1 Samuele 26 - Ma Jou ai Demo-demo o Totobelohoka

O Pasala 26 ko atailakouahi O Dautu ai dora ma hiokoo wohimatoko ma moioli o Saulika

¹ De ipahaino ma moiuku naga o Sifi ma nyawa yamuruono naga yoboa o Gibeaino la yomaketemo de manga koano o Saulu. De ona yoboa ma koano ai himangino de iwihingahu unangika ato, “Marai o Dautu wiwihioriki ai ngi, angamoi una womagogono o Hakila ma lokuoka abe ko ikurutikaua de o tonaka ma kakaaha abe o Yudea ma tonakoka.

² Ho manga hingahu gea o Saulu woihene ipaha de ahao wahoko ai tentara ma nyawa yasana hange abe duru yososawaro yoparangi. Wahokino de ahao wahihira-hira la yomakiniiki iwilingiri o Dautu o Sifi ma tonaka ma kakaahaka.

³ De ipahaino yomahiadono o Hakila ma loku ma datekika ho yomahidodogumu o ngekomo ma datekoka. De gea o Dautu woihenino abe o Saulu de ai nyawa yoboaka iwilingiri ma tonaka ma kakaahaka gea.

⁴ Ho una wahidingoto ai nyawa yamuruono naga la yomatohiki yoiki de yatailako o Saulu de ai nyawa manga dodogumu ma ngi. Angamoi o Dautu woigo wohioriki duru itararono abe ma titi manga boa. De ona yamake o Saulu ai nyawa de ahao iwigilio unangika de iwihingahu abe ona yagoungu yoboaka.

⁵ De ahao o Dautu de ai nyawa yamuruono naga yosobo yomatohiki o Saulu ai dodogumu ma ngiika. De o Sauloka nagaoo o Abanera abe una ai tentara manga hidimono duru wokokurutiye. De o Abanera gea ai baba o Nere. De ona yahinooto yakiookoka manga dodogumu duru ma gogoronaka, de naga manga tentara ma nyawa manga ngoe abe yahigororomino la yagoa-goana ona yahinooto, de onangoo mata-mata yomaiduoka.

⁶ De o Dautu womalega o Saulu ai ngingiduika de ahao waleha ai nyawa yahinooto abe yomakiniiki de una. Abe ona yahinooto gea naga o Ahimeleke abe o Hete ma nyawa de nagali o Abisai abe una o ngo Seruya ami ngofaka de o Yoaba ai dodoto. Ho o Dautu waleha ona yahinootoika wato, “Onagona yosanangi dika ihiniiki la homakutuono hangohama manga dodogumu ma ngi gea ma goronaika?” De gea o Abisai wipaluhu unangika wato, “Ngohi ka tomodeke toniniiki dokaika.”

⁷ Ho ma futu gea dika de ona yahinooto yomatohiki yowohama ma dodogumu gea ma gogoronaika de iwimake o Saulu iwikiooko genangoka. De nagali o Abanera de ma tentara ma nyawa utuoli manga ngoe abe yahigororomino manga koano, masara onangoo yakokikiookoka. De kanganohi o Saulu wohibeloho ai kuama ma tonakuku, ho gea naga imaokoino duru ai pea ma datekoka.

⁸ De o Abisai wamake ma kuama hokogea de wihihudu-hudu o Dautika wato, “Abeika! Gea duru itararono abe adonoka ma oraha Ma Jou wihidoaka ani musu gea ani giama ma hoatika! Ho irahai la ngohi tihidutudukuku ma tonakuku de ai kuama gea la totengouku dika de una wohonengoka. Ngaro ufa dika de tituduku ma hinootoika!”

⁹ Masara o Dautu duru woluku ai hidee gea ho witemo wato, “Ngone duru ko idadiua hihohonenge! Angamoi Ma Jou o Yawe wigorakoka de wihidadi o koano. Ho nako hiadono o nyawa iwitoma de ahao nanga Jou kiani wahohowono onangika gea!

¹⁰ Koaho hihigunoaika dika, angamoi duru tohioriki de tonganono ahao naga ma oraha abe Ma Jou o Yawe Una ma hirete wihibobaha o Saulu, eko marai wohonenge ma titi iwiperekiokaholi, eko o parangi ma gogiriaka de iwitoma.

¹¹ Masara nako ngohi naa duru toluku tihohonenge unangika. Angamoi Ma Jou o Yawe wiirikoka de wigoraka la wahikoano ai nyawa, ho done sarakia ngohi naa ka idadi tihohonenge? Ko idadiua! Masara abeika hagoraka dika to una ai kuama gea de ai akere ma boto abe ai pea ma datekoka, de ahao homataiti holio dokaika!”

¹² De yomaketemo ibooto de ahao o Dautu wagoraka ma kuama de ma boto abe o Saulu ai pea ma datekoka de ka yosobo. De ona yahinooto ka idadi yohupu ma tentara gea ma dodogumu ma ngioka de yaika de ko moi-moiua yahioriki eko yomamaoino. Angamoi Ma Jou o Yawe wokarajaanga manga badanga homoi-homoioka la duru yakokikiookoka.

¹³ Ho o Dautu de o Abisai yohupuikaka de ahao yodoa o lokuiye abe ma dodogumu ma ngi ma daanoka, ho yomakitingaka hatoli ma gurutika.

¹⁴ De genangoka o Dautu wopoaka la ai ilingi igiranguku o Abanera de ai tentarauku wato, “O Abanera, ka idadi ahi ilingi noihene? Ngona nomomikoka eko kowahi?” De ahao o Abanera wopaluhu wato, “Ho ngona naa onaguna abe noaho-ahoko hokonaa?”

