanga.

¹⁰ De gea yomarihimanga de o Akisi ma moi ma moi wileha o Dautika wato, “Ho ngini kangano o kiaika niloiki, de onagonaika niabaata?” De gea o Dautu wipaluhu wato, “Marai miabaata onangika abe manga gogere dakuiye.” Abe ma titi ma moi o Dautu wihingahu abe yabaata o Yehuda ma nyawaika abe dakuiye yogogere, de ma moioli una wato yabaata daku o Yerameele ma nyawaika, de nagahi ma moioli abe wato yabaata daku o Keni ma nyawaikali. De ma nyawa gea abe wafeto-fetongo ona mata-mata tanu o Isiraeloka ma nyawa! Hokogea o Dautu ai hingahu ma demo o Akisika.

¹¹ De gea ma oraha ma getongo abe o Dautu de ai nyawa yabaata manga musuika de duru ko moi-moiokaua o nyawa gea manga hou angamoi yakokihohonengoka. Ho ko iwa o nyawa abe wataokino dika de wao manga ngango ma oraha yolio o Gaata ma kotaika. Angamoi o Dautu womahitiari ai hiningaka wato, “Done ahao naga abe ihikalaki o Akisika de una wohioriki ma gou-goungu abe o kiaka tatobabaata ahi musuika!” De hokogea ihigali-galioli idadi abe ma oraha o Dautu womanoahi o Filistina ma nyawa manga tonakoka gea.

¹² Ho ma koano o Akisi una wingaku o Dautika de wato bote una wabaata de wahohonenge to una ma hirete ai nyawaika! Ho ma koano womatemo ai hiningaka wato, “Maraioka o Isiraele ma nyawa duru iwidohata o Dautika ma titi ai doma gea. De gea irahai, angamoi naa bote una kiani womanoahi ahi tonakoka dika ho ka ihikaika una ka idadi wohileleani ngohi!”