¹⁵ De o Dautu wotemoli wato, “Abeika, ngohi tato bote ngona duru notobanauru dika! Abe o nyawa ato bari nako o Isiraele ma nyawa mata-mataika de ka ngonahi duru ani buturungu ilamoko. Ho nako ngona nagou-goungu nojago hokogea, done sarakia hiadono ani koano ko nigoanua ma oraha o nyawa iwihidee unangika de yomahitigi la ato iwitoma?

¹⁶ Ngona ani tagongo gea marai nao duru ko irahaiua, e? Ho ngohi ahi demo naa duru tagou-goungu, abe Ma Jou o Yawe ai himangoka de ngohi tato ngona de ani nyawa koaho inihohonenge dika ma titi ko nigoanua nia baluhu de nia koano, una abe Ma Jou wigoraka la winihikoano nginika! De naa abeika ngona nomalega arihonongaika. O kiaikaka ani koano ai kuama de ai akere ma boto abe kanganoino naga duru ai pea ma datekoka?” Hokogea o Dautu ai demo o Abanerika.

¹⁷ De ai demo gea woihene de ahao o Saulu wohioriki ai ilingi ho wotemo waamokiye wato, “Ngona gea bote ahi ngofaka o Dautu, eko sarakia?” De gea wipaluhu wato, “Ahi koano, ngona nagoungu. Ngohi naa ani duduhunu o Dautu.

¹⁸ Ho naa tonileha dika ngonaika, ma titi o kia hiadono ngona ahi baluhu ka ihikaika nohinii-niiki? De done ahi howono o kia naga ngohioka?

¹⁹ De naa ngohi togahoko la ngona ahi koano nototoihenohi ahi demoino. Abe nako Ma Jou o Yawe wagou-goungu wokarajaanga ani hiningaka la wato ngona nohihohonenge, gea de ahao ngohi tonganono ka idadi o huhuba moi tomahihuba Unangika la Una de ngohi mimahikadameokali. Masara nako hoka o nyawaino dika ma titi hiadono ngona nohihidee nato nohitoma, gea de ahao ngohi tonganono la Una ma hirete wahohowono de wahohonenge onangika. Angamoi ona gea ihikiniiki ngohi naa hiadono kiani tanoaika ma tonaka abe nanga Jou wonahidoakoka ngone ai nyawaino, de gea imaketero hoka ona ihihuloko ato, ‘Ngona nohupu dika ma homoaika de nomahuba-huba o homoa ma nyawa manga jou-jouika!’

²⁰ Ho naa ahi koano tonileha, done sarakia ma titi hiadono ngohi kiani ahi awunu ikopoa o homoa ma tonakuku? Gea duru ko itiaiua! Koaho irahai ngohi tohonenge duru Ma Jou o Yawe ai himangoka, abe ma titi to ngone nanga tonakoka! De adodoa ho ngona ahi koano abe ani gogere duru ikokurutiye de nohilingiri ngohi naa abe ko kia-kiaua ihidaene? Abe ngohi naa tomaketero hoka o giliili dika ho done ma titi o kia nohilingi-lingiri? De ngohi hoka o totaleo abe o nyawa yokangela yataokino, ho done o kia ma titi ngona ka ihikaika nohinii-niiki o loku-lokuoka naa?”

²¹ De o Dautu ai demo gea woihene ipaha de ahao o Saulu wotemo wato, “Marai ngohi naa tahowonoka. Ho naa togahoko la ngona ahi ngofaka o Dautu nolioino dika, de ngohi ko tonihikangelakaua. Angamoi o wange naa tamakeoka ani dora ma hiokoo ngohino. Abe kanganoino gea de tanu ka idadi nohitoma masara hokogenangua ani datoro. Ho naa itararono abe ma dihiraino de ahi hiningaka tolilifangoka hiadono ahi datoro ngonaika duru itorou. De ma oraha naa duru tomatoduba ma titi ahi hininga gea.”

²² Ho o Dautu wipaluhu unangika wato, “Ahi koano, naga ahi giamoka naa to ngona ani kuama! Ho abeika ani duduhunu womatengo nihuloko la woboaino de wale.

²³ De abe ma titi ngone o nyawa nako nanga datoro itotiai de hitobagou-goungu Ma Jou o Yaweika, gea de ahao Una wonahibalaha de ma rorahai ngoneino. De igoungu kangano Una wonihidoaka ngona to ngohi ahi giamino masara ngohi ka toluku todiai itorou ngonaika, angamoi tohioriki abe Ma Jou wonigoraka ngona la nodadi nanga koano.

²⁴ De mangale ma titi kanganoino de ngona ani wowango togoana hiadono ko tonihikangelaua, ho ngohi tonganono la Ma Jou o Yawe Unangoli ka idadi wohigoana to ngohi ahi wowango. De ngaro o kangela o kia dika taohana ahi wowangoka masara tonganono la Una dika wohiduhunu de wohihupu genangino.”

²⁵ De o Dautu wotemo ibooto de o Dautu wotemoli unangika wato, “Ahi ngofaka o Dautu, ngohi tonigahoko la nanga Jou o Yawe duru wonihiowa ngonaika! La ngona ahao ani wowangoino de ani datoro mata-mata duru de ma utumoka!” De ona yomakoketemo ipaha de ahao o Dautu wosobo, de o Saulu una ka wolio dika to una ai tauika.